Ẹsuta 2 - BAYỊBURU Ẹzaa

E meru Ẹsuta eze-nwanyị

¹ Ọ bya ebe nteke ọbu, g'ẹhu-eghughu ono jizetaru eze Áhazerusu, ọ rịlahaa nke Vashiti mẹe nke iwhe ono, o meru yẹle nke iwu ono, a tụru l'okfu ẹhu Vashiti.

² Tọ dụ iya bụ, ndu l'ejeru eze ozhi bya asụ iya: “T'e leeru gụbe eze ẹnya ụnwumgboko, l'ama ụma, whẹ lẹ nwoke l'ẹteke azẹbua.

³ Tẹ gụbe eze shi l'obodo lile, dụ l'alị-eze ghu-a tụa ẹka lẹ ndu ishi l'e-je eduta ụnwumgboko, l'ama ụma, whẹ lẹ nwoke l'ẹteke azẹbua ono bya edobe l'ụlo ụnwanyi, dụ lẹ Susa, bụ ishi alị-eze-e. T'e duru whẹ yeru Hegayi onye a hárụ aháhá, mbụ onye ono, bụ iya l'eletaru eze ụnwanyi ibe iya ẹnya. Tẹ Hegayi nụ whẹ iwhe whẹ l'e-gude achọ mma.

⁴ Tẹ nwamgbọko ọwhu kagezhia eze ree l'ime ụnwumgboko ono gẹ whẹ ha bụru eze-nwanyị l'ọzori Vashiti.” Okfu ono dụ eze ree, omee ya ẹgube ono.

⁵ O nweru nwoke ọbu, bụ onye Juda, shi l'ikfu Bénjaminu, bu lẹ mkpụkpu Susa, bụ ishi alị-eze ono. Ẹwha nwoke ọbu bụ Mọdekayi nwa Jayi. Ọ bụ nwanwa Shimeyi, bụru nwanwa-nwanwa Kishu.

⁶ Nwoke ono tso lẹ ndu a kpụru lẹ ndzụ lẹ Jerúsalẹmu nteke ono, Nebukadineza, bụ eze ndu Bábyilọnu kpụru Jehoyakinu, bụ eze ndu Juda lẹ ndzụ.

⁷ Mọdekayi bẹ yẹle nwa nwune nna iya, l'aza Hadasa bu. Ọ bụru yẹbedua hefutaru iya, nkele ne iya lẹ nna iya bẹ tọru iya mgbe. Ẹwha ọdo l'eekuje Hadasa bụ Ẹsuta. Ọ bụ nwamgbọko, l'ama ụma, dụ ugvu l'ẹnya. Gẹ ne iya lẹ nna iya nwụhu-geeru bẹ Mọdekayi kutaru iya dobe g'ọo nwa iya, ọ nwụru l'onwiya.

⁸ O noo ya, nteke iwu ono eze tụru, mbụ iwhe ono, eze kfuru ngakọtaru alị-eze ono, e je eduta igweligwe ụnwumgboko bya Susa, bụ ishi alị-eze ono. E duru whẹ yeru Hegayi t'o letaje whẹ ẹnya. Ẹsuta bẹ tsokwawho lẹ ndu ono, e dutaru bya ibe eze; e duru iya yeru Hegayi, bụ onye l'eleta ụlo ụnwanyi ẹnya t'o leta iya ẹnya.

⁹ Nwamgbọko ono, bụ Ẹsuta dụ Hegayi ree l'obu, tẹmenu ọ tụbakwa iya whọ l'ẹnya. Hegayi mekebe ẹgwegwa chọoru iya iwhe l'oo-gude achọ onwiya mma, bya anụ iya ọga nri, ẹhu iya chọru. Ọ họta ụnwumgboko ẹsaa, bụ-gee ụma anyịganyi l'ibe eze duru whẹ yeru iya tẹ whẹ l'ejeru iya ozhi, bya eduta yẹle ụnwumgboko ono je eye l'ụlo, kakọta-gezhia ree l'ụlo ụnwanyi ono.

¹⁰ Ẹsuta te enwedu nteke ọ kọru onye ẹka ya bụ, t'ọ kọ eri, o shi, o noo nkele Mọdekayi buchiru iya t'ọ bọ kọshi.

¹¹ Mbọkumboku bẹ Mọdekayi l'anọje akpawhe l'atatiwhu ọma ogboduwhu ụlo ụnwanyi ono t'ọ marụ gẹ Ẹsuta meru mẹe t'ọ marụ gẹ l'oome eshi.

¹² Ụnwumgboko ono bụ, tẹmenu whẹ ejeshia l'iwhu eze Áhazerusu bẹ whẹ l'anọjeeda ọnwa iri l'ẹbo chọo onwowhe mma, bụ iya bụ nteke e doberu ụnwanyi tẹ whẹ nọ-dzuje. Whẹ l'anọje aha oje l'iwhu eze ahaha;; onye ọwhu o rwuberu ejeje ya anọo ọnwa iri l'ẹbo ono gude chọo onwiya mma. Ọnwa ishi bẹ whẹ l'ehuje mmanụ mẹru, gude ọnwa ishii ọwhu hua mmanụ mbeleke mẹe mmanụ apyịpyi, l'eshi kwẹkwekwe gude chọo onwowhe mma.

¹³ Nwamgbọko ọwhu o rwuberu oje l'iwhu eze bẹ bụ-zhiawho iwhe ọ sụru l'ọ dụ iya ree bẹ l'aanụje iya l'ụlo ụnwanyi ono, ya egude jeshia.

¹⁴ Onye ọbu l'ejeje l'urwẹnyashi lwa l'ụtsu iya. Ọ lwa ya eje anọdu l'ụlo ọdo, bụkwawho ụlo ụnwanyi. Onye l'eleta ụlo ọwhu ọbu ẹnya bụ onye a harụ aháhá, l'ejeru eze ozhi, ẹwha iya bụ Shashụgazu. Ọo ya bụ onye ọ nọ l'ẹka, mbụ ụnwanyi ono, eze l'ẹte alụa l'ọkpoku nwanyị. Nwamgbọko, bahụwaru l'ụlo ono te ejejedu ọwhu eze ọdo gbahaa lẹ nwamgbọko ọbu bẹ dụ eze ree, o kua ya eku.

¹⁵ Ọ bya erwube Ẹsuta oje l'iwhu eze. Mbụ Ẹsuta ono, Mọdekayi kutaru hee bụ iya bụ nwamgbọko ono, ọ nwụru mbụ nwune nna Mọdekayi ono, l'aza Abyihelu. Ọ tọ dụdu iwhe ọ sụru t'a nụ iya tẹ ya gude jee l'iwhu eze ono gbahaa iwhe Hegayi sụru t'o gude, mbụ onye ono, a harụ aháhá, l'ejeru eze ozhi, bụru onye l'eleta ụnwanyi ibe eze ẹnya. Ẹsuta tụbakotaru ndu whụru iya nụ l'ẹnya.

¹⁶ Mbọku e dutaru Ẹsuta jekfu eze Áhazerusu l'ibe iya bụ l'ọnwa iri, bụ iya bụ ọnwa Tebẹtu l'awha nke ẹsaa, ọ watarụ ọbu eze.

¹⁷ Eze bya eye Ẹsuta obu amamẹ ụnwanyi ọdo. Ẹsuta ka iya ọtuba l'ẹnya amamẹ ụnwumgboko ọdo. Ọ bụru yẹbedua bẹ obu eze natarụ. O kpube iya okpu eze-nwanyị l'ọzori Vashiti.

¹⁸ Eze bya eshishia eze nri, ha g'ọo gụnu, kua ndu bụ ishi alị-eze iya mẹe ndu ozhi iya tẹ whẹ bya eria ngụa. Onye o shituru nri ono bụ Ẹsuta. Ọ tụa ndzumike l'obodo lile, dụ l'alị-eze iya. O woru iwhe gbarụ onye eze keshiaru ndu ono.

Mọdekayi mebyiru ejo-ikumu, a gbarụ eze

¹⁹ Nteke e kukoberu ụnwumgboko ono nke ugbo labọ iya bẹ Mọdekayi nọwaa l'ọkwa l'ibe eze.

²⁰ Nteke ono bẹ Ẹsuta l'ete emedua t'a marụ onye ẹka ọ bụ mẹe eri, o shi ẹgube ono, Mọdekayi sụru iya t'ọ bọ kọshi. Nkele Ẹsuta l'anụjeru Mọdekayi okfu lẹ g'o shi anụhawaru iyẹ ya nteke, l'oohefuta iya.

²¹ Nteke ono, Mọdekayi shi nọdu l'ọkwa l'ibe eze bẹ Byigutanu mẹe Tẹreshi, bụ ndu ozhi eze labọ, l'eche ọnuzo ibe eze nche bẹ ẹhu nọnyaaru wata oghu eghughu, whẹ gbaa ikumu gẹ whẹ l'e-shi gbua eze Áhazerusu.

²² Mọdekayi bya achọfuta ikumu ono whẹ gbarụ, o je akọoru iya eze-nwanyị ono, bụ Ẹsuta. Ẹsuta kọoru iya eze l'o noo iwhe Mọdekayi kọru iya.

²³ A bya enyoo okfu ono chọfuta l'ọo ire-lanụ, a chịta ụmadzu labọ ono je aswị-gbua l'eli oshi. A nọdu l'iwhu eze dee ya ede l'ẹkwo-akọ, l'eedeje iwhe meru nụ l'alị-eze ono.