2 Iwhe e meru l'oge ndu eze 5 - BAYỊBURU Ẹzaa

¹ O noo ya, ọrwu lile, Sólomọnu gude l'ẹka arwụ l'ụlo Onye-Nwe-Ọha ono bya agvụkota. Ọ chịtakota iwhe Dévidi, bụ nna iya doberu nsọ bya edobe l'ụlo ono, mbụ mkpọla-ọcha, mẹe mkpọla-ododo, mẹwaro arya ọdo. Iwhe ono b'o dobekotaru l'ẹka l'aakwakọbeje ẹku l'ụlo Chileke ono.

Aapabata igbe-ọgbandzu l'eze-ụlo Onye-Nwe-Ọha

² Tọ dụ iya bụ, Sólomọnu bya ekua ndu bụ ọgurenya ndu Ízurẹlu ndzuko lẹ Jerúsalẹmu, mẹe ndu lile, bụ ishi l'ikfu, mẹe ndu bụ ishi l'ẹnya-uwhu ndu Ízurẹlu, nke ọwhu whẹ l'a-pafụta igbe-ọgbandzu Onye-Nwe-Ọha lẹ mkpụkpu Dévidi bụ iya bụ Záyọnu.

³ O rwulewho nteke whẹ l'eri oge l'ọnwa ẹsaa, unwoke Ízurẹlu gẹ whẹ ha dzukota l'iwhu eze.

⁴ Ndu bụ ọgurenya ndu Ízurẹlu dzulewho, ndu Lívayi pata igbe-ọgbandzu ono.

⁵ Whẹ patarụ igbe-ọgbandzu ono, bya awhọta Ụlo-ẹkwa ndzuko, gwota iwhe bụ arya, dụ nsọ, dụ iya nụ. Ọ bụru ndu l'agbajẹ ẹja nụ Chileke mẹe ndu Lívayi bẹ patarụ iya nụ.

⁶ Eze, bụ Sólomọnu yẹle edzudzu-ọha Ízurẹlu ono, dzukoberu l'ẹka ono bya anọdu l'atatiwhu igbe-ọgbandzu ono egbushi atụru mẹe eswi. Anụ, whẹ gburu bụ ikpoto, bụru agụta agụta.

⁷ O noo ya, ndu l'agbajẹ ẹja nụ Chileke pata igbe-ọgbandzu Onye-Nwe-Ọha ono bya edobe l'ẹka e metaru iya ọru l'ime mkpu eze-ụlo ono, bụ iya bụ Ẹka-kakọta-ọdu-nsọ. Whẹ doberu iya lẹ mkpula akwẹka cherubu.

⁸ Cherubu ono bẹ tụshiru akwẹka atụshi lẹ nwọru ẹka ono, e doberu igbe-ọgbandzu ono, shi nno kwechita igbe-ọgbandzu ono yẹle mkpara, l'eegudeje apa iya.

⁹ Mkpara igbe-ọgbandzu ono bẹ tseru ogologo, nke ọwhu bụ l'aanọduje lẹ mkpu Ẹka-dụ-nsọ ono, dụ l'iwhu Ẹka-kakọta-ọdu-nsọ ele ishishi iya lẹ g'o tsefutaru. Ọle onye nọ l'ẹka ọdo ta awhụdu iya. Whẹ dụkwa-a l'ẹka ono byeye ntanụ.

¹⁰ Ọ tọ dụdu iwhe dụ l'ime igbe-ọgbandzu ono, gbahaa balịbali ẹwhuru labọ, Mósisu yeru iya l'ugvu Horẹbu, mbụ l'ẹka ono, Onye-Nwe-Ọha yẹle ndu Ízurẹlu gbarụ ndzụ gẹ whẹ fụta-geeru l'alị ndu Íjiputu.

Ọdu-biribiri Onye-Nwe-Ọha

¹¹ Ndu l'agbajẹ ẹja nụ Chileke bya eshi lẹ mkpu Ẹka-dụ-nsọ ono lụfuta. Ndu l'agbajẹ ẹja nụ Chileke ono, bụ ndu nọdu l'ẹka ono bẹ dobehawaru onwowhe nsọ gẹ whẹ ha, l'ẹbe akpa ishi ọgbo ọwhu whẹ tso etso.

¹² Asafu, mẹe Hemanu, mẹe Jedutunu, mẹe ụnwu whẹ, mẹe abụbu whẹ, mbụ ọgbo egvu ono, shi l'eri Lívayi l'owhu bya akfụru l'ụzo ẹnyanwu-awata ẹnya-mgbẹja ono. Whẹ yekota uwe, e meru l'ọkpobe ẹkwa ọcha, chịru ogele, mẹe une, mẹe ogumogu akụ egvu. Ndu l'agbajẹ ẹja nụ Chileke, dụ ụkporo ishii kfụru whẹ lẹ mgboro egbu opyi-ọku.

¹³ Ụda opyi-ọku ono mẹe olu egvu ndu ono, l'agụ egvu ono l'awụkotalewho rinaa. Whẹ l'agụ egvu ajaja mẹe egvu ekele anụ Onye-Nwe-Ọha. Whẹ l'agụ egvu ono egbu opyi-ọku eye iya, akụ ogele mẹwaro ngwa-egvu ọdo eyekobe iya. Olu whẹ l'aha gengu-gengu l'ẹka whẹ l'agụ egvu ajaja ono mẹe egvu ekele ono anụ Onye-Nwe-Ọha asụje: “Onye-Nwe-Ọha bụ onye ọma, n-yemobu iya l'a-nọ jeye lẹ gbururu.” Tọ dụ iya bụ, ụlo Onye-Nwe-Ọha ono bụru urwukpu nkụchi.

¹⁴ Urwukpu ono mee ndu l'agbajẹ ẹja nụ Chileke ono ta adụhe ike takeru eje ozhi whẹ nkele ọdu-biribiri Onye-Nwe-Ọha bẹ sokputaru ụlo Chileke ono.