Ditoronomi 15 - BAYỊBURU Ẹzaa

Awha o-nweru-onwonye

¹ Lẹ ngvụcha awha ẹsaa, fụtaru nụ, unu hajẹkwaa ụgwo, e ji eji t'ọ laa nno.

² Gẹ l'ee-shije eme nke ọha ụgwo ọbu t'ọ laa bụ ọwa: T'onye jeru ibe iya ụgwo hajẹkwaaru iyẹ ya. Tọ bọ natajẹkwa onye Ízurẹlu ibe iya; m'ọbu nwune iya ụgwo ono nkele iwhe e kuru awha ono bụ awha, Onye-Nwe-Ọha sụru t'ụgwo laa.

³ Ụgwo onye ọha ọdo ji ghu bẹ l'ịi-nata, ọle ọwhu nwune ghu ji ghu bẹ l'ịi-ha t'ẹka ghu lụfu iya.

⁴ Ọ tọ dụkwa onye bya l'a-bụru onye ụkpa l'echilabọ unu nkele Onye-Nwe-Ọha, bụ Chileke unu l'a-gọru ọnu-ọma nụ unu l'alị ono, l'oome tẹ ya nụ unu t'ọ bụru oke-iwhe unu ono,

⁵ m'ọ -bụkwaru l'unu l'emeje iwhe Onye-Nwe-Ọha, bụ Chileke unu kfuru, dee ẹnya lẹ mini emekota iwhe ọ tụru l'iwu t'e meje bụ iya bụ iwhe-e, mu l'atụru unu ntanụ-a.

⁶ O noo nkele Onye-Nwe-Ọha, bụ Chileke unu l'a-gọru ọnu-ọma nụ unu ẹgube ono, o kweru iya unu l'ụkwa. Unu l'e-jeje ikpoto mba ụgwo, ọle unubẹdua te ejitadu ụgwo. Unu l'a-bụru ishi chịa ikpoto mba, ọle whẹbedua ta abụdu ishi achị unubẹdua.

⁷ Ọ -bụru l'o nweru nwune unu, bụ onye ụkpa, unu l'iya tụkoru buru lẹ mkpụkpu lanụ l'alị ono, Onye-Nwe-Ọha, bụ Chileke unu l'eme tẹ ya nụ unu; t'obu ba anmakwa unu mkpigbi, unu be ekekwaru nwune unu ono, bụ onye ụkpa ono ẹka unu ngvu.

⁸ Iwhe unu l'e-mechia bụ t'unu sajẹru iya ẹka asa jee ya ụgwo, l'asụru iya ome mkpa iya; o beru mkpa iya ọbu ha ọha agha.

⁹ Unu kwabẹkwaru onwunu ẹnya t'ọriri l'abẹe l'iwhe ba agbatajẹ unu l'uche, nke t'unu sụ woo l'awha nke ẹsaa bụ iya bụ awha, l'aa-ha ụgwo t'ọ laa dụakwa ntse, shi nno tachiaru nwune unu ono, nọ lẹ mkpa ono iwhu, jịka l'unu ta anụdu iya iwhe. Ọo-ryakukwa Onye-Nwe-Ọha tuku unu, ya abụru unu ome iwhe-dụ-ẹji.

¹⁰ Unu gudejekwa obu unu nụ iya iwhe ọ sụru t'unu nụ iya, unu ba agụjekwa áwhụ nteke unu l'anụ iyẹ ya nkele Onye-Nwe-Ọha, bụ Chileke unu l'e-kwobekwa nke iwhe ono, unu nụru iya gọru ọnu-ọma nụ unu l'iwhe lile, unu l'eme eme mẹe l'iwhe lile, unu yeru ẹka unu nke ememe.

¹¹ O noo lẹ ndu ụkpa ta abyakwa l'agvụ agvụ l'alị-a. Ọ bụru iya meru, mu l'atụru iya unu l'iwu asụje, unu sajẹkwaaru unwune unu ẹka asa yẹle ndu nọ lẹ mkpa mẹe ndu bụ ndu ụkpa l'alị unu ono.

O-nweru-onwonye nke ndu bụ ohu

¹² Ọ -bụru l'o nweru onye Híburu ibe ghu, ị gbarụ ohu, mbụ nwoke ọdua l'ọo nwanyị, o jewaru ghu ozhi awha ishii, o -bekwa lẹ nke ẹsaa hakwaa ya t'ọ laa je enweru onwiya.

¹³ Ị halẹ iya whọ o nweru onwiya ono, ba agbabẹkwa iya ẹka ọto t'ọ laa.

¹⁴ Kwatakwa saa ẹka asa, shi l'elwu ghu mẹe lẹ balị ghu mẹe lẹ mmẹe ghu, nụ iya iwhe. Ọo gẹ Onye-Nwe-Ọha, bụ Chileke ghu gude gọ-beru ọnu-ọma nụ ghu bẹ l'ịi-nụ iya iwhe.

¹⁵ Unu nyatakwa l'unu shi bụru ohu l'alị Íjiputu, Onye-Nwe-Ọha, bụ Chileke unu bya agbafụta unu. Ọo ya meru g'o gude mu l'atụru unu iwu-a ntanụ.

¹⁶ Ọle ọ -bụkwanuru l'ohu ono sụru ghu lẹ ya ta alụfudu ghu l'ẹka nkele o yeru ghu obu; yee ndibe ghu obu, tẹmenu ọnodu dụru gụ l'iya lẹ ree

¹⁷ ọo ya bụ, gụ ewota oleji dobe iya nchị lẹ mgbo kpọ-fua, ya abụru ohu ghu jeyewaroya. Ọ kwawhọ nno bẹ l'ii-me onye bụ ohu ghu lẹ nwanyị.

¹⁸ T'ọ bọ tsụkwa ghu l'ẹhu gẹ l'ii-me haa ya t'o nweru onwiya nkele ozhi, o jeru ghu awha ishii bẹ kakwa shii ugbo labọ amamẹ ozhi onye e butaru ebuta gege ejeru ghu. Onye-Nwe-Ọha, bụ Chileke ghu l'a-gọkwaru ọnu-ọma nụ ghu l'iwhe lile, l'iime eme.

Anụ, vu ụzo waa ẹkpa-nwa

¹⁹ Ọwhu, bụ okee ya l'iwhe bụ nwa eswi unu mẹe atụru yẹle eghu unu nwụru, bẹ unu l'e-dobekotaru Onye-Nwe-Ọha, bụ Chileke unu nsọ. Unu be egudejekwa oke-eswi vu ụzo waa ẹkpa-nwa ne iya l'eswi unu eje ozhi l'ẹgu. Unu be eghebushijekwa atụru, vu ụzo waa ẹkpa-nwa l'atụru unu ẹji l'ẹhu.

²⁰ Awha g'awha ha t'unu lẹ ndibe unu tajẹkwa anụ iya l'atatiwhu Onye-Nwe-Ọha, bụ Chileke unu l'ẹka ono, Onye-Nwe-Ọha l'a-họta.

²¹ Ọle, ọ -bụkwaru l'ọrwu dụ anụ ono l'ẹhu, mbụ l'ọ bụ ngvụru, m'ọbu l'ọotso ishi, m'ọ kwanụ l'o nweru ẹka ọdo, ọrwu dụ iya l'ẹhu nke ẹji ẹji, unu be egudekwa iya gbaarụ Onye-Nwe-Ọha, bụ Chileke unu ngwo-ẹja.

²² Unu nọdukwa l'ibe unu taa anụ ono. Onye l'aasọ nsọ yẹle onye l'ẹte asọ nsọ nwekwaru ike whẹ ataa ya. Unu tajẹe ya ẹgube ono, l'aatajẹ anụ mgbada m'ọbu anụ umoro.

²³ Unu be erijekwa mmee ya. Unu wụshijekwaa ya awụshi l'alị g'ọo mini.