Ditoronomi 31 - BAYỊBURU Ẹzaa

Jóshuwa l'anọ-chi ẹnya Mósisu

¹ O noo ya, Mósisu l'ekfu okfu ono gẹ l'ookfu iya anụ ndu Ízurẹlu gẹ whẹ ha

² sụ whẹ: “Mu gbawarụ ụkporo awha ugbo ishii ntanụ, ike, mu l'e-gude edu unu eje eje alwa alwa ta adụhedu mu. Onye-Nwe-Ọha bẹ kfuhawaru mu lẹ mu ta adadụ azụ ẹnyimu Jọ́danu azụ iya ọwhuu.

³ Ọo Onye-Nwe-Ọha, bụ Chileke unu l'onwiya l'e-vutaru unu ụzo, unu adaa ẹnyimu ono. Ọo-lakọta mba gẹ mba ha ono l'iyi l'atatiwhu unu, mee t'unu nata whẹ alị whẹ t'ọ bụru nkunu. Ọ bụru Jóshuwa l'a-nọduru unu l'ishi, t'unu daa ẹnyimu ono ẹgube ono Onye-Nwe-Ọha kfuru iya.

⁴ Onye-Nwe-Ọha l'e-me whẹ iwhe o meru ndu eze ndu Amọru, bụ Sáyihọnu yẹle Ọgu, nteke ono, ọ larụ whẹ l'alị whẹ l'iyi.

⁵ Onye-Nwe-Ọha l'e-woru whẹ ye unu l'ẹka. Unu emekota whẹ iwhe ono, mu tụru unu l'iwu t'unu mee whẹ.

⁶ T'obu shihukwa unu ike, t'egvu ba atsụkwa unu. Ba adụkwa iwhe l'e-ye unu egvu, ya eje adụkwa nteke unu l'a-la azụ azụ l'ẹka whẹ nọ. O noo nkele ọo Onye-Nwe-Ọha, bụ Chileke unu bẹ unu l'iya lị eje. Ọ tọ byakwa l'a-tụ unu owhelẹka, t'ọ bya l'a-parụ unu haa.”

⁷ Mósisu bya ekua Jóshuwa, nọdu l'atatiwhu ndu Ízurẹlu l'owhu sụ iya: “T'obu shihukwa ghu ike, t'egvu ba atsụkwa ghu nkele ọo gụbedua bẹ gụ lẹ ndu-a l'a-lị eje alị ọbu, Onye-Nwe-Ọha riburu lẹ nte lẹ ya l'a-nụ nna whẹ oche. Ọ bụru ghu l'e-me tẹ whẹ lwụta alị ono t'ọ bụru nke whẹ.

⁸ Ọo Onye-Nwe-Ọha l'onwiya l'e-vutaru ghu ụzo; ọo-nọdu swiru ghu eswiru. Ọ tọ byakwa l'a-tụ ghu owhelẹka, t'ọ bya l'a-parụ ghu haa. Tẹ egvu ba atsụkwa ghu, obu eje etekwa ghu etete.”

Gẹ l'ee-shije agụ iwu Onye-Nwe-Ọha

⁹ O noo ya, Mósisu bya edee iwu ono ede, parụ nụ ndu l'agbajẹ ẹja nụ Chileke, bụ ụnwu Lívayi, mbụ ndu ono, l'apajẹ Igbe-ọgbandzu Onye-Nwe-Ọha, nụkwa iya whọ ndu bụ ọgurenya Ízurẹlu l'owhu.

¹⁰ Mósisu tụaru whẹ iya l'iwu sụ: “O -rwujelewho lẹ ngvụcha awha ẹsaa, mbụ l'awha ono, l'eemeje t'ụgwo laa, bụ iya bụ nteke ono, l'eerije oge Ime-mkpu.

¹¹ Ndu Ízurẹlu byajẹlewho l'iwhu Onye-Nwe-Ọha, bụ Chileke unu l'ẹka ono, l'ọo-họta, unu agụa iwu-a l'atatiwhu ndu Ízurẹlu l'owhu t'o tsua whẹ etsu lẹ nchị.

¹² Kua ndu Ízurẹlu ndzuko, unwoke mẹe ụnwanyi mẹe ụnwegirima mẹe ndu mbyambya, bu l'ibe unu, tẹ whẹ bya angabẹ nchị, nwụta ọtsu Onye-Nwe-Ọha, bụ Chileke unu egvu, whẹ eleta ẹnya emekota okfu, dụ l'iwu-a g'ọ ha.

¹³ Ụnwu whẹ, bụ ndu l'ẹteke amahaa ya bẹ l'a-nụkwa iya whọ, nwụta ọtsu Onye-Nwe-Ọha, bụ Chileke unu egvu jeye g'unu l'e-buberu l'alị ono, unu l'a-da ẹnyimu Jọ́danu je anata.”

Onye-Nwe-Ọha l'anma ọkwa lẹ ndu Ízurẹlu l'e-megechaa kwefuru yẹbe Chileke ike

¹⁴ Tọ dụ iya bụ, Onye-Nwe-Ọha kfuru yeru Mósisu sụ iya: “Mbọku, l'ịi-nwụhu l'erwuakwa ntse. Kua Jóshuwa t'unu lịru je akfụru lẹ Ụlo-ẹkwa ndzuko tẹ mu nụ iya ozhi, l'ọo-nọ eje.” Mósisu yẹle Jóshuwa bya alịru je akfụru lẹ Ụlo-ẹkwa ndzuko ono.

¹⁵ Onye-Nwe-Ọha gude urwukpu, kpụru orogbodo bya lẹ Ụlo-ẹkwa ono. Urwukpu ono kpụa orogbodo keshita l'ọnu mgbo Ụlo-ẹkwa ndzuko ono.

¹⁶ Onye-Nwe-Ọha sụ Mósisu: “Ntaa b'ị byakwa l'alakfu nna ghu whẹ lẹ mma. Ndu-a bẹ bya l'a-wata ọwha onwowhe kutukutu g'ọo ụnwanyi ọkpara l'ẹka whẹ l'etso agwa ndu alị ono, whẹ l'e-je ebubu lẹ nke whẹ. Whẹ l'a-parụ mu haa; mebyia ọgbandzu mu, bụ ọwhu mu lẹ whẹ gbarụ.

¹⁷ O noo nteke ẹhu-eghughu l'a-gbanwuhu mu l'ẹhu l'ẹka whẹ nọ. Mu aparụ whẹ haa, wohaaru whẹ iwhu mu; a vụa whẹ kpatakpata. Ejo-iwhe yẹle iwhe-ọtsulanu, ha l'igweligwe l'a-dakfuta whẹ nke ọwhu whẹ l'a-nọdu mbọku ono kfua sụ: ‘Iwhe meru ejo-iwhe-e dakfuta anyi bụkwa l'ọo lẹ Chileke anyi ta anọhedu l'echilabọ anyi.’

¹⁸ Mbọku ono bẹ mu l'e-woha iwhu mu ewoha. Mkpata iya bụ lẹ whẹ woru iwhu ghaaru agwa ọdo, shi nno mee ejo-iwhe.

¹⁹ “Ngwa, unu woru egvu-a dee edede t'ọ dụru unu. Unu zhia ndu Ízurẹlu egvu ono t'o weru whẹ l'ọnu, nke ọwhu l'ọo-bụru iwhe mu l'e-gude gbaa whẹ ẹka-ebe.

²⁰ O noo nkele nteke mu l'e-durwu whẹ alị ono mini-ẹra eswi yẹle mmanụ-ẹnwu jiru ejiji, bụ iya bụ alị ono mu riburu lẹ nte lẹ mu l'a-nụ nna whẹ ono, whẹ rwulewho ẹka ono, rijilahaa ẹwho dalahaa rwẹkfu rwẹkfu, bẹ whẹ l'a-gharụ agwa ọdo iwhu jelahaaru iya ozhi, shi nno kolahaa mu ọkpa l'ishi, mebyilahaa ọgbandzu mu.

²¹ Nteke ejo-iwhe yẹle iwhe-ọtsulanu, ha l'igweligwe l'a-dakfuta whẹ, bẹ egvu-a l'a-bụru iwhe ẹka-ebe, maa whẹ ẹjo ẹka nkele ẹpa whẹ ta abyadụ l'agụ-buhu iya agụ-buhu. Tẹmenu mu dutade whẹ eje l'alị ono, mu riburu lẹ nte lẹ mu l'a-nụ whẹ, bẹ mu mahawarụ iwhe whẹ l'arị nke ememe.”

²² Ọo ya bụ, Mósisu bya edee egvu ono mbọku ono, bya ezhia ya ndu Ízurẹlu.

²³ Onye-Nwe-Ọha bya eye Jóshuwa nwa Nunu ozhi, l'ọo-nọ eje l'ẹka sụ iya: “T'obu shihukwa ghu ike, t'egvu ba atsụkwa ghu, nkele ọo gụbedua l'e-duru ndu Ízurẹlu laa alị ono, mu riburu lẹ nte lẹ mu l'a-nụ whẹ. Mu l'a-nọdu swiru ghu eswiru.”

²⁴ Mósisu bya edekota iwu ono l'ẹkwo defu iya l'ishi.

²⁵ Ọ bya ekfuaru ndu Lívayi, l'apajẹ Igbe-ọgbandzu Onye-Nwe-Ọha sụ whẹ:

²⁶ “Unu nata ẹkwo iwu-a woru ye l'agụga igbe-ọgbandzu Onye-Nwe-Ọha, bụ Chileke unu, t'ọ dụ l'ẹka ono bụru iwhe l'agba unu ẹka-ebe,

²⁷ nkele mu makọtaru g'unu gude ekwefube ike mẹe g'unu gude bụ-beru kpọkponyi. Ọ -bụru l'unu shiwa ntaa, mu nọkwadu ndzụ swiru unu-a bụtaru ndu l'ekwefuru Onye-Nwe-Ọha ike, lewaro gẹ l'ọo-dụ mẹ mu nwụhulewho!

²⁸ Unu kukoberu mu ndu bụ ọgurenya ikfu unu gẹ whẹ ha mẹe ndu bụ ishi unu, tẹ mu kfuru okfu-a ye whẹ lẹ nchị, kua igwe mẹe alị t'ọ bya agbaa whẹ ẹka-ebe,

²⁹ nkele mu mawarụ lẹ mu -nwụhulewho bẹ unu l'a-wata ome ejo umere, rehuru erehu, haa ụzo ono, mu tụru unu l'iwu sụ t'unu tsoje. O rwua lẹ mgbe l'iwhu, bẹ ejo-iwhe l'a-zụ-gude unu, nkele unu l'a-nọ eme ejo-iwhe l'ẹnya Onye-Nwe-Ọha, gude iwhe unu metaru l'ẹka unu kpatsua ya ẹhu-eghughu.”

Egvu, Mósisu gụru

³⁰ Tọ dụ iya bụ, Mósisu shilewho ishi lanụ gụa egvu ono jeye ọ gụfu iya l'ishi. Edzudzu-ọha ndu Ízurẹlu ono gẹ whẹ ha nụkota iya.