Ditoronomi 28 - BAYỊBURU Ẹzaa

Ọnu-ọma, a gọru nụ ndu l'edobe iwu

¹ Ọ -bụru l'unu l'anụru Onye-Nwe-Ọha, bụ Chileke unu okfu, leta ẹnya eme iwhe ọ tụru l'iwu, bụ iya bụ iwhe-e, mu l'ekfuru unu ntanụ-a, bẹ Onye-Nwe-Ọha, bụ Chileke unu l'e-dobekwa unu l'ọnodu, ha l'eli karia mba gẹ mba ha ọdo, dụ lẹ mgboko-o.

² Ọnu-ọma-a g'ọ ha l'a-byakfuta unu, mbụkwa ya etso unu pụchipuchi, m'ọ -bụruwho l'unu l'a-nọ anụru Onye-Nwe-Ọha, bụ Chileke unu okfu.

³ Ọnu-ọma l'a-nọ etso unu lẹ mkpụkpu, etso unu l'ẹgu.

⁴ Ọnu-ọma l'a-nọ etso ụnwu unu; etso iwhe unu meberu l'alị, etso ụnwu élwù unu zụshiru, mbụ eswi unu yẹle eghu unu mẹe atụru unu.

⁵ Ọnu-ọma l'a-nọ etso nkata, unu l'evuje eje l'ẹgu mẹe ọtumu nri unu.

⁶ Ọnu-ọma l'a-nọ etso unu nteke unu l'abata abata mẹe nteke unu l'alụfu alụfu.

⁷ Onye-Nwe-Ọha l'e-me t'unu lwụ-gbua ndu ọhogu unu ono, l'etso unu ọgu. Whẹ l'e-dzebe edzebe byakfuta unu ọgu, ọle whẹ l'emegee gbaa nnanụ nnanụ gbakashịhu.

⁸ Onye-Nwe-Ọha l'e-me t'ọnu-ọma iya tso ọba unu mẹe iwhe lile, unu kụberu ẹka nke ememe. Ya agọru ọnu-ọma nụ unu l'alị ono, Onye-Nwe-Ọha, bụ Chileke unu l'a-nụ unu.

⁹ Onye-Nwe-Ọha l'a-kfụbe unu t'unu shihu ike, bụru ndu dụru iya nsọ, ẹgube ono, o riburu iya lẹ nte m'ọ bụkwaruwho l'unu l'e-dobe iwhe Onye-Nwe-Ọha, bụ Chileke unu kfuru etso ụzo iya.

¹⁰ Ndu mgboko l'owhu l'a-whụ gẹ l'ee-ku ẹwha unu alarụ Onye-Nwe-Ọha, whẹ atsụlahaa unu egvu.

¹¹ Onye-Nwe-Ọha l'e-me t'unu nweru iwhe nweru iya nke etsutsu, unu anwụshia ụnwu nwụa ya nke etsutsu; élwù unu azụ̀shia ụnwu zụ̀a ya nke etsutsu; iwhe unu meberu l'alị emehu emehu mehu nke etsutsu l'alị ono, Onye-Nwe-Ọha riburu nna unu whẹ lẹ nte lẹ ya l'a-nụ unu.

¹² Onye-Nwe-Ọha l'a-gụharu unu ụlo ẹka l'oodobeje ẹku iya l'imigwe mee tẹ mini chịa wụshi l'alị unu lẹ mgbe iya, ya agọru ọnu-ọma nụ anya, unu seru l'ẹka unu. Unu abụru ndu l'anọ ejee ikpoto mba ụgwo, unu te ejitadu l'ẹka ndu ọdo.

¹³ Onye-Nwe-Ọha l'e-me unu t'unu bụru ishi, unu ta abụdu ndu ẹnya whẹ lwarụ. Unu l'a-nọ-zhiawho aka shii eje eje, unu ta akadụ ọlwa alị, m'ọ bụkwaru l'unu l'eme iwu, Onye-Nwe-Ọha, bụ Chileke unu bụ iya bụ iwhe-e, mu l'ekfuru unu ntanụ-a, leta ẹnya emekota iya.

¹⁴ Yẹle m'ọ bụru l'unu ta agbẹdu azụ l'iwu, mu l'atụru unu ntanụ ilile. Unu ba ahakwa iya, melahaa iwhe ọdo, tsolahaa agwa ọdo, balahaaru iya ẹja.

Ọnu, a tụru onye kwefuru ike

¹⁵ Ọle, ọ -bụru l'unu ta anụduru Onye-Nwe-Ọha, bụ Chileke unu okfu, unu te eleta ẹnya eme iwu iya mẹe iwhe ọ tọru ọkpa iya, bụ iya bụ iwhe-e, mu l'ekfuru unu ntanụ-a, bẹ mburọnu-a g'ọ ha l'a-byakfutakwa unu; ọo-nọ etso unu pụchipuchi.

¹⁶ Mburọnu l'a-nọ etso unu lẹ mkpụkpu, etso unu l'ẹgu.

¹⁷ Mburọnu l'a-nọ etso nkata, unu l'evuje eje l'ẹgu mẹe ọtumu nri unu.

¹⁸ Mburọnu l'a-nọ etso ụnwu unu, etso iwhe unu meberu l'alị, etso ụnwu, élwù unu zụ̀shiru, mbụ eswi unu mẹe eghu unu mẹe atụru unu.

¹⁹ Mburọnu l'a-nọ etso unu nteke unu l'abata abata mẹe nteke unu l'alụfu alụfu.

²⁰ Onye-Nwe-Ọha l'a-tụ unu ọnu, bya atụ unu ẹyerebeke, mee tẹ n-ghọgeka byakfuta unu l'iwhe lile, unu kụberu ẹka nke ememe. Ya adụ nno jeye nteke unu l'a-bụru kpurupyata, e jia ekfu-a, unu alakọtawaa l'iyi nkele unu bụ ndu ejo-ememe, parụ Chileke haa.

²¹ Onye-Nwe-Ọha l'e-gude ejo ẹhu-ba-dụ-mma gbushia unu jeye nteke l'oo-me t'unu chihu l'alị ono, unu l'a-bahụ t'ọ bụru nkunu.

²² Onye-Nwe-Ọha l'e-gude ẹhu, l'amị madzụ mini mẹe ẹwhoku mẹe ẹhu-ekoko mẹe oke okpomọku mẹe anwụ akpọbe mẹe ogu-ịgba gbushia unu. Iwhe unu meberu l'alị awata ọchashi mmanụ. Iwhe ono g'ọ ha l'a-tụko akpa unu ẹhu jeye nteke unu l'a-bụru kpukpuru-swoo.

²³ Igweli, bụ ọwhu unu vu l'ishi l'a-bụru ope, alị ẹka unu dzọberu ọkpa abụru mgbọro-ígwè.

²⁴ Onye-Nwe-Ọha l'e-me tẹ mini, gega anọ achị l'alị unu bụru otsu-dududu mẹe ivovonyi. Oo-shi l'igweli achị, ekpu unu jeye nteke unu l'a-bụru kpurupyata.

²⁵ Onye-Nwe-Ọha l'e-me tẹ ndu ọhogu unu lwụ-gbua unu. Unu l'e-dzebe edzebe byakfuta whẹ ọgu, ọle unu l'e-megee gbaa nnanụ nnanụ gbakashịhu. Unu l'a-bụru ndu, alị-eze ndu mgboko l'owhu l'a-nọ asọ oyi.

²⁶ Odzu unu l'a-bụru nri, ụnwu-ẹnu, l'ewhe l'eli yẹle anụ-ẹgbudu nọ mgboko l'a-nọ eri, ya eje adụ onye l'a-gbọru whẹ ụja.

²⁷ Onye-Nwe-Ọha l'a-tụ unu ezonwu ndu Íjiputu mẹe ǹtụ́ mẹe ọnya, l'aba wowowo mẹe ẹkpa-ebyi, mbụ ọwhu l'a-bụru agwọta agwọta.

²⁸ Onye-Nwe-Ọha l'e-me t'ọgvu bya unu, ishi abya unu, égò eswehu unu.

²⁹ Unu l'a-nọ arwada ẹka arwada l'echi eswe labọ, ẹgube ono, ndu l'atsọ ishi l'anọje arwadawhe ẹka l'ọochi. Iwhe unu l'eme ta adụdu ọwhu bya l'a-bụru ụpete. Mkpamẹhu yẹle ọna nfụ abụru iwhe l'a-dụ swiru unu nteke nteke, ya eje adụ onye l'a-gbarụ unu mkpu.

³⁰ Madzụ l'e-je okfu nwanyị jebua, ya abụru onye ọdo l'a-nọ alarụ iya l'ụlo. Ya atụa ụlo, ọle ọ tọ byadụ l'e-bu iya ebu. Ya akọo mgbu vayịnu, ọle ọ tọ byadụ l'a-wọta mebyi iya.

³¹ Aa-nọdu l'iwhu madzụ gbua oke-eswi iya, ọle ọ tọ byadụ l'ata anụ iya. A kpụa nkakfụ-ịgara madzụ l'ike; a ta akpụlata-whuduru iye ya azụ. Atụru madzụ bẹ l'ee-rwuta nụ ndu ọhogu iya, ya eje adụ onye l'agbarụ iya mkpu.

³² Ụnwu unu bẹ l'aa-chịta nụ ndu ọdo tẹ whẹ bụru ohu whẹ. Unu akarụ ẹnya ye l'ụzo mbọku mbọku jeye ẹnya agbakọta unu ọochi l'ẹka unu l'ele ẹnya whẹ. Ọ tọ dụdu iwhe unu l'a-dụ ike eme.

³³ Ndu mba, unu l'ẹte amahawa l'e-ripya iwhe unu meberu l'alị mẹe iwhe unu seru anya iya. Mkpamẹhu yẹle aryaka-eryune abụru iwhe l'a-dụ swiru unu nteke nteke,

³⁴ nke ọwhu bụ l'iwhe unu l'e-gude ẹnya unu whụa l'e-me unu, unu emehu ọgvu ọgvu.

³⁵ Onye-Nwe-Ọha l'e-gude ezonwu, l'awhụ ejo ụwhu chia unu ikpere yẹle ọkpa pyaapyaa, mbụ ezonwu, bụ agwọta agwọta. Ya atụko unu ẹhu tsekashia, shizhiawho l'ọbochi-ọkpa jeye l'ishi.

³⁶ Onye-Nwe-Ọha l'a-chịfu unu l'onye unu họtaru t'ọ bụru eze unu laa mba, unu l'ẹte amahawa, nna unu whẹ ta amahawa iya, unu anọdu l'ẹka ono balahaaru agwa ọdo ẹja, mbụ agwa e meru l'oshi yẹle ọwhu ẹwhuru.

³⁷ Unu abụru ndu l'anwụ whẹ ishi kpaa, bụru ndu l'aanma l'ejo ẹtu mẹe ndu l'aatụ lẹ ntọnu l'ẹka ndu ẹka ono, Onye-Nwe-Ọha l'a-chịru unu laa ono nọ.

³⁸ Unu l'e-mebe iwhe ha shii l'alị, ya abụru iwhe l'ẹte abaa nwishi bẹ unu l'a-kpata iya, o noo nkele igube l'e-ripyashi iya.

³⁹ Unu l'a-kọ mgbu vayịnu, ọle unu ta angụdu mmẹe, shi ya nụ, unu ta awọta mebyi, shi iya nụ, o noo nkele erwu l'e-rikota iya.

⁴⁰ Oshi ólivu l'a-tụko alị unu nakọta, ọle mmanụ iya te erwudu unu l'ẹhu, o noo nkele akpụru iya l'e-rishihu dashịa.

⁴¹ Unu l'a-nwụshi unwoke mẹe ụnwanyi, ọle whẹ ta abẹduru unu l'iwhe, o noo nkele aa-kpụ whẹ lẹ ndzụ laa ọha ọdo.

⁴² Oshi, nọ l'alị unu yẹle mebyi iwhe unu meberu l'alị bẹ igube l'a-tapyashịkota.

⁴³ Ndu lwarụ alwa, bu l'echilabọ unu bẹ l'a-nọ aka unu shii eje eje, unubẹdua aka ọlwa alị eje eje.

⁴⁴ Whẹ l'e-jeje unu ụgwo, unu te ejedu whẹbedua. Whẹ l'a-bụru ishi, unubẹdua abụru ndu ẹnya lwarụ.

⁴⁵ Mburọnu-a g'ọ ha l'a-byakfuta unu chịa unu lawu lawu, gude unu mee, unu abụru kpukpuru-swoo. Mkpata iya bụ l'unu ta anụduru Onye-Nwe-Ọha, bụ Chileke unu okfu, eme iwhe ọ tụru l'iwu mẹe iwhe ọ tọru ọkpa iya, bụ iwhe ọ tụru unu l'iwu.

⁴⁶ Mburọnu ono l'a-dụ unu l'ẹhu bụru iwhe-ọhubama yẹle iwhe dụ biribiri, dụkwawho ẹpa unu l'ẹhu jeye lẹ tututu-mịmimi.

⁴⁷ Eshi-ọwhu unu l'ete egudee ẹhu-ụtso mẹe obu-ụtso jeeru Onye-Nwe-Ọha, bụ Chileke unu ozhi nteke iwhe shi dụru unu lẹ mma shii,

⁴⁸ bẹ unu l'e-jeru ndu ọhogu unu ono, Onye-Nwe-Ọha l'e-zhi tẹ whẹ bya etso unu ọgu ono ozhi, unu aswị ẹgu, ẹkpiri akpọ unu nkụ, unu agbaa ọto, ụko iwhe lile adụru unu. Oo-woru odogoro igwe nyabẹ unu l'olu jeye nteke unu l'a-bụru kpukpuru-swoo.

⁴⁹ Onye-Nwe-Ọha l'e-duta ndu mba, shi otẹnya byakfuta unu ọgu. Whẹ l'e-shi l'ẹka mgboko beru zhiru whawhawha g'ọo ugo, l'ewhe ewhe bya ezhikfuru unu. Mba ọbu l'a-nọ ekfu okfu, l'ẹte anụ.

⁵⁰ Mba ọbu bẹ iwhu l'a-dụkwa ọnwuu-ọnwuu. Whẹ te emedu nke l'onye ọwa bụ ọgurenya, whẹ ta awhụru ụnwegirima imiko.

⁵¹ Whẹ l'e-ripya élwù unu mẹe iwhe unu meberu l'alị, jeye unu abụru kpukpuru-swoo. Whẹ ta alwụ-whododuru unu balị unu yẹle mmẹe ọ̀whúú unu mẹe mmanụ unu mẹe ụnwu eswi unu mẹe ụnwu atụru unu jeye unu abụru ọla l'iyi.

⁵² Whẹ l'e-yechi unu lẹ mkpụkpu unu l'owhu, jeye nteke mgbodo unu ono, ha l'eli ono, a tụshiru ike, bụ ọwhu unu chịru ụkfu kwẹe l'alị unu gbaa mgburumgburu l'a-whọfu bụru gwoo l'alị. Whẹ l'e-yechi unu lẹ mkpụkpu unu l'owhu, dụkota l'alị unu gbaa mgburumgburu, bụ alị, Onye-Nwe-Ọha, bụ Chileke unu nụru unu.

⁵³ Iwhe-ọtsulanu, unu l'e-je nteke ono ndu ọhogu unu l'e-yechi unu mẹe oke mkpamẹhu, whẹ l'a-kpa unu, bẹ l'e-me unu awata ori onwunu l'ọnu, mbụ l'unu l'a-talahaa anụ ụnwegirima unu unwoke mẹe ụnwanyi, bụ ụnwu, Onye-Nwe-Ọha, bụ Chileke unu nụru unu;

⁵⁴ nke ọwhu bụ lẹ nwoke, kagezhia onwe obu-imiko, bụru onye dụ agu l'echilabọ unu l'e-nwelahaa ẹnya ọvu l'ẹka nwune iya nọ mẹe l'ẹka nyee ya, o yeru obu nọ mẹe l'ẹka ụnwu iya, bụ ndu whuduru nụ nọ.

⁵⁵ O too butadu anụ nwa iya ono, l'ọota bee m'ọo onye lanụ lẹ ndu ono. O noo nkele ọ tọ dụhedu ọdo, whọduru iya l'ẹka. Iwhe kparụ iya nụ bụru iwhe-ọtsulanu, unu l'e-je nteke ono ndu ọhogu unu l'e-yechi unu yẹle oke mkpamẹhu, whẹ l'a-kpa unu.

⁵⁶ Nwanyị, kagezhia ọdu bẹlebele, bụru onye dụ agu l'ime unu, mbụ nwanyị, dutabe bẹlebele, dutabe agu nke ọwhu bụ l'ọonoje aryọ alị tẹ ya dzọbe, bẹ l'a-nọ edomiru ji iya, o yeru obu iwhe, edomiru iya ụnwegirima iya unwoke mẹe ụnwanyi.

⁵⁷ Eze, l'eshije iya l'ẹhu dafụ nteke ọ nwụru nwa nke ọwhuu mẹe anụ ụnwegirima, l'ọo-nwụshi bẹ l'ọo-tajẹ nwẹkiya lẹ mpya t'ọ bọ dụ onye l'a-ma nụ. O noo nkele ọ tọ dụhedu iwhe ọdo, whọduru iya l'ẹka. Iwhe l'a-kpata iya nụ abụru iwhe-ọtsulanu ono, unu l'e-je nteke ono ndu ọhogu unu l'e-yechi unu yẹle oke mkpamẹhu, whẹ l'a-kpa unu.

⁵⁸ Ọ -bụru l'unu te eletadu ẹnya eme okfu lile, e kfuru l'iwu-a, e deru l'ẹkwo-ọ, shi nno akwabẹ ẹwha-a, bụ ẹwha, dụ biribiri, dụ egvu-a ugvu, bụ iya bụ Onye-Nwe-Ọha, bụ Chileke unu,

⁵⁹ bẹ Onye-Nwe-Ọha l'e-wotakwa oke iwhe-ọtsulanu, akọ-ẹtu iya l'ẹte adụjee bya edoberu unu l'ẹpa unu, mbụ oke iwhe-ọtsulanu, l'a-pa ẹka, tẹmenu alala iya abụru ọgu yẹle ẹhu, l'eme eme, l'anwụ ọnu, tẹmenu alala iya abụru ọgu.

⁶⁰ Ya ewokfuta unu ẹhu-ba-dụ-mma nke ndu Íjiputu, mbụ ono, unu shi atsụ egvu iya ono, ẹhu ono abya arakụru unu arakụru l'ẹhu.

⁶¹ Ẹhu-ba-dụ-mma yẹle iwhe-ọtsulanu ọwhu, l'ẹte edeeru ye l'ẹkwo iwu-a bẹ Onye-Nwe-Ọha l'e-vuru byabẹ unu l'ishi jeye nteke unu l'a-bụru kpukpuru-swoo.

⁶² Ndu l'a-whọdu l'ime unu l'a-bụru akpụru ụmadzu olemole, l'unubẹ ndu shi ha l'igwe g'ọo kpokponde, dụ l'igweli. Mkpata iya bụ l'unu ta anụduru Onye-Nwe-Ọha, bụ Chileke unu okfu.

⁶³ Ọo g'o shi atsọ-be Onye-Nwe-Ọha ụtso tẹ ya mee t'iwhe dụru unu lẹ mma, mee t'unu ka l'ọtu, bụkwawho gẹ l'ọo-tsọ Onye-Nwe-Ọha ụtso tẹ ya mee t'unu bụru kpukpuru-swoo, bụru ọla l'iyi. Unu abụru ndu e whetaru ewheta whefu l'alị ono, unu l'a-bahụ t'ọ bụru nkunu ono.

⁶⁴ Onye-Nwe-Ọha l'a-chịkashi unu nnanụ nnanụ l'eliwhe l'owhu, watalẹwho l'ẹka mgboko watarụ jeye l'ẹka o jeberu. Unu anọdu l'ẹka ono abarụ agwa ọdo ẹja, mbụ agwa e meru l'oshi yẹle ọwhu e meru l'ẹwhuru, bụ iwhe unu l'ẹte amahaa, nna unu whẹ ta amahawa iya.

⁶⁵ Unu ta abyadụ l'enwe ntụsaru-ẹhu l'echilabọ mba gẹ mba ha, ọkpa ta abya l'e-dzuru unu ike. Onye-Nwe-Ọha l'e-me t'obu tsuje unu otsu owhe l'ẹka ono, ẹnya l'agbakọta unu ọochi, áwhụ eji unu obu.

⁶⁶ Ndzụ unu l'a-nọ awa awa l'ẹnya unu. Eswe l'ẹnyashi bẹ unu l'a-nọ l'ẹhu-anmanma, tẹmenu unu tee egudedu ndzụ unu ẹka.

⁶⁷ L'ụtsu bẹ unu l'a-sụ: “Nggẹ l'ọ dụ g'e shi ọ bụru urwẹnyashi!” Nteke o beru l'urwẹnyashi, unu asụ: “Nggẹ l'ọ dụ g'e shi ọ bụru ụtsu!” Mkpata iya bụ l'obu l'a-nọ achị unu whoowhoo lẹ ntsụ-megvu, l'a-dụ unu l'ẹhu yẹle iwhe unu l'e-gude ẹnya unu awhụgbabe.

⁶⁸ Onye-Nwe-Ọha l'e-ye unu l'ụgbo-mini, kpọ-whu unu azụ l'alị Íjiputu, mbụ ụdu ije ono, mu sụru l'unu te ejehedu ọdo. Ọ warọ l'ẹka ono bẹ unu l'a-kpọbe onwunu nke erere, tẹ ndu ọhogu unu zụa unu t'unu bụru ohu whẹ unwoke mẹe ụnwanyi, ọle ọ tọ dụdu onye l'e-kwe unu aswa nke azụta.