Ditoronomi 4 - BAYỊBURU Ẹzaa

Mósisu l'ekfu tẹ ndu Ízurẹlu meje iwhe a tụru whẹ l'iwu

¹ Unubẹ ndu Ízurẹlu, unu ngabẹkwa nchị l'iwhe ono, Onye-Nwe-Ọha tọru ọkpa iya yẹle nsọ ono, mu l'ezhi unu. Unu mekwaa ya ememe nke ọwhu unu l'a-nọdu ndzụ bahụ je anata alị ono, Onye-Nwe-Ọha, bụ Chileke nke nna unu oche whẹ l'eme tẹ ya nụ unu t'ọ bụru nke unu.

² Unu be eyekwakwa iwhe l'okfu ono, mu l'ekfuru unu, unu eje ewofukwa iya iwhe. Unu meje iwu Onye-Nwe-Ọha, bụ Chileke unu, bụ iwhe ono, mu l'ekfuru unu.

³ Unu gudewaa ẹnya unu whụ iwhe Onye-Nwe-Ọha meru l'okfu ẹhu agwa Bálu-peyọ, mbụ gẹ Onye-Nwe-Ọha, bụ Chileke unu meru whẹ, whẹ yifukota bụ iya bụ ndu lile, nọ l'echilabọ unu, bụ ndu tsoru agwa Bálu-peyọ ono.

⁴ Obenu l'unubẹ ndu ọwhu chịru ẹka unu kfụkwee lẹ Onye-Nwe-Ọha, bụ Chileke unu bẹ nọkota ndzụ byeye ntanụ ọwa.

⁵ Unu lekwa, mu zhiakwaru unu iwhe Onye-Nwe-Ọha tọru ọkpa iya yẹle nsọ iya; ẹgube Onye-Nwe-Ọha, bụ Chileke mu sụru tẹ mu zhia ya unu, nke ọwhu unu l'a-nọ eme iya eme l'alị ono, unu l'eje anata.

⁶ Unu dobekwa iya, unu eme iya ememe, ọo ya l'e-goshi unu ụzo mmamagụ, bụru iya l'e-me t'iwhe doje unu ẹnya l'ẹka mba gẹ mba ha nọ, bụ ndu l'e-bekochaa nụa iwhe lile ono, Onye-Nwe-Ọha tọru ọkpa iya ono kfulahaa sụ: “Nke bụ ezhi-okfu bụ lẹ mba-a, parụ ẹka-a bụkwa mba, manụkaru ágụ, bụru mba, iwhe l'edoje ẹnya!”

⁷ Sụa, ?ndẹhunu mba ọdo, parụ ẹka, agwa whẹ nọkube ntse gẹ Onye-Nwe-Ọha, bụ Chileke anyi l'anọkubeje anyi nteke anyi ryakuru iya?

⁸ Tẹ ?ndẹe mba ọdo, parụ ẹka, nweru iwu yẹle nsọ, kfụru nhamụnha g'ọo iwu-a, mu l'atụshiru unu ẹgube-ẹ ntanụ?

⁹ Ọo lẹwho t'unu kwabẹru onwunu ẹnya, nwụberu ndzụ unu ọkpobe ẹnya. Unu ba anyọhakwa iwhe ono, unu gude ẹnya unu whụa, mbụ t'ọ bọ lụfukwa unu alụfu l'obu jeye gẹ unu l'a-nọ-beru ndzụ. Ọ chịa t'unu zhia ya ụnwu unu mẹe ụnwu nwanwa unu whẹ.

¹⁰ Mbọku ono, unu kfụru l'atatiwhu Onye-Nwe-Ọha, bụ Chileke unu l'ugvu Horẹbu bẹ Onye-Nwe-Ọha sụkwaru mu: “Kua ndu Ízurẹlu ndzuko l'atatiwhu mu tẹ mu mee t'okfu mu rwua whẹ lẹ nchị, nke ọwhu whẹ l'a-nwụta mu ọtsu egvu jeye gẹ whẹ l'a-nọ-beru l'alị ono, tẹmenu whẹ ezhikwaa ya whọ ụnwu whẹ.”

¹¹ Tọ dụ iya bụ, unu bya ntse bya akfụru l'ọkpa-ugvu ono; ọku l'enwu whowhowho l'eli ugvu ono ebulihuje ebulihu ala lẹ nhamụnha igweli. Urwukpu sọ-kputa; ẹka lile gbakọta ọochi.

¹² Onye-Nwe-Ọha shi lẹ nhamụnha ọku ono kfuru yeru unu. Ọ bụru olu-okfu bẹ unu l'anụ, unu ta awhụ onye l'ekfu iya nụ. Ọ bụleruwho olu-okfu bẹ unu nụru kpụ.

¹³ Ọ tụkashiaru unu ọgbandzu iya sụ t'unu dobe iya, bụ iya bụ Iwu iri ono, o deru unu l'okpekpu ẹwhuru labọ.

¹⁴ Onye-Nwe-Ọha nọdu nteke ono sụ mu tẹ mu zhia unu iwhe ọ tọru ọkpa iya yẹle nsọ nkiya nke ọwhu unu l'a-nọ eme iya l'alị ono, unu l'ada azụ iya ọwhuu eje anata.

Eebuchi ọbaru agwa ẹja

¹⁵ Ọ kwa iya bụ t'unu kwabẹkwaru onwunu ẹnya; eshi-ọwhu l'ọ tọ dụa ụgbugba iwhe unu whụru mbọku ono, Onye-Nwe-Ọha shi lẹ nhamụnha ọku kfuru okfu yeru unu l'ugvu Horẹbu.

¹⁶ Unu kwabẹkwaru onwunu ẹnya t'unu be egude l'unu l'apyị ntẹkpe merwua onwunu; ntẹkpe ọbu je m'ọo l'adụ ọdu agha, o beru e je l'a-pyị iya t'ọ dụ g'ọo nwoke, ọdua l'ọo nwanyị.

¹⁷ M'ọkwanu t'a pyịa ya t'ọ dụ g'ọo anụ, dụ lẹ mgboko-o, ọdua l'ọo ẹnu, l'ewhe l'eli,

¹⁸ ọdua l'ọo iwhe l'awụ l'ẹwho, m'ọkwanu ẹma, bu lẹ mini.

¹⁹ Unu kwabẹru onwunu ẹnya t'ọ bọ bụkwa, unu -palia ẹnya imeli whụ ẹnyanwu m'ọ bụ ọnwa m'ọ bụ kpokponde mẹwaro iwhe lile, dụkota l'igweli, ya alọru unu ye t'unu balahaaru iya ẹja, jelahaaru iya ozhi, mbụ iwhe lile ono, Onye-Nwe-Ọha, bụ Chileke unu meru, keshiaru ndu lile, nọkota lẹ mkpula igweli-a l'owhu.

²⁰ Obenu lẹ Onye-Nwe-Ọha lọfutawaru unu l'alị Íjiputu ono, bụ ovo-chichichi ọku, l'adazeje igwe ono, t'unu bụru iya ndu o ketaru l'oke, ẹgube ono, unu bụ iya ntanụ.

²¹ Tẹmenu, Onye-Nwe-Ọha kwobe okfu ẹhu unu tukoshi mu ẹhu-eghughu iya bya eribua nte sụ lẹ mu ta abyadụ l'ada ẹnyimu Jọ́danu mẹe lẹ mu ta abyadụ l'abahụ l'ẹguru alị ono, Onye-Nwe-Ọha, bụ Chileke unu l'eme tẹ ya nụ unu t'ọ bụru oke iwhe unu,

²² sụ lẹ mu nwụhufutaje l'alị ọwa-a; lẹ mu ta abyadụ l'ada ẹnyimu Jọ́danu. L'ọo unubẹdua l'a-da iya je anata ẹguru alị ono.

²³ Unu kwabẹkwaru onwunu ẹnya t'unu ba anyazọ ọgbandzu Onye-Nwe-Ọha, bụ Chileke unu, mbụ ono, unu l'iya gbarụ. Unu ba anyazọkwa iya je akpụta ntẹkpe, m'o beru ọ dụ ọdu agha, mbụ iwhe ono, Onye-Nwe-Ọha, bụ Chileke unu buchiru unu t'unu ba abashịru ẹja.

²⁴ O noo nkele Onye-Nwe-Ọha, bụ Chileke unu bụkwa ọku, l'eke eke, bụru Chileke, l'eko okoowhoo.

²⁵ Ọ -bụru l'unu buru l'alị ono nọo ya ọdu; nwụshia ụnwegirima bya enwegeeru ụnwu nwanwa, unu nọdu nteke ono mebyishilahaa onwunu, mbụ je akpụta ntẹkpe, m'o beru ọ dụ ọdu agha, mbụ unu melahaa ejo-iwhe l'ẹnya Onye-Nwe-Ọha, bụ Chileke unu, shi nno kpatsua ya ẹhu-eghughu;

²⁶ mu l'ekukwa igwe kua alị oku tẹ whẹ bya agbaa unu ẹka-ebe ntanụ-a l'ọ tọ dụdu gẹ l'aa-nọ-beru, unu abụkotaru kpukpuru-swoo l'alị ono, unu l'ada ẹnyimu Jọ́danu eje anata ono. Unu te ebukwa iya anọ ọdu, unu abụkotaru kpurupyata.

²⁷ Onye-Nwe-Ọha l'a-tụkashi unu nnanụ nnanụ lẹ mba gẹ mba ha, ya abụru nwa ụmadzu olemole l'a-wafụ lẹ mba gẹ mba ha ono, Onye-Nwe-Ọha l'a-chịkashi unu t'unu laa.

²⁸ Ya abụru l'ẹka ono bẹ unu l'a-baru agwa, madzụ gude ẹka mee ẹja, mbụ agwa, e meru l'ẹwhuru yẹle oshi, tọo whụ ụzo; tọo nụ iwhe too ri nri, tọo nụ nshishi iwhe.

²⁹ Ọle, unu -nọdu l'ẹka ono chọo Onye-Nwe-Ọha, bụ Chileke unu bẹ unu l'a-chọtakwa iya-a, mbụkwa m'ọ -bụru l'unu gude obu unu g'ọ ha mẹe ndzụ unu g'ọ ha chọo ya.

³⁰ Unu jedelewho iwhe-ọtsulanu ono, nteke iwhe lile-e byakfutaru unu l'ikpazụ iya bẹ unu l'a-dakọbe lwakfuta Onye-Nwe-Ọha, bụ Chileke unu, bya emelahaa okfu iya.

³¹ L'eshi-ọwhu Onye-Nwe-Ọha, bụ Chileke unu bụ Chileke, l'awhụje imiko, bẹ l'ọoto byakwa l'a-jịka unu, tọ bya l'a-la unu l'iyi, tọ bya l'a-nyazọ ọgbandzu ono, yẹle nna unu oche whẹ gbarụ; o riru nte tukoberu whẹ iya.

Ọo Onye-Nwe-Ọha bụ Chileke

³² Unu kpaadaa ishi iwhe meru l'oge ndụ-ichee, tẹhenu a nwụa unu. Unu shi iya akpakpa lẹ nteke Chileke meru madzụ dobe lẹ mgboko. Unu kpaadaa ishi iwhe ono jeye l'ẹka igwe beru alị beru t'unu marụ, o nweru oke iwhe ha ẹgube-ẹ, mejehawaru nụ, m'ọ bụ l'akọ ẹtu iya dụjeru.

³³ ?O nweru ndu nụjeru olu Chileke l'ẹka o shi lẹ nhamụnha ọku ekfu okfu ẹgube unu nụru iya, unu nọdule-ẹ ndzụ?

³⁴ ?T'o nweru agwa, tụjeru ama je anafụta mba nọdu mba ọdo l'ẹka bya edoberu onwiya? Mbụ-a gude iwhe-adata mẹe iwhe-awhụrulenya mẹe iwhe dụ biribiri mẹe ọgu, gude ike mẹe ọkpehu iya mẹe oke n-yemegvu; ẹgube ono Onye-Nwe-Ọha, bụ Chileke unu meru unu l'alị Íjiputu, unu gude ẹnya unu whụ?

³⁵ E goshiru unu iwhe ono nke ọwhu unu l'a-marụ l'ọo Onye-Nwe-Ọha bụ Chileke, l'ọ tọ dụhedu Chileke ọdo, dụ nụ gbahaa yẹbedua.

³⁶ O shi l'imigwe mee t'unu nụa olu iya, shi nno lọo unu ẹka lẹ nchị. O goshi unu eze ọku nkiya l'eliwhe, unu nụa olu-okfu iya g'o shi lẹ nhamụnha ọku ono ekfu.

³⁷ Ọo l'o yeru nna unu whẹ obu, bya ahọta ẹpa whẹ; b'o gude bya l'onwiya bya egude ọkpehu iya ono, parụ ẹka dufuta unu l'alị Íjiputu,

³⁸ bya achịfukotaru unu mba gẹ mba ha ono, ka unu shii, ka unu ọkpehu, shi nno dubata unu l'alị whẹ nụ iya unu t'ọ bụru oke-iwhe unu ẹgube, ọ dụ ntanụ-a.

³⁹ Iwhe unu l'a-marụ ntanụ, ya adụkwawho unu l'obu bụ l'ọo Onye-Nwe-Ọha bụ Chileke l'imigwe ọwhu dụ l'imeli, bụru iya lẹ mgboko ọwhu nọ iya lẹ mkpula, l'ọ tọ dụhedu Chileke ọdo dụ nụ.

⁴⁰ Ọo ya bụ, t'unu mejekwa iwhe ọ tọru ọkpa iya yẹle iwhe ọ sụru t'e meje, bụ iwhe mu l'ekfuru unu ntanụ-a, ndụge iwhe adụru unu lẹ ree dụru ụnwu unu, bụ ndu ọwhu l'etso unu etso mẹkwawho nke ọwhu ndzụ unu l'a-kpọliberu l'alị ono, Onye-Nwe-Ọha, bụ Chileke unu l'eme tẹ ya nụ unu t'ọ bụru nke unu jeye lẹ gbururu.

Mkpụkpu, onye gburu madzụ l'a-gbabajẹ je ezeeru ndzụ

⁴¹ Tọ dụ iya bụ, Mósisu wofuta mkpụkpu ẹto dobe iche l'ụzo ẹnyanwu-awata ẹnyimu Jọ́danu,

⁴² ẹka onye gburu madzụ l'a-gbajẹru laa, mbụ onye gburu madzụ ibe iya l'amaga ama, l'ẹbe abụ lẹ yẹle onye ọbu dụhawaa l'okfu. Onye ọbu -gbawarụ laa mkpụkpu lanụ l'ime mkpụkpu ẹto ono, ya ezeeru ndzụ iya.

⁴³ Mkpụkpu ọbu bụ: Beza, dụ l'echi-ẹgu alị ono, dụ whosaa. Ẹka ono bụ ẹka ikfu Rúbẹnu l'a-gbajẹru laa. Mkpụkpu ọdo bụ Ramótu, dụ l'alị Giledu, bụ ẹka ikfu Gadu l'a-gbajẹru laa. Ọdo bụ Golanu, dụ l'alị Báshanu, bụ ẹka ikfu Manáse l'a-gbajẹru laa.

Mósisu tọkashiru iwu t'o doo ẹnya

⁴⁴ Ọ waa bụ iwu, Mósisu tụru doberu ndu Ízurẹlu.

⁴⁵ Ọ waa bụ iwhe Onye-Nwe-Ọha tụru l'iwu mẹe iwhe ọ tọru ọkpa iya mẹe nsọ iya, Mósisu doberu ụnwu Ízurẹlu gẹ whẹ lụfuta-geeru l'alị Íjiputu,

⁴⁶ mbụ nteke whẹ nọ lẹ nsụda, dụ lẹ mgboro mkpụkpu Betu-peyọ, l'ụzo ẹnyanwu-awata ẹnyimu Jọ́danu l'alị Sáyihọnu, bụ eze ndu Amọru, onye shi buru lẹ mkpụkpu Hẹshibonu, mbụ onye ono, Mósisu yẹle ụnwu Ízurẹlu lwụ-gburu nteke whẹ lụfutaru l'alị Íjiputu.

⁴⁷ Whẹ nata alị Sáyihọnu ono mẹe alị Ọgu, bụ eze ndu Báshanu. Ndu eze labọ ono bụ ndu eze ndu Amọru, shi buru l'ụzo ẹnyanwu-awata ẹnyimu Jọ́danu.

⁴⁸ Alị, dụkota lẹ mkpụkpu Arowa l'agụga ọnu-iyi Anọnu bẹ tsokotakwa iya, je akpaa l'ugvu Siriyọnu, bụ iya bụ ugvu Hemọnu.

⁴⁹ Nsụda Araba l'owhu l'ụzo ẹnyanwu-awata Jọ́danu tsokwaru iya whọ; jeye l'eze-ẹnyimu Araba, mbụ lẹ n-wezeta ọkpa-ugvu Pishiga.