2 Iwhe e meru l'oge ndu eze 8 - BAYỊBURU Ẹzaa

Iwhe ọdo, Sólomọnu megbaberu

¹ O be lẹ ngvụcha ụkporo awha, bụ nteke Sólomọnu tụ-geru ụlo Onye-Nwe-Ọha ono mẹe ụlo nkiya,

² ọ bya atụkwa-zhia mkpụkpu gẹ mkpụkpu ha ono Hiramu nụru iya, bya achịta ndu Ízurẹlu yekota iya tẹ whẹ buru.

³ Sólomọnu bya ejee ọgu lẹ mkpụkpu Hámatu Zoba je anata iya.

⁴ Ọ tụa mkpụkpu Tadụmo l'echi-ẹgu, bya atụshia mkpụkpu, l'aakwakọbeje iwhe lẹ Hámatu.

⁵ Ọ tụkwa-zhia mkpụkpu Betu-horonu nke imeli mẹe nke ụzo alị, tụa ya o shihu ike. Ọ tụ-wheta iya mgbodo mgburumgburu, ye iya ọnuzo mẹe mgbọro-igwe, e gude aswọ-chi iya aswọ-chi.

⁶ Ọ bya atụa mkpụkpu Bélatu. Ọ tụshia mkpụkpu, l'aakwakọbe iwhe, mẹe mkpụkpu ẹka ụgbo-ịnya iya l'a-dụ, mẹe mkpụkpu ẹka ndu l'agbarụ iya ịnya l'e-buru. Sólomọnu tụko iwhe lile, ọ chọru atụtu tụa lẹ Jerúsalẹmu, mẹe l'ugvu ugvu Libanọnu, mẹe ẹka lile, alị-eze iya beru.

⁷ Ndu lile, whuduru nụ lẹ ndu Hetu, mẹe ndu Amọru, mẹe ndu Pẹrezu, mẹe ndu Hevu, mẹe ndu Jebusu, mbụ ndu ono, l'ete abụa ndu Ízurẹlu,

⁸ mbụ ẹpa ndu ono, whuduru nu l'alị ono, ndu ọwhu ndu Ízurẹlu l'ẹte alaa l'iyi; ndu ono bẹ Sólomọnu doberu tẹ whẹ jeje ozhi mkpọnwuru. Whẹ l'ejekwa iya-a byeye ntanụ.

⁹ Ọle Sólomọnu ta adụdu onye Ízurẹlu o meru nwohuta ozhi iya. Whẹbedua b'o meru ndu ojọgu iya, mẹe ndu ishi ndu ojọgu iya, mẹe ndu ishi ụgbo-ịnya iya, mẹe ndu l'agbarụ iya ịnya.

¹⁰ Ọo whẹ bụ ndu ishi-ozhi Sólomọnu; iwhe whẹ dụ bụ ụkporo madzụ ugbo iri l'ẹbo l'ụmadzu iri, ọ bụru whẹ l'achị-zhi ndu ono l'ọrwu.

¹¹ Sólomọnu bya eshi lẹ mkpụkpu Dévidi dufuta ada Fero whọ, l'ọolu bya edobe l'ụlo ono, ọ tụru iya nkele Sólomọnu bẹ sụru lẹ nyee ya te ebudu l'ụlo Dévidi, bụ eze ndu Ízurẹlu, o noo nkele iwhe bụ ẹka igbe-ọgbandzu Onye-Nwe-Ọha kpuru ishi bẹ dụwa nsọ.

¹² Sólomọnu bya agbarụ Onye-Nwe-Ọha ẹja ọkpokota-iwhe-ọku l'eli ẹnya-mgbẹja ono, ọ tụru l'e jeta akpọ iwhu eze-ụlo ono.

¹³ Ngwo-ẹja ono b'ọ gbarụ ẹgube iwu Mósisu kfuru t'a gbajẹ iya lẹ mbọku lẹ mbọku, mẹe lẹ mbọku-ọtuta-ume, mẹe l'ọnwa ọ̀whúú, mẹe l'ori oge ẹto ono, l'eerije l'awha, bụ iya bụ oge buredi, l'eete eyee iwhe l'ekoje buredi, mẹe Oge-Idzu, mẹe oge Ime-mkpu.

¹⁴ O tsoru ụzo ono, nna iya Dévidi tọgboru gude họo ọgbo ndu l'agbajẹ ẹja nụ Chileke dobe whẹ l'ozhi, whẹ l'a-nọ eje, bya ahọo ọgbo ndu Lívayi tẹ whẹ nọdu l'ọkwa ndu l'agụ egvu ajaja mẹe tẹ whẹ l'ejeru ndu l'agbajẹ ẹja nụ Chileke ozhi lẹge mbọku gbarụ; ọ gbaa ọgbo ndu l'eche nche dobegee whẹ l'ọnuzo, whẹ l'a-nọ eche, nkele o noo gẹ Dévidi onye nke Chileke tụru iya dobe ndono.

¹⁵ Iwhe lile, eze tụru doberu ndu l'agbajẹ ẹja nụ Chileke mẹe ndu Lívayi tẹ whẹ meje ta adụdu ọwhu whẹ harụ ememe; je akpaa lẹ nke ẹka l'aakwakọbe ẹku.

¹⁶ O noo ya, ọrwu lile, Sólomọnu gude l'ẹka arwụ bya agvụ, mbụ ọrwu, ọ watarụ lẹ mbọku, a tụru ukfu ụlo Onye-Nwe-Ọha ono jeye a tụ-gee ya. Ọ bụru iya bụ l'a tugee ụlo Onye-Nwe-Ọha ono.

¹⁷ Tọ dụ iya bụ, Sólomọnu bya atụgburu jeshia Eziyọnu-geba mẹe Elatu ọwhu dụ l'agụga eze-ẹnyimu l'alị ndu Edọmu.

¹⁸ Hiramu ye ndu nkiya, bụ ndu mahawarụ eze-ẹnyimu ono, whẹ patarụ Sólomọnu ụgbo-mini. Whẹ lẹ ndu nke Sólomọnu tụko tsoru jeshia alị Ofi, shi l'ẹka ono wolata mkpọla-ododo, ẹrwa iya dụ ụnu talẹntu l'ụkporo labọ l'iri bya akụberu eze Sólomọnu.