Émọsu 6 - BAYỊBURU Ẹzaa

Nshọbukwa ndu l'akpa lẹ ntụsaru-ẹhu

¹ “Nshọbukwa ndu nọ l'ugvu Záyọnu akpa lẹ ntụsaru-ẹhu, mẹe ndu nọ l'ugvu Samériya eke tụhaa l'ọ tọ dụdu iwhe bya l'eme whẹ nụ, mbụ unubẹ ndu a marụ ẹwha whẹ, shi lẹ mba bụ ishi mba l'owhu, bụ ndu ono, ọnu-ụlo Ízurẹlu l'abyakfutaje.

² Unu jeedawho mkpụkpu Kalune je awhụ iwhe l'eme l'ẹka ono. Unu -jegee ẹka ono, unu ejeshia Hámatu, bụ oke mkpụkpu. Unu eshi l'ẹka ono jeshia Gatu, bụ mkpụkpu ndu Fílistiya. ?Whẹ ka alị-eze unu ree? ?T'alị whẹ ka nke unu ọha shii?

³ Unubẹ ndu sụru lẹ mbọku ejo-iwhe l'a-nwụ bẹ dụkwaduro otẹnya, unu gudekwanu umere unu eme tẹ mbọku, iwhe-kpanganga l'e-me l'ẹhu unu kaba ọdu ntse.

⁴ Nshọbukwa ndu l'azẹje azẹe tụkaa onwowhe l'iwhe-azẹe, e gude ọkpu-enyi memashia, ndu l'egudeje etsetse machịshia onwowhe l'ugbooshi, ndu bụ anụ nwatụru yẹle anụ eswi, nmachishiru anmachishi bẹ whẹ l'egudeje eme nri.

⁵ Mkpọkoro egvu, unu l'anọje agụ bẹ unu l'akpọje une eye, unu nweru ngwa-egvu ọ̀whúú, dụ l'iche l'iche g'ọo Dévidi.

⁶ Iwhe unu l'egudeje angụ mmẹe bụ eze ntiko. Mmanụ, unu l'ehu l'ẹhu bụru oke mmanụ, l'eshi kwẹkwekwe. Ọle ọla-l'iyi, byakfutaru ndibe Jósẹfu bẹ unu l'ẹte atsọdu áwhụ iya.

⁷ O noo g'o gude unu je l'a-bụ ivurụzo, l'aa-kpụ lẹ ndzụ laa alị ọdo. Oke ẹmereme ono, unu l'amachịshije onwunu eme abụru bugemu.

Ekuku, ndu Ízurẹlu l'eku onwowhe bẹ Onye-Nwe-Ọha l'akpọha akpọha

⁸ “Nnajị-Ọha, bụ Onye-Nwe-Ọha gudewaa onwiya ribua nte, mbụ lẹ Onye-Nwe-Ọha, bụ Chileke bụ Onye-ishi-igwe-ọgu l'ekfu sụ: “Ekuku ono ẹpa Jékọpu l'eku onwowhe bẹ mu l'akpọhakwa akpọha. Agbarara ụlo ono whẹ tụshiru bẹ mu kpọru ashị. O noo g'o gude mu je l'e-woru ishi mkpụkpu whẹ, mẹe iwhe lile, dụ iya nụ ye l'ẹka ndu ọhogu.”

⁹ Ọ -bụru ụmadzu iri bẹ whọduru l'uwhu lanụ, ọnwu atụko whẹ gbuchafu.

¹⁰ Nteke abụbu whẹ byarụ, mbụ onye gbarụ t'ọ kpọshi odzu whẹ ẹnwa, ọ -bụru l'ọ -byarụ tẹ ya pashịa odzu whẹ l'ụlo ono; o -kua onye ọwhu nọ l'ime jịa ya sụ iya: “?Oo nwebaaru odzu ọdo whuduru nụ l'ẹka ono?” Ọ -sụ: “Waawa!” Ya asụ iya: “Taa! Dobe ọnu ndoo! T'anyi be ejekwa ọko ẹwha Onye-Nwe-Ọha!”

¹¹ Nkele Onye-Nwe-Ọha bẹ tụwaru iya ọ bụru iwu, l'oke uwhu l'a-da gbaa vụu vụu, nwa uwhu nshịi adaa tsua yọgiri yọgiri.

¹² Ịnya ?ọogbaje ọso l'ẹka bụ ekpekere nkụchi? ?Eegudeje eswi akọ ọkoro l'eze-ẹnyimu? Ọle unu mewaru ikpe, kfụru nhamụnha, ọ bụru iwhe l'egbu madzụ, unu mee akpụru ọdu-chịriri l'amị, ọ bụru age.

¹³ Unu l'ete ẹswa l'unu lwụtaru mkpụkpu Lodeba. Unu l'etowhe ọnu asụje: “?Tọ dụ l'ike ẹka anyi bẹ anyi gude lwụta mkpụkpu Kanemu?”

¹⁴ Onye-Nwe-Ọha, mbụ Chileke, bụ Onye-ishi-igwe-ọgu l'ekfu sụ: “Unubẹ Ízurẹlu, mu l'e-je akpatsuta mba l'a-byakfuta unu ọgu. Whẹ eshi lẹ mkpụkpu Lebo Hámatu kpaa unu ẹhu jeye lẹ nsụda Araba.”