2 Iwhe e meru l'oge ndu eze 27 - BAYỊBURU Ẹzaa

Nteke Jótamu bụ eze ndu Juda

¹ Jótamu bẹ gbarụ ụkporo awha l'awha ise nteke ọ watarụ ọbu eze. Iwhe ọ chịru bụ awha iri l'ishii lẹ Jerúsalẹmu. Ẹwha ne iya bụ Jerusha nwada Zédọku.

² Jótamu bẹ meru iwhe kfụru nhamụnha l'ẹnya Onye-Nwe-Ọha, ẹgube ono, nna iya Uzáya meru. Ọle ọ tọo bahụdu l'eze-ụlo Onye-Nwe-Ọha. Ndu Juda l'arwụle-ẹ ụrwu-alị, whẹ l'arwụ.

³ Ọo yẹbedua bẹ tụru Ọnuzo Imeli ye l'ụlo Onye-Nwe-Ọha. O noo g'ọ rwụru ọrwu shii lẹ mgbodo ugvu Ofẹlu.

⁴ O nokwawho g'ọ tụshiru mkpụkpu l'ugvu ugvu alị ndu Juda, ọ tụshia agbarara ẹka l'eedomije onwonye, bya atụshia ụlo-eli l'ọswa alị ono.

⁵ Jótamu bya alwụshi eze ndu Amọnu ọgu lwụ-gbua ya. L'awha ono bẹ ndu Amọnu nụru iya mkpọla-ọcha, ẹrwa iya dụ ụkporo talẹntu ugbo ise mẹe ogbongu witi, dụ ụkporo ụnu l'ụnu ise, mẹe ogbongu balị, dụ ụkporo ụnu l'ụnu ise. Whẹ nụkwa iya whọ ọwhu ha ẹgube ono l'awha nke ẹbo iya mẹe l'awha nke ẹto iya.

⁶ Ọo ya bụ, Jótamu kpalahaa ike, o noo nkele o tsoleruwho ụzo Onye-Nwe-Ọha, bụ Chileke iya kwasẹru.

⁷ Iwhe ọdo, Jótamu megbaberu l'oge nke iya, mẹe ọgu lile, ọ lwụkotaru, mẹe iwhe ọdo, o megbaberu b'e dekotaru l'ẹkwo ndu eze ndu Ízurẹlu mẹe nke ndu Juda.

⁸ Ọ gbarụ ụkporo awha l'awha ise nteke ọ watarụ ọbu eze ono. Iwhe ọ chịru bụ awha iri l'ishii lẹ Jerúsalẹmu.

⁹ Jótamu nwụhu lakfu nna iya whẹ lẹ maa, whẹ lia ya lẹ mkpụkpu Dévidi. Éhazu, bụ nwa iya nwoke bya abụru eze l'ọzori iya.