2 Iwhe e meru l'oge ndu eze 4 - BAYỊBURU Ẹzaa

E memashiru eze-ụlo Chileke

¹ O gude ope meta ẹnya-mgbẹja, dụ nha-ọkpa ụkporo l'iri l'ogologo, uswe iya dụ nha-ọkpa ụkporo l'iri, eli iya dụ nha-ọkpa iri l'ise.

² Ọ bya adaze ope gude meta abaravuma, gbarụ mgburumgburu. Ogboromọnu iya mgburumgburu bẹ dụ nji-ẹka iri, eli iya dụ nji-ẹka ise. Mgburumgburu iya bẹ dụkota nji-ẹka ụkporo l'iri.

³ L'iku ogboromọnu iya b'a yọpyaberu iwhe a kpụru ọ dụ g'ọo oke-eswi mgburumgburu, iri l'ẹnya nji-ẹka lanụ. Oke-eswi ono b'a kpẹru giriri uzhi labọ, e mee ya yẹle abaravuma ono lịko ọnu.

⁴ Abaravuma ono b'a tukoberu l'okpurukpu oke-eswi iri l'ẹbo, a kpụru akpụ. Ẹto bẹ cheru iwhu l'ụzo isheli, ẹto ọdo chee iwhu l'ụzo ẹnyanwu-arịba, ẹto ọdo chee iwhu l'ụzo ọhuda, ẹto ọdo chee iwhu l'ụzo ẹnyanwu-awata, whẹ ghakọta ike ye l'ime.

⁵ Abaravuma ono bẹ igbi, dụ iya nụ ha g'ọo ukfumẹka. Ogboromọnu iya b'o meru, ọ dụ g'ọo ogboromọnu omogo, mbụ l'o meru iya, ọ gọo agọ g'ọo nchị fụlawa nkashị-iyi. Mini, l'alajẹ iya nụ bẹ l'e-rwu iwhe dụ g'ọo ụnu galọnu ẹsaa l'ụkporo ugbo iri.

⁶ O mekwaruwho eze efere ise, e gude asa iwhe. Ise b'ọ sụberu l'ụzo ọhuda eze-ụlo Onye-Nwe-Ọha, sụbe ise ọdo l'ụzo isheli. Ọ bụru eze efere ono bẹ whẹ l'asajẹ iwhe e gude gbaa ẹja ọkpokota-iwhe-ọku. Abaravuma whọ bụru iya bẹ ndu l'agbajẹ ẹja nụ Chileke l'egudeje asacha onwowhe.

⁷ Ọ bya egude mkpọla-ododo meta iwhe l'aatukobeje oryọku ụzo iri dobe l'eze-ụlo ono. Ọ bụru lẹ g'a sụru t'e mee ya bụ lẹ g'o meru iya. O woru ise dobe l'ụzo ọhuda, dobe ise ọdo l'ụzo isheli.

⁸ O mekwaawho teburu iri dobe l'eze-ụlo ono. Ise b'o doberu l'ụzo ọhuda, dobe ise ọdo l'ụzo isheli. O gude mkpọla-ododo mee efere, dụ ụkporo ugbo ise.

⁹ Ọ bya emeta ọma ogboduwhu ẹka ndu l'agbajẹ ẹja nụ Chileke l'anọduje, mẹe eze ogboduwhu, mẹe mgbo ọnu ogboduwhu ono. O kwekota ope lẹ mgbo ono.

¹⁰ Ọ pata abaravuma whọ je asụbe l'ụzo ọhuda ẹnyanwu-awata ụlo ono.

¹¹ Iwhe ọdo, Hiramu mefuaru bụ ite, mẹe eze-agọ, mẹe eze-efere. Ọo ya bụ, Hiramu rwụkota ọrwu lile, l'ọorwuru eze Sólomọnu l'ụlo Chileke ono ọ gvụ.

¹² Ọ kpụru itso labọ, mẹe ishi itso labọ, gwarụ kokoroko, ọ tukobegeru l'eli itso ono, mẹe iwhe-akpakpa, dụ uzhi labọ, ọ kparụ gude memashia ishi itso labọ ono, gwarụ kokoroko ono,

¹³ mẹe iwhe ono, dụ g'ọo akpụru itorokuma, dụkota ụnu, o dọ-wheru iwhe-akpakpa ono mgburumgburu. O doru iya giriri uzhi labọ l'ishi itso ono gude memashia ya ememashi,

¹⁴ mẹe ọgba-kperekpere yẹle eze efere, a dọbe-geeru l'eli iya,

¹⁵ mẹe abaravuma yẹle oke-eswi iri l'ẹbo, a sụberu abaravuma ono l'eli,

¹⁶ mẹe ite, mẹe eze-agọ, mẹe oleji, mẹwaro ụnwu arya ọdo, gbarụ nụ. Arya lile ono, Huramu-abyi meshiru tẹ Sólomọnu gude mee ụlo Onye-Nwe-Ọha ono bẹ bụ ope, l'egbuka ngerengere b'o gude mekota iya.

¹⁷ Ọ bụru l'alị ụrwa, dụ lẹ whorokoto mgbakụ Sukọtu yẹle Zeratanu, mbụ lẹ nsụda Jọ́danu bẹ Sólomọnu nọdu yọtakota arya ono g'ọ ha.

¹⁸ Sólomọnu bẹ meshiru arya ono l'igweligwe, nke ọwhu bụ l'ẹrwa ope, larụ iya nụ bẹ l'ẹte adụdua onye marụ iya nụ.

¹⁹ O noo ya, Sólomọnu mekota arya lile, dụ l'ụlo Chileke bụ iya bụ ẹnya-mgbẹja, e gude mkpọla-ododo mee, mẹe teburu, l'aatukobeje buredi, dụ nsọ l'iwhu Chileke,

²⁰ mẹe iwhe l'aatukobeje oryọku, e meru l'ọkpobe mkpọla-ododo yẹle oryọku, a tukoberu iya t'o nwuje l'iwhu Ẹka-kakọta-ọdu-nsọ; ẹgube a sụru t'ọ dụ,

²¹ mẹe iwhe dụ g'ọo fụlawa, mẹe oryọku mẹe iwhe e gude akpata iwhe e mekotaru l'ọkpobe mkpọla-ododo,

²² mẹe iwhe l'apa oghu oryọku, mẹe eze-efere, mẹe agọ, mẹe iwhe l'aagụjeru ọku ye, e gude ọkpobe mkpọla-ododo mekota, mẹe mgbo eze-ụlo ono, bụ iya bụ mgbo nke ime mkpu Ẹka-kakọta-ọdu-nsọ, mẹe mgbo eze-ụlo ono l'onwiya.