2 Iwhe e meru l'oge ndu eze 6 - BAYỊBURU Ẹzaa

Okfu, Sólomọnu kfuru

¹ Tọ dụ iya bụ, Sólomọnu bya asụ: “Onye-Nwe-Ọha, ị sụru l'ii-buru l'urwukpu, gbarụ tsụrikiti.

² Ntaa bẹ mu tụwaru ghu agaga-gvuragvu eze-ụlo, l'ii-buru jeye lẹ tututu-mịmimi.”

³ Edzudzu-ọha ndu Ízurẹlu ono kfụru l'ẹka ono, Sólomọnu ghachiru whẹ iwhu bya agọru ọnu-ọma nụ whẹ.

⁴ Ọ sụ: “T'ajaja bụru nke Onye-Nwe-Ọha, bụ Chileke nke Ízurẹlu, o noo nkele o gudewa ẹka iya medzua ụkwa ono, o kweru Dévidi, bụ nna mu, mbụ ụkwa ono, o gude ọnu iya kweta iya nteke ono, ọ sụru:

⁵ ‘Nkeshi mbọku, mu dufutaru ndibe mu l'alị Íjiputu bẹ l'ọoto dụdua mkpụkpu, dụ l'alị ikfu Ízurẹlu, mu họtaru t'ọ bụru ẹka l'aa-tụ eze-ụlo mu l'e-buru, tọ dụ onye mu họtaru t'ọ bụru onye ishi ndibe mu, bụ ndu Ízurẹlu.

⁶ Ọle ntaa bẹ mu họtawaru Jerúsalẹmu t'ọ bụru ẹka mu l'e-buru, mu họtawaa Dévidi t'ọ chịje ndibe mu ono, bụ ndu Ízurẹlu.’

⁷ “Nna mu Dévidi b'o shi dụ l'obu tẹ ya tụa eze-ụlo Onye-Nwe-Ọha, bụ Chileke nke Ízurẹlu.

⁸ Ọle Onye-Nwe-Ọha bẹ sụru iya: ‘Eshi-ọwhu i vu l'obu t'ị tụaru mu eze-ụlo b'i meru iya ree.

⁹ Ọle ọ tọ bụdu gụbedua l'a-tụ ụlo ọbu. Onye l'a-tụ iya nụ bụ nwa ghu nwoke, ị nwụru anwụnwu; ọo nwa ghu l'a-tụru mu eze-ụlo ọbu.’

¹⁰ “Ntaa bẹ Onye-Nwe-Ọha medzuwaru ụkwa ono, o kweru, nkele mu fụtawaru bya nọ-chia ẹnya nna mu, bụ Dévidi, mu nọduwa l'oshi-eze ndu Ízurẹlu ẹgube Onye-Nwe-Ọha kweru ụkwa iya, tẹmenu mu bya atụwa eze-ụlo Onye-Nwe-Ọha, bụ Chileke nke Ízurẹlu ọbu.

¹¹ L'ẹka ono bẹ mu doberu igbe-ọgbandzu, mbụ igbe ono, e yeru ọgbandzu ono, Onye-Nwe-Ọha yẹle ndu Ízurẹlu gbarụ.”

Sólomọnu l'ekfu anụ Chileke

¹² Tọ dụ iya bụ, Sólomọnu kfụru l'iwhu ẹnya-mgbẹja Onye-Nwe-Ọha, l'iwhu edzudzu-ọha ndu Ízurẹlu ono chilia ẹka iya labọ imeli kfuru nụ Chileke.

¹³ Sólomọnu bẹ gude ope meta ẹka l'akfukojeru akfukoru, ogologo iya dụ nha-ọkpa ẹsaa lẹ mkpirikpi, ọsa iya dụ nha-ọkpa ẹsaa lẹ mkpirikpi, eli iya dụ nha-ọkpa ẹno lẹ mkpirikpi. O dobe iya l'echilabọ ọma ogboduwhu; gbakoru l'eli iya. O byishi ikpere l'atatiwhu edzudzu-ọha ndu Ízurẹlu ono, bya achilia ẹka labọ imeli;

¹⁴ kfulahaa sụ: “Gụbe Onye-Nwe-Ọha, bụ Chileke nke Ízurẹlu, ọ tọ dụdu Chileke ọdo, dụ g'ọo ghu l'imigwe mẹe l'eliwhe, gụbe onye l'edobeje ọgbandzu, gụ lẹ ndu ozhi ghu gbarụ, bụru onye n-yemobu ghu l'ẹte agvụ agvụ l'ẹka ndu gude obu whẹ g'ọ ha etso ghu nụ nọ.

¹⁵ Gụbe onye medzuru ụkwa, i kweru nụ onye ozhi ghu ono, bụ nna mu Dévidi. I gude ọnu ghu kweta iya ụkwa, bya egude ẹka ghu medzua ya ẹgube ọ dụ ntanụ-a.

¹⁶ “Gụbe Onye-Nwe-Ọha, bụ Chileke nke Ízurẹlu, ntaa bụkwa t'i medzufua ụkwa ono, i kweru onye ozhi ghu ono, bụ nna mu Dévidi, mbụ ono, i kweru iya sụ: ‘Ọ tọ dụdu iwhe bya l'e-me t'ụnwu ghu nọ-buhu l'oshi-eze ndu Ízurẹlu m'ọ bụru-a l'ụnwu ghu ọbu l'e-do ẹnya ndo eme iwhe iwu mu kfuru ẹgube ono, gụbedua meru.’

¹⁷ Byiko, Onye-Nwe-Ọha, bụ Chileke nke Ízurẹlu, t'ụkwa ono, i kweru onye ozhi ghu Dévidi vụkotakwa.

¹⁸ “Obenu, ?ndẹe gẹ Chileke yẹle madzụ mmaanụ l'e-shi bukotaru l'eliwhe? Sụa, igwe, mbụ igwe ọwhu kakọta l'eli bẹ l'ẹte asụdua ghu ebubu; ọwhu l'ee-whoro ụlo ọwa, mu tụru!

¹⁹ Ọle ọbu, gụbe Onye-Nwe-Ọha, bụ Chileke, ngabẹnu nchị l'ekfukfu, onye ozhi ghu l'ekfu anụ ghu mẹe l'aryọ, l'ọoryo ghu. Nụaro mkpu ono, onye ozhi ghu l'echiku ghu mẹe ekfukfu ono, ọ nọdu l'iwhu ghu ekfu anụ ghu.

²⁰ T'ẹnya ghu dụjenu l'ụlo-ọ eswe l'ẹnyashi, mbụ ẹka-a, ị sụru l'ii-buru, nke ọwhu l'ịi-nụje ekfukfu, onye ozhi ghu cheberu iwhu l'ẹka ekfu anụ ghu.

²¹ Nụa aryọ onye ozhi ghu mẹe ọwhu ndibe ghu, bụ ndu Ízurẹlu l'aryọ ghu, nteke whẹ cheberu iwhu l'ẹka-a ekfu anụ ghu. Shikwa l'imigwe, bụ ẹka i bu nụa ya; nteke ị nụru iya gụkwaru whẹ nvụ l'iwhe-dụ-ẹji, whẹ metagbaberu.

²² “Ọ -bụru l'o nweru onye mesweru madzụ ibe iya, a sụ iya t'o ria nte, ọ bya l'iwhu ẹnya-mgbẹja l'ụlo-ọ bya eria nte ọbu,

²³ shikwa l'imigwe nụa ya, gụ emee iwhe gbarụ ghu nụ. Gude ẹka ghu kpeshiaru ndu ozhi ghu whẹ okfu ono. Onye ọwhu ikpe nmarụ, gụ anmaa yẹ ya tukobe iya iwhe o metaru l'ishi. Onye ọwhu iswi dụ mma, gụ ahaaru iya enge rwuberu onye dụ chịriri.

²⁴ “Ọ -bụru l'ọhogu bẹ lwugburu ndibe ghu, bụ ndu Ízurẹlu okfu lẹ whẹ mesweru ghu, ọo ya bụ, whẹ ghaa umere lwakfutawhu ghu azụ, bya ekulahaa ẹwha ghu, whẹ nọdu l'ụlo-ọ kfuru nụ ghu, ryọo ghu aryọ,

²⁵ shikwa l'imigwe nụa ya, gụ agụaru ndibe ghu ono bụ ndu Ízurẹlu nvụ l'emeswe ono, whẹ mesweru ghu. Gụ eduwhu whẹ azụ l'alị ono, ị nụru whẹ lẹ nna whẹ ono.

²⁶ “Nteke bụ l'igweli bẹ gụ-chiru agụ-chi, mini chị-buhu, iswi lẹ whẹ meru ghu iwhe-dụ-ẹji. Whẹ -chebe iwhu l'ẹka-a kfuru nụ ghu, kulahaa ẹwha ghu, bya aghaa umere haa ome iwhe-dụ-ẹji ono nkele i chiwaru whẹ ọnu l'alị,

²⁷ shikwa l'imigwe nụa ya, gụ agụaru ndu ozhi ghu bụ iya bụ ndibe ghu ono, bụ ndu Ízurẹlu nvụ iwhe-dụ-ẹji ono. Gụ ezhia whẹ ụzo ọwhu ka mma, whẹ l'a-nọ etso. Gụ emee tẹ mini chịaru whẹ l'alị ghu ono, bụ alị, ị nụru ndibe ghu t'ọ bụru oke-alị whẹ.

²⁸ “Ọ -bụru lẹ mkpẹgu byarụ l'alị-a, m'ọ bụ ẹhu, l'eme eme, m'ọ bụ iwhe l'egbu nri, a kọru akọ, m'ọ bụ ọwhu l'emeje t'ọ dụ ndzụkpo ndzụkpo, m'ọ bụ igube, m'ọ bụ ọvu, l'adajẹ ada bẹ byarụ nụ. Nteke bụ l'ọo ọhogu bẹ bya eyebuta whẹ lẹ mkpụkpu, mbụ o beru ọ bụru ụdu nchịkarehu gụnu bẹ byarụ nụ; o beru ọ bụru ụdu ẹhu-ba-dụ-mma, dụ ọdu-agha bẹ byarụ nụ;

²⁹ o nweru onye machịru ẹka l'ụzo ụlo-ọ kfuru nụ ghu, nkele onyenọnu bẹ marụ ẹka ọ ka iya ememe, mẹe ẹka ọ ka iya atsụtsu; m'ọ bụ l'ọo ndibe ghu, bụ ndu Ízurẹlu bẹ tụkoru gẹ whẹ ha kfuru nụ ghu, bya aryọo ghu aryọ,

³⁰ shikwa l'imigwe ẹka ono, i bu nụa ya gụaru whẹ nvụ. Mekoshi onyenọnu lẹge onyenọnu gude eme, nkeshi ị marụ obu onyenọnu. O noo nkele ọo gụbedua kpelekemkpụmu bẹ marwetaru obu ụnwu eliwhe l'owhu.

³¹ Ọo ya bụ, nke ọwhu whẹ l'a-nọ atsụ ghu egvu, etso ụzo nkeghu mbọkumboku jeye gẹ whẹ l'a-nọ-beru l'alị ono, ị nụru nna anyi whẹ.

³² “A bya l'onye bụ onye ọha ọdo, mbụ onye l'abụa onye Ízurẹlu, bụ ndibe ghu; onye shi ẹka teru ẹnya bya l'iswi ẹwha ghu ono, parụ ẹka ono, mẹe l'iswi ike ghu yẹle iwhe dụ biribiri ono, l'iimegbabe. Nteke onye ono byarụ bya echebe iwhu l'ụlo-ọ kfuru nụ ghu,

³³ shikwa l'imigwe ẹka ono, i bu nụa ya, gụ emeeru onye ọha ọdo ono iwhe lile o kpokuru ghu t'i meeru iya, nke ọwhu ndu mgboko l'owhu l'a-makọtaru ẹwha ghu, bya atsụlahaa ghu egvu g'ọo ndibe ghu, bụ ndu Ízurẹlu. Whẹ amakwarụwho l'ụlo-ọ, mu tụru bẹ vu ẹwha ghu.

³⁴ “Ọ -bụru l'i zhifuru ndibe ghu tẹ whẹ je alwụshi ndu ọhogu whẹ ọgu, ẹka ọbu ẹka ọbu; whẹ chebe iwhu lẹ mkpụkpu-a, ị họtaru mẹe l'ụlo-ọ, mụ tụru ghu,

³⁵ shikwa l'imigwe nụa ekfukfu ono, whẹ kfuru nụ ghu mẹe iwhe whẹ sụru t'i meeru whẹ; gụ agbaarụ whẹ ọdzori.

³⁶ “Nteke bụ l'ọo iwhe-dụ-ẹji bẹ whẹ meru ghu, nkele ọ tọ dụdu onye l'ete emeje iwhe-dụ-ẹji. I kwobe iswi iya, ẹhu-eghughu bya ghu l'ẹhu l'ẹka whẹ nọ, i woru whẹ ye ọhogu l'ẹka, nke ọwhu bụ l'aakpụru whẹ lẹ ndzụ laa alị teru ẹnya m'ọ bụ alị, dụ ntse.

³⁷ Whẹ -nọdu l'alị ono, a kpụru whẹ lẹ ndzụ laa ono, égò lwawhu whẹ azụ, whẹ daa onwowhe ụta, bya anọdu l'alị ndu ono, a kpụru whẹ lẹ ndzụ ono laa ryọo ghu sụ: ‘Anyi mewaru iwhe-dụ-ẹji, bya emewaa iwhe l'ẹte akfụaru nhamụnha, tẹmenu anyi mewaa ejo-iwhe.’

³⁸ Ọ -bụru lẹ whẹ nọdu l'alị ono, a kpụru whẹ lẹ ndzụ laa ono gude ndzụ whẹ l'owhu mẹe obu whẹ l'owhu daa onwowhe ụta ono, whẹ chebe iwhu l'alị-a, bụ alị, ị nụru nna whẹ, mbụ lẹ mkpụkpu-a, ị họtaru mẹe l'ụlo-ọ, mu tụru ghu kfuru nụ ghu,

³⁹ shikwa l'imigwe ẹka ono, i bu nụa ekfukfu, whẹ kfuru nụ ghu mẹe iwhe whẹ sụru t'i meeru whẹ, gụ agbaarụ whẹ ọdzori. Gụaru ndibe ghu ono, meru ghu iwhe-dụ-ẹji nvụ.

⁴⁰ “Byiko Chileke mu, t'ẹnya ghu dụjenu l'ekfukfu, a nọdu l'ẹka-a ekfu anụ ghu, nchị ghu adụjekwa iya whọ.

⁴¹ “Ntaa bụkwa t'i gbalihu byiko Onye-Nwe-Ọha, bụ Chileke, jeshia l'ọkpoku ghu. “Gụbedua mẹe igbe-ọgbandzu ghu ono, l'egoshi l'ị bụ onye ọkpehu dụ. Gụbe Onye-Nwe-Ọha, bụ Chileke, tẹ ndu l'agbajẹ ẹja nkeghu bụnuru ndu l'aa-kwa ndzọta g'ọo onye kwarụ ngwa. Tẹ ndu yeru ghu obu swanụa ẹswa l'iwhe dụ ree, l'iimeru whẹ.

⁴² Byiko Nnajị-Ọha, bụ Onye-Nwe-Ọha, be etuwhakwa iwhu l'ẹka onye nkeghu, i teru mmanụ nọ. Nyatakwa n-yemobu ono, i nweru l'ẹka Dévidi, bụ onye ozhi ghu nọ.”