Ditoronomi 16 - BAYỊBURU Ẹzaa

Oge O-je-ghata

¹ Unu rijee oge O-je-ghata nke Onye-Nwe-Ọha, bụ Chileke unu l'ọnwa Abyibu, o noo nkele ọo l'ọnwa Abyibu bẹ Onye-Nwe-Ọha, bụ Chileke unu dufutaru unu l'alị Íjiputu l'ẹnyashi.

² Unu gbajẹkwaru Onye-Nwe-Ọha, bụ Chileke unu ngwo-ẹja O-je-ghata. Unu gbujee atụru, m'ọbu eghu, m'ọbu eswi gude gbaa ẹja ono l'ẹka Onye-Nwe-Ọha l'a-họta dobe ẹwha iya buru iya eburu.

³ Unu be egudejekwa buredi, e yeru iwhe l'ekoje buredi taa ya. Abalị ẹsaa bẹ unu l'a-tajẹ buredi, l'eete eyee iwhe l'ekoje buredi, bụ iya bụ buredi iwhe-ọtsulanu. O noo nkele ọo ẹwhuru-ọku bẹ unu gude fụta l'alị Íjiputu. Unu meje ya nno jeye gẹ unu l'a-nọ-beru, shi nno anyatajẹ mbọku ono, unu shi lẹ Íjiputu fụta.

⁴ T'a ba awhụkwa iwhe l'ekoje buredi l'ẹka unu l'alị unu l'owhu l'ime abalị ẹsaa ono. O nokwawho g'anụ whọ, unu gburu l'urwẹnyashi abalị mbụ whọ l'ẹte adụje fụta ụtsu.

⁵ Unu ba anọdujekwa lẹ mkpụkpu lẹ mkpụkpu unu, bụ ẹka Onye-Nwe-Ọha, bụ Chileke unu l'a-nụ unu gbaa ẹja O-je-ghata ono.

⁶ T'ẹka, unu l'anọduje gbaa ya bụkwaru ẹka ono, Onye-Nwe-Ọha, bụ Chileke unu l'a-họta dobe ẹwha iya buru iya eburu. Ọo l'ẹka ono bẹ unu l'a-nọduje gbaa ẹja O-je-ghata ono l'urwẹnyashi, mẹ ẹnyanwu ladẹlewho l'ishi, l'oge nteke ono, unu shi l'alị Íjiputu fụta.

⁷ Ọo ahụhu bẹ unu l'a-hụje anụ iya taa l'ẹka ono, Onye-Nwe-Ọha, bụ Chileke unu l'a-họta. O -rwua l'ụtsu iya, unu ajịkobe lashia ibe unu.

⁸ Abalị ishii bẹ unu l'a-tajẹ buredi, l'eete eyee iwhe l'ekoje buredi, o -rwua lẹ mbọku nke ẹsaa, unu edzukoo l'iwhu Onye-Nwe-Ọha, bụ Chileke unu. Unu be ejejekwa ozhi mbọku ono l'owhu.

Ori-oge idzu

⁹ Unu gụtaje idzu ẹsaa dobe. Nteke unu l'a-watajẹ ọgu idzu ẹsaa ono bụ nteke ono l'aawatajẹ obu witi.

¹⁰ O noo nteke unu l'e-rijeru Onye-Nwe-Ọha, bụ Chileke unu Oge-Idzu. Unu ewotaje iwhe zụru unu nkwe l'obu bya anụ lẹge Onye-Nwe-Ọha, bụ Chileke unu gọ-beru unu ọnu-ọma.

¹¹ Unu nọdujekwa l'iwhu Onye-Nwe-Ọha, bụ Chileke unu tee ẹswa l'ẹka ono, Onye-Nwe-Ọha, bụ Chileke unu l'a-họta dobe ẹwha iya, buru iya eburu, mbụ unu l'ụnwegirima unu unwoke mẹe ụnwanyi mẹe ohu unu unwoke mẹe ụnwanyi mẹe ndu Lívayi, bu lẹ mkpụkpu unu mẹe ndu nlwamụnlwa mẹe ndu l'ete enwe nna mẹe ụnwanyi-mbunu, bụ ndu nọ l'echilabọ unu.

¹² Unu nyatajẹkwa l'unu shi bụru ohu l'alị Íjiputu, unu asajẹkwaa ẹnya lẹ mini mekotaje iwhe-e, mu tọru ọkpa iya-a.

Ori-Oge Ime-Mkpu

¹³ Abalị ẹsaa bẹ unu l'e-rije oge-ime-mkpu mẹ unu chifutagelewho balị unu, kụta-gee mmẹe unu.

¹⁴ Unu tejekwaa ẹswa nteke unu l'eri oge ono, unubẹdua mẹe ụnwegirima unu unwoke mẹe ụnwanyi mẹe ohu unu unwoke mẹe ụnwanyi mẹe ndu Lívayi mẹe ndu nlwamụnlwa mẹe ndu l'ete enwee nna mẹe ụnwanyi-mbunu, bụ ndu nọ l'echilabọ unu.

¹⁵ Abalị ẹsaa bẹ unu l'e-rijeru Onye-Nwe-Ọha, bụ Chileke unu oge ono l'ẹka Onye-Nwe-Ọha l'a-họta. Nkele Onye-Nwe-Ọha, bụ Chileke unu l'a-gọru ọnu-ọma nụ unu l'iwhe unu setaru eseta g'ọ ha mẹe iwhe lile, unu kụberu ẹka nke ememe. Nke ọwhu ẹhu l'a-tsọ unu ụtso tsọfu iya unu l'ishi.

¹⁶ Ugbo ẹto l'awha bẹ unwoke unu l'owhu l'a-byajẹ l'atatiwhu Onye-Nwe-Ọha, bụ Chileke unu l'ẹka ono, l'ọo-họta. Whẹ l'a-byajẹ l'ori Oge buredi, l'eete eyee iwhe l'ekoje buredi mẹe l'ori Oge idzu mẹe l'ori Oge ime-mkpu. Tẹ whẹ ba agbajẹkwa ẹka bya l'atatiwhu Onye-Nwe-Ọha.

¹⁷ Onye nọnu l'e-wotaje iwhe lẹge ike beru iya bya anụ. Ọo gẹ Onye-Nwe-Ọha, bụ Chileke unu gọta-beru unu ọnu-ọma bẹ unu l'a-nụ-bejeru.

Ọhota ndu ikpe

¹⁸ Unu họtakwa ndu l'a-bụ ọgbo-ikpe mẹe ndu l'a-bụ ishi ikfu g'ikfu unu ha, unu họo whẹ lẹ mkpụkpu gẹ mkpụkpu ha ono, Onye-Nwe-Ọha, bụ Chileke unu l'eme tẹ ya nụ unu. Ndu ono, l'a-bụru ndu l'e-kpejeru ndu Ízurẹlu ikpe, kfụru nhamụnha.

¹⁹ Unu be ekpejekwa ikpe l'ụzo gberu nggọ, unu be ebujekwa madzụ ẹnya l'iwhu ekpe iya ikpe. Unu be erikwa n-wọlazu lẹ n-wọlazu l'ekpuchijekwa onye marụ ágụ ẹka l'ẹnya, l'oomejekwawho t'okfu onye dụ chịriri dụ ghajọ-ghajo-ghajo.

²⁰ T'ikpe, kfụru nhamụnha bụkwaru iwhe unu l'a-nọduje l'ọzo iya kpelekengu-kpụu nke ọwhu unu l'a-nọdu ndzụ, keta alị ono, Onye-Nwe-Ọha, bụ Chileke unu l'eme tẹ ya nụ unu.

Ọbaru agwa ẹja

²¹ Unu ba akpọbejekwa itso Ashera lẹ mgboro ẹnya-mgbẹja, unu doberu Onye-Nwe-Ọha, bụ Chileke unu.

²² Ya adụbukwa ẹwhuru, unu l'e-dobeje nsọ wata agwagwa, bụ iwhe Onye-Nwe-Ọha, bụ Chileke unu kpọru ashị.