Émọsu 3 - BAYỊBURU Ẹzaa

Ndu l'a-gba ndu Ízurẹlu ẹka-ebe

¹ Unubẹ ndu Ízurẹlu, unu ngabẹkwa nchị l'okfu-a, Onye-Nwe-Ọha kfuru kfugide unu. Ndu o kfuru iya kfugide bụ mba ono, o shi l'alị Íjiputu dufuta:

² “Ọo unubẹdua kpelekengu-kpụu bẹ mu marụ l'iwhe bụ mba, nọkota lẹ mgboko l'owhu. O noo g'o gude mu je l'a-nụ unu áwhụ ejo-iwhe unu l'emegbabe.”

³ Ụmadzu labọ, ?whẹ l'alịje l'ije t'a gụfu lẹ whẹ kwetaru alịli?

⁴ Oduu-gburu-agụ, ?l'ọoboje ekiri l'ọswa l'ẹbe abụ l'ọ whụru iwhe l'oo-gbu ria? Nwa oduu-gburu-agụ, ?l'ọobaje hanyị-hanyị kfụfuta l'ẹka o bu l'ẹbe abụ l'o nweru iwhe o gudepyaberu?

⁵ Ẹnu, ?l'ọodaje l'ọnya, nọ l'alị l'ẹbe abụ l'aagbabẹru ọnya ọbu agbabẹ? Ọnya a gbabẹru agbabẹ l'alị ?l'ọononyajee kposwee onwiya l'ẹbe abụ l'ọ dụ iwhe dabarụ iya nụ?

⁶ Opu-ọgu dalahaa lẹ mkpụkpu, ?ndu bu iya nụ ta atsụdu egvu tọo? Ejo-iwhe, ?l'ọobyakfutaje mkpụkpu, l'ẹbe abụ l'ọo Onye-Nwe-Ọha b'o shi l'ẹka?

⁷ Ishi iya l'ẹmi iya bụ lẹ Nnajị-Ọha, bụ Onye-Nwe-Ọha ta adụdu iwhe l'oomeje l'ẹbe abụ l'o vu ụzo kpuhaa iwhe o domiru edomi goshi ndu ozhi iya, bụ ndu nkfuchiru iya.

⁸ Oduu-gburu-agụ -bọo ekiri, ?oo onye ha nke ba atsụ egvu? Nnajị-Ọha, bụ Onye-Nwe-Ọha -kfua okfu ?Oo onye ha nke be ezhi ozhi, o zhiru?

⁹ Ryaa ya aryarya l'iwhe bụ agbarara dụ lẹ mkpụkpu Ashịdodu mẹe l'iwhe bụ agbarara, dụ l'alị Íjiputu sụ whẹ: “Unu je edzukoo l'ugvu alị Samériya t'unu gude ẹnya unu whụdunu eze ùtsú, l'ada l'ẹka ono mẹe mkpamẹhu, dụ iya nụ.”

¹⁰ “Whẹ ta amadụ ome iwhe kfụru nhamụnha.” O nokwa iwhe Onye-Nwe-Ọha l'ekfu ndono. “Iwhe whẹ kụberu l'agbarara ụlo, whẹ tụshiru bẹ bụ iwhe whẹ nakọru madzụ l'ẹka ike mẹe iwhe whẹ narụ lẹ nfụ.”

¹¹ Ọo ya bụ l'ọ waa iwhe Nnajị-Ọha, bụ Onye-Nwe-Ọha l'ekfu ndọwa: “Ọhogu l'a-nọ-whe alị ono mgburumgburu, ya atụko ẹka ono, unu kpọberu ike unu nwutsushikota, vụa arya, dụkota l'agbarara unu l'owhu.”

¹² Ọ waa iwhe Onye-Nwe-Ọha l'ekfu ndọwa: “Ọ kwa g'onye l'eche atụru, jeru tẹ ya nafụta atụru iya l'ọnu oduu-gburu-agụ, iwhe ọ dụ ike nata iya bụru oshi ọkpa iya labọ, m'ọ bụ ibiribe nchị lanụ. O nokwa gẹ ndu Ízurẹlu, l'aa-dzọfuta l'a-bụ akpụru ụmadzu olemole, mbụ ndu ono, bu lẹ mkpụkpu Samériya, dakashịhu l'iwhe-azẹe whẹ mẹe l'egbe-aba whẹ.”

¹³ Ọ waa iwhe Nnajị-Ọha bụ Onye-Nwe-Ọha, mbụ Chileke bụ Onye-ishi-igwe-ọgu l'ekfu ndọwa: “Unu nụkwaa iwhe-e, mu l'ekfu, unu eje ekfukashiaru iya ndu ọnu-ụlo Jékọpu.”

¹⁴ “Mbọku, mu l'a-nụ ndu Ízurẹlu áwhụ emeswe ono, whẹ mesweru mu bẹ mu l'e-mebyishikwa ẹnya-mgbẹja, dụkota lẹ mkpụkpu Bẹtelu. Mpu dụkota l'ẹnya-mgbẹja ono bẹ l'ee-gbujishi, ya awụshiru l'alị.

¹⁵ Ụlo whẹ tụru kwabẹru ọnanwu yẹle ọwhu whẹ tụru kwabẹru udzumini bẹ mu l'e-mebyishikota. Mu enwutsushia ụlo ono, whẹ gude ọkpu-enyi memashia l'ọoma ụma. Eze ụlo nọkota iya nụ bẹ mu l'e-me ya adakọta kpube iwhu l'alị.” O nokwa iwhe Onye-Nwe-Ọha l'ekfu ndono.