Émọsu 7 - BAYỊBURU Ẹzaa

Uzhi ọwhulenya ise, Émọsu whụru Ọwhulenya nke mbụ: Igube

¹ Ọ waa iwhe Nnajị-Ọha bụ Onye-Nwe-Ọha goshiru mu ndọwa: Mu nọ l'ọwhulenya whụa ẹka Onye-Nwe-Ọha l'akwakọbe otsu-dududu igube, l'a-bya atapyashịa iwhe e meberu l'alị, l'efushikaa ome nke ọ̀whúú; g'a kpatageeru nke mbụ. Nke mbụ ono bụ ọwhu l'aanụje eze l'ọo iwhe rwuberu iya nụ.

² Igube ono tafụlewho iwhe rwutaru irwu l'alị ono kpamụ. Mu chishia mkpu sụ: “Gụbe Nnajị-Ọha, bụ Onye-Nwe-Ọha; jiko gụnuaru ndibe ghu nvụ! ?Ndẹe gẹ ndibe Jékọpu l'e-shi wafụ l'ẹgube iya ọwa, l'ẹbe abụ lẹ whẹ barụ nwishi!”

³ Tọ dụ iya bụ lẹ Onye-Nwe-Ọha ejizeta, bya ekfua sụ: “Ọ waa ta anwụhekwa ọdo.”

Ọwhulenya nke ẹbo: Ọku

⁴ Ọ waa iwhe Nnajị-Ọha bụ Onye-Nwe-Ọha goshiru mu ndọwa: Mu nọ l'ọwhulenya whụa Nnajị-Ọha, bụ Onye-Nwe-Ọha gẹ l'ooku ndibe iya oku tẹ ya gude ọku, l'enwu enwunwu gwaa whẹ ọchi. Ọku ono bya ekezhiawho gẹ l'ooke jeye oke eze-ẹnyimu tashịhu; alị kpọshihu nkụ.

⁵ Tọ dụ iya bụ, mu chishia mkpu sụ: “Gụbe Nnajị-Ọha, bụ Onye-Nwe-Ọha; byiko be emehenu! ?Ndẹe gẹ ndibe Jékọpu l'e-shi wafụ l'ẹgube iya ọwa, l'ẹbe abụ lẹ whẹ barụ nwishi?”

⁶ Tọ dụ iya bụ lẹ Onye-Nwe-Ọha ejizeta, Nnajị-Ọha ono, bụ Onye-Nwe-Ọha bya ekfua sụ: “Ọ waa ta anwụhekwawho ọdo.”

Ọwhulenya nke ẹto: Oshi, e gude atụ mgbodo t'ọ kfụru nsụmini

⁷ Ọ waa iwhe Onye-Nwe-Ọha goshiru mu ndọwa: Mu nọ l'ọwhulenya whụa Onye-ukfu-l'ọha g'ọ kfụru lẹ mgboro mgbodo. Iwhe ọ chị l'ẹka bụru ụdo, l'eegudeje atụ mgbodo t'ọ kfụru nsụmini. Ọ bụru ụdo ono b'e gude tụa mgbodo ono ọ kfụru nsụmini.

⁸ Onye-Nwe-Ọha bya ajịa mu sụ: “Émọsu, ?ọo gụnu b'ị whụru?” Mu sụ iya: “Ọ kwa ụdo, l'eegudeje atụ mgbodo t'ọ kfụru nsụmini.” Tọ dụ iya bụ, Onye-Nwe-Ọha bya asụ mu: “Lekwa, mu l'e-woru ụdo ono, l'eegudeje atụ mgbodo t'ọ kfụru nsụmini ono dobe l'echilabọ ndu Ízurẹlu, gude goshi whẹ lẹ whẹ ta akfụduru nsụmini. Mu ta ahahẹdu whẹ ọdo tẹ mu ba anụ whẹ áwhụ.

⁹ “Ẹnya ẹka ono, Áyiziku doberu bẹ l'ee-mebyishikota. E tsukposhia ẹka ndu Ízurẹlu doberu nsọ. Mu l'e-kwolihu palia ogu-ịgba tatso ọnu-ụlo Jerobowamu ọgu.”

Émọsu yẹle Amazíya

¹⁰ Tọ dụ iya bụ, Amazíya, bụ onye l'agbajẹ ẹja lẹ Bẹtelu bya ezhia ozhi t'e je ezhia onye eze ndu Ízurẹlu, bụ Jerobowamu sụ iya: “Émọsu bẹ nọkwa l'echillabọ ndu Ízurẹlu achịru ghu ejo idzu. Iwhe ọ nọdu kfushia sụkwaru omebyi alị-a.

¹¹ Ọ waa iwhe Émọsu nọdu kfushia ndọwa: “ ‘Ọ kwa ogu-ịgba bẹ l'a-ta ishi Jerobowamu; tọ dụhenu iwhe l'e-me t'a ba akpụ ndu Ízurẹlu lẹ ndzụ chịta whẹ lụfu l'alị whẹ.’ ”

¹² Amazíya gbashi bya ejekfu Émọsu je asụ iya: “Gụbe nwọwhu l'awhụ ọwhulenya; lụfu l'ẹka-a! Tụgbua lawhu azụ l'alị ndu Juda. Je anọdu l'ẹka ono kpata nri, l'ii-ri; gụ anọdu l'ẹka ono kfuchijeru Chileke!

¹³ Ba anọduhe lẹ Bẹtelu sụ l'iikfuchiru Chileke, nkele ọo ẹka dụru eze lẹ nsọ; ọ bụru iya bẹ eze-ụlo ndu Ízurẹlu l'abajẹru Chileke ẹja nọ.”

¹⁴ O noo ya, Émọsu yeeru Amazíya ọnu sụ iya: “Mu ta abụkwa onye nkfuchiru Chileke, tọ bụ onye nkfuchiru Chileke bẹ nwụru mu nụ. Ọo onye l'eche atụru bẹ mu bụ, bya abụru onye l'akọ okfu sịkamo.

¹⁵ Ọo ẹka mu nọdu eche atụru bẹ Onye-Nwe-Ọha bya ekua mu sụ mu tẹ tụgbua jekfu ndibe iya, bụ ndu Ízurẹlu je ekfuchita ọnu iya.

¹⁶ Ngwa ngabẹkwa nchị nụ iwhe Onye-Nwe-Ọha l'ekfu: “ ‘Ị sụru tẹ mu be ekfuchihe ọnu Chileke l'ẹka ndu Ízurẹlu nọ, mu ahaa ozhi ozhi, Chileke zhiru ndu ụlo Áyiziku.’

¹⁷ “Ọo ya bụ l'ọ waa iwhe Onye-Nwe-Ọha l'ekfu ndọwa: “ ‘Amazíya, nyee ghu l'e-megekwaa bụru nwanyị-ọkpara lẹ mkpụkpu-a; ogu-ịgba atakọta ishi ụnwu ghu nke nwoke mẹe nke nwanyị. Alị ghu bẹ l'ee-bukashi ebukashi washịaru ndu ọdo, gụbedua l'onwoghu bụ l'alị ndu l'ẹte amaa Chileke bẹ l'ịi-nọdu nwụhu. Ọdo bụ lẹ ndu Ízurẹlu te enwedu iwhe l'e-me t'a ba kpụ whẹ lẹ ndzụ, chịfu whẹ l'alị whẹ laa alị ọdo.’ ”