2 Iwhe e meru l'oge ndu eze 9 - BAYỊBURU Ẹzaa

Abyabya eze-nwanyị ndu Sheba

¹ Tọ dụ iya bụ, eze-nwanyị ndu Sheba bya anụa g'ude Sólomọnu l'ede, ọ byatashia Jerúsalẹmu tẹ ya gude ajị, shihuru ike data iya. Ọ chịru ikpoto madzụ, mẹe ịnya-kamẹlu, vu mmanụ, l'eshikaa kwẹkwekwe, mẹe igweligwe mkpọla-ododo, mẹe ẹwhuru, l'erekaa ire. Ọ byarwutalewho, ọ tụko iwhe lile, dụ iya l'ẹkpa-ọriri vọshikotaru Sólomọnu.

² Sólomọnu sakọta ajị lile, ọ jịru iya. Ọ tọ dụdu ajị, ọ jịru Sólomọnu kpọru iya ẹka asasa.

³ Eze-nwanyị ndu Sheba whụlewho ụdu mmamagụ, Sólomọnu nweru mẹe ẹgube o doberu ẹka tụa ụlo,

⁴ mẹe ọga nri, l'oorije, mẹe ụdu oshi, ndu ozhi iya l'anọduje anọdu, mẹe gẹ ndu ozhi iya gude eje ozhi yẹle ụdu uwe, whẹ l'eye l'ẹhu, mẹe ẹgube ndu l'agbarụ iya mmẹe, mẹe ụdu uwe, whẹ l'eye l'ẹhu, mẹe ẹja ọkpokota-iwhe-ọku, l'ọogbaje l'ụlo Onye-Nwe-Ọha; nteke ọ whụkotaru iwhe ono, ọ tụfu iya ẹhu.

⁵ Ọ bya asụ eze: “Akọ, mu nọdu l'alị anyi nụa l'okfu iwhe i meshiru mẹe nke mmamagụ ghu bụkota ezhi-okfu.

⁶ Mu te eshikwa kweta l'akọ ono bẹ bụ ezhi-okfu jeye mu bya ntaa bya akparụ ẹku nụ ẹnya mu. Lee l'akọ, mu nụru te ekedu mmamagụ ghu ẹbo, o noo nkele ọ parụ ẹka. I dangoru akọ, mu nụru ọkpobe adango.

⁷ O zhiawho lẹ ndu nkeghu bẹ iwhe kwenukaru! Iwhe kwenukaru ndu ozhi ghu whẹ, bụ ndu, l'anọje l'iwhu ghu ntekenteke anụta olu-okfu mmamagụ ghu!

⁸ T'ajaja bụru nke Onye-Nwe-Ọha, bụ Chileke ghu; onye ono, bụ l'ị dụ iya ree meru o dobe ghu l'oshi-eze iya t'ị bụru eze l'iswi Onye-Nwe-Ọha, bụ Chileke ghu. Chileke ghu bẹ yeru ndu Ízurẹlu obu, ọ bụru obu iya tẹ whẹ shihu ike jeye lẹ gbururu. Ọo ya meru g'o gude, o mee ghu eze whẹ, nke ọwhu l'ii-doberu whẹ ikpe, kfụru nhamụnha mẹe ọdu-chịriri.”

⁹ Tọ dụ iya bụ, eze-nwanyị ono bya eworu mkpọla-ododo, ẹrwa iya dụ talẹntu ụkporo ugbo ishii nụ eze, bya anụ iya igweligwe mmanụ, l'eshi kwẹkwekwe mẹe ẹwhuru, l'erekaa ire. Mmanụ ono, eze-nwanyị ndu Sheba nụru eze Sólomọnu ta adụdu ụdu iya ọdo, dụjeru ẹgube ono.

¹⁰ Ọdo bụ lẹ ndu nke Hiramu mẹe ndu nke Sólomọnu, bụ ndu ono, l'evutaje mkpọla-ododo l'alị Ofi bẹ l'evutajekwawho oshi alugumu mẹe ẹwhuru, l'erekaa ire.

¹¹ Ọ bụru oshi alugumu ono bẹ eze gude meta ndzọkpa, e gude enyihu eze-ụlo Onye-Nwe-Ọha ono mẹe nke ụlo eze, gudekwa iya whọ kwee une mẹe ogumogu, ndu egvu l'egudeje agụ egvu. Ụdu oshi alugumu, dụ nno ta abyabụdua t'a whụ iya l'alị ndu Juda.

¹² Eze, bụ Sólomọnu nụkota eze-nwanyị ndu Sheba ono iwhe ọ sụru t'ọ nụ iya. Iwhe lile, ọ ryọru iya b'ọ nụkotaru iya, t'a gụfukwa ọwhu eze-nwanyị ono nụru eze l'onwiya. Ọo ya bụ, eze-nwanyị dakọbe ọ bụru iya ọla alị whẹ yẹle ndu ozhi iya.

Ẹku Sólomọnu

¹³ Mkpọla-ododo, l'abyajẹru Sólomọnu awha g'awha ha bẹ ẹrwa iya dụ ụnu talẹntu mkpọla-ododo l'ụkporo talẹntu ugbo iri l'ẹto lẹ talẹntu ishii.

¹⁴ T'a gụfukwa iwhe l'eshije l'ẹka ndu l'agba nghọ mẹe l'ẹka ndu l'agba ikike nghọ. Mkpọla-ododo bẹ l'eshijekwawho l'ẹka ndu eze ndu Arabụ mẹe l'ẹka ndu ọ-chị-ọha, l'achị alị ono abyarụ Sólomọnu.

¹⁵ Eze Sólomọnu bẹ metaru eze iwhe l'eegudeje egbobuta onwonye, dụ ụkporo iri. Ọ bụru mkpọla-ododo, e tsusaru ọsa b'o gude mee ya. Mkpọla-ododo, larụ lẹ nnanụ iya bẹ ẹrwa iya dụ ụnu talẹntu ugbo labọ l'ụkporo iri.

¹⁶ O meta iwhe ono, l'eegudeje egbobuta onwonye ono nke nshịi, dụ ụkporo ugbo iri l'ise. Ọ bụru mkpọla-ododo, e tsusaru ọsa b'o gude mee ya. Mkpọla-ododo, larụ lẹ nnanụ iya bẹ dụkota ụkporo shẹkelu ugbo ẹsaa lẹ shẹkelu iri. Ẹka eze doberu iya bụ l'ụlo ono, e gude oshi, shi l'ọswa ugvu ugvu Libanọnu tụa.

¹⁷ Eze gudekwawho ọkpu-enyi mee oshi-eze, bya arwụkota iya ọkpobe mkpọla-ododo l'eli.

¹⁸ Oshi-eze ono bẹ nweru ndzọkpa ishii mẹe iwhe e meru lẹ mkpọla-ododo ye iya t'a tukobeje ọkpa. E meru iya ẹka l'aatukobeje ẹka ibẹka ibẹbo, kpụa oduu labọ kfụkube l'iwhe ono, l'aatukobeje ẹka ono whẹ labọ.

¹⁹ A kpụru oduu iri l'ẹbo kfụbe l'eli ndzọkpa ishii ono. Nnanụ kfụru l'ishi lanụ, ọdo kfụru l'ishi lanụ ọwhu. Ọ noo g'a kfụbekotaru iya lẹ ndzọkpa ono l'ẹhu l'ẹhu. Akọ ẹtu ụdu oshi-eze ono ta dụjeduru l'alị-eze ọdo.

²⁰ Omogo lile, eze Sólomọnu l'egudeje angụ iwhe-angụngu bụ lẹ mkpọla-ododo b'e mekotaru iya. Arya lile, dụkota l'ụlo ono, e gude oshi, shi l'ọswa ugvu ugvu Libanọnu tụa bụru l'ọkpobe mkpọla-ododo b'e mekotaru iya. Mkpọla-ọcha ta adụdu iwhe a gụberu iya l'oge nke Sólomọnu.

²¹ Eze bẹ nweru igweligwe ụgbo-mini, l'agbarụ iya nghọ, yẹle ụgbo-mini Hiramu tụkoru agbagbabẹ l'eze-ẹnyimu lanụ. Ọ bụru ugbo lanụ l'awha ẹto, fụtaru nụ bẹ ụgbo-mini ono shi Tashishi l'alwajẹ, vulata mkpọla-ododo, mẹe mkpọla-ọcha, mẹe ọkpu-enyi, mẹe adaka, mẹe enwe.

²² Ọo eze Sólomọnu bẹ ẹku iya kakọta, ọ bụru iya bẹ mmamagụ iya kakọta l'iwhe bụ ndu eze ndu mgboko l'owhu.

²³ Ndu eze ndu mgboko l'owhu l'abyajẹ l'iwhu Sólomọnu tẹ whẹ nụta olu-okfu mmamagụ, Chileke yeru iya l'ẹhu.

²⁴ Awha g'awha ha l'abụje, onye -byata, ya egude iwhe bya anụ iya, mbụ iwhe e meru lẹ mkpọla-ọcha, mẹe ọwhu e meru lẹ mkpọla-ododo, mẹe uwe mkpẹelanu, mẹe ngwọgu, mẹe mmanụ, l'eshi kwẹkwekwe, mẹe ịnya mmaanụ, mẹe ịnya-mulu. Iwhe l'aanụje iya l'apajẹ ẹka.

²⁵ Sólomọnu bẹ nweru ẹka l'oodobeje ịnya mẹe ụgbo-ịnya, dụ ụnu ugbo iri, bya enweru ụkporo ụnu ndu l'agba ịnya l'ụnu iri. Ndu b'ọ harụ dobe lẹ mkpụkpu, l'eedobeje ụgbo-ịnya, harụ ụwhodu doberu onwiya lẹ Jerúsalẹmu.

²⁶ Ọ bụru iya l'achị iwhe bụ ndu eze, watazhiewho l'ẹnyimu Yufurétisu jeye l'alị ndu Fílistiya, je akpaa l'oge alị ndu Íjiputu.

²⁷ Eze mee tẹ mkpọla-ọcha kụru g'ọo ẹwhuru lẹ Jerúsalẹmu, mee t'oshi sida dzuru ẹka lile g'ọo oshi sịkamo, tụkoru alị ọkpa-ugvu, dụ l'ụzo ẹnyanwu-arịba nata.

²⁸ Sólomọnu bẹ l'aanmarụ ịnya l'alị Íjiputu mẹwaro l'alị ndu ọdo.

Anwụhu Sólomọnu

²⁹ Iwhe ọdo, Sólomọnu megbaberu, wata l'ishi jeye lẹ ngvụcha b'e dekotaru l'ẹkwo-akọ Nétanu onye nkfuchiru Chileke, bya edee ya l'ẹkwo nkfuchiru Ahayija onye Sháyilo mẹe l'ẹkwo ọwhulenya Ido onye l'awhụ awhụ, bụ iya bụ ọwhulenya, ọ whụru l'ishi Jerobowamu nwa Nebatu.

³⁰ Sólomọnu bẹ nọdu lẹ Jerúsalẹmu bụru eze ndu Ízurẹlu ụkporo awha labọ.

³¹ Ọ nwụhu lakfushia nna iya whẹ lẹ maa. E lia ya lẹ mkpụkpu Dévidi, bụ nna iya. Nwa iya nwoke, bụ Rehobówamu bya abụru eze l'ọzori iya.