2 Iwhe e meru l'oge ndu eze 23 - BAYỊBURU Ẹzaa

Eekwefuru Atalaya ike

¹ O rwua l'awha nke ẹsaa, obu bya akaa Jehoyada akaka. Ọ gbaa ndzụ; ndu whẹ l'iya gbarụ ndzụ ono bụ ndu ishi, l'achị ụkporo ndu ojọgu ugbo ise, mẹe Azaríya nwa Jerohamu, mẹe Ishimẹlu nwa Jehohananu, mẹe Azaríya nwa Óbẹdu, mẹe Maseya nwa Adaya, mẹe Elishafatu nwa Zikiri.

² Whẹ tụko alị ndu Juda jegbakota, je ekukoo ndu Lívayi, bu lẹ mkpụkpu, dụkota l'alị ndu Juda l'owhu, bya ekua ndu bụ ishi l'ẹnya-uwhu ndu Ízurẹlu. Whẹ dzukota lẹ Jerúsalẹmu.

³ Edzudzu-ọha ono l'owhu whẹle eze bya anọdu l'ụlo Chileke gbaa ndzụ. Jehoyada bya asụ whẹ: “Unu lekwa nwa eze! Ọ kwa iya l'a-nọ achị, ẹgube ono Onye-Nwe-Ọha kfuru l'ishi ụnwu Dévidi.

⁴ Unu lee iwhe unu l'e-me ndọwa: Unubẹ ndu ono, l'agbajẹ ẹja nụ Chileke, mẹe ndu Lívayi ono, bụ ndu l'anọje lẹ nche mbọku-ọtuta-ume, tẹ nkere ẹto l'ime unu cheje ọnuzo nche,

⁵ nkere ẹto ọdo eche ibe eze, nkere ẹto ọdo eche Ọnuzo Ukfu-ụlo. Ndu Juda l'owhu adọshia l'ọma ogboduwhu ụlo Onye-Nwe-Ọha.

⁶ T'ọ bọ dụkwa onye l'eje ọbahu l'ụlo Onye-Nwe-Ọha, gbahakwaa ndu l'agbajẹ ẹja nụ Chileke mẹe ndu Lívayi, l'eje ozhi. Ọo whẹ bụ ndu l'a-bahụ iya, o noo nkele whẹ dụ nsọ. Ọle ndu ọdo bẹ l'a-sọlaru iwhe Onye-Nwe-Ọha sụru t'a sọlaaru.

⁷ Unubẹ ndu Lívayi bẹ l'a-nọ-whe eze ono mgburumgburu. Unu l'a-pakọtaru ngwọgu unu l'ẹhu l'ẹhu. Iwhe bụ onye kpuru ishi l'ụlo ono bẹ l'ee-gbu egbu. Unu swikwaru eze eswiru l'uje l'ụlwa.”

⁸ Ndu Lívayi mẹe ndu Juda l'owhu mekota iwhe lile, Jehoyada, bụ onye l'agbajẹ ẹja nụ Chileke sụru tẹ whẹ mee. Onyenọnu je achịta ndu nkiya, mbụ ndu ooche nche lẹ mbọku-ọtuta-ume rwuberu mẹe ndu l'afụta lẹ nche lẹ mbọku ono, nkele Jehoyada, bụ onye l'agbajẹ ẹja nụ Chileke ta adụdu ọgbo ọwhu ọ hawarụ tẹ whẹ lashia.

⁹ Jehoyada, bụ onye l'agbajẹ ẹja nụ Chileke ono bya achịta arwa mẹe iwhe l'eegudeje egbobuta onwonye, nke eze iya mẹe nke nshịi ono, shi bụru nke Dévidi, mbụ ono, e doberu l'ụlo Chileke keshiaru ndu ishi ndu ojọgu ụkporo ugbo ise ono.

¹⁰ O woru ndu Juda l'owhu kpọo giriri, whẹ parụ ngwọgu whẹ l'ẹhu l'ẹhu kfụru chịmu gbawhee eze mgburumgburu lẹ mgboro ẹnya-mgbẹja; whẹ shi l'ụzo ọhuda ụlo ono kpọo giriri jeye l'ụzo isheli ụlo ono.

¹¹ Jehoyada yẹle ụnwu iya bya edufuta nwatibe eze ono, bụ Jowashi, kpube iya okpu-eze, ba eworu ẹkwo, e deru iwu Chileke dẹe ya l'ẹka sụ l'ọo ya bụ eze. Jehoyada yẹle ụnwu iya wụa ya mmanụ l'ishi t'ọ bụru eze, bya asụ iya: “Ndzụ ghu ndzụ ogologo eze!”

Anwụhu Atalaya

¹² Nteke Atalaya nụru wọwowo ono, ndu Juda l'atụ l'ẹka whẹ l'agba ọsukwo, aja eze ajaja, ọ tụgbua jekfushia whẹ l'ụlo Onye-Nwe-Ọha ono.

¹³ Ọ bya elee ẹnya whụ eze g'ọ kfụru lẹ mgboro itso iya l'ọnulo ono, bya awhụkwawho ndu ishi ndu ojọgu mẹe ndu l'egbu opyi-ọku gẹ whẹ kfụkube-geeru iya, bya awhụ gẹ ndu alị ono l'owhu l'etekaa ẹswa, egbu opyi-ọku; ndu egvu chịru ngwa-egvu whẹ azụ egvu ajaja. Atalaya lajashịa uwe iya chishia sụ: “Njọ anwụa-o! Njọ anwụa-o!”

¹⁴ Tọ dụ iya bụ, Jehoyada, bụ onye l'agbajẹ ẹja nụ Chileke bya ekpofuta ndu ishi ndu ojọgu ono sụ whẹ: “Unu kpụfuta nwanyị ono l'echilabọ ndu nche ono. Iwhe bụ onye tso iya nụ bẹ l'ee-gbu lẹ mma.” Nkele onye l'agbajẹ ẹja nụ Chileke ono bẹ sụru t'e be egbukwa iya l'ụlo Onye-Nwe-Ọha.

¹⁵ Ọo ya bụ, whẹ zụa ya gwamụ gude, kpụru iya jerwua Ọnuzo Ịnya, dụ l'ibe eze, whẹ gburu iya tụa l'ẹka ono.

Jehoyada l'edozhi alị ndu Juda

¹⁶ Jehoyada bya emee, yẹbedua yẹle ndu Juda l'owhu mẹe eze l'onwiya gbaa ndzụ sụ lẹ whẹ l'a-bụru ndu nke Onye-Nwe-Ọha.

¹⁷ Ndu Juda l'owhu bya awụba l'ụlo agwa Bálu je enwutsushia ya. Whẹ tụko ẹnya-mgbẹja Bálu mẹe ntẹkpe, dụ iya nụ gwee aryaka eryune. Whẹ gbua Mátanu, bụ onye l'agbarụ Bálu ẹja l'iwhu ẹnya-mgbẹja ono.

¹⁸ Jehoyada bya eye ndu nche, whẹ chelahaa ụlo Onye-Nwe-Ọha nche. Whẹ nọdu l'ẹka ndu l'agbajẹ ẹja nụ Chileke, bụ ẹpa Lívayi mẹe l'ẹka ndu Lívayi ono, Dévidi yeru ozhi ụlo Onye-Nwe-Ọha l'ẹka, mbụ ndu ono, o doberu tẹ whẹ kpọkotaje ngwo-ẹja ọku nụ Onye-Nwe-Ọha, ẹgube ono, e deru iya l'ẹkwo-iwu Mósisu. Mbụ tẹ whẹ gude ẹhu-ụtso azụ egvu ẹgube ono, Dévidi tụru iya doberu whẹ.

¹⁹ O woru ndu nche ono yekota l'ọnulo, dụkota l'ụlo Onye-Nwe-Ọha, nke ọwhu bụ l'ọ tọ dụdu onye nwe mmerwu l'ẹhu bya l'a-bahụ iya.

²⁰ Ọ chịta ndu ishi ndu ojọgu ụkporo ugbo ise, mẹe ndu a marụ ẹwha whẹ, mẹe ndu ọ-chị-ọha alị Juda, mẹe ndu alị ono l'owhu, yeru onwiya, whẹ je edufuta eze Jowashi l'ụlo Onye-Nwe-Ọha ono. Whẹ dzọru kwagakwaga shia ụzo ọnuzo imeli dubata iya l'ụlo eze, bya emee ya, ọ nọdu l'oshi-eze ono.

²¹ O noo ya, ẹhu tsọmahu ndu alị ono l'owhu. Mkpụkpu ono bya adaa gbẹe g'e gbugeeru Atalaya lẹ mma.