Ditoronomi 18 - BAYỊBURU Ẹzaa

Oke, rwuberu ndu Lívayi, bụ ọgbo l'agbajẹ ẹja nụ Chileke

¹ Ndu Lívayi, bụ ọgbo l'agbajẹ ẹja nụ Chileke, mbụ ikfu Lívayi l'owhu bẹ l'ẹte ahẹdu oke-alị, tọ dụ oke-iwhe, l'e-rwube whẹ nụ l'alị Ízurẹlu. Iwhe whẹ l'e-gude buru bẹ bụ iwhe e gude agbarụ Onye-Nwe-Ọha ngwo-ẹja, a kpọru ọku, ọo ya bụ oke-iwhe whẹ.

² Whẹ te enwedu oke-iwhe g'ọo ụnwunna whẹ, ọo Onye-Nwe-Ọha bẹ bụ oke-iwhe whẹ nweru, lẹ g'o kweru whẹ iya l'ụkwa.

³ Oke, l'e-rwubeje ndu l'agbajẹ ẹja nụ Chileke nteke ndu Ízurẹlu gude oke-eswi m'ọ bụ atụru bya ọgbaru Onye-Nwe-Ọha ẹja bụ: ẹka iya mẹe agba iya mẹe okfuru iya.

⁴ Iwhe ọdo, unu l'a-nụje whẹ bụ akpụru iwhe unu vu ụzo buta mẹe mmẹe ọwhuu mẹe mmanụ unu yẹle ẹji mbụ, unu ghebushiru l'atụru unu.

⁵ Nkele Onye-Nwe-Ọha, bụ Chileke unu shiwaa l'ikfu unu l'owhu họta whẹ, whẹ l'ẹpa whẹ tẹ whẹ kfụjeru l'iwhu Onye-Nwe-Ọha gude ẹwha iya jejeru iya ozhi ntekenteke.

⁶ Ọ -bụru l'onye Lívayi bẹ shi l'ẹka o bu l'ibe unu l'alị Ízurẹlu l'owhu, gude g'ọ gụru iya byatashia ẹka Onye-Nwe-Ọha, bụ Chileke l'a-họta,

⁷ t'o gudekwa ẹwha Onye-Nwe-Ọha, bụ Chileke iya jee ozhi g'ọo ndu Lívayi ibe iya, bụ ndu l'eje ozhi l'atatiwhu Onye-Nwe-Ọha l'ẹka ono.

⁸ T'oke whẹ bụjekwaru iwhe lanụ l'iwhe gbarụ whẹ nụ, t'a gụfukwa iya iwhe yẹbedua natarụ l'iwhe e retaru l'oke-iwhe nna iya whẹ.

Unu be etsokwa ẹka ndu l'ẹte amaa Chileke

⁹ Unu -bahụlewho l'alị ono, Onye-Nwe-Ọha, bụ Chileke unu l'eme tẹ ya nụ unu ono, t'unu ba anwụkwa ome akpamara ono, ndu mba gẹ mba ha ono l'eme.

¹⁰ T'a ba awhụkwa onye l'akpọ nwa iya nwoke m'ọ bụ nwa iya nwanyị ọku gude agba ẹja l'echilabọ unu. T'ọ bọ dụkwa onye l'a-nọ agba ẹja m'ọ bụ onye l'eme amamanshi, m'ọbu onye l'agba ẹja, m'ọbu onye l'ada lẹ mgbashị.

¹¹ T'ọ bọ dụkwa onye l'e-keje oswe, ya adụkwa onye l'e-jeje njịta l'ẹka maa, ya adụkwa onye l'a-bụ jibya, ya adụkwawho onye l'e-jeje l'ọnu-ụwa.

¹² Nkele onye mekwaru ẹgube iwhe ono bẹ kwa akpamara bẹ l'oome l'iwhu Onye-Nwe-Ọha. Ọo ẹgube akpamara ono bẹ meru Onye-Nwe-Ọha, bụ Chileke unu l'achịfu mba gẹ mba ha ono l'iwhu unu.

¹³ Unu bụkwaru ndu ụta l'adụa lẹ ndzụ whẹ l'ẹka Onye-Nwe-Ọha, bụ Chileke unu nọ.

Onye nkfuchiru, dụ g'ọo Mósisu

¹⁴ Mba gẹ mba ha ono, unu l'eme t'unu nata alị whẹ ono l'anọje anụru ndu l'eme amamanshi mẹe ndu l'agba ẹja okfu. Ọle unubẹdua bẹ Onye-Nwe-Ọha, bụ Chileke unu te ekwedu t'unu mee nno.

¹⁵ Onye-Nwe-Ọha, bụ Chileke unu l'e-shi l'echilabọ unu, mbụ l'echilabọ ụnwunna unu gẹdegede họfutaru unu onye nkfuchiru, l'a-dụ g'ọo mu. Ọo onye ono bẹ unu l'a-nụjeru okfu.

¹⁶ Ọo zhiawho iwhe ono bẹ unu kfuru nụ Onye-Nwe-Ọha, bụ Chileke unu l'ugvu Horẹbu mbọku ono, unu dzuru edzumedzu, nteke ono, unu sụru: “Byiko t'anyi ba anụhenu olu-okfu Onye-Nwe-Ọha, bụ Chileke anyi, anyi awhụhenu eze ọku-a ọdo nke ọwhu anyi l'ẹte anwụshihu.”

¹⁷ Onye-Nwe-Ọha sụ mu: “Whẹ kfuzhikwaru ekfuzhi l'iwhe whẹ kfuru.

¹⁸ Mu l'e-wofutaru whẹ onye nkfuchiru, dụ g'ọo gụbedua l'echilabọ ụnwunna whẹ. Mu eworu okfu mu ye iya l'ọnu, ya atụko iwhe mu kfuru iya kfukotaru whẹ.

¹⁹ Iwhe bụ-zhia onye l'ẹte angabẹ nchị l'okfu mu ono, l'oo-gude ẹwha mu ekfu, bẹ mu l'a-jị ọji nkwẹnkwe.

²⁰ Ọle, onye nkfuchiru wata ọkpa ngganga gude ẹwha mu kfulahaa okfu, mu l'ete ekfua, m'ọbu gude ẹwha agwa ọdo kfulahaa, onye nkfuchiru ọbu bẹ l'ee-gbukwa egbu.”

²¹ Unu nwekwaru ike unu ajịa onwunu sụ: “?Ndẹhunu g'anyi l'e-shi marụ nkfuchiru ọwhu l'ẹte abụa Onye-Nwe-Ọha kfuru iya?”

²² Onye nkfuchiru -gude ẹwha Onye-Nwe-Ọha ekfu iwhe, ọ -bụru l'iwhe ono, l'ookfu te eredu, m'ọkwanu l'ọ tọ dụdu lẹ g'o kfuru iya, ọo ya bụ l'okfu ono ta abụdu Onye-Nwe-Ọha bẹ kfuru iya nụ. Ọo onye nkfuchiru ono bẹ gude ngganga kfua ya. Unu ba atsụjekwa ẹgube onye ono egvu.