2 Tímoti 4 - BAYỊBURU Ẹzaa

¹ Sụa, nyatakwa lẹ Kuráyisutu Jisọsu ono bụ iya bụ onye l'e-kpe ndu nọ ndzụ mẹe ndu nwụhuru anwụhu ikpe l'a-dawhu azụ ujiku lanụ, bya egoshi l'ọo ya bụ eze. Ọo ya bụ, mu nọkwa l'iwhu Chileke yẹle Kuráyisutu Jisọsu ono, ekfuru ghu iya ekfushiru ghu iya ike

² sụ ghu t'ị ryajẹkwaa ozhi-ọma Chileke ono arya, m'ọ -dụ ndu l'iikfuru iya uwhere anụnu mẹe tọ dụ whẹ iya, gụ eletalekwawho ozhi ghu ẹnya. Goshije madzụ ẹka o mesweru, gụ abajẹeru onye meru ẹji mba, gụ egudelekwawho ọta-nshi emeje t'obu shihu whẹ ike, gụ ezhijekwa whẹ whọ iwhe.

³ O noo l'o nweru nteke ndiwhe l'ee-bechaa jịkalahaa ọkpobe-okfu ono anyi l'ezhi, ya abụleruwho ẹgu ejo iwhe l'agụ whẹ nụ bẹ whẹ l'a-gbatsoru. Whẹ achịkoo igweligwe ndu, l'ezhi iwhe ọdo tẹ whẹ bya ezhije whẹ iwhe l'atsọ whẹ ụtso lẹ nchị tẹ whẹ nụje.

⁴ Whẹ ekwehe ngabẹ nchị l'ọkpobe-okfu ono. Ọwhu whẹ l'e-chebe nchị abụru l'akọ-iwhe.

⁵ Ọle-a tẹ gụbedua l'ishi onwoghu sedekotajekwa onwoghu l'iwhe lile. Iwhe-ọtsulanu -byajẹru ghu, tajẹru iya nshi. T'ozhi, l'a-dụru ghu nụ bụru anọ arya ozhi-ọma ono arya, gụ ejekotagee ozhi, gbarụ ghu nụ, o noo l'ị bụ nwozhi Chileke.

⁶ Lẹ mbẹdua bẹ ndzụ mu dụakwa g'ọo ẹja, l'a gbagewaa agbage, mbụ iwhe mu l'ekfu bụ l'ọ gbabewaru mu l'alala.

⁷ Mu mewaru ike mu l'ọso ono, mu gbarụ; mu gbarwuwaru ẹka a kparụ oge. Mu kfụshiwaru ike l'ekwekwe, mu kweru nke Kuráyisutu.

⁸ Iwhe wudurunu ntaa bụru tẹ Chileke nụ mu obunggo ọso ono, o doberu ngabẹru mu, mbụ lẹ Onye-Nwe-Ọha ono, l'ekpeje ikpe kfụru nhamụnha bẹ l'a-gụ mu l'onye dụ chịriri mbọku ikpe ono. Mbụ, ọ tọlekwa mu-a nwẹka mu bẹ l'oo-bu nggo ono kpụ. Oo-bukotagezhia ya iwhe bụ ndu gude obu whẹ ngabẹru abyabya iya.

Ozhi, Pọlu zhiru Tímoti nke iche

⁹ Malẹkwaruwho gẹ l'ii-me byakfuta mu ẹgwegwa.

¹⁰ O noo lẹ Dímasu bẹ wehawaru mu tụgburu nkele iwhe nke mgboko-o bẹ ka iya ree amamẹ Chileke. Ọ tụgbuwaa ntaa jeshia Tesalonáyika. Keresensu bẹ jeru Galéshiya. Táyitọsu jee Dalumésha.

¹¹ Ntaa waakwaa Luku nwekiya bẹ nọdu swiru mu. Byiko tẹ gụ lẹ Makụ lịbukwaaru m'ị -byadẹ; lẹ mkpa iya dụkwa mu shii t'ọ bya eyetaru mu ẹka.

¹² Lẹ Tíkikọsu bẹ mu zhikwaru Éfesọsu.

¹³ Ị -byata, chịtakwaru mu uwe ukpo mu whọ, mu harụ l'ibe Kápọsu lẹ Tirówasu. Gụ achịtakwaru mu whọ iwhe bụkota ẹkwo mu g'ọ ha, kelekele nke ndu onona, e gude pachimenti mee.

¹⁴ Alẹguzánda ọwhu l'akpụ ụzu bẹ mekwaru mu ejo iwhe parụ ẹka. Ọle ọ kwa Onye-Nwe-Ọha bẹ l'a-kfụkota iya ụgwo iwhe o meru.

¹⁵ Zelakwaaru iya gụbedua l'onwoghu, l'ọ kwatakwarụ kwachia ozhi-a, anyi l'ezhi ọwa ụzo.

¹⁶ Lẹ nteke mbụ ono, mu vugezhia ụzo kfụru l'ụlo-ikpe, gọo ẹgo ishi mu; ta adụzhikwaa onye bụ onye mu, mbụkwa m'ọo onye lanụ. Onyenọnu tụkolekwaruwho wehaa mu. Byiko tẹ Chileke ba agụbukwaa ya yeru l'ọo iwhe-dụ-ẹji, whẹ mee ya.

¹⁷ Ọo Onye-Nwe-Ọha bẹ bụ onye kfụkube mu agbẹe mu ọkpu-ike; ọo ya bụ nke ọwhu mu l'ezhikota ozhi-ọma ono tẹ ndiwhe l'owhu nụ-dzuru iya. Ọ kwa iya whọ bụ onye nafụtaru mu l'ọnu oduu.

¹⁸ Ọ kwawhọ Onye-Nwe-Ọha ono bẹ l'a-nafụta mu l'iwhe bụ ejo-iwhe gẹ ejo-iwhe ha, dua mu gelee gelee, duru je edobe l'ẹka ọ bụ eze l'imigwe. Tẹ ọja-ama bụru nkiya jeye lẹ tututu-mịmimi. O noo g'ọ dụ.

Ekele, Pọlu gude kpọ-chia ẹkwo-ozhi iya ishi

¹⁹ Jịaru mu Pyịrísuka yẹle Akwị́la mẹe ndibe Onẹsíforosu.

²⁰ Ẹrásutosu bẹ kwakwarụ lẹ Kọ́rintu. Tirọ́fimosu bẹ mu hakwaru lẹ Milítọsu nkele ẹhu ta adụdu iya mma.

²¹ Kebekwa ẹhu byaada tẹmenu ya ebe nteke oyi l'anọje atsụ. Yúbulosu l'ajịkwa ghu rọ. L'ọojikwa ghu whọ mbụ Púdẹnsu mẹe Láyinọsu mẹe Kulọ́diya mẹwaro ụnwunna anyi ndu ọwhu gẹ whẹ ha.

²² Tẹ Onye-Nwe-Ọha chee ghu ndzụ. Chileke emeeru unu g'unu ha eze-iwhe-ọma.