2 Iwhe e meru l'oge ndu eze 22 - BAYỊBURU Ẹzaa

Nteke Ahazaya bụ eze ndu Juda

¹ Ndu bu lẹ Jerúsalẹmu bya emee Ahazaya, bụ nwa nwoke Jehóramu nke nwata eze l'ọzori nna iya. Nkele ndu ọlwua-ọlaa ndu Arabu bẹ wụbataru l'ọdu-ọgu, tụko ụnwu Jehóramu ono ndu ọwhu bụ ọgurenya gbushikota. Ọo ya bụ, Ahazaya, bụ nwa nwoke Jehóramu bya abụru eze ndu Juda.

² Ahazaya bẹ gbarụ ụkporo awha l'awha labọ nteke ọ watarụ ọbu eze. Iwhe ọ chịru bụ awha lanụ lẹ Jerúsalẹmu. Ẹwha ne iya bụ Atalaya, bụ nwanwa Omiri.

³ Ọ wọtakwaruwho ẹka ndibe Éhabu, o noo nkele ne iya bẹ kpọ-zhiru iya ụzo ome ejo-ememe.

⁴ O meru ejo-iwhe l'ẹnya Onye-Nwe-Ọha, ẹgube ono, ndibe Éhabu meru, nkele gẹ nna iya nwụhu-geeru bẹ ndibe Éhabu kpọ-zhilaharu iya ụzo, shi nno lọru iya ẹka ye l'ọla l'iyi.

⁵ O tsoru ụzo, whẹ kpọ-zhiru iya, je etsoru Jóramu nwa Éhabu, bụ eze ndu Ízurẹlu, whẹ jekfu Hazẹlu, bụ eze ndu Arámu ọgu lẹ mkpụkpu Ramótu, dụ l'alị Giledu. Ndu Arámu merwua Jóramu ẹhu.

⁶ O kwee latashia Jezerẹlu tẹ ya nọdu nyaa ẹhu ono, ndu Arámu merwuru iya lẹ mkpụkpu Rama nteke ono, whẹ jeru ọlwushi Hazẹlu, bụ eze ndu Arámu ọgu. Ahazaya nwa Jehóramu, bụ eze ndu Juda jeshia tẹ ya jịa Jóramu nwa Éhabu lẹ mkpụkpu Jezerẹlu l'ẹhu ono, e merwuru iya.

Jehu gburu Ahazaya

⁷ Ọ bụhawaa iwhe Chileke gbarụ agbagba dobe lẹ Ahazaya bẹ l'a-bụru kpukpuru-swoo l'ejeje ono, o jeru ibe Jóramu. Nteke Ahazaya rwuru ẹka ono bẹ yẹle Jehóramu je etsokfuru Jehu nwa Nimishi, mbụ onye ono, Onye-Nwe-Ọha tụru ẹka họta t'o mee ndibe Éhabu tẹ whẹ tọhu.

⁸ Ọ bụru gẹ Jehu l'agwa ndibe Éhabu ọchi b'o jepyaberu ndu ishi ndu Juda mẹe ụnwu nwune Ahazaya, bụ ndu l'ejeru Ahazaya ozhi; ọ tụko whẹ gbushikota.

⁹ Ọ wata ọochokashi Ahazaya; e je gude iya l'ẹka o domiru onwiya lẹ Samériya, kpụru iya kpụ-kfu Jehu, e gbua ya. E liru iya eli, o noo nkele whẹ sụru l'ọ bụ nwanwa Jehóshafatu ono, gude obu iya l'owhu chọo Onye-Nwe-Ọha. Ọo ya bụ, to nwehe onye ọdo, shi l'ibe Ahazaya, l'a-dụ ike chịa alị-eze ono.

Atalaya yẹle Jowashi

¹⁰ O noo ya, Atalaya, bụ ne Ahazaya whụlewho lẹ nwa iya anwụhu; o gbalihu tụko ndibe ndu eze, shi l'ọzo-ụlo Juda lakọta l'iyi gẹ whẹ ha.

¹¹ Ọle Jehosheba, bụ ada eze Jóramu bẹ dutaru Jowashi nwa Ahazaya wohaa l'echilabọ ụnwu eze ono, l'eeme t'e gbushia. O duta Jowashi yẹle onye l'ehe iya nụ je edobe lẹ mkpu azẹe. O noo gẹ Jehosheba, bụ ada eze Jóramu, bya abụru nyee Jehoyada, bụ onye l'agbajẹ ẹja nụ Chileke shi wohaa Jowashi l'ẹka Atalaya nọ, nke ọwhu bụ l'o to gbudu iya. Nkele Jehosheba bẹ bụ nwune Ahazaya nke nwanyị.

¹² Jowashi b'e domiru l'ụlo Chileke whẹ l'iya nọo awha ishii l'ẹka ono, Atalaya bụ eze-nwanyị l'achị ndu alị ono.