2 Iwhe e meru l'oge ndu eze 26 - BAYỊBURU Ẹzaa

Nteke Uzáya bụ eze ndu Juda

¹ Ndu Juda l'owhu duta Uzáya, bụ onye gbarụ awha iri l'ishii mee ya eze l'ọzori nna iya, bụ Amazíya.

² Ọo ya bẹ tụkwaru mkpụkpu Elatu woru iya nụ-whu ndu Juda azụ gẹ Amazíya lakfugeeru nna iya whẹ lẹ maa.

³ Uzáya bẹ gbarụ awha iri l'ishii nteke ọ watarụ ọbu eze. Iwhe ọ chịru bụ ụkporo awha ugbo labọ l'awha iri l'ẹbo lẹ Jerúsalẹmu. Ẹwha ne iya bụ Jekoliya. Ẹka ne iya shi bụ Jerúsalẹmu.

⁴ Uzáya bẹ meru iwhe kfụru nhamụnha l'ẹnya Onye-Nwe-Ọha, ẹgube ono, nna iya bụ Amazíya meru.

⁵ Ọ chọru ụzo Chileke nteke Zakaráya nọkwadu ndzụ, ọ bụru Zakaráya ono bẹ kpọ-zhiru iya ụzo ọotsu egvu Chileke. Jeye g'ọ nọ-beru bụru onye l'achọ ụzo Onye-Nwe-Ọha, bẹ Chileke meru t'iwhe gbajẹru iya l'ụwha.

⁶ Uzáya bya eje alwụshi ndu Fílistiya ọgu, je enwutsushia mgbodo mkpụkpu Gatu, mẹe mgbodo mkpụkpu Jabune, mẹe mgbodo mkpụkpu Ashịdodu. Ọ bya atụshia mkpụkpu l'alị, dụ lẹ Ashịdodu mẹwaru l'ẹka ọdo, dụ l'alị ndu Fílistiya

⁷ Chileke bya eyeru iya ẹka lwụshi ndu Fílistiya ọgu mẹe ndu Arabu ono, bu l'alị Guru Bálu; o yeru iya ẹka lwụshi ndu Meyunimu ọgu.

⁸ Ndu Amọnu wata anọ atụ ụtu anụ Uzáya. Ude iya ngakọta je akpaa l'oge alị ndu Íjiputu, nkele ọ bya abụru onye l'akpa ike shii.

⁹ Uzáya bẹ tụshikwaruwho ụlo-eli ụlo-eli lẹ Jerúsalẹmu lẹ Ọnuzo Mgburẹku, mẹe lẹ Ọnuzo Nsụda, mẹe lẹ nggoji nggoji mgbodo; ọ tụa ya o shihukota ike.

¹⁰ Ọ tụshia ụlo-eli l'echi-ẹgu, gvushia iduma mini, ha l'igwe nkele o nweru élwù l'urwuturwu l'alị ọkpa-ugvu, dụ l'ụzo ẹnyanwu-arịba mẹe lẹ whorokoto alị. O nweru ndu l'akọru iya okfu, mẹe ndu l'eletaru iya mgbabu vayịnu iya ẹnya l'ugvu ugvu, mẹe l'alị, l'emehuje iwhe, nkele o yenukaru ẹnya l'omebe iwhe l'alị.

¹¹ Uzáya nweru ndu ojọgu, e zhiru ọgu ọkpobe ezhizhi. Whẹ l'anọduje l'ọgbo l'ọgbo eje ọgu, ẹgube a gụru whẹ tẹ whẹ nọduje. Ndu gụru whẹ nụ bụ Jeyẹlu, bụ o-de-ẹkwo yẹle Maseya, bụ onye ishi-ozhi. Onye tuzhiru whẹ ẹka gẹ whẹ l'a-gụ iya bụ onye lanụ lẹ ndu ishi ojọgu eze, bụ Hananiya.

¹² Iwhe ndu ishi ndu ẹnya-uwhu, l'achị ndu ojọgu ono dụkota bẹ bụ ụnu ugbo ishii l'ụkporo iri.

¹³ Ndu ojọgu, whẹ l'achị bẹ dụkota ụnu unwoke ugbo ụnu l'ụkporo ugbo iri l'ẹsato l'ụnu ẹsato l'ụkporo ugbo iri l'ise. Whẹ bụ ndu gude ọkpehu alwụ ọgu alwụ-chiru eze l'ẹka ndu ọhogu iya nọ.

¹⁴ Uzáya bya anụkota ndu ojọgu ono iwhe l'eegudeje egbobuta onwonye, bya anụ whẹ arwa, mẹe okpu-igwe, mẹe uwe-igwe, mẹe akfụ, mẹe ẹwhuru l'eegudeje agba mgbẹka.

¹⁵ Lẹ Jerúsalẹmu b'o meshiru injinu, l'agba akfụ atụ ẹwhuru, ha shii dobegee l'eli ụlo-eli mẹe l'eli nggoji nggoji mgbodo mkpụkpu. Ndu meru iya nụ bụ ndu l'eme nka. Ọtu ọnu Uzáya ngakọta ẹka lile, nkele Chileke yeru iya ẹka l'ụzo, dụ biribiri jeye ọ bụru onye l'akpa ike.

Njọkirehu l'eme Uzáya

¹⁶ Ọle Uzáya watalẹruwho ọkpa ike ono, o kulahaa onwiya eku; ekuku ono duba iya l'ọla l'iyi. O to kwedu tẹ Onye-Nwe-Ọha, bụ Chileke iya gude ire iya ẹka; ọ bahụ l'eze-ụlo Onye-Nwe-Ọha tẹ ya kpọo isẹnsu ọku l'ẹnya ẹka l'aakpọje ụ̀nwù-isẹnsu ọku.

¹⁷ Onye l'agbajẹ ẹja nụ Chileke, bụ Azaríya yẹle ndu ọdo, l'agbarụ Onye-Nwe-Ọha ẹja, dụ ụkporo madzụ ugbo ẹno, mbụ ndu obu karụ akaka bya etsoru Uzáya bahụ l'eze-ụlo ono.

¹⁸ Whẹ kwachia ya ụzo bya asụ iya: “Uzáya, ọ tọ bụdu ghu b'ọ gbarụ t'ị kpọoru Onye-Nwe-Ọha ụ̀nwù-isẹnsu ọku. Ndu ọ gbarụ bẹ bụ ndu l'agbajẹ ẹja nụ Chileke, bụ iya bụ ẹpa Érọnu, mbụ ndu ono, e doberu nsọ tẹ whẹ kpọje ụ̀nwù-isẹnsu ọku. Shi l'ẹka dụ nsọ lụfu, nkele i mewaru iwhe l'adụa ree, shi nno nafụ onwoghu ugvu, Chileke gẹge akwabẹ ghu.”

¹⁹ Iwe bya Uzáya l'ẹhu. Nteke ono b'o gudewaa iwhe l'eegudeje akpọ ụ̀nwù-isẹnsu ọku l'ẹka tẹ ya kpọo isẹnsu ono ọku. Nteke iwe byarụ iya l'ẹhu l'ẹka ndu ono l'agbajẹ ẹja nụ Chileke ono nọ, njọkirehu bya avọ iya l'egedege iwhu, l'ẹnya ndu ono l'agbajẹ ẹja nụ Chileke ono, mbụ lẹ mgboro ẹka ono, l'aakpọje ụ̀nwù-isẹnsu ọku l'ime ụlo Onye-Nwe-Ọha ono.

²⁰ Azaríya, bụ onye ishi ndu l'agbajẹ ẹja nụ Chileke ono mẹe ndu ono, l'agbajẹ ẹja nụ Chileke ono gẹ whẹ ha bya elee ya ẹnya, whẹ whụ gẹ njọkirehu tụkoru iya egedege iwhu nata, whẹ mekebe ẹgwegwa nwufu iya l'ẹka ono. Yẹbedua l'onwiya mekebekwawho ẹgwa lụfu, nkele Onye-Nwe-Ọha bẹ kẹwaru iya ejo ọrwu l'ẹhu.

²¹ Njọkirehu ono mezhiawho eze Uzáya jeye mbọku ọ nwụhuru. O vuru njọkirehu ono buru l'ụlo iche, e bufu iya ebufu t'ọ bọ batajẹhe l'eze-ụlo Onye-Nwe-Ọha. Ọ bụru Jótamu, bụ nwa iya nwoke bẹ bụ onye ishi ibe eze, bụru onye l'achị ndu alị ono.

²² Iwhe ọdo, Uzáya megbaberu, wata l'ishi jeye lẹ ngvụcha bẹ bụ onye nkfuchiru Chileke, bụ Ayizáya nwa Émọzu deshiru iya.

²³ Uzáya nwụhu lakfu nna iya whẹ lẹ maa, e lia ya l'ẹka e liru nna iya whẹ, mbụ l'ẹgu, dụkube ẹka l'eelije ndu eze, nkele whẹ sụru l'ọ bụ onye njọkirehu. Jótamu, bụ nwa iya bya abụru eze l'ọzori iya.