2 Iwhe e meru l'oge ndu eze 3 - BAYỊBURU Ẹzaa

Sólomọnu l'atụ eze-ụlo Chileke ono

¹ Tọ dụ iya bụ, Sólomọnu wata ọtu ụlo Onye-Nwe-Ọha ono lẹ Jerúsalẹmu l'ugvu Moriya, bụ ẹka ono, Onye-Nwe-Ọha byakfutajeru nna iya, bụ Dévidi. Mbụ l'ẹka Dévidi tụru ẹka t'a tụa ya l'ọma ẹka Ọnanu onye Jebusu l'eechije balị.

² Ọ watarụ ọtu ụlo ono l'abalị labọ l'ọnwa ẹbo l'awha kwe iya awha ẹno, ọ watarụ ọbu eze.

³ Ọ waa bụ iwhe-atụ̀tù, Sólomọnu tụ̀ru nụ t'e gude tụa ụlo Chileke ono; ogologo iya b'ọ tụru ọ dụ nha-ọkpa ụkporo ẹno l'iri, uswe iya dụ nha-ọkpa ụkporo l'iri. Iwhe o gude tụa ya bụ ọ-gbarụ-lẹ-mbụ iwhe e shi egudeje atụ ogologo iwhe.

⁴ Nwụlo, a tụru, ọ gbakfuru l'ọnu eze-ụlo ono bẹ dụ ntụ-ọkpa ụkporo l'ogologo. Ogologo iya bẹ yẹle uswe ụlo ono l'onwiya ha ẹnya nhamụnha. Eli nwụlo ono dụ nha-ọkpa ụkporo ugbo ishii. O kwekota ọkpobe mkpọla-ododo l'ime iya.

⁵ Whorokoto ụlo ono b'ọ gbakọtaru oshi sayịpuresu agbagba, kwekota iya ọkpobe mkpọla-ododo, bya eseshia ya nkfụ mẹe gwọgirigwo l'eli.

⁶ O gude ẹwhuru, vu oke ọnu aswa chọo ụlo ono nma. Mkpọla-ododo, o gude mee ụlo ono bẹ bụ mkpọla-ododo, shi l'alị Pavayimu.

⁷ O kwekotaru mkpọla-ododo l'ụlo ono l'owhu. O kweru iya lẹ agbụgaragbu oshi, e gude wụ-chia eli ụlo ono awụ-chi, kwee ya l'oshi mgbo ụlo ono, mẹe lẹ mgbodo ụlo ono, mẹe lẹ mgbo iya bya apyịshia cherubu lẹ mgbodo ụlo ono.

⁸ Ọ bya atụa mkpu Ẹka-kakọta-ọdu-nsọ. Ogologo iya b'ọ tụru yẹle uswe ụlo ono l'onwiya bụru iwhe lanụ. Ọ tụru ogologo iya ọ dụ nha-ọkpa ụkporo l'iri, uswe iya dụ nha-ọkpa ụkporo l'iri. O kwekota iya mkpọla-ododo, ẹrwa ya dụ ụnu talẹntu ugbo labọ l'ụkporo iri.

⁹ Aga mkpọla-ododo, e gude mee ụlo ono bẹ ẹrwa iya dụ ụkporo shẹkelu ugbo labọ lẹ shẹkelu iri. O kwekota mkpọla-ododo l'ụlo nke eli iya.

¹⁰ Mkpu Ẹka-kakọta-ọdu-nsọ b'o meru cherubu labọ dobe. Iwhe o gude mee ya bụ gbamụgbamu, kwekota iya mkpọla-ododo.

¹¹ Akwẹka cherubu ono whẹ labọ bẹ dụkota nji-ẹka ụkporo. Akwẹka nnanụ bẹ dụ nji-ẹka ise l'ogologo je etsukfuru lẹ mgbodo ụlo ono, nnanụ dụ nji-ẹka ise l'ogologo je etsukfuru l'akwẹka cherubu ọwhu.

¹² Akwẹka cherubu ọwhu dụ nji-ẹka ise l'ogologo je etsukfuru lẹ mgbodo ụlo ono, nnanụ dụ nji-ẹka ise l'ogologo je etsukfuru lẹ akwẹka nnanụ ọwhu.

¹³ Cherubu ono whẹ labọ bẹ tụsaru akwẹka atụsa, ọ dụkota nji-ẹka ụkporo. Whẹ kfụru mkpomoro chee iwhu l'ụzo ọnu mkpu ono, kakọta ọdu nsọ.

¹⁴ O gude oghu, dụ urwukpu-urwukpu, mẹe oghu ododo, mẹe oghu uswe-uswe, mẹe ọkpobe ẹkwa ọcha kwee ẹkwa-mgbochi, sekashia cherubu l'eli iya.

Itso, e meru l'ope

¹⁵ L'ọnu ụlo ono b'o gvuberu itso labọ, dụ-gee nha-ọkpa ụkporo labọ l'iri l'ẹbo l'eli, bya emeta ishi itso, dụ nha-ọkpa ẹsaa lẹ mkpirikpi tukobegee l'eli iya l'iche l'iche.

¹⁶ Ọ kparụ iwhe dụ g'ọo gwọgirigwo gangashịa agangashị l'eli itso ono, bya akpụa iwhe dụ g'ọo akpụru itorokuma, dụ ụkporo ise swọbe-gee lẹ gwọgirigwo ono.

¹⁷ Ọ bya egvube itso ono whẹ labọ l'atatiwhu eze-ụlo ono. Nnanụ b'o gvuberu l'ụzo ọhuda ụlo ono, gvube ọwhu l'ụzo isheli ụlo ono. O noo, o gvuberu l'ụzo ọhuda ụlo ono b'o kuru Jakinu, kua ọwhu, o gvuberu l'ụzo isheli ụlo ono Bóazu.