Ditoronomi 6 - BAYỊBURU Ẹzaa

Iwhe e kwoberu tụa iwu

¹ Ọ waa bụ iwhe Onye-Nwe-Ọha tụru l'iwu yẹle iwhe ọ tọru ọkpa iya mẹe nsọ, o doberu t'e tsoje bụ iya bụ iwhe Onye-Nwe-Ọha, bụ Chileke unu sụru tẹ mu zhia unu t'unu meje l'alị ono, unu l'eme t'unu daa ẹnyimu Jọ́danu, je anata, t'ọ bụru nke unu ono,

² nke ọwhu unu l'a-nọ atsụ Onye-Nwe-Ọha, bụ Chileke unu egvu, mbụ unubẹdua l'onwunu mẹe ụnwu unu mẹe ụnwu nwanwa unu whẹ, eme iwhe ọ tọru ọkpa iya mẹe iwhe ọ tụru l'iwu bụ iya bụ iwhe mu l'ekfuru unu t'unu meje jeye gẹ unu l'a-nọ-beru nke ọwhu ndzụ unu l'a-kpọliberu.

³ Unubẹ ndu Ízurẹlu, unu nụkwaa ya. Unu edokwaa ẹnya ndo mee ya eme, nke ọwhu l'ọo-dụru unu lẹ ree, unu asaa ọsa ka l'igwe l'alị ono, mini-ẹra eswi yẹle mmanụ-ẹnwu jiru ejiji, bụ iwhe Onye-Nwe-Ọha bụ Chileke nke nna unu whẹ kweru unu ụkwa iya.

⁴ Unubẹ ndu Ízurẹlu, unu nụa ya, lẹ Onye-Nwe-Ọha, bụ Chileke anyi bẹ bụ iya bụ Onye-Nwe-Ọha lanụ, dụ nụ kpụ.

⁵ Unu ye Onye-Nwe-Ọha, bụ Chileke unu obu unu g'ọ ha. Unu gude obu unu g'ọ ha mẹe ndzụ unu g'ọ ha mẹe ike unu g'ọ ha ye iya obu ono.

⁶ T'okfu-a, mu l'ekfuru unu ntanụ-a bukwaru unu eburu l'obu.

⁷ Unu zhije iya ụnwegirima unu ọkpobe ezhizhi. Unu bọje iya l'ụja nteke unu nọdu anọdu l'ụlo unu mẹe nteke unu l'eje l'echi-ụzo mẹe nteke unu zẹe azẹe mẹe nteke unu kfụru akfụru.

⁸ Unu gbarụ iya l'ẹka t'ọ bụru iwhe-ọhubama, unu ekebeje iya ekebe l'egedege-iwhu nke ọwhu unu l'a-nyatajẹ iya.

⁹ Unu dee ya ede l'ọkpa mgbo ụlo unu mẹe l'ọnu-abata mkpụkpu unu.

¹⁰ Nteke Onye-Nwe-Ọha, bụ Chileke unu dubataleruwho unu l'alị ono, o riburu nna unu oche whẹ, bụ Ébirihamu mẹe Áyiziku mẹe Jékọpu lẹ nte lẹ ya l'a-nụ unu yẹle oke mkpụkpu mẹe ẹguru mkpụkpu mkpụkpu ono, l'ẹte abụa unu tụru iya l'onwunu;

¹¹ nụkwawho unu ụlo, ẹguru iwhe jiru eji, l'ẹte abụa unu kwarụ iya ye iya, nụ unu okpuru, a tụru atụ, l'ẹte abụa unu tụru mẹe mgbabu vayịnu yẹle oshi ólivu, l'ẹte abụa unu yeru, mbụ nteke ono, unu l'a-nọ eri g'ẹhu ha unu ono;

¹² unu kwabẹkwa ẹnya t'unu ba anyazọ Onye-Nwe-Ọha, onye ono, bụ iya dufutaru unu l'alị Íjiputu, bụ ẹka unu shi bụru ohu.

¹³ Unu tsụje Onye-Nwe-Ọha, bụ Chileke unu egvu; ọo ya kpụ bẹ unu l'a-bajẹru ẹja bya abụru ẹwha iya bẹ unu l'e-gudeje gụa ẹnwa.

¹⁴ Unu be etsokwa agwa ọdo, mbụ agwa ndu ono, buwheru unu mgburumgburu.

¹⁵ Lẹ Onye-Nwe-Ọha, bụ Chileke unu ono, unu l'iya nọ bụkwa Chileke, l'eko okoowhoo. Unu -mee nno bẹ ẹhu-eghughu Onye-Nwe-Ọha, bụ Chileke unu ono l'a-wụ-kputakwa unu, mee unu t'unu tọhu lẹ mgboko-o.

¹⁶ Unu be ejekwa ọdata Onye-Nwe-Ọha, bụ Chileke unu, ẹgube ono, unu dataru iya lẹ Masa.

¹⁷ Iwhe Onye-Nwe-Ọha, bụ Chileke unu tụru l'iwu mẹe iwhe ọ sụru t'e meje yẹle iwhe ọ tọru ọkpa iya, bụ iwhe ọ sụru t'unu meje; t'unu dobejekwa iya dobeshia ya ike.

¹⁸ Unu mejee iwhe kfụru nhamụnha yẹle iwhe dụ ree l'ẹnya Onye-Nwe-Ọha, nke ọwhu l'ọo-dụru unu lẹ ree mẹe nke ọwhu unu l'a-bahụ je anata ẹguru alị ono, Onye-Nwe-Ọha riburu lẹ nte lẹ ya l'a-nụ nna unu oche whẹ,

¹⁹ chịshikota ndu ọhogu unu whẹ l'iwhu unu bụ iya bụ iwhe Onye-Nwe-Ọha kweru ụkwa iya.

²⁰ Lẹ mgbe l'iwhu nteke ụnwu unu l'a-jị unu sụ: “?Ọo gụnu b'ọ fụtaru mbụ iwu ono yẹle iwhe ono, a tọru ọkpa iya ono mẹe nsọ ono, Onye-Nwe-Ọha, bụ Chileke anyi doberu t'anyi tsoje?”

²¹ Iwhe unu l'e-kfuru ụnwu unu ono bụ ọwaa: “Anyi shi bụru ohu Fero l'alị Íjiputu, Onye-Nwe-Ọha gude ọkpehu iya dufuta anyi l'alị Íjiputu ono.

²² Anyi gude ẹnya anyi whụa iwhe-awhụrulenya mẹe oke iwhe dụ biribiri, harụ kpaa kpaa, Onye-Nwe-Ọha meru kpua alị Íjiputu yẹle Fero mẹe ndu alị iya l'owhu.

²³ O dufuta anyi l'ẹka ono, nke ọwhu l'oo-dubata anyi l'alị ono, o riburu nna anyi oche whẹ lẹ nte lẹ ya l'a-nụ whẹ.

²⁴ Onye-Nwe-Ọha bụru iya bẹ sụru t'anyi mekotaje iwhe ono, ọ tọru ọkpa iya ono, t'unu tsụje Onye-Nwe-Ọha, bụ Chileke anyi egvu, nke ọwhu l'ọo-dụru anyi lẹ ree ntekenteke mẹe nke ọwhu l'oo-dobe anyi ndzụ, ẹgube ọ dụ ntanụ-a.

²⁵ Ọo-bụru anyi ọdu chịriri mẹ anyi doo ẹnya ndo emekota iwhe lile Onye-Nwe-Ọha, bụ Chileke anyi tụru l'iwu, ẹgube ono, ọ sụru t'anyi meje iya.”