Émọsu 5 - BAYỊBURU Ẹzaa

Egvu-áwhụ a gụru l'ishi ndu Ízurẹlu

¹ Ndu Ízurẹlu, unu ngabẹ nchị l'okfu-a, unu ngabẹ nchị l'egvu-áwhụ-a, mu l'agụ l'ishi unu:

² “Nwamgbọko, bụ Ízurẹlu bẹ daakwarụ darwua alị, ọ tọo gbashibahedua agbashi ọdo. A harụ iya l'alị l'ẹka ọ daburu gbakashịhu, tọ dụ onye jeru iya apali.”

³ Ọ waa iwhe Nnajị-Ọha bụ Onye-Nwe-Ọha l'ekfu ndọwa: “O nweru mkpụkpu, dụ lẹ Ízurẹlu, zhifuru ndu ojọgu dụ ụnu labọ l'ụkporo iri tẹ whẹ jee ọgu, iwhe l'e-megee vuru ishi whẹ lwa bẹ bụ ụkporo ndu ojọgu ugbo ise. Mkpụkpu ọwhu zhiru ndu ojọgu, dụ ụkporo ugbo ise tẹ whẹ jee ọgu, iwhe l'e-megee vuru ishi whẹ lwa abụru ndu ojọgu iri.”

⁴ Ọ waa iwhe Onye-Nwe-Ọha l'ekfuru ọnu-ụlo Ízurẹlu ndọwa: “Unu chọo mu nggẹ unu anọdu ndzụ.

⁵ Unu ba achọkwa mu lẹ Bẹtelu. Unu be ejekwa Gílugalu. Unu ba aghatakwa jeshia Byiyesheba. O noo nkele ndu Gílugalu bẹ l'aa-kpụkwa lẹ ndzụ, e mee ndu Bẹtelu, ya eje adụ iwhe whẹ l'a-bụkwadu.”

⁶ Unu chọo Onye-Nwe-Ọha nggẹ unu anọdu ndzụ. Ọdua bẹ l'oo-rekwa whuruwhuru g'ọo ọku byakfuta ọnu-ụlo Jósẹfu, bya ekechafu iya, ọ tọ dụdu onye nọ lẹ Bẹtelu l'a-dụ ike egbota iya.

⁷ Nshọ unubẹ ndu, l'ewojeru ikpe, kfụru nhamụnha kpọo ishi akụ, mee ya t'ọ bụru age, mbụ unubẹ ndu l'ewojeru ọdu-chịriri gwọo l'alị.

⁸ Ọo Onye-Nwe-Ọha bẹ meru kpokponde ono, bụ Puleyadesu yẹle Orayọnu. Ọ bụru iya l'emeje ẹkpuroochi, ya aghọo iwhoro chi-asahu. L'oomeje eswe, ya ekpua ẹhu bụru ẹnyashi. Ọo ya bụ onye l'ekuje mini, dụ l'eze-ẹnyimu oku, woru iya kwaa eliwhe l'owhu l'ẹhu. Ọ kwa Onye-Nwe-Ọha bụ ẹwha iya.

⁹ Oomeje tẹ kpurupyata lọo vaa byakfuta onye ike dụ, l'oomeje tẹ mkpụkpu a tụru ọ bụru agbarara bụru kpurupyata.

¹⁰ Onye unu l'egbejee kpọo ashị bụ onye ikpe iya kfụru nhamụnha lẹ nggamgbo-ọha. Ọ tọ dụdu iwhe unu l'agụbeje onye l'ekfu ire-lanụ.

¹¹ Ndu ụkpa bẹ unu l'adzọje tọlitoli, unu l'egudeje whẹ naa whẹ ereshi whẹ l'ẹka ike. Eshi-ọwhu ọ dụ nno, a makwarụ-a l'unu gude ẹwhuru, a washịru awashị tụshia ụlo unu. Ọle unu ta abyadụ l'e-bu iya ebu. A makwarụ-a l'unu nweru mgbu vayịnu, dụ ugvu l'ẹnya, ọle unu ta abyadụ l'a-ngụ mmẹe shi iya nụ.

¹² Mu marụ gẹ emeswe, unu mesweru habe l'igweligwe mu marụ gẹ iwhe-dụ-ẹji, unu meru habe shii. Ndu-dụ-chịriri bẹ unu l'emekpa ẹhu, unu l'eri n-wọlazu, unu te ekpeje ndu ụkpa ikpe kfụru nhamụnha lẹ nggamgbo-ọha.

¹³ O noo g'o gude onye nweru mgbamego l'edobeje ọnu ndoo m'ọ dadẹwaa nno nkele a nọ l'ejo oge.

¹⁴ Unu chọo ụzo ome iwhe dụ ree, haa ome ẹjo iya, nggẹ unu anọdu ndzụ. Ọo ya bụ nke ọwhu Onye-Nwe-Ọha, mbụ Chileke, bụ Onye-ishi-igwe-ọgu l'e-swiru unu eswiru, ẹgube ono, unu l'asụje l'o swiru unu.

¹⁵ Unu kpọo ome ejo-iwhe ashị; yee ome iwhe dụ ree obu. Unu kpeje ikpe, kfụru nhamụnha lẹ nggamgbo unu; nkele e nwekwaru ike, Onye-Nwe-Ọha, mbụ Chileke bụ onye-ishi-igwe-ọgu emeeru unu eze-iwhe-ọma, unubẹ nwa ndu ọwhu whọduru nụ lẹ ndibe Jósẹfu.

¹⁶ Ọo ya bụ l'ọ waa iwhe o kfuru, mbụ Nnajị-Ọha bụ Onye-Nwe-Ọha, mbụ Chileke bụ Onye-ishi-igwe-ọgu: “Aa-tụ ụzu-ẹkwa l'iwhe bụ echi-ụzo nọnu. Ee-chi o-ji-l'ẹka-tọgbo-o lẹ nggamgbo lẹ nggamgbo. Ndu l'akọ okfu bẹ l'ee-ku, whẹ abya aryaa ẹkwa gụa áwhụ, e kua ndu marụ ọrya ẹkwa-áwhụ, whẹ abya aryaa ya.

¹⁷ Ụzu-ẹkwa l'a-tụshihu l'ẹka lile, e nweru mgbu vayịnu, nkele mu l'abyakwa ọgha l'echilabọ unu.” O nokwa iwhe Onye-Nwe-Ọha l'ekfu ndono.

Mbọku nke Onye-Nwe-Ọha

¹⁸ Nshọbukwa unubẹ ndu l'ọogu ẹgu tẹ mbọku nke Onye-Nwe-Ọha byakebe! Sụa, ?ọo gụnu kparụ iwhe mbọku nke Onye-Nwe-Ọha l'agụ unu ẹgu? Mbọku ono l'a-bụkwa ẹkpuroochi nkụchi, iwhoro ta adụkwa iya.

¹⁹ Ọo-dụkwa g'ọo nwoke nahụru oduu-gburu-agụ, je agbabarụ ejo-nkụta-ọswa. Mbụ l'ọo-dụ g'ọo onye bahụru l'ụlo iya je anọdu anọdu woru ẹka tukobe lẹ mgbodo, agwọ shi ẹka o shi bya ata iya.

²⁰ Mbọku nke Onye-Nwe-Ọha l'a-bụru ẹkpuroochi nkụchi, iwhoro ta adụkwa iya. Igweli l'a-whuchi awhuchi, nke ọwhu bụ l'iwhoro ta adụdu ilile.

²¹ “Ori-oge, unu l'eriru mu bẹ mu kpọkwaru ashị, ọ t'ọ dụdu iwhe mu gụberu iya. Edzukobe, unu l'edzukobejeru mu ta adụjekwa mu ree.

²² Anụ owhu, unu l'akpọje ọku gude gwaa mu yẹle ngwo-ẹja-nri, unu l'anụje mu ta adụkwa ọwhu mu l'anatajẹ. Anụ, nmachiru anmachi ono, unu l'egudeje bya agbaarụ mu ẹja ẹhu-guu, bẹ mu l'ete elejekwa ẹnya.

²³ Unu ba agụjeheru mu egvu; o noo l'egvu unu l'anọje ada mu whutuwhutu lẹ nchị. Mu ta angabẹjekwa nchị l'iwhe nkwa unu l'ada.

²⁴ Iwhe mu chọru bụ t'ikpe, kfụru nhamụnha sọje gborogboro g'ọo mini! Ọ-dụ-chịriri asọ gborogboro g'ọo ẹnyimu, l'ẹte enwee atahụ!

²⁵ Sụa, unubẹ ọnu-ụlo Ízurẹlu, unu nọru ụkporo awha ugbo labọ l'echi-ẹgu, ?Unu shi agwajẹ mu agwagwa nteke ono? ?T'unu shi anụje mu iwhe nteke ono?

²⁶ Ọle ntaa bẹ iwhe unu kpọru obu yeru bụ l'ọgvu onye eze unu, bụ Sakutu mẹe l'ọgvu ibe unu, bụ Kayịwanu, mbụ ọgvu kpokponde ono, unu gwọtaru agwọta.

²⁷ O noo g'o gude mu je l'e-me t'a kpụa unu lẹ ndzụ chịta unu ghaa alị Damásukọsu. O nokwa iwhe Onye-Nwe-Ọha l'ekfu ndono, mbụ onye ono ẹwha iya bụ Chileke, bụ Onye-ishi-igwe-ọgu.