2 Iwhe e meru l'oge ndu eze 30 - BAYỊBURU Ẹzaa

Ọkwako nkwakọ ori oge O-je-ghata

¹ Hezekáya bya ezhikota iwhe bụ ndu Ízurẹlu mẹe ndu Juda ozhi, dekwaruwho ẹkwo-ozhi nụ ndu Ífuremu mẹe ndu Manáse tẹ whẹ byakọta l'ụlo Onye-Nwe-Ọha, dụ lẹ Jerúsalẹmu, nke ọwhu whẹ l'e-riru Onye-Nwe-Ọha, bụ Chileke nke Ízurẹlu oge O-je-ghata.

² Eze yẹle ndu ishi iya mẹe edzudzu-ọha ono, nọ lẹ Jerúsalẹmu bya achịa ya idzu sụ l'oge O-je-ghata ono bẹ l'ee-ri l'ọnwa ẹbo.

³ Oge ono bẹ whẹ l'ẹte eridua nteke l'eerije iya, o noo nkele ndu mewaru onwowhe, whẹ dụ nsọ lẹ ndu l'agbajẹ ẹja nụ Chileke tẹke abadụa nwishi, ọdo bụ lẹ ndu Ízurẹlu teke enwehadua ndzuko lẹ Jerúsalẹmu.

⁴ Iwhe ono, whẹ tụfutaru dụ eze yẹle edzudzu-ọha ono l'owhu ree.

⁵ Tọ dụ iya bụ, whẹ kabua l'aa-rya iya aryarya l'alị Ízurẹlu kpaa-whuu; whẹ bya eshi iya aryarya lẹ Byiyesheba rwua lẹ Danu tẹ ndu Ízurẹlu wụru byatashia Jerúsalẹmu bya eriaru Onye-Nwe-Ọha, bụ Chileke nke Ízurẹlu oge O-je-ghata ono. Nkele whẹ ta azafụtabudua l'igwe bya oori oge ono lẹ g'e deru iya l'ẹkwo.

⁶ Eze tụa iwu tẹ ndu ọkpa-ẹgwa jegbakota alị ndu Ízurẹlu mẹe alị ndu Juda. Ndu ọkpa-ẹgwa bya egude ẹkwo-ozhi ono, eze yẹle ndu ishi iya deru jeshia. Iwhe e deru l'ẹkwo-ozhi bẹ sụru agha: “Unubẹ ndu Ízurẹlu, unu lwakfutawhu Onye-Nwe-Ọha azụ; mbụ Chileke nke Ébirihamu mẹe Áyiziku mẹe Ízurẹlu, nke ọwhu l'ọo-ghachiru unu iwhu ọdo, mbụ unubẹ nwa ndu ọwhu wafụru l'ẹka ndu eze ndu Asiriya.

⁷ Unu ba adụkwa g'ọo nna unu whẹ mẹe ụnwunna unu whẹ, bụ ndu ono, l'ẹte agba tẹ Onye-Nwe-Ọha, bụ Chileke nna whẹ gude ire whẹ ẹka, eshi nno Onye-Nwe-Ọha mee whẹ, whẹ bụru kpukpuru-swoo ẹgube unu l'awhụnu iya-a.

⁸ Unu ba abụkwa kpọkponyi lẹ gẹ nna unu whẹ shi bụru. Iwhe unu l'e-me bụ t'unu tụa onwunu tọgboru Onye-Nwe-Ọha, unu abya l'ụlo iya ono, dụ nsọ, mbụ ụlo ono, o mewaru t'ọ dụ nsọ jeye lẹ tututu-mịmimi. Unu bajẹru Onye-Nwe-Ọha, bụ Chileke unu ẹja, nke ọwhu ọta-chịchichi ẹhu-eghughu iya l'a-lụfu unu l'ẹhu.

⁹ Ọ -bụru l'unu lwakfutaru Onye-Nwe-Ọha, bẹ ndu ono kpụru ụnwunna unu whẹ mẹe ụnwegirima unu whẹ lẹ ndzụ l'a-whụru whẹ imiko, haa whẹ, whẹ alwawhu azụ l'alị-a. Nkele Onye-Nwe-Ọha, bụ Chileke unu bẹ bụ onye l'emeje eze-iwhe-ọma, bụru onye l'awhụje imiko. Ọ tọ byadụ l'e-wofu iwhu ewofu l'ẹhu unu m'ọ bụruwho l'unu lwakfutaru iya.”

¹⁰ Ọo ya bụ, ndu ọkpa-ẹgwa ono tụko mkpụkpu lẹ mkpụkpu jegbakota l'alị ndu Ífuremu mẹe nke ndu Manáse jasụ l'alị ndu Zébulọnu. Ọ bụleru-a ọchi bẹ l'aachị whẹ aja whẹ ewenu.

¹¹ Ọle o nweleru-a ndu harụ shi l'ikfu Asha, mẹe ikfu Manáse, mẹe ikfu Zébulọnu, bụ ndu kweru wozeta onwowhe alị byatashia Jerúsalẹmu.

¹² O nokwawho g'ẹka Onye-Nwe-Ọha dụ l'ẹhu ndu Juda, o mee t'obu bụru whẹ nnanụ, nke ọwhu whẹ l'e-me iwhe Onye-Nwe-Ọha kfuru, ẹgube eze yẹle ndu ishi iya sụru whẹ tẹ whẹ mee.

Eeri oge O-je-ghata ono

¹³ O noo ya, ikpoto madzụ wụru bya akpakodzua lẹ Jerúsalẹmu tẹ whẹ ria oge ono, l'aatajẹ buredi, l'ete eyee iwhe l'ekoje buredi l'ọnwa ẹbo. Edzudzu-ọha ono paa mebyi ẹka.

¹⁴ Whẹ tụko ẹnya-mgbẹja nọkota lẹ Jerúsalẹmu wofukota. Whẹ vuta ẹnya ẹka ono, l'aakpọje ụ̀nwù isẹnsu ọku je azụbe lẹ nsụda Kidirọnu.

¹⁵ O rwua l'abalị iri l'ẹno l'ọnwa ẹbo ono, whẹ gbua nwatụru O-je-ghata ono. Iwhere gudeshia ndu ono, l'agbajẹ ẹja nụ Chileke mẹe ndu Lívayi ono, l'ẹteke emee onwowhe tẹ whẹ dụ nsọ; whẹ kwee je emee onwowhe tẹ whẹ dụ nsọ, gude anụ, l'ee-gude gbaa ẹja ọkpokota-iwhe-ọku byatashia l'ụlo Onye-Nwe-Ọha.

¹⁶ Whẹ je anọdukota l'ọnodu, whẹ l'anọduje, ẹgube ono, o kfuru iya, mbụ iwu Mósisu, bụ nwoke nke Chileke. Ndu l'agbajẹ ẹja nụ Chileke ono whee mmee ono, whẹ natarụ l'ẹka ndu Lívayi.

¹⁷ Igweligwe, bụ ndu nọ l'igwe-ọha ono bẹ l'ẹteke emedua onwowhe tẹ whẹ nsọ; ọ bụru iya meru iwhe ọ bụ ndu Lívayi bẹ gburu ndu ono, mmerwu dụ l'ẹhu ono nwatụru O-je-ghata nkewhe, nke ọwhu whẹ l'e-me iya t'ọ dụru Onye-Nwe-Ọha nsọ.

¹⁸ Ọka lẹ ndu shi l'ikfu Ífuremu, mẹe ndu ikfu Manáse, mẹe ndu ikfu Ísaka, mẹe ndu ikfu Zébulọnu bẹ l'ẹteke atụrwudua atụrwu, whẹ rikwa nụ oge O-je-ghata ono, ọle eriri, whẹ riru iya ta abụkwa lẹ g'ọ gbarụ. Iwhe meru nụ bẹ bụ lẹ Hezekáya kfuru nụ Onye-Nwe-Ọha l'iswi ẹhu whẹ sụ: “Tẹ Onye-Nwe-Ọha, bụ oome ree gụnuaru iwhe bụ

¹⁹ onye zhiberu obu iya achọ Onye-Nwe-Ọha, bụ Chileke nke nna iya whẹ nvụ, t'a gụfuro l'onye ọbu teke emedua onwiya tẹ ya nsọ l'ụzo ọwhu iwu ụlo-nsọ kfuru.”

²⁰ Ọo ya bụ, Onye-Nwe-Ọha nụa ekfukfu ono, Hezekáya kfuru nụ iya, t'o kwe t'ọ dụ iwhe l'e-me ndu ono.

²¹ Ndu Ízurẹlu, bụ ndu ọwhu nọ lẹ Jerúsalẹmu gude ẹhu-ụtso ria oge ono, l'aatajẹ buredi, l'ete eyee iwhe l'ekoje buredi abalị ẹsaa. Ọwhube ndu Lívayi mẹe ndu l'agbajẹ ẹja nụ Chileke l'anọje azụru Onye-Nwe-Ọha egvu mbọkumboku, whẹ l'egudeje ngwa-egvu mẹe ike whẹ agụ egvu ono.

²² Hezekáya kfuru okfu mgbamume nụ ndu Lívayi ono, goshiru l'o doru whẹ ẹnya, mbụ ozhi, whẹ l'ejeru Onye-Nwe-Ọha. Abalị ẹsaa ono bẹ whẹ rikotaru nri, e shiru l'oge ono, gbaa ẹja ẹhu-guu, bya ekele Onye-Nwe-Ọha, bụ Chileke nke nna whẹ ekele.

²³ Edzudzu-ọha ono l'owhu bya ekweta lẹ whẹ l'e-rifua oge ono abalị ẹsaa ọdo. Ọo ya bụ, whẹ gude ẹhu-ụtso ria oge ono abalị ẹsaa ọdo.

²⁴ Hezekáya, bụ eze ndu Juda bya anụ edzudzu-ọha ono ụnu oke-eswi ugbo labọ l'ụkporo iri mẹe ụnu atụru ugbo iri l'ẹsaa l'ụkporo iri. Ndu ishi nụ edzudzu-ọha ono ụnu oke-eswi ugbo labọ l'ụkporo iri mẹe ụnu atụru ugbo ụkporo l'ise tẹ whẹ gbua gude ria oge ono. Igweligwe lẹ ndu l'agbajẹ ẹja nụ Chileke bya emee onwowhe, whẹ dụ nsọ.

²⁵ Iwhe bụ edzudzu-ọha ndu Juda l'owhu tekota ẹswa, mẹe ndu l'agbajẹ ẹja nụ Chileke, mẹe ndu Lívayi, mẹe ndu shi lẹ Ízurẹlu bya ndzuko ono, mẹkwawho ndu mbyambya, shi l'alị Ízurẹlu bya, mẹe ndu mbyambya, bu l'alị ndu Juda.

²⁶ Ẹhu-ụtso tụko Jerúsalẹmu chia kpụukpuu, nkele wata l'oge nke Sólomọnu nwa Dévidi, bụ eze ndu Ízurẹlu bẹ l'ọotoko dụbudua iwhe dụ nno lẹ Jerúsalẹmu.

²⁷ Tọ dụ iya bụ, ndu ono, l'agbajẹ ẹja nụ Chileke, mẹe ndu Lívayi wulihu gọru ọnu-ọma nụ ndu ono, Chileke nụa olu whẹ; ekfukfu, whẹ l'ekfu anụ Chileke rwua imigwe, bụ ẹka ono, dụ nsọ, o bu ebubu.