Daníyelu 1 - BAYỊBURU Ẹzaa

Ndu Ízurẹlu ẹno eze họtaru

¹ L'awha kwe Jehoyakimu awha ẹto ọ watarụ ọbu eze ndu Juda bẹ Nebukadineza, bụ eze l'achị ndu Bábyilọnu chịtaru ndu ojọgu iya, whẹ je eyebuta Jerúsalẹmu.

² Onye-Nwe-Ọha woru Jehoyakimu, bụ eze ndu Juda ye l'ẹka Nebukadineza. O mekwaawho ọ harụ arya, dụ l'eze-ụlo Chileke gwota. Arya ono b'o gwotaru lashia alị Shịna je edobe iya l'ẹka l'eedobeje ẹku l'ụlo agwa iya.

³ Eze bụ Nebukadineza bya ekfuru Ashipenazu bụ onye ishi ndu l'eleta ibe-eze ẹnya sụ iya t'ọ harụ ndu Ízurẹlu ono; ndu ọwhu shi l'eri ndu eze yẹle ndu ọwhu shi l'eri ndu a marụ ẹwha whẹ dutaru iya.

⁴ Tẹ ndu l'oo-dutaru iya bụru unwokorọbya l'ẹte enwee ẹka e mebyiru whẹ emebyi, ndu dụ ugvu l'ẹnya bụru ndu nweru uche, marụ ágụ, bya abụru ndu iwhe l'edoje ẹnya ree ẹgwegwa, mẹe ndu gbarụ ooje ozhi l'ibe-eze. Ya ezhia whẹ gẹ l'eekfuje okfu Bábyilọnu mẹe gẹ l'eedeje iya ede.

⁵ O noo ya, eze sụ t'ọ bụru ọga nri, yẹbedua l'erije bẹ l'aa-nụje whẹ mbọku mbọku tẹ whẹ ria. A nụ whẹ ụdu mmẹe, ya l'angụje tẹ whẹ ngụje. Sụ t'e gude awha ẹto zhia whẹ iwhe. Awha ẹto ono gvụlewho whẹ awata oojeru eze ozhi.

⁶ Ndu a họtaru lẹ ndu ono bụ ndu shi l'ikfu Juda, ẹwha whẹ bụ: Daníyelu, Hananiya, Mishẹlu ọwaa Azaríya.

⁷ Onye ishi ndu ono, l'eleta ibe-eze ẹnya ono bya agunweshia whẹ ẹwha. Daníyelu b'ọ gụru Belutesheza, gụa Hananiya, Sheduraku, gụa Mishẹlu, Mishaku, gụa Azaríya, Abedinego.

Aadata Daníyelu whẹ

⁸ Ọle Daníyelu bya ekfua ya rwuheta iwhu l'iya ta abyadụ l'ekwobe nri eze yẹle ụdu mmẹe, eze l'angụje merwua onwiya. Ọo ya bụ, ọ ryọo onye ishi ndu ono, l'eleta ibe-eze ẹnya t'o bo kwekwa tẹ ya merwua onwiya l'ụzo dụ nno.

⁹ Chileke bya emee Daníyelu tụba onye ishi ono l'ẹnya, imiko Daníyelu dụ iya.

¹⁰ Ọle onye ishi ndu l'eleta ibe-eze ẹnya ono bẹ l'atsụ eze egvu. Ọ sụ Daníyelu: “Ọ -bụru l'eze bẹ whụru unu, unu jọo ya ẹhu l'ẹnya, unu ta adụ g'ọo ụnwu ọgbo unu, bẹ l'oo-gbufukwa mu ishi. G'ọ bụ iya bẹ sụru l'ọ waa ọga nri, unu l'e-rije yẹle ụdu mmẹe, unu l'a-ngụje ndọwa.”

¹¹ Tọ dụ iya bụ, Daníyelu tụa ike ituwhu jekfushia onye ọwhu, onye ishi ndu ono, l'eleta ibe-eze ẹnya sụru t'o leta yẹbedua, bụ Daníyelu, mẹe Hananiya, mẹe Mishẹlu, mẹe Azaríya ẹnya. O jekfu iya je asụ iya:

¹² “Byiko gudenu abalị iri data anyịbe ndu ozhi ghu. T'ọ bụruro ẹkwo-nri bẹ l'ịi-nụje anyi t'anyi ria ngụru mini ye iya.

¹³ E -megee gụ elele anyi elele marụ ọ dụ iche dụ l'ụgbugba ẹhu anyi l'ụnwu okorọbya ono, l'eri nri eze. Ọo iwhe ị whụru l'ẹhu anyịbe ndu ozhi ghu bẹ l'ii-gude eme anyi iwhe.”

¹⁴ Ọo ya bụ, o kweta iwhe whẹ kfuru bya adata whẹ abalị iri.

¹⁵ Abalị iri ono gvụlewho, a whụ l'ẹhu ka whẹ ọdu mma mẹe lẹ whẹ ka okporokpo karụ ụnwu okorọbya ono, l'eri nri eze.

¹⁶ Ọo ya bụ, onye ono l'eleta whẹ nụ nụgbuwaru whẹ rọ ẹkwo-nri, haa whẹ ọnu nri eze mẹe mmẹe eze.

¹⁷ Ụnwu okorọbya ẹno ono bẹ Chileke meru whẹ nweru ishi ẹkwo, marụ ome nka l'ode iwhe mẹe l'ọnwuta iwhe. Daníyelu l'onwiya bẹ marụ gẹ l'aakọwa ọwhulenya, marụ gẹ l'aakọwa nrọ.

¹⁸ Oge ono, e gude ezhi ụnwu okorọbya ono iwhe gbadzulewho, eze sụ t'e dutawa whẹ rọ bya. Onye ishi ndu ono, l'eleta ibe-eze ẹnya chịta whẹ bya egoshi eze Nebukadineza.

¹⁹ Eze yẹle ụnwu okorọbya ono kfugbabe okfu. L'ime whẹ ta adụdu onye ọdo, l'atụru Daníyelu mẹe Hananiya mẹe Mishẹlu mẹe Azaríya. Whẹ bya etsoru bụru ndu l'ejeru eze ozhi.

²⁰ Iwhe bụ iwhe eze kparụ whẹ ishi iya, bụ iwhe larụ l'ụzo mmamagụ m'ọ bụ l'ụzo iwhe l'e-shi doo ẹnya bẹ whẹ ka mma ugbo iri, amamẹ ndu jibya mẹe ndu l'eme amamanshi nọkota l'alị-eze iya l'owhu.

²¹ Daníyelu bẹ nọ-zhiawho l'ogboduwhu ibe eze g'ọ nọ iya jeye l'awha mbụ, Sayirọsu watarụ ọbu eze.