2 Tímoti 2 - BAYỊBURU Ẹzaa

Ọkpobe onye l'alwụ ọgu ẹhu Kuráyisutu

¹ Ọo ya bụ, gụbedua, bụ nwa mu; tẹ Chileke mee t'i gude eze-iwhe-ọma ono, shi l'ẹka Kuráyisutu Jisọsu shihu ike.

² Ị nụwaru-a iwhe lile ono, mu kfuru l'edzudzu-ọha. Wota iya ye l'ẹka ndu goshiwaru lẹ whẹ gbarụ nke t'e gude ire whẹ ẹka, bụkwanu ndu l'a-dụ ike ezhi iya ndu ọdo.

³ Jekwaa oke iwhe-ọtsulanu nke ghu l'okfu ẹhu Kuráyisutu Jisọsu, bụ iwhe gbarụ ọkpobe onye l'alwụ ọgu ẹhu Kuráyisutu.

⁴ O to nwekwa onye ojọgu, nọ l'ẹka ọgu l'awhụ ẹwhu l'ekweje tẹ ọriri ẹhu iya nwuru iya ye l'ome iwhe ndu l'abụa ndu ojọgu l'emeje. Iwhe l'ọonoje eme nu bụ tẹ ya mee iwhe l'a-nọ atsọ onye-ishi, deru ẹwha iya l'ẹkwo ụtso.

⁵ Ọdo bụru l'onye l'agba ọso bẹ l'eete ebujekwa obunggo onye kakọta agbagba, m'ọ -bụdua l'ọ gbarụ ọso g'a tụru iwu agbagba iya.

⁶ Ọo onye l'akọ okfu, l'eseshi anya ike b'ọ gbarụ nke t'o vujeru ụzo ria iwhe e metaru l'okfu iya ọbu.

⁷ Rịkwaa iwhe lile ono, mu l'ekfu arịri, lẹ Onye-Nwe-Ọha bẹ l'e-yetaru ghu-a ẹka mee t'iwhe ono dokota ghu ẹnya.

⁸ Nyatakwa Jisọsu Kuráyisutu ono, Chileke meru, o shi l'ọnwu teta nọdu ndzụ. Jisọsu ono, bụ eri Dévidi, ọ bụru iwhe ono bụkota iwhe ọbu, ozhi-ọma ono mu l'ezhi l'ekfu.

⁹ Ọo l'ọo lẹ mu l'ezhi ozhi-ọma ono bẹ meru iwhe mu l'eje iwhe-ọtsulanu-a, mu l'eje-e, mbụ a tụ-gee tụa mu mkpọro gẹ-woo lẹ mu bụ onye metaru ejo iwhe. Ọle ọbu, ?ọo a -tụ-gee mu mkpọro ọbu, ?a tụhunuru ozhi-ọma ono mkpọro. Tụswekwa, ọ tọ dụkwa onye ha nke ọotu ozhi-ọma ono mkpọro.

¹⁰ O noo iwhe meru mu kwobe iswi ẹhu ndu ono, Chileke họtaru, anwugbukota iwhe lile-e l'obu, ọ kwa iya bụ nke ọwhu Chileke l'e-shikwanu l'ẹka Kuráyisutu Jisọsu dzọkwaa whẹ whọ, ya eshi nno nụ whẹ ndzụ, dụ biribiri, bụ ndzụ tututu-mịmimi.

¹¹ Okfu-a bẹ kwa okfu e gude ẹka, kfuru sụ: “Ọ -bụru l'anyi lẹ Kuráyisutu bẹ tụkoru nwụhukota bẹ anyi l'iya l'a-tụkokwawho nọdukota ndzụ.

¹² Ọ -bụru l'anyi l'atajẹru iwhe lile nshi, bẹ anyi lẹ Jisọsu l'a-tụkokwawho bụru eze. Ọ -bụru l'anyi sụru l'anyi ta amadụ onye ọ bụ, bẹ l'ọo-sụkwawho lẹ ya ta amadụ onye anyi bụ.

¹³ Ọ -bụru l'anyi ta akfụshijedu ike l'iwhe anyi kfụru, bẹ yẹbedua l'akfụshijekwa ike l'iwhe o kfụru, nkele ọ tọ gbanwejedu iwhe o kfuru.”

Onye e kweru l'oojerwe ozhi ejerwe

¹⁴ Nyatajẹru whẹ iwhe lile ono, gụ anọduje l'iwhu Chileke kfuaru whẹ iya kfushiaru whẹ iya ike sụ whẹ: tẹ whẹ ba anọjekwa abawhe mba okfu, l'adụa iwhe ọ patarụ. Ọ tọ dụkwa urwu dụ iya nụ, ọ lẹkwaa emebyi bẹ l'oomebyije ndu l'anụ iya nụ.

¹⁵ Kebe ẹhu goshije whẹ lẹ Chileke dalewaru ghu, gụta ghu l'ị bụ onye gbarụ nke t'i jejeru iya ozhi, mbụ l'ị bụ onye ozhi iwhere ozhi, l'ooje l'ẹte adụa, tẹmenu ị bụru onye l'a-nọje ezhirwe ọkpobe-okfu ono ezhirwe, l'ewojeleru iya who tụa jalaa.

¹⁶ Gụ ezelajeeru mkpọkoro okfu l'adụa iwhe ọ patarụ, o noo l'ẹgube okfu ono l'e-me ndu l'anụ iya nụ, whẹ alalahaa azụ azụ, whẹ anọhe eyeru Chileke ugvu.

¹⁷ Iwhe whẹ l'ezhi l'adụje g'ọo ọnya-mgbawha, l'ababushi anụ. Ndu harụ lịru lẹ ndu ono, l'anọje ekfu ẹgube okfu ono bụ Hayimeníyọsu mẹe Filítosu.

¹⁸ Whẹ hawarụ anọ etso ọkpobe-okfu ono nkele whẹ sụru lẹ ndu nwụhuru anwụhu gbee shiwanu l'ọnwu teta, nọdu ndzụ. Whẹ gude nno o nweru ndu ọwhu whẹ harụ enwunga enwunga, enwufu whẹ l'ekwekwe whẹ kweru nke Kuráyisutu.

¹⁹ Ọle ukfu-ụlo ono, shihuru ike, Chileke tụru bẹ bụ enwubata enwubata. Iwhe ọhubama, Chileke deru l'ukfu-ụlo ono bụ: “Onye-Nwe-Ọha marụ-a ndu bụ ndu nkiya.” Iwhe ọdo, o defukwaaru iya whọ bụ: “T'iwhe bụ-zhia onye sụru woo lẹ ya bụ nke Onye-Nwe-Ọha sefukwawho ẹka l'ome ejo-ememe.”

²⁰ L'ime eze-ụlo, ha shii ta abụlekwawho iwhe e gude mkpọla-ododo yẹle ope, vukota aswa kpụa bẹ l'adụje iya nụ kpụ. Iwhe a pyịru l'oshi mẹe ọwhu e gude ụrwa kpụa bẹ l'adụ-gejekwaa ya. Ndu bụru iwhe ọja-ama, ndu abụleruwho iwhe e gude eme iwhe.

²¹ Ọo ya bụ, ọ bụru l'o nweru onye safụkotaru onwiya ejo iwhe ono, mu gụshiru ono, ọ kwa iya bụ l'onye ono dụwaa g'ọo iwhe ọja-ama ono, mbụ l'onye ono bẹ bụkotawaa nke onye nwe ụlo ono, l'agarụ onye nwe iya nụ ọkpobe mkpa, tẹmenu ọ bụru onye, e doberu kwabẹ tọ dụ ike jeeru Chileke iwhe bụ-zhia ọkpobe ozhi l'eejeru iya.

²² Ọo ya bụ t'ị gbalajẹeru ẹgu ome ejo-iwhe ono, l'anọje agụkaa unwokorọbya. Iwhe l'ii-mechia bụ t'ị kebe ẹhu meje t'ị bụru onye dụ chịriri, gụ egudepyabelekwawho ekwekwe, i kweru nke Kuráyisutu g'i gude iya. Gụ eye ndu ọdo obu, gụ lẹ ndu ọdo adụkwa l'odoo. O noo iwhe gụ lẹ ndu ono, l'egudeje obu-iwhoro akpoku Onye-Nwe-Ọha l'a-tụkoje emekota ndono.

²³ Be eyejekwa ọnu l'okfu ntụtego eswe, l'ẹte adụa iwhe ọ patarụ. O noo l'ị maanarụ-a l'ẹgube iwhe ono bẹ bụlewho ụswo bẹ l'ookutsutaje.

²⁴ Lẹ nwozhi nke Onye-Nwe-Ọha bụfutajekwa onye l'ẹte aswọje ụswo, ọ bụfutaje onye dụru madzụ lile odoo, onye ono bụfutajekwawho onye marụ gẹ l'eezhije iwhe, ya abụru onye l'anwụ-gbuje iwhe l'obu nteke e meru iya iwhe-dụ-ẹji.

²⁵ Ọ bụfutaje onye l'ewozeje onwiya alị, akpozhiru ndu l'agbajẹ iya okfu ụzo. O noo l'o nwekwaruro gẹ l'oo-me Chileke ẹgbee yetaru whẹ ẹka, whẹ adaa onwowhe ụta haa iwhe-dụ-ẹji ono, whẹ l'emegbabe, lwakfuta Chileke, whẹ abya amakọtaru ọkpobe-okfu ono.

²⁶ Ọo ya bụ ẹnya abya ekosahu whẹ, whẹ ajịfu l'ọnya ono, Oshifutuswe nmatarụ whẹ, bụ iya shi mee whẹ, whẹ l'eme iwhe bụ uche-obu Oshifutuswe ono.