2 Iwhe e meru l'oge ndu eze 32 - BAYỊBURU Ẹzaa

Senakeribu l'abya ọgu lẹ Jerúsalẹmu

¹ Hezekáya megelewho ẹguru iwhe ono, ọ nọdu meshigbabe, Senakeribu, bụ eze ndu Asiriya chịta ndu ojọgu iya byatashia ọgu l'alị ndu Juda; whẹ bya akwaa okpu yebutakota mkpụkpu lile, a tụru o shihu ike. Iwhe Senakeribu rịru bụ lẹ ya l'a-lwụta whẹ yeru onwiya.

² Nteke Hezekáya whụru l'iwhe Senakeribu gbarụ ẹnya iya byatashia bụ tẹ ya bya alwụshi Jerúsalẹmu ọgu,

³ o jekfushia ndu ishi iya mẹe ndu ojọgu iya idzu. Whẹ chịa gẹ whẹ l'e-shi je enwuchishia ẹnya-mini, dụ l'azụ mkpụkpu ono tẹ mini gbabuhu. Whẹ bya eyetaru iya ẹka.

⁴ Ikpoto madzụ bya edzua; whẹ je enwuchishia ẹnya-mini ono g'ọ ha mẹe ngele, l'asọghata l'alị ono. Whẹ sụ lẹ whẹ ta achọdu tẹ ndu eze ndu Asiriya whụ mini, l'e-dzuru whẹ mẹ whẹ byalẹwho.

⁵ Hezekáya bya ewhube iwhu tụkwaa ẹka darụ adada lẹ mgbodo mkpụkpu ono; bya atụshia ụlo-eli ụlo-eli l'eli mgbodo ono. L'azụ mgbodo ono b'ọ tụru mgbodo ọdo ye. Ọ bya emee agbarike mgbodo mkpụkpu Dévidi, ọ kabaa oshihu ike. Ọ kpụshikwaawho ngwọgu l'igweligwe, kpụshia whe l'eegudeje egbobuta onwonye wụshi.

⁶ Ọ bya edobe ndu ojọgu, l'a-nọ l'ishi ndu Ízurẹlu. O kua ndu ojọgu ono ndzuko, whẹ byakfuta iya lẹ nggamgbo, dụ l'ọnu mkpụkpu ono. Ọ bya ekfuru okfu mgbamume nụ whẹ sụ:

⁷ “Unu shihukwa ike, obu eshia unu ike. Unu ba atsụkwa egvu, tẹ meji ba agbabuhukwa unu l'iswi eze ndu Asiriya yẹle ikpoto ndu ono, whẹ l'iya lị, nkele onye nọ l'ẹka iya nke anyi bẹ kakwa onye ọwhu nọ l'ẹka iya nkewhe ẹkuku.

⁸ Iwhe o nweru bẹ bụ madzụ mmaanụ, ọle anyịbedua nweru Onye-Nwe-Ọha, bụ Chileke anyi, onye l'e-yetaru anyi ẹka lwụaru anyi ọgu ono.” Iwhe ono, Hezekáya, bụ eze ndu Juda kfuru mee, meji nmakfuru ndu Juda anmakfuru.

Senakeribu l'ekfulwu Jerúsalẹmu

⁹ Senakeribu, bụ eze ndu Asiriya, mbụ onye ono, chị ndu ojọgu iya bya eyebuta mkpụkpu Lakishi nọnyaa bya ezhia ndu ozhi iya tẹ whẹ jeshia Jerúsalẹmu je ezhia Hezekáya, bụ eze ndu Juda, zhia ndu Juda, bu lẹ Jerúsalẹmu ozhi sụ:

¹⁰ “Ọ waa iwhe Senakeribu, bụ eze ndu Asiriya l'ekfu ndọwa: ?Ọo lẹ gụnu bẹ unu chịru ụkfu kwẹe, meru g'o gude unu nọ-kirishia lẹ Jerúsalẹmu l'ẹka unu whụkwaru-a l'e yebutaru unu eyebuta?

¹¹ ?Unu marụ-a l'ọo eduwhu bẹ Hezekáya l'eduwhu unu, nteke ọ sụru unu lẹ Onye-Nwe-Ọha, bụ Chileke unu l'a-nafụta unu l'ẹka eze ndu Asiriya? Iwhe l'oome bụ t'ẹgu nri mẹe ẹgu mini gbushia unu.

¹² ?Tọ bụdu Hezekáya lanụ-a bẹ wofuru ẹka l'aagwajẹ Chileke agwagwa, bya emebyishia ẹnya-mgbẹja iya, bya asụ ndu Juda whẹle ndu Jerúsalẹmu l'ọo l'atatiwhu ẹnya-mgbẹja lanụ bẹ unu l'a-bajẹru Chileke ẹja, ọ bụru l'ẹka ono bẹ unu l'a-kpọje ụ̀nwù-isẹnsu ọku?

¹³ “?Unu ta amadụ iwhe mu lẹ nna mu whẹ meru ndu alị ọdo? Ọgvu ndu ọha ọdo ono, ?ọ dụ ike nafụta ndu alị ono l'ẹka mu tọo?

¹⁴ A bya lẹ ndu ọha ọdo ono, nna mu whẹ meru, whẹ bụru kpurupyata, ?ndẹe ọgvu ndu ọha ọdo ono ọwhu dụ ike nafụta whẹ l'ẹka mu, l'egoshikwanu lẹ Chileke unu l'a-dụ-a ike nafụta unu l'ẹka mu?

¹⁵ Unu ba ahashị Hezekáya ẹka t'ọ ghọje unu ụgho, dusweshi unu gẹ l'oodusweshi unu ntaa. Unu be ekweshi lẹ nkiya, nkele ọ tọ dụkwa ọgvu ndu ọha ọdo, m'ọ bụ ọgvu ndu alị-eze, dụjeru ike nafụta ndibe iya l'ẹka mu mẹe l'ẹka nna mu whẹ. Ọwhu l'eewhoro lẹ Chileke unu bẹ l'a-nafụta unu l'ẹka mu!”

E gburu Senakeribu

¹⁶ Ndu ozhi Senakeribu ono l'ekfushi njọ dụ whẹ l'ọnu ekpu Onye-Nwe-Ọha, bụ Chileke, ekfulwu onye ozhi Onye-Nwe-Ọha ono, bụ Hezekáya.

¹⁷ Eze Senakeribu dee ẹkwo-ozhi gude kfuru sukusuku nụ Onye-Nwe-Ọha, bụ Chileke nke Ízurẹlu, mbụ kfudeshia ya ẹhu sụ: “Ọo g'ọgvu ndu ọha ọdo l'ẹte adụa ike nafụta ndu nkiya l'ẹka mu bụ gẹ Chileke nke Hezekáya l'ẹte abyaa l'a-dụ ike nafụta ndu nkiya l'ẹka mu.”

¹⁸ Ndu ozhi Senakeribu ono gude okfu-alị ndu Juda ryaarụ iya ndu Jerúsalẹmu ono, nọ l'eli mgbodo mkpụkpu ono aryarya, shi nno mee t'egvu bya whẹ l'ẹhu yẹle t'ẹhu-anmanma gude whẹ, nke ọwhu whẹ l'a-kpata ụzo nata mkpụkpu ono.

¹⁹ Whẹ kfulahaaru Chileke nke Jerúsalẹmu jolajola gẹ woo l'ọ bụ ọgvu ndu alị ọdo, madzụ gude ẹka mee.

²⁰ Eze, bụ Hezekáya mẹe onye nkfuchiru Chileke, bụ Ayizáya nwa Émọzu bya ekfuru nụ Chileke, ryarụ kpua ya l'iswi iwhe ono; ekfukfu whẹ kfuru nụ iya rwua imigwe.

²¹ Onye-Nwe-Ọha zhia ojozhi-imigwe, ọ bya echigbushia iwhe bụ ndu ojọgu, ike dụ l'ọgu, mẹe ndu ishi ndu ojọgu, mẹe ndu ishi ọdo, nọ l'ọdu-ọgu eze ndu Asiriya ono. Eze ndu Asiriya ono gude iwhere lwatashia alị iya. Nteke ọ lwarụ bahụ lẹ nwụlo agwa iya, ụwhodu l'ụnwu iya nwoke gude mma gbugbua ya.

²² Ọo ya bụ, Onye-Nwe-Ọha shi nno dzọfuta Hezekáya yẹle ndu bu lẹ Jerúsalẹmu l'ẹka Senakeribu, bụ eze ndu Asiriya mẹwaro l'ẹka ndu ọdo. Ọ nwụberu whẹ ẹnya ibẹka ibẹbo.

²³ Igweligwe vuta iwhe bya anụ Onye-Nwe-Ọha lẹ Jerúsalẹmu mẹe iwhe l'erekaa ire, whẹ nụru Hezekáya, bụ eze ndu Juda. Wata nteke ono tụgburu bẹ ndu mba gẹ mba ha doberu eze Hezekáya l'ọnodu, ha shii.

Hezekáya l'etse etsetse

²⁴ Ọ bụru nteke ono bẹ ẹhu-ba-dụ-mma guderu Hezekáya, nke ọwhu bụ l'ọ nọwa l'ọnu ọnwu. O kfuru nụ Onye-Nwe-Ọha, ọ za iya, bya emeru iwhe-awhụrulenya nụ iya.

²⁵ Hezekáya tselahaa etsetse haa oome eyeru Onye-Nwe-Ọha lẹ g'o meru yeru yẹbedua. Ọo ya bụ, Onye-Nwe-Ọha bya atukoshi yẹle ndu Juda mẹe ndu Jerúsalẹmu oke ẹhu-eghughu iya.

²⁶ Nzhimanụ etsetse ono lwa Hezekáya yẹle ndu Jerúsalẹmu azụ. Ọo ya bụ, Onye-Nwe-Ọha haa whẹ otukoshi oke ẹhu-eghughu iya nteke ono Hezekáya, bụkwadu eze.

Iwhe Hezekáya nweru

²⁷ Hezekáya bẹ nweru iwhe shii, l'aakwabẹ iya ugvu. O metaru onwiya mkpu l'ọokwakobeje mkpọla-ọcha, mẹe mkpọla-ododo, mẹe ẹwhuru, l'erekaa ire, mẹe mmanụ, l'eshikaa mkpọ, mẹe iwhe l'eegudeje egbobuta onwonye, mẹwaro arya ọdo, vugee oke ọnu aswa.

²⁸ Ọ tụa ụlo ẹka l'oodobeje witi, o butaru, mẹe ẹka l'oodobeje mmẹe, mẹe mmanụ, bya enweru ụwoko ẹka ọga eswi dụ l'iche l'iche l'adọshije mẹe mkpu atụru.

²⁹ Ọ tụshiaru onwiya mkpụkpu; nweru igwe atụru, mẹe eghu, mẹe eswi, nkele Chileke bẹ nụru iya ẹku l'ụzo, parụ ẹka.

³⁰ Ọo Hezekáya bẹ mechiru ẹka mini Gihọnu l'eshije asọfu l'ụzo imeli, bya eshi l'ụzo alị iya bufuaru iya ụzo l'ụzo ẹnyanwu-arịba mkpụkpu Dévidi. Hezekáya bẹ ẹka iya bụ akpụto-l'ọboroto l'iwhe lile o meru.

³¹ O be gẹ ndu ishi, l'achị Bábyilọnu yeru ndu l'abya amarụ gẹ iwhe-awhụrulenya whọ, Onye-Nwe-Ọha meru nụ iya nwụru iya, Chileke haa ya tẹ ya datada iya marụ iwhe dụ iya l'obu.

Anwụhu Hezekáya

³² Iwhe ọdo, megbaberu nteke Hezekáya bụ eze mẹe g'o gude goshi lẹ ya yeru Chileke obu b'e dekotaru l'ọwhulenya onye nkfuchiru, bụ Ayizáya nwa Émọzu mẹe l'ẹkwo ndu eze ndu Juda mẹe nke ndu Ízurẹlu.

³³ Hezekáya bya anwụhu lwakfu nna iya whẹ lẹ maa. E lia ya l'ugvu ẹka ilu ẹpa Dévidi dụ. Ndu Juda l'owhu mẹe ndu Jerúsalẹmu kwabẹ iya ugvu nteke ono ọ nwụhuru. Manáse, bụ nwa iya nwoke bya abụru eze l'ọzori iya.