2 Jọnu 1 - BAYỊBURU Ẹzaa

¹ Ẹkwo-ozhi-a shi l'ẹka mbẹdua, bụ onye e meru ọgurenya chọchi. Onye mu l'ede iya anụ bụ eze-nwanyị ono, Chileke họtaru yẹle ndibe iya. Eze-nwanyị ono yẹle ndibe ya bẹ mu yeru obu, iwhe meru mu ye whẹ obu ono bụ lẹ mu lẹ whẹ tụkowaru marụ ezhi-okfu ono. L'ọ tọ kwa mu nwẹka mu yeru whẹ obu. Iwhe lile, bụkota ndu mawarụ ọkpobe-okfu ono yekwaru whẹ who ọbu.

² Iwhe mekwanuru anyi ye iya obu ono bụru l'ọkpobe-okfu ono buwaa anyi ebu l'ẹhu. Ọ bụkwaru nno bụ gẹ l'oo-bugbuwaru iya ro jeye lẹ tututu-mịmimi.

³ Tẹ Chileke bụ Nna yẹle Nwa iya, bụ Jisọsu Kuráyisutu meeru anyi eze-iwhe-ọma, meeru anyi obu-imiko; mekwaawho tẹ nchị dụ anyi ndoo nggẹ anyi gude ire-lanụ mẹe oye obu tụgba bụru nnanụ g'anyi tụgbanuru iya-a.

Ọkpobe okfu mẹe oye obu

⁴ Ẹhu tsọkwaru mu ụtso tsọshia mu iya ike gẹ mu harụ ndibe ghu whụa, mbụ ndu ọwhu l'eme ọkpobe-okfu ono lẹge Nna sụru t'anyi meje iya.

⁵ Lekwa iwhe mu l'aryọ gụbe eze-nwanyị ono ntaa ndọwa: T'anyi ye ibe anyi obu. Ọ tọ bụkwa lẹ mu l'atụru ghu iwu ọwhuu, ọ kwa-a ọwhu anyi natahawarụ eshi mbụlembu ono bụ iya bụ t'anyi ye ibe anyi obu.

⁶ Lee iwhe ọbu bụ iya bụ oye obu ndọwa: T'iwhe anyi l'a-nọjelewho eme jeye g'anyi l'a-nọ-be ndzụ lẹ mgboko-o, bụjeleruwho iwhe Chileke sụru t'e mejee. Iwhe ọbu Chileke sụru t'e mejee bụlekwawho iwu ono, unu shihawaa eshi mbụlembu nụta bụ iya bụ t'unu yeje ibe unu obu.

⁷ Sụa, lẹ ndu l'egudeje ẹregede duwhua madzụ bẹ haakwa l'igweligwe wụfuta dzuru ẹka lile lẹ mgboko, mbụ ndu l'ete ekwetaa lẹ Jisọsu bẹ byarụ bya abụru madzụ l'ezhi lẹ mgboko-o. Ẹgube onye ono kwa iya bụ onye ọbu, l'egudeje ẹregede duwhua madzụ, tẹmenu ọ bụru iya bụ ọ-chị-nta Kuráyisutu ọbu.

⁸ Iwhe unu l'a-kwachafụlewho ẹnya iya bụ t'unu be emebukwaa t'iwhe ono, unu seru anya iya ono nahụ unu tuwhahu nke ẹwoma. Unu kwachafụkwaru onwunu ẹnya nke ọwhu unu l'a-natadzuchia obunggo iya anatadzu.

⁹ Iwhe bụ onye l'eme iwhe ọdo eyekwa l'iwhe ono, Kuráyisutu zhiru, mbụ too meje iya lẹge o zhiru iya, onye ono bẹ yẹle Chileke l'ẹte atụgbakwaa bụru nnanụ. Onye l'emekwanu iwhe ono, Kuráyisutu zhiru ono, l'oomerwujele iya who l'okelee ya, onye ono bẹ yẹle Chileke mẹe Nwa Chileke ono, bụ Jisọsu tụkookwaru tụgba bụru nnanụ.

¹⁰ Iwhe mu l'ekfu bụ, o -nweru onye byakfutaru unu, mbụ t'ọ bụ iwhe ono, e zhiru anyi bẹ onye ọbu gude bya, unu be ekwekwa t'o yeru unu ishi l'ụlo, nke ewhoro-o l'unu kweru iya ekele.

¹¹ O noo l'onye jịru iya mbụkwa-a m'ọo ?ị dụ whọ ọma? bẹ yẹle iya lịakwa ọli lanụ l'iwhe-dụ-ẹji lile ono, l'oomekota.

¹² Mu nweru igweligwe iwhe mu gege ederu unu l'ẹkwo-ọ, ọle ọ tọ bụdu ẹkwo yẹle mini-ẹkwo bẹ mu l'e-gude dekotaru iya unu, iwhe mu l'arị-chia bụ lẹ mu l'a-kpakfutachia unu, mu l'unu ekfugbawaro l'ọnu anyi nggẹ ẹhu tsọkwanua anyi ụtso tsọfu iya l'ishi.

¹³ Ụnwu nwanna ghu nke nwanyị whẹ, bụ onye Chileke họtaru l'ajịkwa ghu rọo.