Émọsu 4 - BAYỊBURU Ẹzaa

Ndu Ízurẹlu te ekwedu lwakfuta Chileke

¹ Unu ngabẹ nchị l'okfu-a, unubẹ eswi alị Báshanu, mbụ unubẹ ụnwanyi ono, bu l'ugvu Samériya. Ndu ụkpa bẹ unu l'anọje akpa ẹhu, egwe ndu l'adụa g'ọ harụ whẹ aryaka eryune, unu nọdu unu asụ ji, l'alụ unu alụlu: “Nụ anyi mmẹe t'anyi ngụa!”

² Nnajị-Ọha, bụ Onye-Nwe-Ọha, bụ onye ono, dụ nsọ bẹ riakwaru nte sụ: “Oge l'agbabekwaa nteke l'ee-gude aga-nko lọo unu wuru-wuru lọfu. Ndu ọwhu wuduru nụ l'ime unu, e gude aga-ẹma seta whẹ sefu.

³ Ẹka l'ee-shi kpụshia unu bụ ẹka ụzo dụ lẹ mgbodo unu. Onyenọnu echee iwhu nchelanu. Ẹka l'ee-rwuta unu je awụshi bụ lẹ Hamọnu.” O nokwa iwhe Onye-Nwe-Ọha l'ekfu ndono.

⁴ “Unu bya lẹ Bẹtelu lọbaru lẹ mmeswe unu. Unu eje lẹ mkpụkpu Gílugalu kaba ya rọo ememe. Unu lọbaru wotaje ngwo-ẹja unu l'ụtsu mbọkumboku. Unu alọbaru wotaje ụzo-lanụ-l'ụzo-iri unu l'ujiku ẹto, a nwụtaru anwụta.

⁵ Unu wota buredi e yeru iwhe l'eekoje buredi gude gbaa ẹja obunggo. Unu -nụdeje Chileke iwhe zụru unu nkwe l'obu, unu arya ya aryarya. Unu kụa ya l'edzudzu-ọha, nkele ọo ẹgube iwhe ono l'adụje unu ree ememe, unubẹ Ízurẹlu.” O nokwa iwhe Nnajị-Ọha bụ Onye-Nwe-Ọha l'ekfu ndono.

⁶ “Mu kpọru unu ẹgu lẹ mkpụkpu lẹ mkpụkpu, mbụ lẹ mu meru, unu ta awhụje nri ria l'ibe unu. O noo ta ahụ unu nke t'unu lwakfutawhu mu azụ.” O nokwa iwhe Onye-Nwe-Ọha l'ekfu ndono.

⁷ “Mu meru mini ta achịjeheru unu lẹge ọ whọduru ọnwa ẹto t'iwhe e meberu l'alị kaa. L'ọobuje mu -chịaru mkpụkpu ọwa mini, mu ta achịduru iya mkpụkpu ọwhu. Mini -chịa l'okfu ọwaa, ọ tọ chịdu l'okfu ọwhu, iwhe e meberu l'alị akpọshihu nkụ.

⁸ O nweru ndu ọwhu shi lẹ mkpụkpu labọ m'ọ bụ ẹto jeru mbanananaa, jeshia mkpụkpu ọdo ọcho mini-angụngu, whẹ ta awhụ mini, dzuru whẹ angụngu. O noo ta ahụ unu nke t'unu lwakfutawhu mu azụ.” O nokwa iwhe Onye-Nwe-Ọha l'ekfu ndono.

⁹ “Mu mewaru t'iwhe unu meberu l'alị mẹe mgbu vayịnu unu chashịa mmanụ, bya emee t'ọ tsụshia evu. Igube tapyashịa oshi ólivu unu yẹle figu unu. Ọle ọ tọ hụdu unu nke t'unu lwakfutawhu mu azụ.” O nokwa iwhe Onye-Nwe-Ọha l'ekfu ndono.

¹⁰ “Mu wotaru unu ejo ẹhu-ba-dụ-mma ẹgube ono, ọ dụru ndu Íjiputu. Mu gude ogu-ịgba gbushia unwokorọbya unu, bya erwutakota ịnya unu. Mu mee tẹ nshishi odzu, rehuru erehu l'ọdu-ọgu unu kporu laa unu l'imi. O noo ta ahụ unu nke t'unu lwakfutawhu mu azụ.” O nokwa iwhe Onye-Nwe-Ọha l'ekfu ndono.

¹¹ “Mkpụkpu unu bẹ mu harụ mebyishia ẹgube ono mu mebyishiru Sódomu mẹe Gọmóra. Unu dụa g'ọo otsebere-nkụ a lọfutaru l'ọku t'ọ bo kege iya. O noo ta ahụ unu nke t'unu lwakfutawhu mu azụ.” O nokwa iwhe Onye-Nwe-Ọha l'ekfu ndono.

¹² “Ọo ya bụ l'ọ waa iwhe mu l'e-me unu ndọwa, unubẹ ndu Ízurẹlu. Eshi-ọwhu mu l'e-me unu iwhe ono, ọ kwa iya bụ t'unu kwakọbekwa akwakọbe nke ojekfu Chileke unu, unubẹ ndu Ízurẹlu!”

¹³ Ọ kwa iya bụ onye ono, bụ iya meru ugvu, mee whẹrewhere. Ọ bụru iya bụ onye ono l'ekpuhaje iwhe l'ọori l'ọriri goshi madzụ. Ọ bụru iya l'emeje tẹ chi, bọru abọ megee jihu, bya abụru iya bụ onye ono l'adzọje kwagamụ kwagamụ l'eli mgbogidi nke mgboko. Ẹwha iya bụkwa Onye-Nwe-Ọha, mbụ Chileke, bụ Onye-ishi-igwe-ọgu.