Ditoronomi 13 - BAYỊBURU Ẹzaa

Ọbaru agwa ọha ọdo ẹja

¹ Ọ -bụru l'a nọnyaaru, onye shi l'echilabọ unu fụta bya abụru onye nkfuchiru, m'ọbu nwọro-nrọ, bya emelaharu unu iwhe-ọhubama, m'ọbu iwhe-awhụrulenya;

² e megee, iwhe-ọhubama ono mẹe iwhe-awhụrulenya ono vụa g'o kfuru iya, ọ bya ekfulahaaru unu t'unu wata otso agwa ọdo jelahaaru iya ozhi, mbụ agwa, unu l'ẹte amahawa;

³ unu ba angakwa nchị l'okfu onye nkfuchiru ono, m'ọbu nwọro-nrọ ono nkele ọ kwa adata bẹ Onye-Nwe-Ọha, bụ Chileke unu l'adata unu tẹ ya marụ; ?unu gude-e obu unu g'ọ ha mẹe ndzụ unu g'ọha ye Onye-Nwe-Ọha, bụ Chileke unu obu?

⁴ Ọo Onye-Nwe-Ọha, bụ Chileke unu bẹ bụ onye unu l'a-nọ etso, bụru iya kpụ bẹ unu l'a-nọ atsụ egvu. Unu edobeje iwhe ọ tụru l'iwu, eme iwhe o kfuru, unu ejeru iya ozhi, chịru ụkfu kwẹe ya.

⁵ T'e gbukwaa onye nkfuchiru ono, m'ọbu nwọro-nrọ ono egbu, o noo nkele iwhe o zhiru unu bụ t'unu kwefu ike haa otso Onye-Nwe-Ọha, bụ Chileke unu, bụ onye dufutaru unu l'alị Íjiputu, gbafụta unu l'ẹka ono, unu shi bụru ohu. Onye ono bẹ iwhe l'oome bụ t'ọ kpọshia unu t'unu be etso ụzo ono, Onye-Nwe-Ọha tụru unu l'iwu t'unu tsoje. Ọ kwa ẹgube ono bẹ unu l'e-shi chigbua mgbashị l'igbo, o beru t'ọdo be eberu iya.

⁶ Ọ -bụru l'ọo nwune ghu, mbụ onye gụ l'iya shi l'ẹwho lanụ, m'ọbu l'ọo nwa ghu nwoke, ọdua l'ọo nwa ghu nwanyị, ọdua l'ọo nyee ghu ono, dụ ghu l'obu, ọdua l'ọo ẹguru ọnya ghu ono, gụ l'iya nọ lẹ ndzụ, bẹ byakfutaru ghu nụ lẹ mpya bya emelahaa tẹ ya rata ghu t'unu je abalahaaru agwa ọdo ẹja, mbụ agwa, l'ịitii mahawa, nna ghu whẹ ta amahawa iya,

⁷ bụ iya bụ agwa ndu ono buwheru unu mgburumgburu, mbụ ndu ọwhu bụ unu ntse mẹe ndu ọwhu bụ unu otẹnya, jeye l'ẹka, igwe beru alị beru.

⁸ Unu be ekwetakwa iwhe o kfuru, unu ba angakwarụ iya nchị. Unu ba awhụkwaru iya imiko. Unu be edobekwa iya ndzụ, unu eje edomikwa onye ọbu edomi.

⁹ Unu gbukwaa onye ọbu egbugbu. Tẹ gụbedua vuru ụzo dabẹ iya ẹka ọnwuu l'ẹhu, tẹmenu ndu ọwhua gẹ whẹ ha abya eripyabewa iya rọ.

¹⁰ Unu gude ẹwhuru tụ-gbua ya, o noo nkele ọ chọru ụzo, l'oo-shi mee t'unu gbẹeru Onye-Nwe-Ọha, bụ Chileke unu azụ, bụ onye dufutaru unu l'alị Íjiputu, bụ ẹka, unu shi bụru ohu.

¹¹ Ọo ya bụ, nke ọwhu ndu Ízurẹlu l'owhu l'a-nụ iya tsụlahaa egvu, ya eje adụhe onye, l'e-mebaa njọ, dụ ẹgube ono ọdo l'echilabọ unu.

¹² Ọ -bụru l'unu shi lẹ mkpụkpu lanụ l'ime mkpụkpu lẹ mkpụkpu ono, Onye-Nwe-Ọha, bụ Chileke unu l'eme tẹ ya nụ unu t'unu buru ono nụa

¹³ l'o nweru ndu ejo-madzụ, shi l'echilabọ unu je achịta ndu, bu lẹ mkpụkpu ono asụje: “Unu bya t'anyi je abalahaaru agwa ọdo ẹja,” mbụ agwa, unu l'ẹte amahawa,

¹⁴ unu kpakwaa ishi, nyochaa ya ọkpobe enyocha, dee ẹnya lẹ mini jịa ajị. Ọ -bụru whọ l'ọo ezhi-okfu, mbụ l'akpamara, dụ ẹgube ono bẹ meru nụ l'echilabọ unu,

¹⁵ ọo ya bụ, unu egude ogu-ịgba gbushikota ndu bu lẹ mkpụkpu ono, unu gbugbushia ndu mkpụkpu ono kpamụ kpamụ, shi nno woru whẹ nụ Chileke. Iwhe lile, nọ iya nụ je akpaa l'elwu bẹ unu l'e-gude ogu-ịgba gbukota.

¹⁶ Iwhe lile, dụ lẹ mkpụkpu ono bẹ unu l'a-vụkota avụvu, bya akụbe lẹ nggamgbo ọha. Unu atụko mkpụkpu ono yẹle iwhe lile, nọ iya nụ kpọkota ọku, t'ọ bụru ngwo-ẹja ọkpokota-iwhe-ọku, a nụru Onye-Nwe-Ọha, bụ Chileke unu. Mkpụkpu ono l'a-bụru ikpọzu jeye lẹ gbururu, t'a bya l'atụ-whu iya azụ ọdo.

¹⁷ T'ọ bọ dụkwa iwhe ono, e doberu nke emebyishi, l'aa-whụ madzụ l'ẹka m'ọo nnanụ, ndụge Onye-Nwe-Ọha esewhu ọta-chịchichi ẹhu-eghughu iya azụ, meeru unu obu-imiko, mbụ nke ọwhu imiko unu l'a-dụ iya, ya emee unu t'unu kabaa l'igwe; ẹgube ono, o riburu iya nna unu whẹ lẹ nte,

¹⁸ m'ọ -bụkwaru l'unu meru iwhe Onye-Nwe-Ọha, bụ Chileke unu kfuru; dobekota iwhe ọ tụru l'iwu t'e meje bụ iya bụ iwu-a, mu l'atụru unu ntanụ-a, bya emekwawho iwhe kfụru nhamụnha l'ẹnya Onye-Nwe-Ọha, bụ Chileke unu ono.