Ditoronomi 21 - BAYỊBURU Ẹzaa

Nke onye e gburu t'a ma onye gburu iya nụ

¹ Ọ -bụru l'a whụru odzu onye e gburu egbu l'ẹka ọ daburu l'ẹgu l'alị ono, Onye-Nwe-Ọha, bụ Chileke unu l'a-nụ unu t'ọ bụru nke unu, t'a ma onye gburu iya nụ,

² tẹ ndu bụ ọgurenya unu whẹ mẹe ndu ikpe unu whẹ fụtakwa, bya eshi l'ẹka onye ono, e gburu ono zẹe, tụ̀a iwhe atụ̀tù jeye lẹ mkpụkpu, nọ-wheru nụ iya mgburumgburu.

³ Tẹ ndu bụ ọgurenya, shi lẹ mkpụkpu ọwhu ka ọnokube ntse l'ẹka ono, onye ono e gburu zẹe, kpụta nwada eswi, l'ẹte egudebua jee ozhi l'ẹgu, t'a tụgbabebua ya l'ibe iya,

⁴ kpụru je lẹ nsụda, mini l'asọ asọso, mbụ ẹka l'ẹte akọbua akọko, t'ọ dụ iwhe e mebejeru iya. Whẹ anọdu lẹ nsụda ono kụ-kwoo nwada eswi ono olu.

⁵ Ndu l'agbajẹ ẹja nụ Chileke, bụ ụnwu Lívayi afụta bya akfụru l'ụzo atatiwhu. Nkele Onye-Nwe-Ọha, bụ Chileke unu bụ whẹ b'ọ họtaru tẹ whẹ jejeru iya ozhi, whẹ egudeje ẹwha Onye-Nwe-Ọha agọ ọnu-ọma anụ madzụ. Ọ bụru whẹ bẹ l'ekpeshije okfu, dụru madzụ yẹle ibe iya mẹe okfu lẹ madzụ mekaru ibe iya iwhe.

⁶ Tẹ ndu bụ ọgurenya ono, shi lẹ mkpụkpu ọwhu ka ọnokube ntse l'ẹka ono, onye ono, e gburu ono zẹe kwọkwaa ẹka whẹ l'eli nwada eswi ono, a kụ-kworu olu lẹ nsụda ono.

⁷ Whẹ ekfua sụ: “Ẹka anyi ta adụkwa l'ọchi onye-e, anyi ta awhụ nteke l'eegbu iya.

⁸ Byiko Onye-Nwe-Ọha natanụ ụgwo-ọ, l'aakfụ l'ishi ndu nkeghu, bụ ndu Ízurẹlu l'ọnodu iwhe-dụ-ẹji, whẹ meru, mbụ ndu ono, ị gbafụtaru. T'ọchi onye, l'adụa iwhe o meru ba atukokwaru ndu nkeghu, bụ ndu Ízurẹlu l'ishi. Ọo ya bụ, e shi nno kfụa ụgwo ọchi onye ono, e gburu egbu.”

⁹ Ọo ẹgube ono bẹ unu l'e-shi wofu ikpe ọchi onye ono l'adụa iwhe o meru l'echilabọ unu, eshi-ọwhu unu mewaru, iwhe kfụru nhamụnha l'ẹnya Onye-Nwe-Ọha.

Nke ọlu nwanyị, a lwụtaru l'ọgu

¹⁰ Nteke unu jekfuru ndu ọhogu unu ọgu, Onye-Nwe-Ọha, bụ Chileke unu woru whẹ ye unu l'ẹka, unu kpụa whẹ lẹ ndzụ,

¹¹ bya awhụa nwanyị, l'ama ụma l'ime ndu ono, unu kpụru lẹ ndzụ ono, o nweru onye ọ dụ ree, mbụ onye, ọ dụ nke t'o duta iya t'ọ bụru nyee ya,

¹² t'o onye ọbu dutakwa iya latashia ibe iya, rwushia ya ẹgbushi l'ishi, beshia ya nvọ iya.

¹³ Ya eyefu uwe, o yeru nteke a kpụru iya lẹ ndzụ, nọdu l'ụlo onye ọbu ryaa ẹkwa nna iya yẹle nke ne iya ọnwa owhu. E -megee yẹle onye ọbu awata azẹze, onye ọbu abụru ji iya, yẹbedua abụru nyee ya.

¹⁴ Ọ -bụru l'e megeeru, nwanyị ono ta adụhe onye ọbu ree, t'ọ pakwarụ iya haa t'o je njere iya. Be erekwa iya ere gude reta okpoga, be emekwa iya g'ọo ohu; eshi-ọwhu i mewaru iya iwhe-iwhere.

Iwhe rwuberu ọkpara

¹⁵ Nwoke -lụa ụnwanyi labọ, o yee onye lanụ obu kpọo onye lanụ ashị, whẹ tụko nwụtaru iya ụnwegirima, mbụ onye ono, o yeru obu ono yẹle onye ọwhua ọ kpọru ashị whọ, ọ -bụru l'ọo onye ọwhu ọ kpọru ashị bẹ nwụtaru iya ọkpara;

¹⁶ mbọku, l'oo-ke ekpe gude keeru ụnwu iya iwhe o nwe, t'o bo wotakwa nwa nke onye ọwhu o yeru obu whọ dobe l'ọnodu ọkpara hachia nwa nke onye ono, ọ kpọru ashị whọ, gbẹ-chia bụru iya bụ ọkpara.

¹⁷ T'o mebukwaa nyata l'onye bụ ọkpara iya bụ nwa nke nwanyị ono, ọ kpọru ashị ono, ya ekeru oke labọ nụ iya l'iwhe lile, o nweru nkele ọo nwata ono bụ nwa mbụ, goshiru l'ọ dụ l'iwhe. Iwhe rwuberu ọkpara bụkwa iya nwe iya.

Nwa, bụ ekfu-ba-anụ

¹⁸ Nwoke -nwụta nwa, bụ ekfu-ba-anụ, bụru ọkaria-ẹka, mbụ nwata, l'ẹte anụru nna iya okfu, t'ọ nụru ne iya okfu; whẹ hụwa ya nta hụa imo ọ bụru nchị nwakpaa,

¹⁹ tẹ nna iya yẹle ne iya kpụtakwa iya kpụfuru ndu bụ ọgurenya l'ọnu-abata mkpụkpu ẹka o bu.

²⁰ Whẹ asụ ndu bụ ọgurenya mkpụkpu ono: “Nwa anyi-a bẹ bụkwa ekfu-ba-anụ, bụru ọkaria-ẹka, ọ tọ nụjeduru anyi okfu. Ẹkpiri bẹ parụ iya ẹka, tẹmenu ọ bụru onye l'angụnuka ikike mmẹe.”

²¹ T'unwoke mkpụkpu ono l'owhu tụ-gbukwa nwata ono l'ẹwhuru t'ọ nwụhu. Ọo ẹgube ono bẹ unu l'e-shi chigbua mgbashị l'igbo o beru t'ọdo be eberu iya. Nke ọwhu ndu Ízurẹlu l'owhu l'a-nụ iya tsụhu egvu.

Iwu, dụ l'iche l'iche

²² Madzụ -meta iwhe ọ gbarụ t'ọ nwụhu, e woru iya gbua, unu kobe odzu iya l'eli oshi,

²³ t'odzu iya ono be ekokwaru l'eli oshi ono jeye tẹ chi sahụ. Unu likwaa ya mbọku ono gẹdegede nkele onye koru l'eli oshi bụkwa onye Chileke tụru ọnu. Unu be emerwukwa alị ono, Onye-Nwe-Ọha, bụ Chileke unu l'a-nụ unu t'ọ bụru oke-iwhe unu emerwu.