Ditoronomi 27 - BAYỊBURU Ẹzaa

Ẹnya-mgbẹja, dụ l'ugvu Ebalu

¹ O noo ya, Mósisu yẹle ndu bụ ọgurenya Ízurẹlu bya ekfuru yeru ndu Ízurẹlu sụ whẹ agha: “Unu dobekotakwa iwu lile-e, mu l'atụru unu ntanụ-a.

² Unu -dalẹwho ẹnyimu Jọ́danu bahụ l'alị ono, Onye-Nwe-Ọha, bụ Chileke unu l'eme tẹ ya nụ unu, unu patakwa ẹwhuru, hagee shii kpọbe-gee, unu egude ụrwa chia ya echichi.

³ Unu eworu iwu-a g'ọ ha dekota l'eli iya mẹ unu dagelewho ẹnyimu ono bahụ l'alị ono Onye-Nwe-Ọha bụ Chileke unu l'eme t'iya nụ unu, mbụ alị ono mini-ẹra eswi yẹle mmanụ-ẹnwu jiru ejiji ono, ẹgube ono Onye-Nwe-Ọha bụ Chileke nke nna unu whẹ kweru unu ụkwa iya.

⁴ Nteke unu darụ ẹnyimu Jọ́danu ono, unu kpọbekwa ẹwhuru-a, mu l'ekfuru unu okfu iya ntanụ-a l'eli ugvu Ebalu. Unu egude ụrwa chia ya echichi.

⁵ Ọo l'ẹka ono bẹ unu l'a-tụru Onye-Nwe-Ọha, bụ Chileke unu ẹnya-mgbẹja. Ya abụru ẹwhuru bẹ unu l'e-gude tụa ẹnya-mgbẹja ono, mbụ ẹwhuru, l'adụa iwhe-igwe, denyijeru iya nụ.

⁶ T'ọ bụkwaru ẹwhuru, l'ẹte awajaa awaja bẹ unu l'e-gude tụaru Onye-Nwe-Ọha, bụ Chileke unu ẹnya-mgbẹja ono. Ya abụru l'eli iya bẹ unu l'a-gbajẹru Onye-Nwe-Ọha, bụ Chileke unu ngwo-ẹja ọkpokota-iwhe-ọku.

⁷ Unu gbajẹkwawho ẹja ẹhu-guu l'ẹka ono. Unu atụko nọdu l'ẹka ono ria ya, tee ẹswa l'iwhu Onye-Nwe-Ọha, bụ Chileke unu.

⁸ Unu dekotakwa iwu-a g'ọ ha l'eli ẹwhuru ono t'o shia uryi.”

Mburọnu, a nọ l'ugvu Ebalu dobe

⁹ Mósisu yẹle ẹpa Lívayi, bụ ndu l'agbajẹ ẹja nụ Chileke bya ekfuru yeru ndu Ízurẹlu l'owhu sụ whẹ: “Unu daa jii unubẹ ndu Ízurẹlu, unu ngabẹ nchị. Ntanụ bẹ unu bụakwa ndibe Onye-Nwe-Ọha, bụ Chileke unu.

¹⁰ Ọo ya bụ, unu nụjekwaaru Onye-Nwe-Ọha, bụ Chileke unu okfu. Unu edobekota iwu iya mẹe iwhe ọ tọru ọkpa iya, bụ iwhe mu l'atụru unu l'iwu ntanụ-a.”

¹¹ Mósisu bya atụkwaaruwho ndu Ízurẹlu iwu mbọku ono sụ whẹ agha:

¹² Unu dalẹwho ẹnyimu Jọ́danu, ndu ikfu, l'a-kfụru l'eli ugvu Gerizimu gọru ọnu-ọma nụ ndu Ízurẹlu bụ: ikfu Símiyọnu, ikfu Lívayi, ikfu Juda, ikfu Ísaka, ikfu Jósẹfu mẹe ikfu Bénjaminu.

¹³ Ndu ikfu ọwhu l'a-kfụru l'eli ugvu Ebalu bua mburọnu bụ: ikfu Rúbẹnu, ikfu Gadu, ikfu Asha, ikfu Zébulọnu, ikfu Danu mẹe ikfu Náfutali.

¹⁴ Ndu Lívayi ewolia olu ryaarụ iya unwoke Ízurẹlu l'owhu aryarya sụ:

¹⁵ “Mburọnu dụru onye doberu ntẹkpe, a pyịru apyị, m'ọbu ọwhu a kpụru akpụ. Iwhe ono bụkwa akpamara l'iwhu Onye-Nwe-Ọha, mbụ iwhe ono ndu l'eme nka gude ẹka mee dobe agwa lẹ mpya.” Ndu Ízurẹlu l'owhu azụa mgbede sụ: “T'ọ dụ nno-o!”

¹⁶ “Mburọnu dụru onye l'ẹte akwabẹ nna iya yẹle ne iya ugvu.” Ndu Ízurẹlu l'owhu azụa mgbede sụ: “T'ọ dụ nno-o!”

¹⁷ “Mburọnu dụru onye wofuru ẹwhuru oge alị madzụ ibe iya.” Ndu Ízurẹlu l'owhu azụa mgbede sụ: “T'ọ dụ nno-o.”

¹⁸ “Mburọnu dụru onye kpọ-zhiru onye l'atsọ ishi t'o shia ẹka l'abụa ụzo.” Ndu Ízurẹlu l'owhu azụa mgbede sụ: “T'ọ dụ nno-o!”

¹⁹ “Mburọnu dụru onye l'anafujẹ madzụ iswi-ọduma, rwuberu iya nụ l'ọo l'ọ bụ onye lwarụ alwa m'ọ bụ onye nna iya l'anọhee m'ọ bụ nwanyị-mbunu.” Ndu Ízurẹlu l'owhu azụa mgbede sụ: “T'ọ dụ nno-o!”

²⁰ “Mburọnu dụru onye jekfuru nyee nna iya azẹe, nkele ọo nna iya b'o mechiru iwhu.” Ndu Ízurẹlu l'owhu azụa mgbede sụ: “T'ọ dụ nno-o!”

²¹ “Mburọnu dụru onye jekfuru anụmanu azẹe.” Ndu Ízurẹlu l'owhu azụa mgbede sụ: “T'ọ dụ nno-o!”

²² “Mburọnu dụru onye jekfuru nwune iya nwanyị azẹe m'ọ bụ nwanna iya, m'ọbu nwune iya.” Ndu Ízurẹlu l'owhu azụa mgbede sụ: “T'ọ dụ nno-o!”

²³ “Mburọnu dụru onye jekfuru ne nyee ya azẹe.” Ndu Ízurẹlu l'owhu azụa mgbede sụ: “T'ọ dụ nno-o!”

²⁴ “Mburọnu dụru onye gburu madzụ ibe iya lẹ mpya.” Ndu Ízurẹlu l'owhu azụa mgbede sụ: “T'ọ dụ nno-o!”

²⁵ “Mburọnu dụru onye natarụ n-wọlazu tẹ ya je egbua onye l'adụa iwhe o meru.” Ndu Ízurẹlu l'owhu azụa mgbede sụ: “T'ọ dụ nno-o!”

²⁶ “Mburọnu dụru onye l'ẹte eme iwu-a g'ọ ha.” Ndu Ízurẹlu l'owhu azụa mgbede sụ: “T'ọ dụ nno-o!”