2 Iwhe e meru l'oge ndu eze 7 - BAYỊBURU Ẹzaa

Eedobe eze-ụlo Chileke nsọ

¹ Sólomọnu kfugelewho nụ Chileke, ọku shi l'imigwe bụru whaa bya ekekota ẹja ọkpokota-iwhe-ọku ono mẹe ngwo-ẹja ọdo, a gbarụ. Ogbu-zaazaa Onye-Nwe-Ọha sweta ụlo ono.

² Ndu l'agbajẹ ẹja nụ Chileke ta adụ ike kpua ishi l'ime ụlo Onye-Nwe-Ọha ono, nkele ogbu-zaazaa Onye-Nwe-Ọha bẹ swechitaru iya.

³ Nteke ụnwu Ízurẹlu whụru ọku ono gẹ l'oonwu abya, bya awhụ g'ogbu-zaazaa nke Onye-Nwe-Ọha tukoru l'eli ụlo ono, whẹ dashịa kpubegee iwhu l'alị l'eli ẹka e gude ẹwhuru nmalia anmali, whẹ balahaaru Onye-Nwe-Ọha ẹja ekele iya ekele asụje: “Onye-Nwe-Ọha bụ onye ọma, n-yemobu iya l'a-nọ jeye lẹ gbururu.”

⁴ Tọ dụ iya bụ, eze yẹle ndu Ízurẹlu ono gẹ whẹ ha tụko gbaarụ Onye-Nwe-Ọha ngwo-ẹja.

⁵ Anụ, eze Sólomọnu gburu egbu gude gbaa ẹja bẹ dụ, ụkporo ụnu eswi ugbo labọ l'ụnu iri l'ise mẹe ụkporo ụnu atụru ugbo iri l'ise. Ọo ya bụ, eze yẹle ndu Ízurẹlu gẹ whẹ ha bya edobe ụlo Chileke ono nsọ.

⁶ Ndu l'agbajẹ ẹja nụ Chileke tụko kfụru l'ọnodu whẹ. O nokwawho gẹ ndu Lívayi kfụru lẹ nkewhe, gude ngwa egvu Onye-Nwe-Ọha, mbụ ono, eze bụ Dévidi meru dobe t'e gude gụje egvu ekele nụ Onye-Nwe-Ọha, bụ iya bụ ngwa egvu ono, o shi egudeje agụ egvu ekele asụ: “N-yemobu Onye-Nwe-Ọha l'a-nọ jeye lẹ gbururu.” Ndu l'agbajẹ ẹja nụ Chileke ono nọdu cheberu ndu Lívayi ono iwhu egbu opyi-ọku, ndu Ízurẹlu l'owhu kfụru akfụru.

⁷ Sólomọnu dobe echilabọ ogboduwhu ono, dụ l'atatiwhu ụlo Onye-Nwe-Ọha ono nsọ. Ọ nọdu iya gbaa ẹja ọkpokota-iwhe-ọku mẹe ẹba anụ, e gude gbaa ẹja ẹhu-guu. O noo nkele ẹnya-mgbẹja ono, e gude ope mee bẹ l'ọoto lakọtadua, mbụ ngwo-ẹja ọkpokota-iwhe-ọku ono, mẹe ngwo-ẹja nri ono, mẹe ẹba anụ ono.

⁸ Ọo ya bụ, Sólomọnu, mẹe ndu Ízurẹlu lile ono, whẹ l'iya nọ l'ẹka ono, mẹe ikpoto edzudzu-ọha ono, mbụ ndu shi l'ọnu ẹka l'eeshije bahụ lẹ Hámatu je akpaa l'ọnu-iyi Íjiputu nọdu nteke ono ria eriri abalị ẹsaa.

⁹ O rwua l'abalị ẹsato iya, whẹ nwee ndzuko gbarụ iche. Nkele whẹ doberu ẹnya-mgbẹja nsọ abalị ẹsaa, ria eriri iya abalị ẹsaa.

¹⁰ O be l'ụkporo abalị l'abalị ẹto l'ọnwa ẹsaa, ọ gbasaa ndu ono tẹ whẹ lashia ibe whẹ. Whẹ lashia l'ẹhu-ụtso mẹe l'obu-ụtso iswi iwhe-ọma, Onye-Nwe-Ọha meru nụ Dévidi, mẹe Sólomọnu, mẹe ndibe iya, bụ ndu Ízurẹlu.

Onye-Nwe-Ọha l'ekfu eyeru Sólomọnu

¹¹ O noo ya, Sólomọnu bya atụa eze-ụlo Onye-Nwe-Ọha ono mẹe ụlo eze ono tụ-gee. O tụko iwhe lile, ọ tụberu ememe l'eze-ụlo Onye-Nwe-Ọha ono mẹe l'ụlo nkiya mekota g'ọ tụberu iya.

¹² Onye-Nwe-Ọha bya abyakfuta Sólomọnu l'ẹnyashi sụ iya: “Mu nụwaru ekfukfu, i kfuru nụ mu, bya ahọtawaa eze-ụlo-ọ t'ọ bụru ụlo, l'aa-nọ agbarụ mu ngwo-ẹja.

¹³ Ọ -bụru lẹ mu guchiru igweli, nke ọwhu bụ l'ọ tọ chịdu mini, m'ọ kwanụ lẹ mu tụru iwu nụ igube t'ọ tụko alị ono danwụshia, m'ọ kwanụ lẹ mu zhiru ẹhu-ba-dụ-mma t'ọ bya l'echilabọ ndibe mu,

¹⁴ ọ -bụru lẹ ndibe mu, bụ ndu l'eeku ẹwha whẹ ala l'ẹwha nkemu bẹ l'e-wozeta onwowhe alị kfuru nụ mu, chọo atatiwhu mu, bya adakọbe haa ejo-ememe, whẹ l'eme, ọo ya bụ, mu eshi l'imigwe nụa ekfukfu, whẹ l'ekfu anụ mu, gụaru whẹ nvụ l'iwhe-dụ-ẹji, whẹ metagbaberu, bya emee t'alị whẹ mehu.

¹⁵ Ntaa bẹ ẹnya mu mẹe nchị mu l'a-dụje l'ekfukfu, l'eekfu anụ mu l'ẹka-a.

¹⁶ Mu họtawaru ụlo-ọ, bya edobewa iya nsọ, bya emewa iya t'ọ bụru ẹka mu l'a-nọ jeye lẹ tututu-mịmimi. Ẹnya mu mẹe obu mu l'a-dụje l'ẹka ono ntekenteke.

¹⁷ “A bya lẹ gụbedua, ọ -bụru l'ii-tsoru ụzo nkemu ẹgube nna ghu Dévidi tsoru iya, eme iwhe lile, mu tụru ghu l'iwu, edobe iwhe mu tọru ọkpa iya mẹe nsọ mu,

¹⁸ bẹ mu l'e-me t'ọnodu ghu bụru echihu echihu l'oshi-eze ono, ẹgube ono mu lẹ nna ghu Dévidi gbarụ iya l'ọgbandzu nteke ono, mu sụru iya: ‘O to nwedu iwhe bya l'e-me t'ụnwu ghu nọ-buhu l'oshi-eze ndu Ízurẹlu.’

¹⁹ “Ọle ọ -bụru l'a nọnyaaru, unu ghafụ haa ome iwhe mu tọru ọkpa iya tọgboru unu mẹe iwu, mu tụru doberu unu, mbụ unu je agwalahaa agwa ọdo, abarụ iya ẹja,

²⁰ ọo ya bụ, mu avụa whẹ l'ọgvu vụfu l'alị ono, mu nụru whẹ ono, swee ẹnya l'ụlo-ọ, mu doberu ọ dụru mu nsọ. Mu emee ya t'ọ bụru iwhe ndu ọdo l'e-gude anma l'ejo ẹtu mẹe iwhe l'aa-nọ eme iwhe ọchi.

²¹ Ụlo-ọ, gvugaru ẹgube-ẹ abụru, onye ghatadẹ, ya akpọo beru sụ: ‘?Ọo gụnu meru Onye-Nwe-Ọha mee ụdudu iwhe ọwa l'alị-a mẹe l'ụlo-ọ?’

²² Ndu madzụ asụ: ‘Ọo lẹ whẹ harụ Onye-Nwe-Ọha, bụ Chileke nke nna whẹ, onye ono dufutaru whẹ l'alị Íjiputu, bya akpọru obu yeru agwa ọdo, gwalahaa ya, bya abalahaarụ iya ẹja, o noo iwhe meru g'o gude Onye-Nwe-Ọha wokfuta whẹ ụdu ejo-iwhe-e.’ ”