2 Iwhe e meru l'oge ndu eze 25 - BAYỊBURU Ẹzaa

Nteke Amazíya bụ eze ndu Juda

¹ Amazíya bẹ gbarụ ụkporo awha l'awha ise nteke ọ watarụ ọbu eze. Iwhe ọ chịru bụ ụkporo awha l'awha tete lẹ Jerúsalẹmu. Ẹwha ne iya bụ Jehowadanu. Ẹka ne iya shi bụ Jerúsalẹmu.

² Amazíya bẹ meru iwhe kfụru nhamụnha l'ẹnya Onye-Nwe-Ọha. Ọle o too gudegedu obu iya mee ya.

³ Ọchichi bebelewho alwa Amazíya l'ẹka ọkpobe alwalwa, o gbua ndu ozhi iya ono, bụ whẹ gburu nna iya nteke ọ bụ eze.

⁴ Ọle o to gbudu ụnwegirima ndu ono. O meru iwhe ono, e deru l'iwu, mbụ l'ẹkwo Mósisu, l'ẹka ono, Onye-Nwe-Ọha sụru woo agha: “Ndu nwụru ụnwu bẹ l'eete egbudu l'ụgwo iwhe ụnwu whẹ metaru, t'e gbu ụnwu l'ụgwo iwhe ndu nwụru whẹ nụ metaru, onyenọnu l'a-la l'iwhe-dụ-ẹji, o metaru l'ẹka iya.”

⁵ Amazíya bya ekua unwoke ndu alị Juda, doo whẹ l'ẹnya-uwhu l'ẹnya-uwhu ibe nna whẹ l'ikfu Juda mẹe l'ikfu Bénjaminu, tẹ whẹ nọdu l'ẹka ndu ishi, l'achị ụnu ndu ojọgu ugbo labọ l'ụkporo iri mẹe l'ẹka ndu ishi, l'achị ndu ojọgu ụkporo ugbo ise. Ndu ọ gụtaru bẹ bụ ndu gbarụ ụkporo awha tụgbushia, ọ bya achọfuta l'iwhe whẹ dụkota bẹ bụ ụnu unwoke ugbo ụnu l'ụkporo iri l'ẹsaa l'unwoke iri. Ndu ono bụkota ndu a họru ahọho, mbụ ndu dzuru ooje ọgu, bụru ndu l'a-dụ ike parụ arwa mẹe iwhe l'eegudeje egbobuta onwonye.

⁶ O nokwawho g'ọ kfụru mkpọla-ọcha, ẹrwa iya dụ ụkporo talẹntu ugbo ise gude buta ndu ojọgu ndu Ízurẹlu, dụ ụkporo ụnu unwoke ugbo iri l'ẹbo l'ụnu iri, bụ ndu ike dụ l'ọgu.

⁷ Ọle onye nke Chileke bẹ byakfutaru iya bya asụ iya: “Gụbe eze, tẹ gụ lẹ ndu ojọgu ndu Ízurẹlu ba alịkwa jee ọgu ono, o noo nkele Onye-Nwe-Ọha te eswikwaru ndu Ízurẹlu, mbụ l'o to swiduru ndu Ífuremu.

⁸ Nteke bụ l'i megeeru chịru whẹ jee l'iwhu ọgu ono, bẹ Chileke l'e-chitsukwa ghu l'iwhu ndu ọhogu ghu, o beru i mee ọkpehu ome agha. O noo nkele onye l'a-dụ ike yeru madzụ ẹka bụ Chileke. Ọ bụkwaru iya whọ l'a-dụ ike mee t'a lwụ-gbua madzụ l'ọgu.”

⁹ Amazíya sụ onye nke Chileke ono: “?Anyi l'e-mekwanu gụnu lẹ mkpọla-ọcha ono, ẹrwa iya dụ ụkporo talẹntu ugbo ise whọ, mu kfụru ndu ojọgu ndu Ízurẹlu?” Onye nke Chileke ono sụ iya: “Onye-Nwe-Ọha bẹ sụru gẹ l'ọo-nụ ghu ọwhu ka ono nkajishi.”

¹⁰ Tọ dụ iya bụ, Amazíya chịfuta ndu ojọgu ono, shi l'alị Ífuremu byakfuta iya ono sụ whẹ tẹ whẹ lashia ibe whẹ. Ẹhu ghua whẹ eghu shii l'ẹka ndu Juda nọ, whẹ vọru kfurukfuru lashia.

¹¹ Obu kalẹ-ẹ Amazíya aka, ọ chilia ndu nkiya, ọ bụru whẹ oje Nsụda Únú. Whẹ rwua ẹka ono gbua ndu Siye, ụnu unwoke ugbo ụkporo l'ise.

¹² Unwoke ndu Juda ono kpụta ndu ọdo, dụ ụnu unwoke ugbo ụkporo l'ise lẹ ndzụ, chịta whẹ je atukobe l'elikoro eze-ẹwhuru ọbu, shi l'ẹka ono nwua whẹ daa-whuu, whẹ bya adaa gwee onwowhe aryaka-eryune.

¹³ Ọle ndu ojọgu ndu Ízurẹlu ono, Amazíya chiwhuru azụ tẹ whẹ l'iya ba alịshi jee ọgu ono bya awụba lẹ mkpụkpu ndu Juda, whẹ shi lẹ Samériya lwụa whẹ jeye lẹ Betu-horonu, gbua ụnu madzụ ugbo ẹsaa l'ụkporo iri lẹ ndu Juda ono, bya egwoo arya, ha shii.

¹⁴ Gẹ Amazíya shi ogbushi ndu Edọmu alwa b'ọ chị ọgvu ndu alị Siye. O dobe ọgvu ono ọ bụru nkiya, bya agwalahaa ya, balahaarụ iya ẹja, l'akpọru iya ụ̀nwù-isẹnsu ọku.

¹⁵ Ọo ya bụ, ẹhu wata oghu Onye-Nwe-Ọha eghu l'ẹka Amazíya nọ, o zhia onye nkfuchiru iya t'o jekfu iya. Onye nkfuchiru ono je asụ iya: “?Ọo gụnu meru ọ bụru ọgvu, l'adụa ike nafụta ndu nwe yẹbe ọgvu ono l'ẹka ghu b'ị gwalahaarụ?”

¹⁶ Onye nkfuchiru ono kpụkwaduru-a okfu ono l'ọnu ekfu, eze bụ Amazíya gboburu iya ye iya l'ọnu sụ: “?Anyi sụru ghu t'ị bụru onye l'agbazhiru eze idzu? T'ọ hakwarụ ghu nno l'ọnu! Ọ dụa ishi ghu alaa ya.” Ọo ya bụ, onye nkfuchiru ono melekwawho ọnu shọngu, ọle ọ sụkwanuru: “Mu marụ lẹ Chileke bẹ kpebuwaru iya lẹ ya l'a-la ghu l'iyi, eshi ọwhu i meru iwhe dụ nno, i swọ-chile-e akụ lẹ nchị l'idzu, mu l'achị-koshi ghu.”

Ọgu l'adarụ ndu Juda whẹle ndu Ízurẹlu

¹⁷ Tọ dụ iya bụ, Amazíya, bụ eze ndu Juda yẹle ndu l'achịru iya idzu bya agbaa idzu. O zhia ozhi t'e je zhia eze Jowashi nke Ízurẹlu je asụ iya: “Bya t'anyi lẹ ghu kpọgbaada.” Jowashi bẹ bụ nwa Jehowahazu, Jehowahazu bụru nwa Jehu.

¹⁸ Jowashi, bụ eze ndu Ízurẹlu bya ezhiwhu Amazíya, bụ eze ndu Juda ozhi azụ sụ: “Oshi uke, dụ l'ugvu ugvu Libanọnu bẹ zhiru oshi sida, dụkwawho l'ugvu ugvu Libanọnu ozhi sụ iya: ‘Kenu nwa mu nwoke ada ghu nwanyị t'ọ bụru nyee ya.’ Ọo ya bụ, anụ-ẹgbudu, bu l'ugvu ugvu Libanọnu ono ghatadẹlewho dzọo oshi uke ono pyaapyaa.

¹⁹ Iwhe l'iikfunu bụ t'a whụdunu g'ị lwụ-gburu ndu Edọmu. Ọ bụru iya meru l'ịinga ụnga. Ọwhu t'ị nọduru onwoghu. Ba achọshi okfu-l'ụka, bụ ọwhu l'e-ri ishi ghu, ria ishi ndu Juda.”

²⁰ Ọle Amazíya ta angadụru iya nchị, nkele ọo Chileke b'o shi l'ẹka tẹ ya woru whẹ ye ndu ọhogu whẹ l'ẹka, o noo nkele whẹ gwarụ agwa ndu Edọmu.

²¹ Ọo ya bụ, Jowashi, bụ eze ndu Ízurẹlu chịta ndu ojọgu iya jeshia, whẹ l'eze ndu Juda, bụ Amazíya kpọgba l'ọgu ono lẹ mkpụkpu Betu-shẹmeshi ọwhu dụ l'alị ndu Juda.

²² Ndu Ízurẹlu lwụ-gbua ndu Juda, onyenọnu lẹ ndu Juda ono gbalaa lashia ibe whẹ.

²³ Jowashi, bụ eze ndu Ízurẹlu gude eze ndu Juda, bụ Amazíya lẹ mkpụkpu Betu-shẹmeshi. Amazíya bụ nwa Jowashi, Jowashi bụru nwa Ehazaya. Jehowashi kpụru iya rwua Jerúsalẹmu, o nwutsushia mgbodo Jerúsalẹmu; o shi iya enwutsu l'ọnuzo ndu Ífuremu rwua l'ọnuzo mgburẹku mkpụkpu. Ẹka o nwutsuru lẹ mgbodo ono bẹ ogologo iya rwuru ụnu nha-ọkpa.

²⁴ Ọ chịtakota mkpọla-ododo, mẹe mkpọla-ọcha, mẹe iwhe bụ arya, ọ whụru l'ụlo Chileke, bụ iya bụ ono dụ l'ẹka Óbẹdu-edọmu. Ọ chịtakwawho iwhe bụ ẹku, dụ l'ụlo eze mẹe ndu atụ-chiru atụ-chi, latashia Samériya.

²⁵ Eze ndu Juda, bụ Amazíya nwa Jowashi bẹ nọru awha iri l'ise g'eze ndu Ízurẹlu, bụ Jehowashi nwụhu-geeru.

²⁶ Iwhe ọdo, Amazíya megbaberu, wata l'ishi jeye lẹ ngvụcha b'e dekotaru l'ẹkwo ndu eze ndu Juda mẹe ndu Ízurẹlu.

²⁷ Eshi nteke Amazíya harụ otso Onye-Nwe-Ọha b'a nọdu lẹ Jerúsalẹmu gbaarụ iya ejo-ikumu, ọ vụa ọkpa iya mini lashia Lakishi. E yefu ndu chọru iya jeshia Lakishi je gbua ya l'ẹka ono.

²⁸ E gude ịnya palata odzu iya, bya elia l'ẹka e liru nna iya whẹ lẹ mkpụkpu ndu Juda.