Ditoronomi 20 - BAYỊBURU Ẹzaa

Oje ọgu

¹ Nteke unu jekfuru ndu ọhogu unu ọgu, unu je akpọ-lwu ịnya mẹe ụgbo-ịnya mẹe ndu ojọgu, ka nke unu shii, t'egvu ba atsụkwa unu. O noo nkele Onye-Nwe-Ọha, bụ Chileke unu bẹ nọkwa swiru unu eswiru, mbụ onye ono, dufutaru unu l'alị Íjiputu.

² Nteke unu l'abya ọwata ọgu ono, t'onye l'agbajẹ ẹja nụ Chileke fụtakwa bya ekfuru okfu yeru ndu ojọgu unu.

³ T'ọ sụ whẹ: “Unubẹ ndu Ízurẹlu, unu ngabẹkwa nchị. Ntanụ bẹ unu l'ejekfu ndu ọhogu unu ọgu. Tẹ meji ba atọfukwa unu, t'egvu ba atsụkwa unu. T'obu be etekwa unu ete, t'ẹhu ba anmakwa unu anma l'iwhu whẹ.

⁴ Nkele ọo Onye-Nwe-Ọha, bụ Chileke unu bẹ unu l'iya lị eje t'ọ lwụ-chitaru unu ọgu l'ẹka ndu ọhogu unu nọ, mee t'unu lwụ-gbua.”

⁵ Tẹ ndu ishi kfukwaruwho yeru ndu ojọgu unu sụ whẹ: “?O nweru onye tụru ụlo ọ̀whúú, toko wooru iya ye l'ẹka Chileke? T'onye ọbu dawhukwa azụ lashia ibe iya a nọnyakwa ọ nwụhu l'ọgu, onye ọdo je eworu ụlo ono ye l'ẹka Chileke.

⁶ ?O nweru onye gbarụ mgbabu vayịnu, toko ria iwhe shi iya nụ? T'onye ọbu dawhukwa azụ lashia ibe iya, a nọnyakwa ọ nwụhu l'ọgu, onye ọdo je eria ya.

⁷ ?O nweru onye l'ejekwadu okfu nwanyị tọko lụ-bua ya? T'onye ọbu dawhukwa azụ lashia ibe iya, a nọnyakwa ọ nwụhu l'ọgu; onye ọdo je alụa ya.”

⁸ Tẹ ndu ishi ono kfukwaruwho yebaaru ndu ojọgu ono sụ whẹ: “?O nweru onye l'atsụ egvu, m'ọbu onye meji l'atọfu atọfu? T'onye ọbu dawhukwa azụ lashia ibe iya; a nọnyakwa meji tọfulahaa ibe iya g'ọ tọfuru yẹbedua.”

⁹ Ndu ishi ono kfugelewho okfu ono nụ ndu ojọgu ono, t'a họta ndu l'a-bụru ndu ishi ojọgu tẹ whẹ l'edu ndu ojọgu ono.

¹⁰ Nteke unu wụfutaru eje ọgu lẹ mkpụkpu, t'unu vukwaru ụzo chọo gẹ l'ee-shi kpeshia tẹ nchị dụ ndoo.

¹¹ Ọ -bụru lẹ whẹ kwetaru tẹ nchị dụ ndoo, bya egheberu unu ọnuzo whẹ ọnu, ọo ya bụ, iwhe bụ ndu bu lẹ mkpụkpu ono l'owhu abụkotaru ndu unu l'a-nọdu edzuru ozhi mkpọnwuru.

¹² Nteke bụ lẹ whẹ jịkaru nke nchị-ọdu-ndoo, mbụ whẹ tsokfuru unu ọgu, t'unu yebuta mkpụkpu ono mgburumgburu.

¹³ Onye-Nwe-Ọha, bụ Chileke unu yelewho mkpụkpu ono l'ẹka unu, unu egude ogu-ịgba gbushikota unwoke, nọkota iya nụ gẹ whẹ ha.

¹⁴ Ọle ụnwanyi whẹ mẹe ụnwegirima whẹ mẹe élwù whẹ mẹkota iwhe lile ọdo, dụ lẹ mkpụkpu ono je akpaa l'arya, a vụtaru l'ọgu, dụ iya nụ g'ọ hakọta, bẹ unu l'e-gwotakota t'ọ bụru nke unu. Unu eripya iwhe unu gwotaru l'ẹka ndu ọhogu unu ono, Onye-Nwe-Ọha, bụ Chileke unu nụru unu.

¹⁵ Ọ kwa nno bụ g'unu l'e-mekotaje mkpụkpu gẹ mkpụkpu ha l'owhu, nọkota unu otẹnya otẹnya, bụ ọwhu l'ẹte abụa mkpụkpu mba gẹ mba ha ono, dụ l'ẹka-a.

¹⁶ A bya lẹ mkpụkpu gẹ mkpụkpu ha nke ndu-a, Onye-Nwe-Ọha, bụ Chileke unu l'eme tẹ ya nụ unu alị whẹ t'ọ bụru oke-iwhe unu, t'ọ bọ dụkwa iwhe l'atụ ume, unu l'a-ha t'ọ nọdu ndzụ.

¹⁷ Unu gbugbushikota whẹ kpamụ kpamụ, shi nno woru whẹ nụ Chileke, bụ iya bụ ndu Hetu mẹe ndu Amọru mẹe ndu Kenanu mẹe ndu Pẹ́rezu mẹe ndu Hevu mẹe ndu Jebusu, ẹgube ono Onye-Nwe-Ọha, bụ Chileke unu tụru iya unu ọtu iwu.

¹⁸ Nke ọwhu whẹ l'ẹte ezhi unu ome akpamara ono, whẹbedua l'anọje eme, mbụ iwhe ono, whẹ l'anọje eme gude agwa agwa whẹ, unu eshi nno meswee Onye-Nwe-Ọha, bụ Chileke unu.

¹⁹ Nteke unu yebutaru mkpụkpu mgburumgburu nọo ọdu, l'ẹka unu l'etso iya ọgu t'unu lwụa ya lwụta, t'unu ba adabẹkwa ogbunkụ l'oshi, kfụru akfụru lẹ mkpụkpu ono mebyishia. Unu wọtaje akpụru iya ria, unu be egbutsukwa iya egbutsu. Oshi, kfụru l'ẹgbudu ?ọ bụ madzụ nke t'unu yebutafua ya mgburumgburu?

²⁰ Oshi, unu l'emebyije kpụ bụ oshi, unu marụ l'ọ tọ bụdu oshi-ọmi. Unu gbutsujee ya gude tụa ịga-ọgu lwụshi mkpụkpu ono, l'etso unu ọgu ono ọgu jeye nteke unu l'alwụ-gbu iya.