Ditoronomi 2 - BAYỊBURU Ẹzaa

Awha, ndu Ízurẹlu nọgbaberu l'echi-ẹgu

¹ Anyi bya atsuwhu azụ tsoru echi-ẹgu shia ụzo Eze-ẹnyimu Uswe-uswe; ẹgube Onye-Nwe-Ọha sụru mu t'anyi mee ya. Anyi nọo ọdu; tsoru aghawhe ngvudangvu l'ugvu ugvu Siye l'ẹka ono.

² Tọ dụ iya bụ, Onye-Nwe-Ọha sụ mu:

³ “Unu ghawhetashiwaru l'alị ugvu ugvu-a. Iwhe unu l'eme ntaa bụ t'unu ghachi shia ụzo isheli.

⁴ Iwhe l'ii-kfuru ndu Ízurẹlu bụ: ‘Ntaa bẹ unu byakwa l'awụghata ẹka ụnwunna unu bu, mbụ ẹpa Ịso, bụ ndu ono, bu l'alị Siye. Whẹ l'a-nọkwa atsụ unu egvu, ọle t'unu sakwaa ẹnya lẹ mini.

⁵ Unu ba akpatsukwa whẹ ọgu, nkele mu ta abyakwa l'anụ unu alị whẹ m'ọo ẹka lanụ, m'o beru ọ bụru ẹka ha g'ọo ntụ-ọkpa lanụ. Ọo Ịso bẹ mu nụru alị ugvu ugvu Siye ono t'ọ bụru nkiya.

⁶ Ọo okpoga bẹ unu l'e-gudeje zụta whẹ nri ria, mini bụkwaruwho okpoga bẹ unu l'e-gudeje zụta whẹ iya ngụa.’ ”

⁷ Onye-Nwe-Ọha, bụ Chileke unu gọokwaru unu ọnu-ọma l'iwhe lile, bụ iwhe unu l'eme l'ẹka unu. Ọ makọtaru g'ije unu dụ dụ l'echi-ẹgu-a, parụ ẹka-a. Ụkporo awha ugbo labọ-ọ bẹ Onye-Nwe-Ọha, bụ Chileke unu nọkota swiru unu, tọ dụ iwhe ụko iya dụjeru unu.

⁸ Ọo ya bụ, anyi ghajaa ẹka ụnwunna anyi whẹ ono bu bụ iya bụ ẹpa Ịso ono bu l'alị Siye. Anyi gbangoo echi-ụzo Araba ọwhu shiru lụfu Elatu; anyi gbangokwawho ụzo Eziyọnu-geba. Anyi je agbaa mgbango ụzo; shia ụzo ọwhu lụfuru l'echi-ẹgu ndu Moabu.

⁹ Onye-Nwe-Ọha bya asụ mu: “Unu ba achọkwa ndu Moabu okfu. Unu ba akpatsukwa whẹ ọgu nkele mu ta abyakwa l'anụ unu alị whẹ m'ọo ẹka lanụ; ọo ẹpa Lọtu bẹ mu nụru mkpụkpu Áru t'ọ bụru nkewhe.”

¹⁰ Ndu shi buru l'ẹka ono bụ ndu Emimu. Whẹ bụ ndu ọkpehu dụ; whẹ ha l'urwu tẹmenu whẹ tsefugee etsefu g'ọo ndu Anaku.

¹¹ Ndu Emimu bẹ l'eekuje ẹpa Refa; ẹgube ono, l'eekuje iya ndu Anaku. Ọle ndu Moabu l'ekuje whẹ ndu Emimu.

¹² Ndu Họru shikwawho buru l'alị Siye. Ọle ẹpa Ịso bẹ natarụ whẹ alị ono mee whẹ, whẹ bụru kpurupyata l'iwhu whẹ, bya ebuchia alị whẹ ono, ẹgube ono, ndu Ízurẹlu meru l'alị ono, Onye-Nwe-Ọha nụru whẹ t'ọ bụru nkewhe.

¹³ Tọ dụ iya bụ, Onye-Nwe-Ọha sụ: “Unu wụ-lihu je adaa ọnu-iyi Zerẹdu.” Whẹ wụ-lihu je adaa ọnu-iyi Zerẹdu ono.

¹⁴ Watalẹwho nteke anyi gbalihuru lẹ Kádẹshi Baneya rwua nteke anyi darụ ọnu-iyi Zerẹdu bẹ bụ ụkporo awha l'awha iri l'ẹsato. Ọ bya l'ebedeshia nteke ono, ọgbo, l'eje ọgu lẹ Ízurẹlu nwụshihukotawaa ẹgube Onye-Nwe-Ọha riburu lẹ nte l'ọo-dụ whẹ.

¹⁵ Ọo Onye-Nwe-Ọha bẹ darụ whẹ ejo ẹka l'ẹhu gude chigbushia whẹ l'echilabọ ụnwu Ízurẹlu jeye whẹ gvụkota.

¹⁶ Ọo ya bụ, ọnwu gbugelewho ndu, dzuru oje ọgu l'ime ndu Ízurẹlu,

¹⁷ Onye-Nwe-Ọha bya asụ mu:

¹⁸ “Ntanụ bẹ unu l'a-ghata Áru, dụ l'alị ndu Moabu.

¹⁹ Unu -jeta rwua alị ndu Amọnu, unu ba achọkwa whẹ okfu, unu ejee akpatsukwa whẹ ọgu nkele mu ta abyakwa l'anụ unu alị ndu Amọnu m'ọo ẹka lanụ. Ọo ẹpa Lọtu bẹ mu nụru alị ono t'ọ bụru nkewhe.”

²⁰ Ẹka ono bẹ l'aanọjekwawho eku alị ẹpa Refa. Ẹpa Refa bẹ shi buru l'ẹka ono. Ndu Amọnu l'anọje eku whẹ ndu Zamuzumimu.

²¹ Whẹ shi bụru ndu ọkpehu dụ, whẹ hakwawhọ l'urwu; tẹmenu whẹ tsefugee etsefu g'ọo ndu Anaku. Ọle Onye-Nwe-Ọha bẹ meru, whẹ bụru kpurupyata l'iwhu ndu Amọnu. Ndu Amọnu nata whẹ alị whẹ buchia ya.

²² Ọ kwawhọ ẹgube ono bẹ Onye-Nwe-Ọha meru iya ndu ẹpa Ịso ono, shi buru l'alị Siye. O gbushiru whẹ ndu Họru, shi buru l'ẹka ono, ndu ẹpa Ịso bya achịshia whẹ buchia ibe whẹ jeye ntanụ.

²³ Ọ bụru nno bụ g'ọ dụ ndu Ava, mbụ ndu ono, shi bukotaru l'ụnwu mkpụkpu, nọ jeye lẹ mkpụkpu Gaza. Whẹbedua bẹ bụ ndu Kafụto, ndu shi l'alị Kafụto bẹ meru whẹ, whẹ bụru kpurupyata buchia alị whẹ.

Ndu Ízurẹlu l'alwụ-gbu eze Sáyihọnu

²⁴ Onye-Nwe-Ọha sụ mu: “Ngwa, t'unu gbalihu palia ije, je adaa nsụda Anọnu. Lekwa lẹ Sáyihọnu, bụ eze, nọ lẹ Hẹshibonu achị ndu Amọru yẹle alị iya l'owhu bẹ mu yeekwaru unu l'ẹka. Unu tso whẹ ọgu, wata whẹ ọnashi alị whẹ.

²⁵ Shizhiawho ntanụ bẹ mu l'e-me t'iwhe, bụ mbakeshi nọ lẹ mkpula igweli l'owhu wata unu ọtsu egvu, whẹ anmakwawhọ jijiji. Ndu nụru akọ ẹtu unu bẹ ẹhu l'a-nmakọta anma, meji atọfu whẹ.”

²⁶ Ọo ya bụ, mu shi l'echi-ẹgu Kedemotu zhia ndu ozhi tẹ whẹ je ezhia Sáyihọnu, bụ eze ndu Hẹshibonu ozhi nchị-ọdu-ndoo sụ iya:

²⁷ “Byiko tẹ mu ghatanụ l'alị ghu. Ẹka mu l'a-kwasẹru bụlewho ọma oji kpụ. Mu ta ahakwa ọma oji swịa ya l'ụzo ọdo.

²⁸ Nri, mu l'e-ri eri mẹe mini, mu l'a-ngụ angụ bụ okpoga bẹ mu l'a-kfụje ghu gude zụta iya. Iwhe mu l'aryọ ghu nwẹkiya bụ tẹ mu gude ọkpa ghata l'alị unu

²⁹ jeye mu adaa ẹnyimu Jọ́danu bahụ l'alị ono, Onye-Nwe-Ọha, bụ Chileke anyi l'anụ anyi. Mbụ ẹgube ono, ụnwu Ịso, bu l'alị Siye mẹe ndu Moabu, bu lẹ Áru harụ, mu ghata l'alị whẹ.”

³⁰ Ọle Sáyihọnu, bụ eze ndu Hẹshibonu bẹ jịkaru t'anyi ba aghatashị l'alị iya. O noo lẹ Onye-Nwe-Ọha, bụ Chileke unu meru t'obu nmaa ya mkpigbi, o meru t'obu kpọ-chia ya akpọ-chi nke ọwhu l'ee-shi nno ya eworu iya ye unu l'ẹka, bụnua g'ọ dụ ntanụ-a.

³¹ Onye-Nwe-Ọha sụ mu: “Lekwa, lẹ mu wataakwaru ome tẹ Sáyihọnu yẹle alị iya lwakọta unu l'ẹka. Unu watakwa iya anashị, nke ọwhu alị ono l'e-megee bụru oke-iwhe unu.”

³² Tọ dụ iya bụ, Sáyihọnu yẹle ndu nkiya l'owhu wụ-kfuta anyi ọgu lẹ mkpụkpu Jahazu.

³³ Onye-Nwe-Ọha, bụ Chileke anyi woru iya ye anyi l'ẹka, anyi lwụ-gbua ya yẹle ụnwu iya mẹe ndu nkiya iya l'owhu.

³⁴ Anyi natakọta mkpụkpu lile, bụ nkiya nteke ono mebyishikota, tụko iwhe bụ unwoke mẹe ụnwanyi mẹe ụnwegirima gbugbushikota kpamụ kpamụ shi nno woru whẹ nụ Chileke, t'ọ dụ onye wafụru iya nụ m'ọo onye lanụ.

³⁵ Ọo élwù bẹ anyi chịtaru, gwotakwawhọ arya, dụ lẹ mkpụkpu ono, anyi lwụtaru ọ bụru nke anyi.

³⁶ Wata lẹ Arowa, dụ l'agụga nsụda Anọnu mẹe wata lẹ mkpụkpu ono, dụ l'ime nsụda Anọnu je akpaa l'alị Giledu ta adụdu mkpụkpu ọwhu kpọjeru anyi ẹka m'ọo nnanụ. Mkpụkpu ono g'ọ ha bẹ Onye-Nwe-Ọha, bụ Chileke anyi nụkotaru anyi.

³⁷ Ọle anyi te ejekubedu alị ndu Amọnu mẹe alị, dụ l'agụga mini Jabọku mẹe mkpụkpu, dụkota l'alị ugvu ugvu, mbụ-zhia ẹka lile ono, Onye-Nwe-Ọha, bụ Chileke anyi buchiru anyi t'anyi be eje.