Émọsu 9 - BAYỊBURU Ẹzaa

Ọwhulenya nke ise: Ụlo-dụ-nsọ, darụ adada

¹ Mu nọ l'ọwhulenya whụa Onye-Nwe-Ọha gẹ ọ kfụru lẹ mgboro ẹnya-mgbẹja. Ọ sụ: “Wota iwhe vụa l'eli ishi itso, gude eze-ụlo-ọ nke ọwhu ukfu-ụlo ono l'a-nmakọta jijiji. Vụa ya yọgiri-yọgiri t'o zee zepyabe onyenọnu l'ishi. Ndu ọwhu whuduru nụ bẹ bụ ogu-ịgba bẹ mu l'e-gude gbushia whẹ. Ọ tọ dụdu onye bya l'a-gbala m'ọo onye lanụ, tọ dụ onye bya l'a-nahụ.

² Whẹ -gvukwaa m'o beru whẹ gvua nsụ bahụ l'alị-maa, mu l'e-yelekwaa ẹka l'ime ẹka ono gụta whẹ. Whẹ -nyikwaa m'o beru whẹ nyihu eli bahụ l'imigwe, mu eshilekwaa l'ẹka ono lọ-zeta whẹ.

³ Whẹ -jekwa m'ọo l'e-domi onwowhe l'eli ugvu Kamẹlu, mu achịlekwaa nta whẹ je akpụfuta whẹ l'ẹka ono. Whẹ -jekwa m'ọo l'e-domi onwowhe l'ọhu eze-ẹnyimu tẹ mu ba awhụ whẹ, bẹ mu l'e-zhilekwaa ejo agwọ, bu lẹ mini t'o je angụa whẹ ẹrwu l'ẹka ono.

⁴ O -beru ndu ọhogu whẹ kpụa whẹ lẹ ndzụ lashia alị ọdo, mu ezhilekwaa ogu-ịgba t'o je ataa ishi whẹ l'ẹka ono. Mu l'a-dazhịbe whẹ ẹnya mee whẹ ejo-iwhe, mu te emekwaru whẹ iwhe dụ ree.”

⁵ Ọ kwa Nnajị-Ọha bụ Onye-Nwe-Ọha bụru Onye-ishi-igwe-ọgu; onye bụ, o -denyi mgboko ẹka, ya adazeshihu; ndu lile, bu iya nụ atsọo ejo áwhụ, alị ekoo whụla whụla g'ọo ẹka ẹnyimu Nayịlu byarụ utso, ntaantaa, ya azụda g'ọo ẹnyimu Íjiputu.

⁶ Onye-Nwe-Ọha bẹ tụru ụlo eli l'imigwe buru, woru akpamigwe whụshia l'eli mgboko. Mini, dụ l'eze-ẹnyimu bẹ l'ookuje oku, woru iya chịaru eliwhe l'owhu. Ọ kwa Onye-Nwe-Ọha bụ ẹwha iya.

⁷ Ọ waa iwhe Onye-Nwe-Ọha l'ekfu ndọwa: “Unubẹ ndu Ízurẹlu ?unu lẹ ndu Kushi ta abụdu iwhe lanụ l'ẹka mu nọ? ?Tọ dụ ẹgube mu shi l'alị Íjiputu dufuta ndu Ízurẹlu, bụ gẹ mu dufutaru ndu Fílistiya l'alị Kafụto, ọ bụru gẹ mu dufutaru ndu Arámu l'alị Kiru?

⁸ Ọwhu bụ ezhi-okfu bụ lẹ Nnajị-Ọha, bụ Onye-Nwe-Ọha gudekwa ẹnya iya awhụkota alị-eze ono, l'eme iwhe-dụ-ẹji. Iwhe mu tụberu bụ lẹ mu l'e-mebyishi whẹ, mee tẹ whẹ tọhu lẹ mgboko. Ọle ẹpa Jékọpu bẹ mu l'ẹte emedu tẹ whẹ tọhu-gee.” O nokwa iwhe Onye-Nwe-Ọha l'ekfu ndono.

⁹ “Sụa, mu l'e-me iya, ya abụru iwu mbụ lẹ mu l'a-yọ ọzo-ụlo Ízurẹlu ayọyo yọchafuta whẹ lẹ mba gẹ mba ha. Mu l'e-ye whẹ lẹ n-yọ yọo whẹ gẹ l'aayọje ẹsusa, ọle mu ta abyadụ l'ekwe t'ọ dụ akpụru whẹ l'egeda l'alị.

¹⁰ Ndu l'eme iwhe-dụ-ẹji lẹ ndibe mu bẹ ogu-ịgba l'a-takọta ishi whẹ, mbụ ndu ono, l'asụje l'ejo-iwhe te eshitakwa ẹka whẹ nọ, t'o chisweru whẹ ẹhu.”

¹¹ “O -rwua nteke ono bẹ mu l'a-tuwhu ụlo Dévidi ono, zeshihuru ezeshihu azụ ọdo. Mu l'a-tụkwa-zhi ẹka ọ dakpọshihuru adakpọshihu bya emekwaa ya t'ọ bọ bụhe mkpọkoro ọzo-ụlo, mbụ tụa ya kfụbe; ya adụ g'o shihawa dụ lẹ mbụ.

¹² Ọo ya bụ lẹ ndu Ízurẹlu l'a-lwụtakota ndu whuduru lẹ Edọmu mẹe iwhe lile, bụ mba, mu kuru tẹ whẹ bụru ndu nkemu.” O nokwa iwhe Onye-Nwe-Ọha l'ekfu ndono, mbụ onye ono, bụ iya l'e-me iwhe lile ono t'ọ dụ.

¹³ Ọ waa iwhe Onye-Nwe-Ọha l'ekfu ndọwa: “Oge l'abyaakwa nteke bụ; ndu l'akpata iwhe e meberu l'alị gudekwadu iya l'ẹka akpata, ndu l'akọ ọkoro awata akọko, ndu l'adzọshi mmẹe l'akpụru vayịnu gudekwadu iya l'ẹka adzọshi, akpụru vayịnu awata achashị. Mmẹe ọ̀whúú l'e-shi l'eli ugvu alashị gorogoro, bya eshi l'eli nwugvu asọ gborogboro.

¹⁴ Ndibe mu ono, bụ ndu Ízurẹlu ono, a kpụru lẹ ndzụ bẹ mu l'e-dulatawhu azụ. Whẹ atụkwaa mkpụkpu whẹ ono, ẹgbara shi kfụa bya ebuchiwhu iya azụ ọdo. Whẹ l'a-kọ mgbu vayịnu ngụa mmẹe, shi iya nụ, whẹ agba mgbabu ria akpụru iwhe shi iya nụ.

¹⁵ Mu l'a-dzabẹ ndu Ízurẹlu l'alị whẹ gẹdegede, t'a bya l'e-whefubaa whẹ ewhefu ọdo l'alị ono, mu nụru whẹ.” O nokwa iwhe Onye-Nwe-Ọha bụ Chileke unu l'ekfu ndono.