2 Iwhe e meru l'oge ndu eze 24 - BAYỊBURU Ẹzaa

Nteke Jowashi bụ eze ndu Juda

¹ Jowashi bẹ gbarụ awha ẹsaa nteke ọ watarụ ọbu eze. Iwhe ọ chịru lẹ Jerúsalẹmu bụ ụkporo awha ugbo labọ. Ẹwha ne iya bụ Zibyiya. Ẹka ne iya shi bụ mkpụkpu Byiyesheba.

² Jowashi bẹ meru iwhe kfụru nhamụnha l'ẹnya Onye-Nwe-Ọha jeye gẹ Jehoyada, bụ onye l'agbajẹ ẹja nụ Chileke nọ-beru.

³ Jehoyada bẹ lụru Jowashi ụnwanyi labọ, ọ nwụshia unwoke mẹe ụnwanyi.

⁴ O be nteke ọbu, Jowashi bya achịpyaa ya l'ime obu iya lẹ ya l'e-dobe ụlo Onye-Nwe-Ọha l'ọnodu, gbarụ iya nụ.

⁵ Ọ bya ekua ndu l'agbajẹ ẹja nụ Chileke mẹe ndu Lívayi sụ whẹ: “Unu tụko mkpụkpu, dụkota l'alị ndu Juda jegbakota, naa ndu Ízurẹlu okpoga, l'ee-gude mekwaa ụlo Chileke unu awha l'awha. Unu lọ-vukwaru iya ọku naa ya.” Ọle ndu Lívayi ta alọ-vuduru iya ọku.

⁶ Ọo ya bụ, eze kua Jehoyada, bụ onye ishi ndu l'agbajẹ ẹja nụ Chileke sụ iya: “?Ọo nwụhunuru agha meru g'o gude t'ị sụ ndu Lívayi tẹ whẹ wolata okpoga akịriko ono, shi l'alị ndu Juda mẹe Jerúsalẹmu, mbụ ono, Mósisu, bụ onye ozhi Onye-Nwe-Ọha gbarụ whẹle edzudzu-ọha ndu Ízurẹlu t'e gude mee nke ụlo-ẹkwa ono, e doberu iwu Onye-Nwe-Ọha?”

⁷ O noo l'ụnwu Atalaya, bụ nwanyị ejo-obu ono bẹ wụbatawaru l'ụlo Onye-Nwe-Ọha, gude iwhe e doberu nsọ l'ụlo Onye-Nwe-Ọha ono gwaa Bálu.

⁸ Ọo ya bụ, eze bya asụ t'e meta okpoko dobe l'azụ azụ ọnu ẹka l'eeshije abahụ l'ụlo Onye-Nwe-Ọha.

⁹ A bya aryaa ya aryarya l'alị ndu Juda mẹe lẹ Jerúsalẹmu, t'e wolataru Onye-Nwe-Ọha okpoga akịriko ono, Mósisu, bụ onye ozhi Chileke gbarụ ndu Ízurẹlu l'echi-ẹgu.

¹⁰ Ndu ishi mẹe ndu Juda l'owhu gude ẹhu-ụtso wolata okpoga akịriko ono, bya eche ya l'ime okpoko ono, whẹ mezhie ya whọ nno jeye whẹ wolatakota iya ọ gvụ.

¹¹ L'ọobuje, nteke ndu Lívayi patarụ okpoko ono pajeru ndu ishi-ozhi eze, whẹ bya awhụ l'okpoga bẹ ha iya shii, onye l'ederu eze ẹkwo yẹle onye ozhi onye l'agbajẹ ẹja nụ Chileke abya ewhoo ya olu, pata okpoko ono je edobewhu azụ l'ẹka l'ọoduje. Ọ bụru nno bẹ whẹ l'emeje iya mbọkumboku, shi nno nata okpoga ono nke etsutsu iya.

¹² Eze yẹle Jehoyada l'ewojeru okpoga ono nụ ndu ọrwu ono, l'aarwụ l'ụlo Onye-Nwe-Ọha dụ l'ẹka. Whẹ egude iya buta ndu l'edo ụlo mẹe ndu kapịnta tẹ whẹ mezhia ụlo Onye-Nwe-Ọha ono t'ọ dụ-whu azụ l'ọnodu iya. O nokwawho gẹ whẹ l'egudeje iya buta ndu gude mkpụrumkpu-igwe mẹe ope arwụ ọrwu tẹ whẹ mekwaa ụlo Onye-Nwe-Ọha ono.

¹³ Ndu ono l'arwụ ọrwu ono bẹ nwụberu ẹnya l'ọrwu ono. Whẹ l'emekwa ụlo ono eje l'iwhu l'iwhu. Whẹ bya atụkwa ụlo Chileke ono dobe iya l'ọkpobe ọnodu, ọ dụhawa mbụ dụ, bya emee ya ọ kfụru chịmu.

¹⁴ Whẹ dozhigelewho ụlo ono, whẹ wota uwhudu okpoga ono bya anụ eze yẹle Jehoyada. Ọ bụru iya b'e gude meshia arya, e doberu l'ụlo Onye-Nwe-Ọha ono, mbụ arya, e gude eje ozhi, mẹe arya, e gude eme nke ngwo-ẹja ọkpokota-iwhe-ọku, mẹe efere, e gude eme nke isẹnsu, mẹe arya, e meru lẹ mkpọla-ododo, mẹe ọwhu e meru lẹ mkpọla-ọcha. Whẹ gbalahaa ẹja ọkpokota-iwhe-ọku l'ụlo Onye-Nwe-Ọha ono ntekenteke jeye lẹ gẹ Jehoyada nọ-beru.

Anwụhu Jehoyada

¹⁵ Ọle Jehoyada bẹ karụ nka nọo igweligwe awha tẹhenu ọ nwụhude. Ọ nọru ụkporo awha ugbo ishii l'awha iri tẹhenu ọ nwụhude.

¹⁶ Whẹ lia ya l'ẹka e liru ndu eze lẹ mkpụkpu Dévidi, gude nyata iwhe dụ ree o meru ndu Ízurẹlu, mẹe ọwhu o meru Chileke, mẹe ọwhu o meru l'ụlo Chileke ono.

Jowashi nweru ejo-obu

¹⁷ Gẹ Jehoyada nwụhu-geeru bẹ ndu ishi, l'achị ndu alị Juda byarụ bya ewhuzetaru eze ishi l'alị. Eze ngabẹru whẹ nchị.

¹⁸ Whẹ bya aparụ ụlo Onye-Nwe-Ọha, bụ Chileke nke nna whẹ haa, gwalahaa agwa Ashera mẹe agwa ọdo. Chileke tukoshi ndu Juda mẹe ndu Jerúsalẹmu ẹhu-eghughu iya, nkele ikpe nmarụ whẹ.

¹⁹ Onye-Nwe-Ọha bya ezhigee zhia ndu nkfuchiru iya tẹ whẹ bya akpọ-whuta whẹ azụ l'ẹka ya nọ. Ndu nkfuchiru ono kfua eleke kfua adụma, whẹ bụleru-a etsu arwachi.

²⁰ Tọ dụ iya bụ, Ume Chileke bya Zakaráya nwa Jehoyada, bụ onye l'agbajẹ ẹja nụ Chileke l'ẹhu. O whekoru ndu Juda sụ whẹ: “Ọ waa iwhe Chileke kfuru ndọwa: ?Ọo gụnu meru unu l'emebyi iwhe Chileke tụru l'iwu, shi nno mebyia ọga l'iwhu nkunu? Eshi-ọwhu unu harụ Onye-Nwe-Ọha, bẹ Onye-Nwe-Ọha haakwaru unubẹdua.”

²¹ Whẹ kwee bya agbaarụ iya ejo-ikumu, eze sụ whẹ tẹ whẹ tụ-gbua ya l'ẹwhuru, whẹ tugbua ya l'ọma ogboduwhu ụlo Onye-Nwe-Ọha.

²² Ọ bụru iya bụ l'eze, bụ Jowashi ta anyatadụ ẹguru iwhe-ọma ono, Jehoyada, bụ nna Zakaráya meru iya, o gbua nwa iya nwoke. Zakaráya nwụhude ọ sụ: “Tẹ Onye-Nwe-Ọha whụkwa iwhe unu meru, gwata unu ụgwo iya!”

²³ Awha gbalẹwho, ndu ojọgu ndu Arámu wụ-kfu Jowashi ọgu. Whẹ zeru bata l'alị ndu Juda mẹe lẹ Jerúsalẹmu bya atụko ndu ishi ndu Juda l'owhu lakọta l'iyi. Whẹ vua arya whẹ wolahuru eze whẹ lẹ Damásukọsu.

²⁴ Ndu ojọgu ndu Arámu bẹ bụ-a nwa ndu habe nwahabe bẹ whẹ chị bya ọgu ono, obenu lẹ Onye-Nwe-Ọha bẹ yeru whẹ igweligwe ndu ojọgu ndu alị Juda l'ẹka, o noo nkele whẹ harụ Onye-Nwe-Ọha, bụ Chileke nke nna whẹ. Whẹ shi nno nụa Jowashi kpakụduu.

²⁵ Ndu Arámu ono bẹ kẹru Jowashi ejo ọrwu l'ẹhu tụgbua. Ndu ozhi iya bya agbaarụ iya ejo-ikumu je egbua ya l'iwhe-azẹe ya, l'iswi ọchi nwatibe Jehoyada, bụ onye ono, l'agbajẹ ẹja nụ Chileke ono, o gburu. Ọo ya bụ, Jowashi nwụhu, whẹ lia ya lẹ mkpụkpu Dévidi. Ọle whẹ te elidu iya l'ilu ndu eze.

²⁶ Ndu gbarụ iya ejo-ikumu ono bụ: Zabadu nwa Shimeyatu, bụ nwanyị Amọnu yẹle Jehozabadu nwa Shimiritu, bụ nwanyị Moabu.

²⁷ A bya l'akọ ẹhu ụnwegirima iya, mẹe igweligwe ozhi, Onye-Nwe-Ọha zhigbaberu l'ishi iya, mẹe g'o gude dobe ụlo Chileke l'ọnodu iya b'e dekotaru l'ẹkwo, l'akọwa iwhe e deru l'ẹkwo ndu eze. Amazíya, bụ nwa iya nwoke bya abụru eze l'ọzori iya.