Émọsu 2 - BAYỊBURU Ẹzaa

¹ Ọ waa iwhe Onye-Nwe-Ọha l'ekfu ndọwa: “Ndu Moabu l'anọje eme iwhe-dụ-ẹji mmekwase. Eshi-ọwhu ọ dụ nno bẹ mu l'ẹte ahakwa tẹ mu ba anụ whẹ áwhụ. Ọkpu onye eze ndu Edọmu bẹ whẹ kpọru ọku jeye ọ kpọo ukfuru.

² Ọo ya bụ lẹ mu l'a-nwụru ọku ye l'alị ndu Moabu, ya adzụkota agbarara, dụ lẹ mkpụkpu Keriyotu. Ndu Moabu l'a-nwụshihu mẹ whẹ nụlewho ùtsú l'aakụ ekpu whẹ. Mbụ lẹ whẹ l'a-nwụshihu nteke whẹ nụru mkpu-ọgu mẹe ụda opu-ọgu.

³ Onye l'achị Moabu bẹ mu l'e-gbu egbugbu, gbukota ndu bụ ishi alị ono gẹ whẹ ha.” O nokwa iwhe Onye-Nwe-Ọha l'ekfu ndono.

⁴ Ọ waa iwhe Onye-Nwe-Ọha l'ekfu ndọwa: “Ndu Juda l'anọje eme iwhe-dụ-ẹji mmekwase. Eshi-ọwhu ọ dụ nno bẹ mu l'ẹte ahakwa tẹ mu ba anụ whẹ áwhụ. Iwu Onye-Nwe-Ọha bẹ whẹ huru l'alị, jịka ome iwhe ọ tọru ọkpa iya t'e meje. Iwhe duwhuru whẹ nụ bụ lẹ whẹ je awata ọgwa agwa ono, bụ ụgho ono, nna whẹ gwarụ.

⁵ Ọo ya bụ lẹ mu l'a-nwụru ọku ye l'alị ndu Juda, ya adzụkota agbarara, dụ lẹ Jerúsalẹmu.”

Ikpe, l'ee-kpe ndu Ízurẹlu

⁶ Ọ waa iwhe Onye-Nwe-Ọha l'ekfu ndọwa: “Ndu Ízurẹlu l'anọje eme iwhe-dụ-ẹji mmekwase. Eshi-ọwhu ọ dụ nno bẹ mu l'ẹte ahakwa tẹ mu ba anụ whẹ áwhụ. Ndu-dụ-chịriri bẹ whẹ l'ereje l'ụgwo mkpọla-ọcha whẹ ji, ree ndu l'adụa g'ọ harụ whẹ l'ụgwo, sụru aswa akpọkpa labọ, whẹ ji.

⁷ Ndu ụkpa bẹ whẹ l'adzọje tọlitoli, byarụ whẹ ishi ye l'ime alị. Ndu nọ lẹ mkpamẹhu bẹ whẹ l'ewojeru iwhe rwuberu whẹ nụ docha l'agụga. Nna yẹle nwa l'akpakọje ekpukfu nwamgbọko lanụ azẹe, shi nno metoshia ẹwha mụbe Onye-Nwe-Ọha ono, dụ nsọ.

⁸ L'agụga agụga ẹnya-mgbẹja bẹ whẹ l'azẹshije l'eli ẹkwa, madzụ nụru whẹ gude naa onwiya mkpalẹka. Ọ bụru l'ime ụlo Chileke bẹ whẹ l'anọduje angụ mee, whẹ retaru madzụ lẹ nre.

⁹ Ọo mbẹdua bẹ nọdu l'iwhu whẹ laa ndu Amọru l'iyi, mbụ ndu Amọru ono, hagee gbagorogodongu g'ọo oshi sida, kpọo akpaa g'ọo achị. Mebyi, whẹ mịru, barụ l'eli bẹ mu mebyishiru, mebyishia ọgbaragbu, whẹ chịru wụa l'alị.

¹⁰ Ọo mbẹdua bẹ dufutaru unu l'alị Íjiputu, dua unu ụkporo awha ugbo labọ l'echi-ẹgu tẹ mu je anụ unu alị ndu Amọru.

¹¹ Ọo mbẹdua bẹ shi l'ime ụnwu unu unwoke wofuta ndu ọwhu bụ ndu nkfuchiru Chileke, ọ bụru mu shi l'ime ụnwu okorọbya unu wofuta ndu ọwhu riburu nte ọduru Chileke nsọ. Unubẹ ndu Ízurẹlu, ?iwhe mu l'ekfu ta abụdu iwhe meru eme tọo?” O nokwa iwhe Onye-Nwe-Ọha l'ekfu ndono.

¹² “Ọle unu meru whẹ ngụa mmẹe, mbụ ndu ono riburu nte ọduru Chileke nsọ ono, unu sụ ọwhube ndu nkfuchiru Chileke tẹ whẹ be ekfuhe iwhe Chileke zhiru whẹ ekfukfu.

¹³ Unu leenu, mu byakwa l'abyarụ unu ishi ye l'ime alị, unu ataa kpọkpo-kpọroro g'ọo ọgba-kperekpere, e doru ivu ereshi l'eli.

¹⁴ Ndu ọkpa-ẹgwegwa ta abyakwa l'agbala agbala, ndu ọkpehu dụ ta abya l'enwekwadu ụvo, ndu-ojọgu ta adụ ike adzọ onwowhe.

¹⁵ Ndu marụ ọgba akfụ ta adụkwa ike atakeru atakeru, ndu ọkpa-ẹgwegwa ta adụ ike agbala agbala, ndu l'agba ịnya ta adụ ike adzọ onwowhe.

¹⁶ Mbọku ọbu mbọku ọbu, bẹ onye kuru onwiya dike-ọgu l'e-tuwhakwa ngwọgu iya gbaa ọso.” O nokwa iwhe Onye-Nwe-Ọha l'ekfu ndono.