2 Iwhe e meru l'oge ndu eze 34 - BAYỊBURU Ẹzaa

Nteke Josáya bụ eze ndu Juda

¹ Josáya bẹ gbarụ awha ẹsato nteke ọ watarụ ọbu eze. Iwhe ọ chịru bụ ụkporo awha l'awha iri lẹ nnanụ lẹ Jerúsalẹmu.

² O meru iwhe kfụru nhamụnha l'ẹnya Onye-Nwe-Ọha. Ọ wọtaru ẹka ochee-oroke iya, bụ Dévidi. Ọ tọ dụdu ọwhu ọ harụ.

³ L'awha kwe iya awha ẹsato, ọ watarụ ọbu eze b'ọ watarụ ọcho ụzo Onye-Nwe-Ọha, bụ Chileke nke ochee-oroke iya, bụ Dévidi. Nteke ono b'ọ bụkwadu nwata-uke. O be l'awha kwe iya awha iri l'ẹbo, ọ wata ọwhashi ukutuku, dụ lẹ Juda mẹe lẹ Jerúsalẹmu; o woshia ẹka l'aagwajẹ iwhe dụ iya nụ, mẹe itso Ashera, mẹe ntẹkpe, a pyịru apyị, mẹe ọwhu a kpụru akpụ.

⁴ O zhia t'e tsukposhia ẹnya-mgbẹja Bálu. O nwutsushia ẹnya ẹka l'aakpọje ụ̀nwù isẹnsu ọku, dụ l'ẹka ono. Itso Ashera, mẹe ntẹkpe, a pyịru apyị, mẹe ọwhu a kpụru akpụ b'o gwekotaru, ọ bụru udzu; o woru iya je ewhekaa l'ilu ndu shi agwajẹ iya nụ.

⁵ Ndu l'agbarụ agwa ono ẹja b'ọ kpọkotaru ọkpu whẹ ọku l'eli ẹka l'aakpọjeru agwa ono ngwo-ẹja ọku. Ọ tụko ukutuku, dụ lẹ Juda mẹe lẹ Jerúsalẹmu whashịkota.

⁶ Lẹ mkpụkpu ẹka ndu Manáse, mẹe ndu Ífuremu, mẹe ndu Símiyọnu bukota, mbụ je akpaa l'ẹka ndu Náfutali bukota mẹe l'ẹka nọ-wheru iya mgburumgburu, e meru, ọ bụru kpurupyata,

⁷ b'o nwutsushiru ẹnya ẹka whẹ l'akpọjeru ọgvu whẹ ngwo-ẹja ọku, bya egwepyashia itso Ashera mẹe ntẹkpe, dụ iya nụ, l'ootsu buruburu. Whẹ tụko ẹnya ẹka l'aakpọje ụ̀nwù isẹnsu ọku, dụkota l'alị Ízurẹlu nwutsushikota ọ bụru gwoo. E megee, Josáya lwatashia Jerúsalẹmu.

A whụru Ẹkwo Iwu

⁸ O be l'awha kwe Josáya awha iri l'ẹsato, ọ watarụ ọbu eze, nteke ono b'ọ whashịwaru ukutuku, dụ l'alị ono, o zhia Shefanu, bụ nwa Azalaya, mẹe Maseya, bụ ọ-chị-ọha mkpụkpu, ono mẹe Jowa, bụ nwa Jowahazu, onye l'akwakọbeje iwhe meru eme; tẹ whẹ je emekwashia ụlo Onye-Nwe-Ọha, bụ Chileke iya.

⁹ Whẹ byakfuta Hilikaya, bụ onye ishi ndu l'agbajẹ ẹja nụ Chileke je eworu okpoga, e wobataru l'ụlo Chileke nụ iya, mbụ okpoga ono, ndu Lívayi, bụ ndu l'eche nche l'ọnu ụlo natarụ l'ẹka ndu Manáse, mẹe l'ẹka ndu Ífuremu, mẹe l'ẹka ndu Ízurẹlu ono, wafụru nụ, mẹe ọwhu whẹ natarụ l'ẹka ndu Juda kpaawhuu, mẹe l'ẹka ndu Bénjaminu, mẹe l'ẹka ndu bu lẹ Jerúsalẹmu.

¹⁰ Whẹ woru okpoga ono ye l'ẹka ndu ishi ọrwu ono, l'aarwụ l'ụlo Onye-Nwe-Ọha. Ọ bụru iya b'e gude akfụ ndu ọrwu ono, l'emekwashi ụlo Onye-Nwe-Ọha ono ụgwo.

¹¹ Whẹ wokwaruwho okpoga nụ ndu kapịnta mẹe ndu l'atụ ụlo ono tẹ whẹ gude zụ-chia ẹwhuru, a washịru awashị, mẹe oshi, l'aatukobeje l'ụlo gude gbata iya agbata, mẹe oswebe, l'aagbajẹ agbagba gude wụa ụlo ọbu awụwu, nkele ndu ọwhu shi dụ iya nụ bẹ ndu eze, shi achị Juda harụ, ọ lakọta l'iyi.

¹² Unwoke ono bya arwụa ọrwu ono, whẹ ta apa iya ẹka lanụ. Ndu e doberu l'ishi ọrwu ono bẹ bụ Jahatu yẹle Obedaya. Ndu ono bụ ẹpa Merari bụ iya bụ eri Lívayi. Ndu ọdo bẹ bụ Zakaráya yẹle Meshulamu, bụ ẹpa Kohatu. Ọwhube ndu Lívayi ono, l'eme nka l'ọku egvu

¹³ bẹ bụ ndu ishi ndu ọwhu l'evu iwhe e gude eme nke ụlo ono; ọ bụru whẹ l'atuzhiru ndu ọrwu ono ẹka l'ọrwu, dụ l'iche l'iche whẹ l'arwụ. Ndu Lívayi ono bẹ harụ bụru ndu ode-ẹkwo, mẹe ndu ishi-ozhi, mẹe ndu nche ọnuzo.

¹⁴ Ọ bụru gẹ whẹ l'ewofuta okpoga ono, e wobataru l'ụlo Onye-Nwe-Ọha ono bẹ Hilikaya, bụ onye l'agbajẹ ẹja nụ Chileke whụru Ẹkwo Iwu ono, Onye-Nwe-Ọha shi l'ẹka Mósisu nụ.

¹⁵ Hilikaya sụ Shefanu, bụ onye l'ede ẹkwo: “Mu whụakwaru Ẹkwo Iwu ọbu l'ụlo Onye-Nwe-Ọha.” Ọ bya eworu Ẹkwo Iwu ono nụ Shefanu.

¹⁶ Ọo ya bụ, Shefanu gude ẹkwo ono byakfuta eze bya asụ iya: “Iwhe lile, e yeru ndu ozhi ghu l'ẹka tẹ whẹ mee bẹ whẹ l'emekwa-a.

¹⁷ Whẹ wotaakwaru okpoga, dụ l'ụlo Onye-Nwe-Ọha ye l'ẹka ndu ishi ọrwu mẹe ndu ọbu, l'arwụ ọrwu ọbu.”

¹⁸ Nteke ono ode-ẹkwo ono, bụ Shefanu bya ekfuaru eze sụ iya: “Hilikaya, bụ onye l'agbajẹ ẹja nụ Chileke bẹ nwekwaru ẹkwo, ọ nụru mu.” Shefanu bya anọdu l'iwhu eze gụa ya.

¹⁹ Nteke eze nụru iwhe ọ gụfutaru l'ẹkwo iwu ono, o gude iwe-l'ọnuma lajashịa uwe iya.

²⁰ Eze bya asụ Hilikaya, mẹe Ahikamu, bụ nwa Shefanu, mẹe Abudọnu, bụ nwa Mayịka, mẹe Shefanu, bụ ode-ẹkwo, mẹe Ayizáya, bụ onye ozhi eze sụ whẹ agha:

²¹ “Unu jekfu Onye-Nwe-Ọha njịta l'iswi ẹhu mu, mẹe l'iswi ẹhu ndu whuduru nụ lẹ Ízurẹlu, mẹe l'iswi ẹhu ndu Juda, l'okfu iwhe ọwa-a, e deru l'ẹkwo ono, a whụru. L'oke ẹhu-eghughu Onye-Nwe-Ọha bẹ pakwarụ ẹka l'ẹhu anyi, o noo lẹ nna anyi whẹ te edobedu iwhe Onye-Nwe-Ọha kfuru, whẹ te eme iwhe e deru l'ẹkwo-ọ.”

²² Ọo ya bụ, Hilikaya mẹe ndu ono, eze zhiru ozhi ono jeshia ibe nwanyị l'ekfuchiru Chileke, bụ Huluda. Huluda bẹ bụ nyee Shalumu, bụ nwa Tokuhatu nwa Hasura. Shalumu bụru iya l'eleta uwe ndu l'agbajẹ ẹja nụ Chileke ẹnya. Ẹka Huluda bu bẹ bụ l'ẹgu ọ̀whúú ndu Jerúsalẹmu. Whẹ bya ekfuru iya iwhe ono.

²³ Ọ sụ whẹ: “Ọ waa iwhe Onye-Nwe-Ọha, bụ Chileke nke Ízurẹlu l'ekfu ndọwa: Unu je ezhia onye zhiru unu t'unu byakfuta mu

²⁴ l'ọ waa iwhe Onye-Nwe-Ọha l'ekfu ndọwa: Mu bya l'ewokfuta Jerúsalẹmu mẹe ndu bu iya nụ ejo iwhe-ọtsulanu; mu l'e-wokfuta whẹ mburọnu ono, e deshiru l'ẹkwo ono, a gụru l'iwhu eze ndu Juda.

²⁵ Nkele whẹ harụ mu, kpọlahaa ụ̀nwù isẹnsu ọku nụ agwa ọdo, bya egude iwhe whẹ l'emegbabe akpatsu mu ẹhu-eghughu. Ọo ya l'e-me mu ekpukpushi ẹka-a oke ẹhu-eghughu mu, t'a bya l'a-byanyi iya abyanyi.

²⁶ Iwhe unu l'e-kfuru eze ndu Juda, mbụ onye ono, zhiru unu t'unu bya njịta l'ẹka Onye-Nwe-Ọha bụ, l'ọ waa iwhe Onye-Nwe-Ọha, bụ Chileke nke Ízurẹlu l'ekfu l'okfu iwhe ono, yẹbe eze nụru ndọwa:

²⁷ Eshi-ọwhu iwhe ono kpọru ghu mkpọ l'obu, i wozeta onwoghu alị l'iwhu mu nteke ono, ị nụru iwhe mu kfuru l'ọo-dakfuta mkpụkpu ẹka-a mẹe ndu bu iya nụ. Eshi-ọwhu i gude iswi iwhe ono wozeta onwoghu alị l'iwhu mu, bya egude iwe-l'ọnuma gbajashịa uwe ghu, ryaa ẹkwa l'iwhu mu, bẹ mu nụwaru iwhe i kfuru. O nokwa iwhe Onye-Nwe-Ọha l'ekfu ndono.

²⁸ Sụa, mu l'e-me, gụ alakfu nna ghu whẹ lẹ maa, e lia ghu guu; ẹnya ghu ta abya l'a-whụ ejo iwhe-ọtsulanu ono, mu l'e-wota bya edoberu mkpụkpu ẹka-a yẹle ndu bu iya nụ.” Whẹ lwatashia bya akọoru eze gẹ nwanyị ono kfuru.

Josáya l'emezhi ọgbandzu Onye-Nwe-Ọha

²⁹ Tọ dụ iya bụ, eze bya ezhia ozhi gude kua ndu bụ ọgurenya ndu Juda gẹ whẹ ha mẹe ndu Jerúsalẹmu, whẹ byakfuta iya.

³⁰ Eze yẹle unwoke ndu Juda ono gẹ whẹ ha, mẹe ndu bu lẹ Jerúsalẹmu, mẹe ndu l'agbajẹ ẹja nụ Chileke, mẹe ndu Lívayi, mẹe ndu Juda l'owhu ndu ukfu lẹ ndu nta, tụko wụru jeshia l'ụlo Onye-Nwe-Ọha. Ọ gụru ẹkwo ọgbandzu ono, a whụru l'ụlo Onye-Nwe-Ọha ono ye whẹ lẹ nchị.

³¹ Eze bya akfụru lẹ mgboro itso iya, gbaa ndzụ l'iwhu Onye-Nwe-Ọha lẹ ya l'a-nọ etso Onye-Nwe-Ọha ọwaa lẹ ya l'e-gude obu iya g'ọ ha mẹe ndzụ iya g'ọ ha edobe iwu iya, mẹe nsọ iya, mẹe iwhe ọ tọru ọkpa iya, shi nno eme iwhe ọgbandzu ono, e deru l'ẹkwo ono kfuru.

³² O mee t'iwhe bụ ndu nọ lẹ Jerúsalẹmu mẹe lẹ Bénjaminu zụru yeru iwhe ono, o kfuru. Ndu bu lẹ Jerúsalẹmu mee iwhe ọgbandzu Chileke ono kfuru, mbụ Chileke nke nna whẹ.

³³ Josáya bya ewoshikota ejo-agwa, dụ l'alị ndu Ízurẹlu kpaa-whuu. O mee t'iwhe, bụ ndu nọ lẹ Ízurẹlu bajẹru Onye-Nwe-Ọha, bụ Chileke whẹ ẹja. Whẹ ta aha ootso ụzo nke Onye-Nwe-Ọha, bụ Chileke nke nna whẹ ono byeye g'ọ nọ-beru.