Ditoronomi 33 - BAYỊBURU Ẹzaa

Mósisu gọru ọnu-ọma nụ ikfu Ízurẹlu l'ẹhu l'ẹhu

¹ Ọ waa bụ ọnu-ọma, Mósisu, bụ onye nke Chileke gọru nụ ụnwu Ízurẹlu tẹmenu ọ nwụhude.

² Ọ sụru: Onye-Nwe-Ọha bẹ shi l'ugvu Sáyinayi bya. O shi l'alị Siye waaru anyi whoo g'ọo ẹnyanwu ụtsu. O shi l'ugvu Paranu nwua swee. Ndu, whẹ l'iya lị bụ ụnukurunu ndu dụ nsọ; ọ parụ ọku, l'enwu enwu l'ẹka-ụtara iya.

³ Sụa, ndiwhe b'o yeru obu. Ndu dụru Onye-Nwe-Ọha lẹ nsọ bẹ nọkota iya l'ẹka. Whẹ l'adajẹ lẹ mgboro ọkpa iya, whuzetaru iya iwhu l'alị. Ọ bụru iwhe o kfuru bẹ whẹ l'emeje.

⁴ Mósisu tụru iwu doberu anyi, ọ bụru iya bụ oke-iwhe ẹpa Jékọpu l'owhu ketaru.

⁵ Ọo Onye-Nwe-Ọha bụ eze ndu Jeshurunu nteke ono, ndu ishi ndu Ízurẹlu, mẹe ikfu ndu Ízurẹlu l'owhu dzukoru.

⁶ “Tẹ ndzụ dụkwa ikfu Rúbẹnu, t'o bo chihukwa echihu. Ọo l'ezhi l'ẹpa iya ta abadụ nwishi.”

⁷ Iwhe o kfuru l'ẹhu ikfu Juda bụ: “Gụbe Onye-Nwe-Ọha, nụkwaa olu Juda. Dulatakwa iya t'ọ lwakfuta ndu nkiya. Mekwaa t'ẹka shia ya ike l'ọgu. Yejenuru iya ẹka t'ọ lwụ-gbua ndu ọhogu iya.”

⁸ Ikfu Lívayi b'o kfuru okfu ẹhu whẹ sụ: “Gụbe Onye-Nwe-Ọha, menua t'ikfu Lívayi gudeje ido, bụ tumimu yẹle urimu ghu, marụ iwhe bụ uche-obu ghu, mbụ ndu ono, ị dataru lẹ Masa, bụru ndu okfu darụ gụ lẹ whẹ lẹ mini Meriba.

⁹ Ọo whẹ bẹ kfuru nke nna whẹ yẹle nke ne whẹ sụ: ‘Ọ tọ dụkwa iwhe anyi gụberu whẹ.’ Ụnwegirima, whẹ nwụru anwụnwu bẹ whẹ sweru ẹnya, whẹ ta ama ndu unwune whẹ bụ. Ọ bụru okfu gụbe Onye-Nwe-Ọha bẹ whẹ letaru ẹnya eme, bya edobe ọgbandzu ghu.

¹⁰ Ndibe Jékọpu bẹ whẹ l'e-zhi nsọ, i doberu. Whẹ ezhia ndu Ízurẹlu iwu ghu. Ọo whẹ l'a-kpọjeru ghu ụ̀nwù-isẹnsu ọku. Ọ bụru whẹ l'a-gbajẹ ẹja ọkpokota-iwhe-ọku l'ẹnya-mgbẹja ghu.

¹¹ Gụbe Onye-Nwe-Ọha, gọkwaru ọnu-ọma ye l'anya, whẹ l'ese. Natakwa ozhi, whẹ gude ẹka whẹ jee. Nyakakwaa ndu wulihuru etso whẹ okfu ishi-nka, mẹe nke ndu kpọru whẹ ashị, nke ọwhu whẹ l'ẹte apalihe ishi apali ọdo.”

¹² Ikfu Bénjaminu b'o kfuru okfu ẹhu nke whẹ; sụ: “Onye Onye-Nwe-Ọha yeru obu bẹ l'a-nọdu iya lẹ mgboro tụsaa ẹhu, nkele ọo Onye-Nwe-Ọha l'egbochitaje iya eswe l'ẹnyashi. Onye ono, Onye-Nwe-Ọha yeru obu bẹ Onye-Nwe-Ọha l'akwọjeru l'azụ.”

¹³ Ikfu Jósẹfu b'o kfuru okfu ẹhu nke whẹ sụ: “T'alị whẹ bụkwaru alị, Onye-Nwe-Ọha gọru ọnu. T'o mekwaa t'iji ọma, shi l'imigwe dashịjeru whẹ, ya emee t'ime alị nwụjeru whẹ mini fọfofo.

¹⁴ Tẹ Onye-Nwe-Ọha mekwaa t'o chijeeru whẹ, mbụ anwụ, l'emeje t'iwhe, e meberu l'alị mehu ọkpobe emehu. T'iwhe, kagezhia ree rwujekwa whẹ ẹka l'ọnwa l'ọnwa.

¹⁵ T'iwhe, kagezhia ree, shi l'ugvu ndụ-ichee rwubekwa whẹ ẹka, yẹle ẹguru iwhe shikota lẹ nwa ugvu ono, l'a-nọ jeye lẹ gbururu.

¹⁶ T'iwhe, kagezhia ree lẹ mgboko-o, yẹle iwhe jiru iya nụ rwubekwa whẹ ẹka. T'ikfu Jósẹfu tụbakwa onye ono l'ẹnya mbụ onye ono, nọ lẹ nwooshi nshịi ono, ọku l'enwu enwu. T'ọnu-ọma-a l'owhu dụkotakwa l'ishi ikfu Jósẹfu, mbụ onye ono bụ iya bụ ishi l'unwune iya.

¹⁷ Ọ-dụ-biribiri iya dụ g'ọo nke oke-eswi ne iya vu ụzo nwụa, mpu iya dụ g'ọo mpu atsụ. Ọo ya bẹ l'oo-gudeje adụ-tsushi ndiwhe, mbụ je akpaa l'ẹka mgboko beru. O noo gẹ ụnukurunu ẹpa Ífuremu dụ ndono, mbụ l'o noo gẹ agụta agụta ẹpa Manáse dụ ndono.”

¹⁸ Ikfu Zébulọnu b'o kfuru okfu ẹhu nke whẹ sụ: “Zébulọnu, t'ẹhu tsọje unu ụtso nteke unu lụfuru alụfu. Ísaka, t'ẹhu tsọje unu ụtso nteke unu nọdu l'ibe unu.

¹⁹ Whẹ l'e-ku ụnwu eliwhe tẹ whẹ dzukoo l'ugvu whẹ. Whẹ anọdu l'ẹka ono gbaa ẹja, dụ chịriri. Whẹ l'e-gude iwhe-ọma, jiru eze-ẹnyimu, mẹe ẹku, domigeeru onwiya l'alị nvẹja buru.”

²⁰ Ikfu Gadu b'o kfuru okfu ẹhu nke whẹ sụ: “T'ajaja bụru nke onye meru alị Gadu t'ọ saa ọsa. Ikfu Gadu tọlewhoo nwẹhu nmaa pyataa g'ọo oduu-gburu-agụ nọdu l'ẹka ono. Iwhe lile, whẹ whụru bẹ whẹ l'ezhijashije ẹka iya yẹle ishi iya.

²¹ Ọo alị ẹka, kakọta ree bẹ whẹ họtaru doberu onwowhe, mbụ l'ẹka, a nụru whẹ bẹ bụ oke, gbarụ ndu bụ ishi. Nteke ono, ndu ishi ndu Ízurẹlu dzukojeru, bẹ bụ whẹbedua meru iwhe kfụru nhamụnha l'ẹnya Onye-Nwe-Ọha, ọo whẹ bẹ meru iwhe ono, Onye-Nwe-Ọha sụru tẹ ndu Ízurẹlu mee.”

²² Ikfu Danu b'o kfuru okfu ẹhu nke whẹ sụ: “Ikfu Danu bẹ bụ nwa oduu-gburu-agụ, shi lẹ Báshanu akfụ garamu garamu eje abya.”

²³ Ikfu Náfutali b'o kfuru okfu ẹhu nke whẹ sụ: “Ikfu Náfutali bẹ tụbaakwaru Onye-Nwe-Ọha l'ẹnya. Ọnu-ọma Onye-Nwe-Ọha jiakwaru iya ẹka ẹbo-ẹbo. T'oke-alị iya shikwa l'ụzo eze-ẹnyimu Gálili dụ je akpaa l'ụzo ọhuda.”

²⁴ Ikfu Asha b'o kfuru okfu ẹhu nke whẹ sụ: “T'ọnu-ọma, dụru ụnwu Asha kakọtakwa nke ụnwu ndu ọdo shii. T'ọ tụbakwa unwune iya l'ẹnya. T'ọkpa iya dekwaru ederu lẹ mmanụ.

²⁵ Ọo igwe yẹle ope bẹ unu l'e-gudeje aswọ-chi ọnuzo unu. Ọ bụru g'unu l'a-nọ-beru bụ g'ike unu l'e-jeberu.”

²⁶ “Ọ tọ dụkwa onye dụ g'ọo Chileke nke Jeshurunu, onye l'aghajajẹ igweli, bya agbaarụ unu mkpu, tẹmenu l'oogudeje ọ-dụ-biribiri iya gbaghata l'urwukpu.

²⁷ Ọo Chileke ono, shi l'edenwede bẹ bụ onye unu l'a-nọ l'ime iya ezeru ndzụ. Oo-woru ẹka dẹe unu adẹe lẹ mkpula jeye lẹ gbururu gude gbẹe unu ọkpu-ike. Ndu ọhogu unu bẹ l'ọochije baa whẹ ẹbaa l'atatiwhu unu sụ: ‘Unu gbunyia whẹ ẹnya!’

²⁸ Ọo ya bụ, ndu Ízurẹlu eburu l'ẹhu-guu. Eri Jékọpu akpalahaa lẹ ntụsaru-ẹhu l'alị, witi lẹ balị dụ, mmẹe dụ iya. Iji eshi l'igweli adashịru whẹ.

²⁹ Ẹhu-ụtso bụkwa nke unu, unubẹ ndu Ízurẹlu. ?Ọo onye dụ g'ọo unu, unubẹ ndu Onye-Nwe-Ọha dzọfutaru? Ọo Onye-Nwe-Ọha bụ onye mgbochi, l'eyeru unu ẹka. Ọ bụru iya bụ ogu-ịgba, unu gude eku onwunu. Ndu ọhogu unu l'a-whụru godogodo byakfuta unu, unu adzọo whẹ okpurukpu fụtu-fụtu.”