2 Tímoti 3 - BAYỊBURU Ẹzaa

Gẹ umere ndiwhe l'a-dụ l'oge ikpazụ

¹ Iwhe lanụ ọwhu l'ịi-kalẹwho ogude ẹka bụ l'o -rwulewho l'oge ikpazụ ono bẹ ọkpobe iwhe-ọtsulanu l'a-byakwa.

² O noo lẹ nteke ono bẹ ndiwhe l'a-bụlewho: onyenọnu, ya abụru onwiya bẹ l'oo-ye obu kpụ, whẹ abụru ndu ẹkpiri okpoga, bụru ndu l'atụ ọnu onwowhe gẹ whẹ l'ahaa, bụru ndu l'eku onwowhe eku, bụru ndu l'anọje ewhu ndu ọdo iwhu, bụkwaruwho ndu karishiru ne lẹ nna nwụru whẹ nụ ẹka, whẹ abụru o-ria-ọmata whẹ, whẹ abụru ndu l'ẹte adụa iwhe l'adụjeru whẹ lẹ nsọ.

³ Whẹ abụru ndu madzụ dụ ashị, bụru ndu iwhe l'ẹte alụfuje alụfu l'obu, bụru ndu l'atukobeje madzụ ibe whẹ iwhe l'oomee, bụru ndu l'ẹte adụje ike sedekota onwowhe, bụru ndu l'eme igiri g'ọo anụ-ẹgbudu, whẹ abụru ndu iwhe dụ ree l'adụje ashị.

⁴ Whẹ abụru ndu l'enwujeru madzụ ibe whẹ ye l'ẹka ọhogu whẹ, whẹ abụru ekfu-ba-anụ whẹ, whẹ etsoru emewhe nwọ-ha-g'iya ọ-ha-g'iya, whẹ abụru ndu ka oye obu l'iwhe-ụtso amamẹ Chileke;

⁵ whẹ abụru ndu l'anọje eme umere g'ọo ndu kwetaru nke Chileke, ọle whẹ te ekwetakwanu lẹ Chileke bẹ dụ ire. Byiko, kwachafụkwaru ẹgube ndu ono ẹnya.

⁶ Ndu dụ nno bẹ bụ whẹ l'a-hajẹru ekpuwhe l'ụlo l'ụlo eduwhushiwhe ụnwanyi, l'ete enwee uche, mbụ ụnwanyi, metawaru ejo iwhe, ọ kwọwaru whẹ ẹhu, iwhe l'alowhu ẹgube ụnwanyi ono bụru ẹgu njọ gẹ njọ ha, dụkota iche iche l'anọje agụ whẹ.

⁷ Ẹgube ụnwanyi ono bẹ l'ọonoje ewheshi uwhere ike tẹ whẹ nwụta iwhe, ọle whẹ ta abyakwanụ l'a-dụ ike takeru marwetakota ọkpobe-okfu ono.

⁸ Ndu ono, l'anọje eduwhushiwhe ụnwanyi ono bẹ kwachiru ọkpobe-okfu ono ụzo lẹge Jánẹsu yẹle Jámbirisu kwachiru iya Mósisu lẹ nteke ndụ-ichee. Ndu ono, l'anọje eduwhushi ụnwanyi ono bẹ égò swewaru, ekwekwe whẹ kweru bẹ bụ ekwekwe, darụ l'ẹba l'ẹnya Chileke.

⁹ Ọle ndu ono ta adụdu ẹka whẹ l'ejebebaa, madzụ lile atụko whụkota lẹ whẹ bụ ndu eswe, mbụnu-a lẹge madzụ lile whụkotaru lẹ Jánẹsu yẹle Jámbirisu bụ ndu eswe.

Iwhe Pọlu zhiru Tímoti t'o mejee

¹⁰ Ọle gụbedua bẹ tsowaru iwhe mu l'ezhi, l'iitsookwawho umere mu, ọ bụkwaruwho iwhe mu tụberu lẹ ndzụ mu bẹ bụ iwhe ị wọpyaberu: ọ bụru iwhe ị tụberu lẹ ndzụ nke ghu; ọ bụru iwhe mu kweru b'ị wotaru: ọ bụkwaruwho iwhe i kweru. Ị whụakwaruwho gẹ mu l'atabejeru ndu ọdo nshi, whụakwawho gẹ mu yetaberu ndu ọdo obu mẹe lẹge mu l'anwụ-gbutabeje iwhe l'obu.

¹¹ Ị makwarụ-a mkpamẹhu ono, a kparụ mu g'ọ ha mẹe iwhe-ọtsulanu lile ono, mu nọdu jegbabe, bụ iwhe tụkotaru dakfuta mu lẹ Ántiyọku mẹe lẹ Ayikóniyomu mẹe Lị́sutura. Sụa, mkpamẹhu, dakfutageeru mu l'ẹka ono ta abụkwa iwhe ekfukfu. Ọle Onye-Nwe-Ọha dzọkotalekwaru mu-a l'iwhe lile ono.

¹² Mbụkwa l'iwhe bụ ndu lile, l'ọogu ẹgu tẹ whẹ lẹ Kuráyisutu Jisọsu tụgba bụru nnanụ, tẹ whẹ shi nno nọdu ndzụ, dụ Chileke ree, bẹ l'aa-kpakọtakwawho ẹhu.

¹³ Ọle ndu bụ ndu l'eme ejo-iwhe mẹe ndu l'anọje aghọ ụgho gẹ whẹ ha bẹ l'a-nọlewho aka njọ aka eje eje l'ome ejo-iwhe whẹ l'eme, whẹ egude nno duwhushia ndu ọdo, ndu ọdo eduwhushikwawho whẹbedua.

¹⁴ Ọle ọbu, tẹ gụbedua l'onwoghu kfụshilekwawho ike l'ọkpobe-okfu ono e zhiru ghu, bụkwa iya whọ bụ iwhe i kwetaru; o noo l'ị makwarụ-a ndu bụ whẹ, zhiru ghu iya.

¹⁵ Gụ anyatakwawhọ l'i shizhiawho lẹ dẹedeede makọtaru iwhe e deru l'ẹkwo Okfu Chileke. Ọo iwhe ono, e deru l'ẹkwo Okfu Chileke ono bẹ l'a-dụ ike mee ghu, gụ enweru mmamagụ nke ọwhu Chileke l'e-shi l'ekwekwe, i kweru nke Kuráyisutu Jisọsu dzọo ghu.

¹⁶ Iwhe bụ iwhe e deru l'ẹkwo Okfu Chileke bẹ shikota l'ẹka Ume Chileke. Mkpa iya dụ t'e gude iya zhi ọkpobe-okfu ono mẹe t'e gudeje iya goshi madzụ ẹka o mesweru mẹe t'e gude iya kpozhia madzụ égò mẹe t'e gude iya hefuta madzụ t'onye ọbu bụru onye dụ chịriri l'iwhu Chileke,

¹⁷ ọo ya bụ nggẹ onye nke Chileke akwakọbe-rwee ẹhu; kwabẹlewho akwabẹ ojeru Chileke ọkpobe ozhi, dụru iya nụ g'ọ dụlee.