2 Iwhe e meru l'oge ndu eze 31 - BAYỊBURU Ẹzaa

¹ E megelewho iwhe lile ono, ndu Ízurẹlu l'owhu, bụ ndu nọ l'ẹka ono wulihu bahụ l'ime mkpụkpu ndu Juda, je atụko ẹwhuru, e doberu nsọ, dụ lẹ mkpụkpu ono gwee ryaaryaa, whẹ gbukwoshia itso Ashera, dụ iya nụ, bya enwutsushia ẹka l'aagwajẹ iwhe mẹe iwhe bụ ẹnya-mgbẹja, dụ l'alị Juda l'owhu mẹe ọwhu l'alị Bénjaminu, mẹe alị Ífuremu, mẹe l'alị Manáse; whẹ mee ya nno jeye whẹ lakọta iwhe lile ono l'iyi. E megee, ndu Ízurẹlu latashia mkpụkpu whẹ; onyenọnu lashia ibe iya.

Iwhe a nụru t'e gude baarụ Onye-Nwe-Ọha ẹja

² Hezekáya bya agbaa ndu l'agbajẹ ẹja nụ Chileke mẹe ndu Lívayi l'ọgbo l'ọgbo. O keru ozhi nụ ọgbo nọnu, mbụ ozhi, gbarụ ndu l'agbajẹ ẹja nụ Chileke mẹe ozhi, gbarụ ndu Lívayi. Ozhi whẹ bụ tẹ whẹ gbajẹ ẹja ọkpokota-iwhe-ọku mẹe tẹ whẹ gbajẹ ẹja ẹhu-guu mẹe tẹ whẹ nọduje l'ọnulo Onye-Nwe-Ọha jeje ozhi, mẹe tẹ whẹ keleje Onye-Nwe-Ọha ekele, gụje egvu ajaja nụ iya.

³ Eze bya eshi l'elwu, o nweru hata anụ nụ t'e gude gbaa ẹja ọkpokota-iwhe-ọku l'ụtsu mẹe l'urwẹnyashi, mẹe nke mbọku-ọtuta-ume, mẹe nke ọnwa ọ̀whúú, mẹwaru nke oge ọdo, a tuburu atubu, ẹgube ono, e deru iya l'iwu Onye-Nwe-Ọha.

⁴ Ọ tụa iwu tẹ ndu bu lẹ Jerúsalẹmu woru oke iwhe rwuberu ndu l'agbajẹ ẹja nụ Chileke mẹe ndu Lívayi nụ whẹ, nke ọwhu whẹ l'e-yemi onwowhe l'ome iwhe iwu Onye-Nwe-Ọha kfuru.

⁵ Iwu ono, eze tụru bya agbasaa ẹka lile, nteke ono whọ ndu Ízurẹlu nụlahaa mebyi iwhe mbụ, whẹ metaru l'alị, mbụ witi, mẹe mmẹe ọ̀whúú, mẹe mmaanụ ólivu, mẹe mmanụ-ẹnwu, mẹe iwhe lile, shi l'ẹgu. Whẹ vubatakwawho ụzo-lanụ-l'ụzo-iri, shi l'iwhe lile, whẹ nweru, ọ nyịbe anyịbe.

⁶ Ndu Ízurẹlu mẹe ndu Juda, bukota lẹ mkpụkpu, dụ l'alị ndu Juda wotakwawho ụzo-lanụ-l'ụzo-iri, shi l'eswi whẹ, mẹe l'atụru whẹ, mẹe l'eghu whẹ bya anụ, whẹ nụkwawho ụzo-lanụ-l'ụzo-iri, shi l'iwhe dụ nsọ, e doberu Onye-Nwe-Ọha, bụ Chileke whẹ nsọ; whẹ kụbe iya l'ikpo l'ikpo.

⁷ Iwhe ono bẹ whẹ kụberu l'ikpo l'ikpo wata l'ọnwa nke ẹto iya, ọ bụru l'ọnwa nke ẹsaa ya bẹ whẹ megeru iya.

⁸ Nteke Hezekáya yẹle ndu ishi bya awhụ g'iwhe ono kụru l'ikpo l'ikpo, whẹ jaa Onye-Nwe-Ọha ajaja, bya agọru ọnu-ọma nụ ndibe iya, bụ ndu Ízurẹlu.

⁹ Hezekáya bya ajịde ndu l'agbajẹ ẹja nụ Chileke mẹe ndu Lívayi gẹ l'ee-me ikpo iwhe ono.

¹⁰ Azaríya, bụ onye ishi ndu l'agbajẹ ẹja nụ Chileke ono, mbụ onye ọzo-ụlo Zédọku bya eyee ọnu sụ: “Eshi nteke ono whẹ watarụ anọ evubata iwhe ono l'ụlo Onye-Nwe-Ọha bẹ anyi watarụ oriji ẹwho, ọwhu l'etsuboje etsubo paa ẹka, o noo nkele Onye-Nwe-Ọha bẹ gọwaru ndibe iya ọnu-ọma; ọo ya meru, eze iwhe ha ẹgube-ẹ tsufuta.”

¹¹ Hezekáya bya ekfuaru whẹ tẹ whẹ dozhia mkpu, l'aakwakọbeje iwhe l'ụlo Onye-Nwe-Ọha, whẹ dozhia ya.

¹² Whẹ chịtakota iwhe lile ono, a nụru t'e gude baarụ Onye-Nwe-Ọha ẹja bya awụshi l'ime mkpu ono, bụ iya bụ ụzo-lanụ-l'ụzo-iri whọ mẹe iwhe ono, e doberu nsọ. Whẹ ta apadụ ozhi whẹ ẹka lanụ. Onye e meru onye ishi, l'a-nọ eleta iwhe ono bẹ bụ Konaniya, bụ onye Lívayi. Onye l'etsota iya nụ bụ nwune iya, bụ Shimeyi.

¹³ Eze, bụ Hezekáya mẹe onye ishi ụlo Onye-Nwe-Ọha, bụ Azaríya bya ahọta ndu l'a-nọdu l'ẹka Konaniya yẹle nwune iya, bụ Shimeyi eleta iwhe ono ẹnya. Ndu ọbu, whẹ họtaru bụ: Jehiyẹlu, Azazíya, Nahatu, Asahẹlu, Jeremotu, Jozabadu, Eliyẹlu, Isumakiya, Mahatu mẹe Benaya.

¹⁴ Iwhe a nụru Chileke lẹ g'ọ zụru nkwe l'obu bẹ bụ Kore, bụ nwatibe onye Lívayi, bụ Imuna b'ọ dụ l'ẹka. Kore bụ onye nche ọnuzo ẹnyanwu-awata. Iwhe a nụru Onye-Nwe-Ọha mẹe iwhe kagezhia ọdu nsọ bẹ l'ookeshije g'ọ gbarụ.

¹⁵ Ndu l'eyeru iya ẹka lẹ mkpụkpu ẹka ndu l'agbajẹ ẹja nụ Chileke bu bẹ bụ: Idẹnu, Miniyaminu, Jeshuwa, Shemaya, Amaríya mẹe Shekanaya. Whẹ ta apadụ ozhi whẹ ẹka lanụ. Whẹ yetaru ẹka keshiru ndu l'agbajẹ ẹja nụ Chileke ibe whẹ iwhe gbarụ whẹ nụ. Whẹ keshiru iwhe ono l'ọgbo l'ọgbo. Ọ bụru g'a nụru onye ukfu bụ g'a nụru onye nta.

¹⁶ Ndu ọdo, whẹ keru iwhe gbata bẹ bụ unwoke, gbarụ awha ẹto tụgbushia, bụ ndu e deru ẹwha whẹ l'ẹkwo e deshiru lẹ g'e shi nwụa whẹ, keru gba iwhe bụ ndu l'abahụje l'ụlo Onye-Nwe-Ọha eje ozhi mbọkumboku. Whẹ keru whẹ iya lẹge ozhi, whẹ l'eje dụ, bya ekeeru whẹ iya l'ọgbo l'ọgbo whẹ.

¹⁷ Whẹ bya ekeru gba ndu l'agbajẹ ẹja nụ Chileke, e deru ẹwha whẹ l'ẹnya-uwhu whẹ, ẹgube e shi nwụa whẹ mẹe ndu Lívayi, gbarụ ụkporo awha tụgbua. Whẹ keru whẹ iwhe ono g'ozhi whẹ dụ, keeru whẹ iya l'ọgbo l'ọgbo whẹ.

¹⁸ E deshikotaru ẹwha ụnwegirima whẹ, mẹe unyomu whẹ, mẹe ụnwu whẹ nwoke, mẹe ụnwu whẹ nwanyị lẹ mkpụkpu ono l'owhu l'ẹkwo e deshiru g'e shi nwụa whẹ. Whẹ gbarụ t'e gude ire whẹ ẹka l'odobe onwowhe nsọ.

¹⁹ A bya lẹ ndu l'agbajẹ ẹja nụ Chileke, bụ ẹpa Érọnu, mbụ ndu ono, bu l'ẹgu, nọ-wheru mkpụkpu whẹ mgburumgburu, whẹbedua b'a gụru unwoke lẹ mkpụkpu lẹ mkpụkpu tẹ whẹ keeru unwoke, bụ ẹpa Érọnu ono iwhe nkewhe mẹe ndu e deru ẹwha whẹ l'ẹkwo e deshiru g'e shi nwụa ndu Lívayi.

²⁰ Iwhe ono bẹ bụ iwhe Hezekáya meru l'alị ndu Juda l'owhu. O meru iwhe dụ ree mẹe iwhe kfụru nhamụnha, ọ bụru onye gbarụ t'e gude ire iya ẹka l'ẹka Onye-Nwe-Ọha, bụ Chileke nọ.

²¹ Iwhe lile o yeru ẹka ememe l'ozhi, dụ l'ụlo Chileke mẹe iwhe o meru nta gẹ l'ee-shi t'o mee iwhe iwu kfuru mẹe iwhe a sụru t'e mee, b'ọ tụru onwiya tọgboru Onye-Nwe-Ọha, shi nno mekotagezhia iwhe ono, o gude obu iya l'owhu mekota iya. Ọo ya bụ, iwhe lile bụru iya ojeru ojeru.