Ẹsuta 5 - BAYỊBURU Ẹzaa

Ẹsuta jekfuru eze aryọ

¹ O rwulewho l'abalị ẹto, whẹ l'aswị ẹgu ono, Ẹsuta chịta uwe eze-nwanyị iya yee, o je akfụru l'ogboduwhu ibe eze nke ime ime l'atatiwhu ụlo ẹka oshi-eze nọ. Eze nọduwho l'oshi-eze iya chebe iwhu l'ụzo ọnuzo.

² Ọ bya atụfu ẹnya whụ eze-nwanyị ono, bụ Ẹsuta g'ọ kfụru l'ọma ogboduwhu ono, ọ tụbalekwa iya whọ l'ẹnya. Eze bya machịaru iya mgbọro mkpọla-ododo, ọ pa l'ẹka. Ẹsuta jekube iya ntse je akpaa ẹka l'ishishi mgbọro ono.

³ Eze jị iya sụ: “Eze-nwanyị Ẹsuta, ?ọo gụnu bẹ l'ee-meru ghu? O behuduru ọ bụru tẹ mu kee alị-eze mu ẹbo nụ ghu uzhi lanụ bẹ mu l'e-meru ghu iya.”

⁴ Ẹsuta sụ iya: “Ọ -bụru l'ọ dụ eze ree, tẹ gụbe eze gụ lẹ Hemanu lịnuru byarụ mu lẹ nri ntanụ-a, t'unu bya eria nri, mu shiru gụbe eze.”

⁵ Eze zhia ozhi sụ t'onye ya bya l'awhụ bụkwaru Hemanu, nke ọwhu whẹ l'iya l'e-je aza Ẹsuta oku. Ọo ya bụ, eze yẹle Hemanu jeshia lẹ nri ono, o kuru whẹ.

⁶ Whẹ ngụnyaa mmẹe eze jịa Ẹsuta sụ: “?Ọo gụnu bụ mkpa ghu tẹ mu gbooru ghu iya? ?Ọo gụnu b'ọ dụ ghu tẹ mu meeru ghu? O behuduru ọ bụru tẹ mu kee alị-eze mu ẹbo nụ ghu uzhi lanụ bẹ mu l'e-meru ghu iya.”

⁷ Ẹsuta sụ: “Iwhe bụ mkpa mu, bụru iwhe ọ dụ mu t'e meeru mu bụ:

⁸ Ọ -bụru lẹ mu dụ gụbe eze l'obu, tẹmenu ọ dụ gụbe eze ree t'i meeru mu iwhe mu l'aryọ ghu, ọo ya bụ tẹ gụbe eze gụ lẹ Hemanu bya lẹ nri, mu l'e-shiru unu echile. Echile ono bẹ mu l'e-ye ọnu l'ajị ono, gụbe eze jịru mu.”

Hemanu l'achị idzu tẹ ya gbua Mọdekayi

⁹ Mbọku ono bẹ Hemanu gude ẹhu-ụtso yẹle ẹswa jiru iya obu ala. Obenu lẹ nteke ọ whụru Mọdekayi l'ọnoguzo ibe eze, bya awhụa l'ọ tọ gbeshiduru iya agbeshi, to goshi l'ọokwabe iya ugvu, oke iwe ji Hemanu obu l'ẹka Mọdekayi nọ.

¹⁰ Hemanu jishia ike kpaa onwiya sede lashia ibe iya. Ọ lwarwua bya ezhia t'e je ekuaru iya ndu ọnya iya whẹ mẹe nyee ya bụ Zẹreshi.

¹¹ Ọ bya awata oto ọnu kọlahaaru whẹ gẹ ya nweberu iwhe mẹe gẹ ya nwụ-beru ụnwu l'igwe mẹe g'eze gude vulibe iya l'ọkwa, shi nno kwabẹ iya ugvu, ha shii, bya emee tẹ ya bụru onye kagezhia shii lẹ ndu, eze meru ishi mẹe ndu l'ejeru eze ozhi.

¹² Ọ sụ: “Ọ tọ dụdu onye ọdo, eze-nwanyị, bụ Ẹsuta kweru t'o tsoru eze bya lẹ nri, o shiru, gbahaa mbẹdua kpụ. Echile ọwa, dụ ẹgube-ẹ b'o kukwaru mu whọ lẹ nri ọdo mu l'eze.

¹³ Ọle iwhe lile ono ta adụdu iwhe ọ bụ mu jeye mu awhụ-beru onye Ju whọ, bụ Mọdekayi l'ọnoguzo ibe eze.”

¹⁴ O noo ya, Zẹreshi, bụ nyee ya mẹe ndu ọnya iya whẹ ono gẹ whẹ ha sụ iya: “Zhia t'e je arwụtaru ghu oswebe, l'aaswị-gbuje madzụ, t'a rwụa ya t'ọ dụ nji-ẹka ụkporo ugbo labọ l'iri l'eli. O -be l'ụtsu echile gụ ekfuru eze t'a kpụta Mọdekayi je aswị-gbua l'eli oswebe ono. Ọo ya bụ, gụ egude ẹhu-ụtso tsoru eze jeshia lẹ nri ọbu e kuru unu.” Idzu ono dụ Hemanu ree shii, o zhia ndu je arwụta oswebe ono, l'aaswị-gbuje madzụ dobe.