Ẹsuta 3 - BAYỊBURU Ẹzaa

Ejo-ikumu, Hemanu gbarụ ndu Ju

¹ Iwhe ono nwụ-gelewho, eze Áhazerusu bya akpolia ọkwa Hemanu. Ọ bya edobe iya l'ọnodu, ka nke ndu ọdo, whẹ l'iya bụ ishi alị-eze ono. Hemanu bụ nwa Hamedata onye shi l'eri Agagu.

² Eze tụa iwu t'iwhe bụ ndu ozhi eze gẹ whẹ ha, bụ ndu gude ọkwa l'ibe eze, whuzejeru Hemanu ishi l'alị, whẹ abarụ iya ẹja gude akwabẹ iya ugvu. Ndu ozhi eze wata ome ẹgube ono eze tụru whẹ l'iwu. Ọle Mọdekayi te ekwedu whuzeru iya ishi l'alị, t'o kwe abarụ iya ẹja gude akwabẹ ụdudu ugvu ono.

³ Tọ dụ iya bụ, ndu ozhi eze ono, bụ ndu gude l'ọkwa l'ibe eze bya ajịa Mọdekayi sụ: “?Ọo gụnu meru g'o gude l'iimebyi iwu, eze tụru?”

⁴ Mbọkumboku bẹ whẹ l'anọje ekfu eyeru Mọdekayi, ọle ọ tọo ngajẹduru whẹ nchị. Whẹ kwee je edooru iya Hemanu t'a marụ ?a ha iya t'o megburu ẹgube ono. Nkele o kfuwaru whẹ lẹ ya bụ onye Ju.

⁵ Nteke Hemanu chọfutaru lẹ Mọdekayi te ewhuzejeduru iya ishi l'alị mẹe l'ọ tọ badụru iya ẹja gude akwabẹ iya ugvu, iwe bya iya l'ẹhu.

⁶ Nteke Hemanu bya amarụ lẹ Mọdekayi bụ onye Ju, o wocha nke l'ọo Mọdekayi bẹ l'ee-gbu nwẹkiya. Iwhe o meru bụ l'ọ watarụ ọchokashi ụzo, l'oo-shi lakọta ndu nke Mọdekayi l'iyi, bụ iya bụ ndu Ju, bukota l'alị-eze Áhazerusu.

⁷ O be l'awha kwe eze Áhazerusu awha iri l'ẹbo, ọ watarụ ọbu eze, l'ọnwa Nisanu, a nọdu l'iwhu Hemanu tụa ido ono, bụ Puru. Ishi iwhe a tụ-turu ido ono bụ t'e gude họta ujiku lanụ yẹle ọnwa lanụ, whẹ l'e-gude medzua ikumu ono, Hemanu gbarụ. Whẹ tụa ido ono, ọ daba l'ọnwa iri l'ẹbo bụ iya bụ ọnwa Ada.

⁸ O noo ya, Hemanu sụ eze Áhazerusu: “O nweru ndu lanụ ọbu, tụkaru onwowhe atụka buru l'echilabọ ndu alị-a. Whẹ bukota l'obodo lile, dụ l'alị-eze-e ya nụ. Nsọ alị whẹ bẹ gbarụ iche lẹ nsọ alị ndu ọdo, tẹmenu whẹ te edobeje iwu, eze tụru. Ụdudu ndu ono bẹ a -haa whẹ ẹka bẹ whẹ ta abyakwa l'a-bẹru eze l'iwhe.

⁹ Ọ -bụru l'ọ dụ eze ree, t'eze tụa iwu t'e gbushia whẹ. Mu l'a-kfụ ndu l'e-jeru eze ozhi mkpọla-ọcha, ẹrwa iya dụ ụnu talẹntu mkpọla-ọcha ugbo ụkporo l'ise, nke ọwhu l'ee-yekobe iya l'ụlo-ẹku eze.”

¹⁰ Ọo ya bụ, eze gbata echi, l'oogudeje eme iwhe-ọhubama gbẹe Hemanu nwa Hamedata, bụ eri Agagu. Hemanu l'onwiya bẹ bụ ọhogu ndu Ju.

¹¹ Eze sụ Hemanu: “Dobero okpoga ghu je emee ndu ono g'ọ dụ ghu ree.”

¹² Ọo ya bụ, o rwua g'ọnwa mbụ ono gbarụ abalị iri l'ẹto, e kukota ndu l'ederu eze ẹkwo whẹ byadzukota. Whẹ tụko iwhe lile ono, Hemanu sụru tẹ whẹ dee dekota l'ẹkwo, a nụ iya ndu nnọ-chi ẹnya eze mẹe ndu ọchi-ọha obodo, dụ iche iche l'alị-eze ono, nụkwa iya whọ ndu bụ ishi l'alị ono. Obodo nọnu b'e deru nkewhe l'ụzo, whẹ l'edeje ẹkwo, gude okfu-alị whẹ dee ya. Ẹkwo ono b'e deru l'ẹwha eze Áhazerusu bya egude echi mkpụshi-ẹka iya mee ya iwhe-ọhubama.

¹³ E woru ẹkwo-ozhi ono nụ ndu ọkpa-ẹgwa tẹ whẹ je ekeshia l'obodo lile, dụ l'alị-eze Áhazerusu. Iwhe e deru iya bụ, t'a lakọta ndu Ju l'iyi gbushia whẹ tẹ whẹ tọhu l'akpụru ẹnyanwu lanụ, mbụ nwata mẹe ọgurenya mẹe ụnwanyi mẹe ụnwegirima mẹ ọnwa iri l'ẹbo bụ iya bụ ọnwa Ada gbaa abalị iri l'ẹto. Iwu ono sụkwawho, e gbugee whẹ t'a vụa arya whẹ nnanụ.

¹⁴ Iwhe dụ l'ẹkwo ono b'a sụru t'a tụa t'ọ bụru iwu l'obodo lile, e mee t'a madzuru iya nke ọwhu whẹ l'a-kwakọbe ẹhu m'ọgvu mbọku ono.

¹⁵ Eze kfua t'e je ekeshia ẹkwo-ozhi ono, ndu ọkpa-ẹgwa ono tụtube iya jeshia ya ekeke. Ẹka e vu ụzo tụa iwu ono ryaa ya aryarya bụ lẹ Susa, bụ ishi alị-eze ono. Eze yẹle Hemanu bahụ l'eriri l'angụngu, ẹhu rwụrwushihu ndu bu lẹ Susa gẹ whẹ nụru ozhi ono.