Ditoronomi 11 - BAYỊBURU Ẹzaa

Yee Onye-Nwe-Ọha obu, nụjeru iya okfu

¹ Ọo ya bụ, unu yee Onye-Nwe-Ọha, bụ Chileke unu obu, meje iwhe ọ tụberu t'e meje mẹe iwhe ọ tọru ọkpa iya mẹe nsọ, o doberu t'e tsoje mẹe iwu iya ntekenteke.

² Unu makwarụ ọwaa ntanụ, lẹ ndu mu l'ekfuru ta abụkwa ụnwu unu, nkele whẹ ta amadụ nke àhụ̀hù ono, Onye-Nwe-Ọha, bụ Chileke unu hụ̀rù unu mẹe ọ-dụ-biribiri iya yẹle ike mẹe ọkpehu iya, whẹ te egudeje ẹnya whẹ whụ iya.

³ Whẹ ta awhụje iwhe-ọhubama iya yẹle iwhe o megbaberu l'alị Íjiputu, mbụ iwhe o megbaberu Fero, bụ eze ndu Íjiputu mẹe ndu alị iya,

⁴ mẹe iwhe o meru ndu ojọgu ndu Íjiputu mẹe ịnya whẹ mẹe ụgbo-ịnya whẹ; mbụ g'o gude mee tẹ Eze-ẹnyimu Uswe rigbushia whẹ nteke ono, whẹ l'achị unu ọso yẹle gẹ Onye-Nwe-Ọha gude mee whẹ, whẹ bụru kpurupyata byeye ntanụ,

⁵ mẹkwawho iwhe o meru unu l'echi-ẹgu jeye nteke unu byarwutaru ẹka-a,

⁶ mẹe iwhe ono, o meru Detanu yẹle Abyiramu, bụ ụnwu Eliyabu, bụ nwa Rúbẹnu, nteke ono, alị sarụ ọnu l'echilabọ ndu Ízurẹlu lwekota whẹ lẹ ndibe whẹ mẹe ụlo-ẹkwa whẹ mẹe iwhe nọ ndzụ, bụ nkewhe.

⁷ Unubẹdua l'onwunu bẹ gude ẹnya unu whụkota eze iwhe ono, Onye-Nwe-Ọha megbaberu.

⁸ Ọo ya bụ, unu tụko iwu lile-e, mu l'atụru unu ntanụ-a dobekota, nke ọwhu ike l'a-dụkwanu unu t'unu je anata alị ono, unu l'eme t'unu daa ẹnyimu Jọ́danu je nata t'ọ bụru nkunu ono,

⁹ yẹle nke ọwhu ndzụ unu l'e-tse ogologo l'alị ono Onye-Nwe-Ọha riburu nna unu whẹ lẹ nte lẹ ya l'a-nụ whẹ yẹle ẹpa whẹ, mbụ alị ono, mini-ẹra eswi yẹle mmanụ-ẹnwu jiru ejiji.

¹⁰ Nkele alị ono, unu l'eme t'unu bahụ je anata ono ta adụkwa g'ọo alị Íjiputu, bụ ẹka unu shi fụta; bụru, ẹka unu shi akọje iwhe, gude ọkpa unu je agbaa ya mini gẹ l'aagbajẹ l'ọru-ẹwa.

¹¹ Ọle alị ono, unu l'eme t'unu daa ẹnyimu je anata ono bẹ bụ ugvu nkụchi, bụru nsụda nkụchi, tẹmenu mini, shi l'igwe l'emeje iya, ya angụ fọfofo.

¹² Ọo alị, Onye-Nwe-Ọha, bụ Chileke unu nwụberu ẹnya b'ọ bụ. Mbụ l'ẹnya Onye-Nwe-Ọha, bụ Chileke unu l'adụje l'alị ono ntekenteke, wata lẹ ogbube ishi-awha jeye lẹ ngvụcha iya.

¹³ Iwhe o gude dụ nno bụ nke ọwhu bụ, ọ -bụru l'unu l'eme iwu-a, mu l'atụru unu ntanụ-a, bụ iya bụ oye Onye-Nwe-Ọha, bụ Chileke unu obu mẹe ogude obu unu g'ọ ha mẹe ndzụ unu g'ọ ha ejeru iya ozhi,

¹⁴ bẹ Onye-Nwe-Ọha l'e-me tẹ mini chịjee l'alị unu lẹ mgbe iya; mini ishi-awha mẹe mini ebuhu achịru unu nke ọwhu unu l'e-metaje witi lẹ balị unu, kụa mmẹe unu, mekwaawho mmanụ unu.

¹⁵ Oo-me t'irwu ẹwu rwua l'ẹgu unu nke ọwhu eswi unu l'a-tajịje ẹwho; tẹmenu unu abụru ndu l'a-nọdu eri nri eriji ẹwho.

¹⁶ Unu kwabẹkwaru onwunu ẹnya; t'e be eduswe unu ụzo t'unu dakọbe wata ojeru agwa ọdo ozhi balahaaru iya ẹja.

¹⁷ Unu -mee ya nno, bẹ Onye-Nwe-Ọha l'a-tukoshikwa unu oke ẹhu-eghughu iya, mee tẹ mini ba achịjeheru unu, mee t'alị unu be emehujehe iwhe e meberu iya. E jia ekfu, unu abụru kpurupyata l'ẹguru alị ono, Onye-Nwe-Ọha l'eme tẹ ya nụ unu.

¹⁸ Ọo ya bụ, t'unu woru okfu mu-a gbua giriri l'ime obu unu mẹe l'ime ndzụ unu. Unu gbarụ iya l'ẹka, t'ọ bụru iwhe-ọhubama, unu ekebejekwa iya whọ l'egedege-iwhu.

¹⁹ Unu zhije iya ụnwegirima unu. Unu akọje iya l'akọ nteke unu nọdu l'ụlo unu mẹe nteke unu l'eje l'echi-ụzo mẹe nteke unu zẹe azẹe mẹe nteke unu kfụru akfụru.

²⁰ Unu dekwaa ya ede l'oshi mgbo ụlo unu mẹe l'ọnu-abata mkpụkpu unu.

²¹ Ọo ya bụ nke ọwhu unu l'ụnwegirima unu l'a-ka nka l'alị ono, Onye-Nwe-Ọha riburu nna unu whẹ lẹ nte lẹ ya l'a-nụ whẹ, tẹ whẹ buru jeye nteke mgboko l'a-nọ-beru.

²² O noo nkele, ọ -bụru l'unu doru ẹnya ndo, emekota iwhe-e, mu sụru t'unu meje, bụ iwhe ono, mu l'ekfuru unu t'unu meje bụ iya bụ oye Onye-Nwe-Ọha, bụ Chileke unu obu mẹe anọ etso ụzo iya l'owhu yẹle ọchiru ẹka kwẹe ya

²³ bẹ Onye-Nwe-Ọha l'a-chịfukwa mba gẹ mba ha l'iwhu unu, mbụ mba gẹ mba ha ono, kagee unu shii, ka unu ọkpehu, unu eburu l'alị whẹ.

²⁴ Iwhe bụ-zhia ẹka, unu dzọru ọkpa l'a-bụkota nke unu. Alị unu l'e-shizhiawho l'echi-ẹgu nọo je akpaa l'ugvu ugvu Libanọnu, shikwawhọ l'ẹnyimu Yufurétisu nọo je akpaa l'eze-ẹnyimu ụzo ẹnyanwu-arịba.

²⁵ Ọ tọ dụdu onye l'a-dụ ike akpọ unu iwhu. Onye-Nwe-Ọha, bụ Chileke unu l'e-me t'a tsụje unu egvu, ẹhu anmanma unu egudeshia whẹ l'iwhe bụ ẹka unu tụru ọkpa l'alị ono l'owhu, ẹgube, o kweru unu ụkwa iya.

²⁶ Unu lekwa, ntanụ bẹ mu l'edoberu unu ọnu-ọma yẹle mburọnu.

²⁷ Ọnu-ọma l'a-dụru unu m'ọ bụru l'unu l'eme iwu ono, Onye-Nwe-Ọha, bụ Chileke unu sụru t'unu meje, bụ iwu-a, mu l'atụru unu ntanụ-a.

²⁸ Mburọnu l'a-dụru unu m'ọ -bụru l'unu jịkaru ome iwu ono, Onye-Nwe-Ọha, bụ Chileke unu tụru unu t'unu meje, parụ ụzo ono, mu sụru t'unu shije haa, tsolahaa agwa ọdo, bụ ọwhu unu l'ẹte amahaa.

²⁹ Sụa, Onye-Nwe-Ọha, bụ Chileke unu -dubatalewho unu l'alị ono, unu l'eje anata t'ọ bụru nkunu ono, unu ryakwaa ọnu-ọma ono aryarya l'ugvu Gerizimu, unu aryakwawho mburọnu ono aryarya l'ugvu Ebalu.

³⁰ Ugvu labọ ono bẹ unu mahawarụ l'ọ tụkoru dụ l'azụ ẹnyimu Jọ́danu azụ iya ọwhu l'ụzo ẹnyanwu-arịba, mbụ l'alị ndu Kenanu ono, bu lẹ nsụda Araba, ẹka ono, cheberu iwhu lẹ mkpụkpu Gílugalu, lẹ mgboro oshi More.

³¹ Unu l'abyawa ọda ẹnyimu Jọ́danu je anata alị ono, Onye-Nwe-Ọha, bụ Chileke unu l'eme tẹ ya nụ unu t'ọ bụru nkunu. Unu -natagele iya whọ buru,

³² unu dokwaa ẹnya ndo, mekotaje iwhe lile Onye-Nwe-Ọha tọru ọkpa iya mẹe nsọ, o doberu, bụ ọwhu mu l'atụru unu ntanụ-a.