Émọsu 8 - BAYỊBURU Ẹzaa

Ọwhulenya nke ẹno: Nkata akpụru iwhe charụ acha jiru ejiji

¹ Ọ waa bụ iwhe Nnajị-Ọha bụ Onye-Nwe-Ọha goshiru mu ndọwa: Mu nọ l'ọwhulenya whụa nkata akpụru iwhe charụ achacha jiru ejiji.

² Onye-Nwe-Ọha bya ajịa mu sụ mu: “Émọsu; ?ọo gụnu b'ị whụru?” Mu sụ iya: “Ọ kwa nkata akpụru iwhe charụ acha jiru ejiji.” Tọ dụ iya bụ, Onye-Nwe-Ọha sụ mu: “Ndibe mu ono, bụ ndu Ízurẹlu bẹ oge ikpazụ whẹ rwuakwaru. Mu ta ahahẹdu whẹ ọdo tẹ mu ba anụ whẹ áwhụ.”

³ Ọ waa iwhe Nnajị-Ọha bụ Onye-Nwe-Ọha l'ekfu ndọwa: “O -rwulewho mbọku ono bẹ ụzu-ẹkwa, l'a-da l'ọzori egvu, l'aagụje l'eze-ụlo Chileke. Odzu ndu nwụhuru anwụhu aha l'igwe kụru l'ẹka lile. Ẹka lile ada nyorokotongu.”

Aa-gwa ndu Ízurẹlu ọchi

⁴ Unu ngabẹ nchị; unubẹ ndu l'anọje adzọpyashi ndu l'adụa g'ọ harụ whẹ ishi; unubẹ ndu l'anọje apyigbushi ndu ụkpa, bu l'alị-a;

⁵ mbụ unubẹ ndu l'asụje: “?Ọo nteke ole bẹ ori oge ọnwa ọ̀whúú l'a-gvụ nke ọwhu unu l'a-wata oore witi unu? ?Ọo nteke ole bẹ mbọku-ọtuta-ume l'a-gvụ nke ọwhu unu l'e-vushi witi unu reshia?” Mbụ nke ọwhu unu l'e-bubota tinu balị unu t'ọ ka ọlwa alị; mee aswa iya t'ọ ọka shii, bya egude iwhe l'aatụ̀je iwhe e meru l'ụgho gude kputa ndiwhe.

⁶ Unu ekpota apya witi, a gẹge awụshi awụshi yekobe l'ọkpobe iya ree oke aswa, bya achọo ndu ụkpa, ji ụgwo mkpọla-ọcha zụta, chọkwaawho ndu l'adụa g'ọ harụ whẹ zụta l'ụgwo, sụru aswa akpọkpa labọ, whẹ ji ụgwo iya.

⁷ Onye-Nwe-Ọha, bụ onye ono, ẹpa Jékọpu gude eku onwowhe bẹ riakwaru nte sụ: “Iwhe whẹ meru bẹ mu l'ẹte abyakwaa l'azọha azọha.

⁸ “Alị l'e-megekwaa nmaa jijiji l'iswi iwhe ono; áwhụ iya abyarụ ndu bu l'alị ono. Alị ono l'e-ko whụla whụla g'ọo ẹka ẹnyimu Nayịlu byarụ utso; a nmawoo ya anmawo; ya ebulihu; bya azụda g'ọo ẹnyimu Íjiputu.

⁹ “Ọ waa iwhe Nnajị-Ọha bụ Onye-Nwe-Ọha l'ekfu ndọwa: O -rwua mbọku ono bẹ mu l'e-me ẹnyanwu arịba l'ishi l'echilabọ eswe, mu emee mgboko agbakọta ẹkpuroochi l'eswe.

¹⁰ Oge, unu l'erije bẹ mu l'a-gbanwe t'ọ bụru unu nggụmawhu. Mu agbanwee egvu ẹhu-ụtso, unu l'agụje t'ọ bụru unu ẹkwa-áwhụ. Mu l'e-me t'unu yekota uwe-áwhụ g'unu ha, kpụshia unu ishi anwụhu l'ẹhu l'ẹhu. Mu l'e-me unu aryaa ẹkwa g'ọo onye l'agụ áwhụ nwa nwoke lanụ ọ nwụtaru, ọ zubuhu nwụhu. Mbọku ono l'owhu l'a-bụru unu ụkpazhi-ọnwu-ọnu.”

¹¹ Ọ waa iwhe Nnajị-Ọha bụ Onye-Nwe-Ọha l'ekfu ndọwa: “Oge l'erwuakwa nteke mu l'e-me tẹ mkpẹgu bya l'alị-a. Ẹgu mu l'ekfu okfu iya ta abụkwa ẹgu nri, tọ bụ ẹgu mini. Ọwhu mu l'ekfu okfu iya bụ ẹgu ọnu okfu Onye-Nwe-Ọha.

¹² Madzụ l'e-tsoru aghawhe, o -shi l'ẹnyimu ọwaa ya alụfu ẹnyimu ọwhuu, o -shi l'ụzo isheli ya alụfu ụzo ẹnyanwu-awata. Mbụ lẹ whẹ l'e-shi foo lụfu faa l'ẹka whẹ l'achọ ẹka whẹ l'a-nụ okfu Onye-Nwe-Ọha, ọle whẹ ta awhụdu iya.

¹³ “Mbọku ono bẹ ụnwumgboko, l'ama g'ọo gụnu mẹe unwokoro, akwara dụ l'ẹhu l'a-vẹshihu l'ẹka ẹkpiri kpọru whẹ jegiri-jegiri.

¹⁴ Ndu ono, l'egudeje ẹwha agwa Samériya ria nte, mbụ ndu ono, l'asụje: ‘Ọ -bụru whọ lẹ gụbe ọgvu Danu bẹ nọ-o ndzụ g'ị nọ iya; ọ -bụru whọ lẹ gụbe ọgvu Byiyesheba bẹ nọ-o ndzụ g'ị nọ iya’, ndu l'erije ẹgube nte ono l'a-dakọta; whẹ ta fụkwa gbalihubaa agbalihu ọdo.”