Ditoronomi 22 - BAYỊBURU Ẹzaa

¹ Ị -whụa eswi madzụ ibe ghu, m'ọbu atụru iya l'ẹka l'ọokpawhuhu akpawhuhu; be emekwa ẹnya gẹ-woo l'ị tị whụdu iya. Kebekwa ẹhu kpụta iya kpụ-whuru iya azụ.

² Ọ -bụru l'onye ọbu te ebukubedu ghu ntse, m'ọbu l'ị tị madụ onye ọbu, kpụtakwa iya lashia ibe ghu t'ọ nọdu jeye nteke onye ọbu l'a-chọru iya bya, gụ akpụru iya kpẹe ya.

³ O nokwawho gẹ l'ii-me iya m'ọ -bụru l'ọo nkakfụ-ịgara iya, ọ bụru nno gẹ l'ii-me iya m'ọ -bụru l'ọo uwe iya, o noo gẹ l'ii-meje l'iwhe madzụ ibe ghu, tuwhahuru etuwhahu, mbụ iwhe iya tuwhahuru nụ, ị whụa ya. Be emejekwa ẹnya g'ị tị whụdu iya.

⁴ Ị -whụa nkakfụ-ịgara madzụ ibe ghu m'ọ bụ eswi iya l'ẹka ọ darụ l'agụga echi-ụzo, be emekwa ẹnya gẹ-woo l'ị tị whụdu iya. Kebekwa ẹhu yeru onye ọbu ẹka t'ọ kpụ-lia ya.

⁵ Tẹ nwanyị ba akwajẹkwa ngwa nwoke. Tẹ nwoke be eyejekwa uwe nwanyị, nkele onye l'eme nno bẹ l'emekwa akpamara l'ẹnya Onye-Nwe-Ọha, bụ Chileke unu.

⁶ Ọ -bụru l'ịighata aghata, ị whụa ẹkfunu, ẹnu kparụ l'eli oshi, m'ọbu l'ọma alị, ụnwu ẹnu nọdu iya, m'ọbu l'ọo ẹkwa iya dụ iya, ne iya kpuru l'eli ụnwu iya ono, m'ọbu l'eli ẹkwa iya ono, ba anwụpyabekwa ne iya yẹle ụnwu iya.

⁷ Kebekwa ẹhu kpatsua ne iya t'o whefu, g'ị nwụta ụnwu iya nke ọwhu l'ọo-dụru ghu lẹ mma mẹe nke ọwhu l'ịi-nọliberu ndzụ.

⁸ Ọ -bụru l'ịitu ụlo ọ̀whúú, nteke ị watarụ iya ekpukpu, kpusakwaa ya ọsa swia ya ọnu mgburumgburu, t'ọ bọ dụ onye l'e-shi l'ẹka ono wefu bya adaa, shi nno wobata ọchi l'ụlo ghu ono.

⁹ Ba akụkwa iwhe ẹghirigha lẹ mgbabu vayịnu ghu, ọdua bẹ l'aa-natakwa ghu mebyi iwhe ono, ị kụru yẹle akpụru, ọ mịtaru mbụ vayịnu ghu ono je edobe l'ụlo-nsọ.

¹⁰ Be eligbabejekwa eswi yẹle nkakfụ-ịgara eligbabe gude atụpya alị ugbo lanụ.

¹¹ Be eyejekwa uwe, a kwarụ ẹghirigha, gude ẹkwa ẹji ẹji kwagbabẹ l'ẹkwa, dụ rẹbere rẹbere.

¹² Kpajẹkwaru iwhe oghu, dụ yagịriyagiri ye l'ọnumonu uwe mkpẹelanu ghu mgburẹku ẹno.

Iwhe l'emebyi alụlu

¹³ Nwoke -lụta nwanyị yẹle nwanyị ọbu zẹ-gelewho, ọ bya adụ iya ẹji,

¹⁴ ọ wata iya obo ibo kọlahaa ya l'ejo ẹko asụje: “Mu lụru nwanyị-a, bya ejekfu iya azẹe, t'ọ dụ iwhe l'egoshi lẹ yẹle nwoke tẹke azẹbudua.”

¹⁵ Tẹ nna nwamgbọko ọbu yẹle ne iya wotakwa iwhe l'egoshi lẹ nwamgbọko ono shi bụru onye yẹle nwoke l'ẹteke azẹbua je egoshi ndu bụ ọgurenya l'ọnu-abata mkpụkpu.

¹⁶ Nna nwamgbọko ono asụ ndu bụ ọgurenya ono: “Mu kutaru nwa mu nwanyị-a kee nwoke-e t'ọ bụru nyee ya; ọ bya adụwa iya ẹji ntaa,

¹⁷ nke ọwhu bụ l'oobowa iya ibo asụje: ‘Lẹ nwa mu nwanyị-a ta adụkwa iwhe l'egoshi lẹ yẹle nwoke tẹke azẹbudua.’ Ọle t'unu lekwa iwhe l'egoshi lẹ nwa mu nwanyị ọbu bẹ yẹle nwoke tẹke azẹbudua.” Whẹ abya eworu ẹkwa ono tụsaa l'iwhu ndu bụ ọgurenya mkpụkpu ono.

¹⁸ Tẹ ndu bụ ọgurenya mkpụkpu ono gude nwoke ono tụaru iya ụtu ẹchachi.

¹⁹ Whẹ ereta iya nre ụkporo mkpọla-ọcha ise woru nụ nna nwamgbọko ono nkele nwoke ono kọru nwamgbọko Ízurẹlu l'ejo ẹko. Nwamgbọko ono abụru nyee ya g'ọ bụ iya. T'ọ bọ chịfukwa nwanyị ono achịfu jeye gẹ l'ọo-nọ-beru.

²⁰ Ọle ọ -bụkwanuru l'ibo ono, e boru iya bụ ire-lanụ, t'ọ dụ iwhe l'egoshi lẹ nwamgbọko ono bẹ yẹle nwoke tẹke azẹbudua,

²¹ tẹ whẹ kpụfutakwa nwamgbọko ono l'ọnu nwụlo nna iya, t'ụnwoke mkpụkpu, ẹka a nwụru iya gude ẹwhuru tụ-gbua ya t'ọ nwụhu nkele o meru iwhe iwhere iya dụ l'alị Ízurẹlu, nkele o shi nọdu l'ibe nna iya agba ọkpara. Ọo ẹgube ono bẹ unu l'e-shi chigbua mgbashị l'igbo, o beru t'ọdo be eberu iya.

²² Ọ -bụru l'e guderu nwoke l'ẹka chịi l'ẹka yẹle nyee onye ọdo zẹe, t'e gbukwaa nwoke ono, jekfuru nwanyị ono yẹle nwanyị ọbu, o jekfuru egbugbu. Ọo ẹgube ono bẹ unu l'e-shi chigbua mgbashị l'igbo, o beru; t'ọdo be eberu iya l'alị Ízurẹlu.

²³ Ọ -bụru lẹ nwamgbọko yẹle nwoke l'ẹte azẹbua, mbụ nwamgbọko, nwoke l'ejekwadu okfu iya eje bẹ nwoke ọdo whụru lẹ mkpụkpu jekfu iya azẹe,

²⁴ t'unu tụkokwa whẹ kpụfuta l'ọnu-abata mkpụkpu ono gude ẹwhuru tụ-gbua whẹ tẹ whẹ nwụhukota. T'a tụ-gbua yẹbe nwamgbọko, o noo nkele ọ nọ lẹ mkpụkpu ono to chi mkpu t'a gbatarụ iya. A tụ-gbua yẹbe nwoke, o noo nkele o mebyishiru nyee madzụ ibe iya. Ọo ẹgube ono bẹ unu l'e-shi chigbua mgbashị l'igbo, o beru t'ọdo be eberu iya.

²⁵ Ọle, ọ -bụkwaru l'ọo l'ẹgu bẹ nwoke jekfuru nwamgbọko, l'eejekwadu okfu iya eje, gude iya l'ọkpehu yẹle iya zẹe. T'ọ bụkwaru nwoke ono bẹ l'ee-gbu nwẹkiya.

²⁶ T'ọ bọ dụkwa iwhe unu l'e-me nwamgbọko ono. Nwamgbọko ono ta adụkwa iwhe-dụ-ẹji o metaru nke t'e gbua ya. Ishi iya abụru l'ẹgube iwhe ono dụkwa g'ọo nke onye je afụaru madzụ ibe iya gbuta iya tụa.

²⁷ O noo nkele ọo abagude bẹ nwoke ono baguderu iya l'ẹgu, tẹmenu nwamgbọko ono, l'eejekwadu okfu iya eje chia mkpu t'a gbatarụ iya, t'ọ dụ onye jeru iya anafụta.

²⁸ Ọ -bụru lẹ nwoke bẹ jekfuru nwamgbọko, l'ẹte ejedee okfu iya gude iya l'ọkpehu jekfu iya azẹe, a whụa whẹ,

²⁹ tẹ nwoke ono kfụkwaa nna nwamgbọko ono ụkporo mkpọla-ọcha ugbo labọ lẹ mkpọla-ọcha iri. Tẹ nwoke ono lụkwaa ya, o noo nkele o mebyishiwaru iya. T'ọ bọ chịfukwa nwamgbọko ono achịfu jeye gẹ l'ọo-nọ-beru.

³⁰ Tẹ nwoke ba alụkwa nyee nna iya, shi nno mechia nna iya iwhu.