Ditoronomi 5 - BAYỊBURU Ẹzaa

Iwu iri

¹ Mósisu bya ekua Ízurẹlu l'owhu ndzuko sụ whẹ: “Unubẹ ndu Ízurẹlu, unu nụkwa iwhe Onye-Nwe-Ọha tọru ọkpa iya yẹle nsọ, o doberu t'e tsoje, bụ iwhe mu l'eme t'ọ ghaa unu ọhu lẹ nchị ntanụ-a. Unu nwụa ya ọnwu-ẹkwo, unu edoo ẹnya ndo eme iya ememe.

² Onye-Nwe-Ọha, bụ Chileke anyi bẹ anyi l'iya gbakwarụ ndzụ l'ugvu Horẹbu.

³ Ọ tọ bụkwa nna anyi oche whẹ bẹ whẹ lẹ Onye-Nwe-Ọha gbarụ ndzụ ono, ọo anyịbedua, mbụ anyịbedua g'anyi ha, bụ ndu nọ ndzụ ntanụ-a.

⁴ Onye-Nwe-Ọha bẹ shi lẹ nhamụnha ọku kfuru okfu yeru unu l'iwhu l'iwhu l'eli ugvu.

⁵ Mbẹdua kfụkahu unu lẹ Onye-Nwe-Ọha l'echi nteke ono, ekfuru unu iwhe Onye-Nwe-Ọha kfuru nkele egvu ọku ono guderu unu, unu te enyihu ugvu ono. Iwhe o kfuru bụ:

⁶ “ ‘Ọo Mu bụ Onye-Nwe-Ọha, bụru Chileke unu, mbụ onye ono, dufutaru unu l'alị Íjiputu, l'alị ẹka ono, unu shi bụru ohu.

⁷ “ ‘T'ọ bọ dụkwa iwhe ọdo, unu l'a-bajẹru ẹja, gbahaa mụbe Chileke kpụ.

⁸ “ ‘Unu be emetakwaru onwunu ntẹkpe, e meru ọ dụ g'ọo iwhe nọ l'imigwe, m'ọ bụ iwhe nọ lẹ mgboko, m'ọbu iwhe nọ lẹ mini ime-alị.

⁹ Unu ba abajẹkwaru whẹ ẹja m'ọ bụ jeeru whẹ ozhi. O noo nkele mụbe Onye-Nwe-Ọha, bụ Chileke unu l'ekoje okoowhoo. Mu l'ahụ̀je ndu kpọru mu ashị àhụ̀hù iwhe-dụ-ẹji, whẹ meru mu; kwobe iya hụ̀a ụnwu whẹ mẹe ụnwu nwanwa whẹ mẹe ụnwu nwanwa-nwanwa whẹ àhụ̀hù.

¹⁰ Ọle iwhe bụ ndu yeru mu obu, eme iwhe iwu mu kfuru bẹ mu l'emeje tẹ n-yemobu mu bụru o-je-lẹ-nwanwa l'ẹhu whẹ.

¹¹ “ ‘Unu be ekujekwa ẹwha mụbe Onye-Nwe-Ọha, bụ Chileke unu l'ụzo l'akfụaru nhamụnha. Nkele mụbe Onye-Nwe-Ọha ta abyakwa l'a-ha ndu l'ekuje ẹwha mu l'ụzo l'akfụaru nhamụnha tẹ mu ba anụ whẹ awhụ.

¹² “ ‘Unu nyatakwa mee mbọku Sabatụ, bụ mbọku ọtuta-ume t'ọ dụ nsọ, ẹgube ono Onye-Nwe-Ọha, bụ Chileke unu tụru iya unu ọ bụru iwu.

¹³ Ọo abalị ishii bẹ unu l'e-seje anya gude jekota ozhi unu.

¹⁴ Ọle mbọku nke ẹsaa bụ mbọku ọtuta-ume nke Onye-Nwe-Ọha, bụ Chileke unu. Tọ bọ dụkwa ozhi, unu l'e-jeje mbọku ono. Unubẹdua l'ishi onwunu mẹe ụnwu unu mẹe ndu unu gbarụ ohu mẹe élwù unu mẹe ndu lwarụ alwa, bu lẹ mkpụkpu unu be ejejekwa ozhi mbọku ono, ọchikwa ume bẹ unu l'a-tụtaje mbọku ono.

¹⁵ Unu nyatakwa l'unu shi bụru ohu l'alị Íjiputu, Onye-Nwe-Ọha, bụ Chileke unu bya egude ike iya mẹe ọkpehu iya dufuta unu l'ẹka ono. O noo g'o gude Onye-Nwe-Ọha, bụ Chileke unu l'atụru iya unu l'iwu sụ t'unu tụtaje ume mbọku ọtuta-ume.

¹⁶ “ ‘Unu kwabẹje nna unu lẹ ne unu ugvu, ẹgube ono Onye-Nwe-Ọha, bụ Chileke unu tụru iya unu ọ bụru iwu. Ọo ya bụ, nke ọwhu ndzụ unu l'a-kpọliberu akpọliberu, iwhe adụru unu lẹ ree l'alị ono, Onye-Nwe-Ọha, bụ Chileke unu l'abya unu anụnu.

¹⁷ “ ‘Unu be egbujekwa ọchi.

¹⁸ “ ‘Unu be erijekwa ogori.

¹⁹ “ ‘Unu be ezhijekwa oshi.

²⁰ “ ‘Unu ba atukobejekwa madzụ ibe unu iwhe l'oomee.

²¹ “ ‘Tẹ nyee madzụ ibe unu m'ọ bụ ụlo iya m'ọ bụ alị iya m'ọ bụ ohu, ọ gbatarụ agbata m'ọ bụ élwù iya, mbụ-zhia iwhe madzụ ibe unu nwe enwe ba adụkwa unu nke t'a sụ l'ọo unu nwe iya.’

²² “Ọo okfu ono bẹ Onye-Nwe-Ọha kfuru unu l'eli ugvu nteke ono, unu dzukoberu. O shi l'ime ọku mẹe l'urwukpu yẹle ẹkpuroochi gude olu, l'ede edede kfuru yeru unu. Ọ tọ dụdu iwhe ọdo, o yekoberu iya. O dee ya ede l'eli okpekpu ẹwhuru labọ parụ nụ mu.”

Egvu guderu ndu Ízurẹlu l'ugvu Sáyinayi

²³ O be g'unu nụru olu-okfu ono g'o shi l'ime ẹkpuroochi ekfu eyeru unu, tẹmenu ọku l'adzụ l'eli ugvu ono, whẹ byakfuta mu mbụ ndu bụ ishi l'ikfu unu l'owhu mẹe ndu bụ ọgurenya unu

²⁴ bya asụ mu: “Onye-Nwe-Ọha, bụ Chileke anyi bẹ goshiwaru anyi ọ-dụ-biribiri iya mẹe g'ọ habe shii. Tẹmenu anyi nụkwaawho olu-okfu iya g'o shi lẹ nhamụnha ọku ono ekfu. Ntanụ bẹ anyi whụru lẹ Chileke kfuru okfu yeru madzụ, madzụ ọbu nọdule-ẹ ndzụ.

²⁵ ?Ndẹe g'anyi l'e-shi whụa ọnwu je adaba iya? Nkele eze ọku-a l'e-kegbushikwa anyi mẹ anyi kwaa nụgburu olu-okfu Onye-Nwe-Ọha, bụ Chileke anyi.

²⁶ O noo nkele ọ tọ dụdu madzụ mmaanụ, nụjewaru olu-okfu Chileke, nọ ndzụ, megee nọdu ndzụ, ẹgube-ẹ, anyi nụru iya g'o shi lẹ nhamụnha ọku ekfu eyeru anyi.

²⁷ Iwhe unu kfuru mu bụ tẹ mu jekubechia Onye-Nwe-Ọha ntse, je anụtakota iwhe lile Onye-Nwe-Ọha, bụ Chileke unu l'e-kfu. E -megee, mu ekfuru unu iwhe lile Onye-Nwe-Ọha, bụ Chileke unu kfuru. L'unu l'a-ngabẹ-ẹ nchị mee ya eme.”

²⁸ Tọ dụ iya bụ, Onye-Nwe-Ọha nụa okfu unu kfuru nteke ono, unu l'ekfu eyeru mu, Onye-Nwe-Ọha sụ mu: “Okfu, ndu a kfuru ghu bẹ mu nụkotawaru. Iwhe lile, whẹ kfuru dụkwa ree.

²⁹ Nggẹ l'ọo iwhe l'obu whẹ l'a-dụgburu ẹgube-ẹ, shi nno atsụ mu egvu, edobe iwhe lile, mu tụru l'iwu mẹ iwhe adụru whẹ lẹ ree, dụru ụnwu whẹ jeye lẹ gbururu.

³⁰ Tụgbua je asụ whẹ tẹ whẹ lawhukota azụ l'ụlo-ẹkwa ebubu whẹ.

³¹ Ọle, tẹ gụbedua nọkube mu l'ẹka-a nke ọwhu mu l'a-karu ghu iwhe lile, mu sụru t'e meje mẹe iwhe mu tọru ọkpa iya mẹe nsọ, mu doberu t'e tsoje, bụ iwhe l'ii-zhi whẹ nke ọwhu whẹ l'a-nọ eme iya l'alị ono, mu l'eme tẹ mu nụ whẹ t'ọ bụru nkewhe.”

³² Ọo ya bụ, unu dokwaa ẹnya ndo, meje iya gẹ Onye-Nwe-Ọha, bụ Chileke unu sụru t'unu mee ya. Unu ba ahakwa iya, melahaa iwhe ọdo.

³³ Unu tụkokwa ụzo ono, Onye-Nwe-Ọha, bụ Chileke unu sụru t'unu shi ono shije, nke ọwhu unu l'a-nọdu ndzụ, iwhe adụru unu lẹ ree, tẹmenu ndzụ unu etsee ogologo l'alị ono, l'a-bụru nke unu ono.