Ẹsuta 4 - BAYỊBURU Ẹzaa

Mọdekayi l'ekfuru Ẹsuta t'o yeru whẹ ẹka

¹ Nteke Mọdekayi bya amarụ iwhe l'anwụ nụ, ọ lajashịa uwe iya chịta uwe áwhụ yee, kpota ntụ wụa onwiya, lụfu ọma mkpụkpu echi mkpu ẹkwa, atsọ gbụdagbuda.

² O jetabe rwua ọnoguzo ibe eze, ọ kfụru, o noo nkele ọ tọ dụdu onye yeru uwe áwhụ, l'eekweje t'ọ bata.

³ Obodo ọbule, o rwuru, mbụ ẹkwo ono, e deru iwu whọ, eze tụru bẹ áwhụ l'atsọjeru ndu Ju bu iya nụ. Whẹ awata ọswi ẹgu, agụ áwhụ, arya ẹkwa. Igweligwe l'eyeje uwe áwhụ gwọru lẹ ntụ.

⁴ Ọo ya bụ, ụnwumgboko mẹe unwoke, a harụ aháhá, l'ejeru Ẹsuta ozhi bya edooru iya nke Mọdekayi ono, iwhe ono tsụa ya l'anụ shii. Ọ chịta uwe chẹe t'a chijeru Mọdekayi t'o yee, yefu uwe áwhụ ono. Ọle Mọdekayi bẹ jịkaru iya anata.

⁵ Ẹsuta bya ekua Hataku, bụ onye a harụ aháhá l'ejeru eze ozhi, mbụ onye e yeru t'o jejeru yẹbe Ẹsuta ozhi. O zhia ya t'o je amarụ iwhe l'anwụru Mọdekayi mẹe iwhe kpatarụ g'o gude l'ọ nwụru iya nno.

⁶ Tọ dụ iya bụ, Hataku bya ejekfu Mọdekayi l'ẹka ọ nọdu lẹ nggamgbo mkpụkpu ono, dụ lẹ nhamụnha ọnoguzo ibe eze.

⁷ Mọdekayi kọkotaru iya iwhe lile nwụru iya nụ, bya akọoru iya igbudu okpoga, Hemanu kweru ụkwa lẹ ya l'a-nụ t'e ye l'ụlo-ẹku eze, nke ọwhu l'oo-kwe t'e gbushia ndu Ju.

⁸ O wota ẹkwo, e deru iwu whọ, eze tụru sụ t'e gbushia ndu Ju, mbụ ẹkwo ono eze nọdu lẹ mkpụkpu Susa dee keshia, o woru yẹbe ẹkwo nụ Hataku t'o goshi Ẹsuta, ya akọwaaru iya ọnodu t'o doo ya ẹnya. Ọ sụkwawho t'e zhia Ẹsuta t'o jekfu eze je aryọo ya t'ọ whụaru ndu Ju imiko.

⁹ Hataku dawhu azụ je akọoru Ẹsuta iwhe Mọdekayi kfuru iya.

¹⁰ Ẹsuta zhiwhu iya ozhi azụ t'o je ezhia Mọdekayi sụ iya:

¹¹ “Iwhe bụ ndu ozhi eze je akpaa lẹ ndu lile, bu l'obodo, dụkota l'alị-eze iya g'ọ ha, bẹ makọtaru l'o to nwedu nwoke m'ọ bụ nwanyị bya l'atụgburu jekfu eze nteke ọ nọ l'ogboduwhu ibe-eze nke ime ime m'ọ bụa yẹbe eze l'onwiya bẹ kuru onye ọbu eku. Onye tụru iya ama bẹ iwu sụru t'e gbua onye ọbu egbu, gbahaa l'onye ọbu bẹ eze tụru obu iya ama machịaru mgbọro mkpọla-ododo iya, shi nno sụ t'ọ nọdu ndzụ. Eshi ụkporo abalị l'abalị iri ntaa bẹ eze l'eteke ekukwaa mu tẹ mu bya.”

¹² A bya ezhia Mọdekayi ozhi Ẹsuta zhiru,

¹³ o zhiwhu ozhi azụ t'e je ezhia Ẹsuta lẹ ya sụru agha: “Ba arịnuwho l'eshi ọwhu ị nọwaa l'ibe eze bẹ bụ gụbedua bụ onye Ju l'a-wafụ nwẹkiya.

¹⁴ Nkele ọ -bụru l'ị nọdu nggujingguji ntaa, t'i ye ọnu, bẹ l'ee-shikwa l'ụzo ọdo dzọfuta ndu Ju. Ọle gụbedua mẹe ndibe nna ghu l'a-bụru kpurupyata. ?Oo onye marụ mẹ iwhe meru g'o gude e mee ghu ị nọdu l'ọkwa eze-nwanyị bụ ndụge i yeta ẹka l'iwhe l'anwụ ntaa?”

¹⁵ Ẹsuta zhiwhukwa ozhi azụ t'e je ezhia Mọdekayi sụ iya:

¹⁶ “Tụgbua je akpakọo ndu Ju, bu lẹ Susa l'ẹka lanụ, unu aswịa ẹgu kfuru nụ Chileke l'iswi ẹhu mụbe Ẹsuta. T'unu be erikwa nri, unu eje angụ iwhe-angụngu ujiku ẹto eswe l'ẹnyashi. Mbẹdua mẹe ụnwumgboko, l'ejeru mu ozhi l'a-swịkwawho ẹgu nke anyi g'unu l'aswị. E -megee bẹ mu l'e-jekfu eze. A makwarụ-a l'o megideru iwu. Ọle mu l'e-jele-e; mu je l'a-nwụhu tẹ mu nwụhu.”

¹⁷ Ọo ya bụ, Mọdekayi tụgbua je emekota iwhe Ẹsuta zhiru iya t'o mee g'ọ ha.